PACANG/NUCANG TTHA SIDAN PHUNPHUN
 
1)      ADAM: NUPI THULUNG
Adam cun Pathian thu hnakin a nupi thu a lungsawn. Pacang pakhat pa cun porh aw zetin hitin a simdah, "ka pacangpi pawlin mitthangtu nahzi (alarm clock) an nei, kei cun kan nu'I kiu ka nei" a ti. Cuvekin nahzi ttul loin nupi thekthawi ttha zingtin te thawh cut tikah mi tthang thei tu neih cu a ttha zet nan Adam vekin Pathian thu hnakin mai nupi thulun ruangah leitlun milai hmuahhmuah sual, Satan thang sungah tlaklut pi a rak um thei. Pathian thu hnakin nupi thulun ruangah insang, vengpi, khawsung, kawhhran le pawlkom tiang buainak thlen can a um thei. Adam vek pacangttha laimi lakah an um ve pei maw?
 
2)      ABRAHAM: PATHIAN THULUNG
Abraham cun Pathian thu a lun ruangah a pupa ram cu a suahsan ih a theihdah lo nak ramah a feh. A pupa ro le ram le sunglekhat suahsan in a theihdah lonak ramah feh ding cu ziangtluk a har in a ttih ding? Cui hlei ah Pathian in a neihisun fapa Isaac kha thawinak nung ah pe/that dingin a fial tikah afapa cu rai thawinak hrangah pe dingin tlangparah a fehpi. Amai tisan duhzawng, lungawizawng, le a nunnak ih a ruahsan mi, a tesinfa tiang Abraham hmin hlo lo nak ding hrangah a ruahsan mi, a fapa neihsun khalkha Pathian in thawinak hrangah pe dingin a fial tikah tuah dingin a fehsuak. Ziangtluk pacangttha saw asi? Abraham vekin, Pathian thulung in lei tisa ro, nuamnung, milai ruahsannak, le lungawinak tiah ruahsan mi pawl dungtun in Pathian thuhnuai ah a nungtu laimi pacangttha kan nei maw?
 
3)      GEHAZI: THUPHAN THAWN NGAHNAK (II Siangpahrang 5:1…)
Gehazi cun Pathian thu hnakin sumpai ngah nak kha thupi sawnah a ret ih sumpai cu ral bawipa Naaman hnen ihsin a lak tikah phar natnak kha a damsung a tuar phah. Dik lo zetin, Pathian thu lo vekin ngah nak pawl in milai hmailam, Pathian hnen ihsin thlawsuah a kham sawn timi hmuh theih asi. Gehazi ih pacangttha sinak cun rei lo te sumpai le hlawnthil le ri parah lungawinak a thlen nan a rei lo te ah pharnatnak le riahsiatnak asi. Mi tampi cu dik lo zetin Pathian thu kalh in sumpai le thil le ri an ngah ruangah a dam thei lo mi phar nat nei vekin an damsung a hmangtu mi tampi an um thei asi. Laimi rawngbawltu lakah Elisha ih dungthlun Gehazi vek hi kan um pang pei maw?
 
4)      DAVID: ISREAL PAWL RAAL GOLIAT THAT TU
David cun siangpahrang a ttuan hlanah Isreal pawl thinphang le kur rero ko a tuah tu, Goliath cu Pathian thu vekin a do ih a neh tikah leitlun milai san cem tiang pacangttha tiah a hmin ngan, siar, rel ringring asi. Goliath vek ka hmai ah ral thah ding um sehla, David vek pacangtha ka cang ve ding a ti tla kan um pang maw. Zumnak le tisa ah na kiangkap ah a um mi na unau pawl, na miphunpi zan itthat thei lo ko a tuah tu, ttih le khur ko a tuah tu, thlaphang ko a tuah tu, an nitin nun ih Goliath kha na thah sak asile David vek pacangtha na si ve.
 
