Leihnuai politics le mipi pehtlaih awk dan

 

Tunai te, Falam peng nulepa pawl casuah mi kan rak siar cio ih mi hrekhat in ruahnak nan rak ngan cio vekin an thusuahmi thawn a pehpar aw mi, ramhnuai mi pawlin mipi hnen ihsin sumpai, milai thazang, bungrua, le nihlawh tiang an laksak theu mi thu thawn peh aw in malte sim bet duh mi tawiten vun sim sehla.

 

Ramhnuai pawl le mipi pehltaih awkdan

 

Kawlram kan zoh asile Shan, Kachin, Karen, tvp. In kum 50 lenglo ihsin kawlram Rgn kumpi an rak do thawk. Cuvek in leitlun hmunzakip ah kumpi dinglai do tu, dothlennak tuah tu, ramhnuai politics cangvaihnak hmuh ding a um. Thimnakah, India ram, Srilinga, Middle East ram pawl ah kumpi dinglai do in politics cangvaihnak hmuh ding a um. Leitlun ah miphun hnam te nau pawl, miphun tam deuh le cakdeuh pawl kuthnuai ah nekcep tuar ruangah kumpi dinglai do rero tu miphun ziang maw zat an um mi hi UN khalin anmah pawl au aw suah ve thei dingin hmun fate tla a pek hai (http://www. unpo.org/ ). Hivek ramhnuai politics cangvaihnak hrekkhat pawl lak ihsin tihnung zetmi le fimkhur tul mi pawl zoh tlang hnih uhsi.

 

 

National Political movement: Sri Lanka ramih Tamil miphun pawlin an ram cu  'Tamil Eelam' (an thu hla zoh duh hrangah: http://www.eelam. com) ti ah an ko ih anmah te zalennak sual in Sri Lanka kumpi an do. Palestinian  (http://www.palestin ehistory. com) pawl khalin Israel kumpi do in an cangvai ih a tu ah anmah te uk awknak tla an nei sang vivo zo. Cun Kurdistan-Turkey (http://www.globalse curity.org/ military/ world/war/ kurdistan- turkey.htm) pawl cun political party an nei ih Kurdistan Workers' Party (Partiya Karkere Kurdistan—PKK  @ http://www.pkk. org/)  hmin in kum 1984 ihsin hriamhrei kai in Turkey kumpi an dodal. HI pawl kan zoh tikah an political party ih cangvaihnak pawl hi miphun (nation) pakhat hmin in an cangvai ih ram le mipi an nei. An ram le mipi in an bawm ih an ram le mipi ai awh in an ram mipi pawlin anmai duhthlannak in an miphun thuanthu cu anmai duhdan vekin tuah tha thei ding tumtahnak thawn an neih sumsaw an thazang an nunnak tiang an pek.

   

Kawlram sung khalah Kachin (,http://www. kachinpost. com/bio.html) ,  Shan (http://www. shanland. org/), Karen (http://www.karen. org/knu/knu. htm) pawl khal kawl kumpi an do nak kum a rei pi zo vekin mi zapi theih asi. Chin mi pawl khal 1988 ih kawlram pumpi tlawngta pawl democracy ngah nak ding hrangih cangvaihnak ihsi thawkin miphun hminsal in ram le miphun thuanthu tuah tha dingin a bur le langhngan zetin ramhnuai ah cangvaihnak a thawk. A hlanah mi ziangmawzat a rak thawk rero