 
 
5)      ABSALOM: MAH HRINGTU PA DODAL IN  LAL/UPATNAK CUH
Absalom cu kawtka ah amai pa'i siatnak aukio rero in mipi pawl kha ttongkam thlum le nal in a rak bum ih Israel siangpahrang sinak a rak cuh tikah a mai thihnak, thihsia in rei lo te ah a dung a thlun cih. Absalom vek cu a lawman tuk zohman tulai sanah, laimi lakah kan um lo ding kan ti men thei. Kan harsat can ah in bawmtu, kan hrang tthatnak tisa le thlarau lam in cawm tu, thangsiat le relsia in mai hmaikhua a sial rero tu pawl hi Absalom ih rualpi ttha, Absalom ih pacangtha sinak vekin pacangtha sinak hawl rero tu an si. Himi casiar tu lakah cuvek kan um asile hihi theih a tha; Absalom hin a tawn dingmi rak thei cia sehla amah hringtu, a pa thangsiat tahratin a tuah mi, Israel siangpahrang sinak a rak cuh mi kha a tuah lo ding. Cui hlei ah zir bet dingmi pakhat cu midang siatnak, mi relsiatnak, le thangsiatnak pawl hmanrua ah hmang tahrat in lamttang a hawl tu pawl cu a nget cia mi thingrua thawn in a sak rero tu vek an si. Absalom ih zawh mi lamzin vek zawh lo dingin ralring cio uhsi.
 
 
6)      ESTHER: RAM LE MIPHUN HRANG NUNGNGAM
Esther cun a miphunpi pawl luatnak ding hrangah amai nunnak le dinhmun tiang hloh thei mi lamzin zawh in siangpahrang pa hnenah thu a thlenih Israel pawlin zalennak an ngah, thihnak ihsin an luat phah. Esther vekin siangpahrang nupi cu sidingna ka tuah ve ko ding, a titu kan um pang maw? Na kiangkap kha zoh aw la, tisa le thlarau sal ah a tangmi, thihnak lamzin ah kan mipi, le miphun a fehpi rero tu thuanthu santiluang hi kham dingin na dinhmun ih a tlin tawk in sangka a ong aw mi ah kekar in na fehsuak ding maw? Na neihmi, theihmi, ti theimi a hlawkpi tu ding na miphunpi pawl, tisa le thlarau ah na unau, na thisen zawm pawl hnenah na pe siang maw? Cutin na tuah asile Esther vek nucangtha na sive.
 
7)      MIHLO PACANGTTHA
JACOB/ISRAEL in fapa hleihnih a nei; Reuben, Shimon, Levi, Judah, Issachar, Zebulun, Dan, Naphtali, Gad, Asher, Joseph, and Benjamin. Hi pawl lakah santhar Israel kumpi/cozah in a hmuhsuak sal thei nawn lo mi an um. Leitlun hmun killi ihsin Israel hnam hlo kan si, titu an suak cupco.
Cuvek in Laimi pawl khal leitlun hmun killi ah kan tthekdarh theh zo, kan unau, kan cipi, kan thisenpi, kan miphun pi lakah kan pupa ro, ram, thuanthu le nunphung, kan miphun Pathian thei nawn lo in a hloral ta ding an um pang maw? An um asile Falam Khuanu Khuapa pawlin tuisi thawk in Falam khawlipi sungah        "MIHLO KHANLUNG' an phun cia asile leilungpi a dam hrih ahcun kan tesinfa pawlin mihlo an run hawl tikah khuitawk ramah zo pawl an hlo ta timi an run theithei ding. Curuangah, kan pupa ro-ram a suahsan ih dunglet a hawih nawn lo tu pawl, miphun dang ramdang ah a hlo ral rero zo tu pawl hrangah tuisin Mihlo KhanLung phun a cu zo nan ti cio lo maw? Kan tesin fa pawl an rung anhai tuk dah ke!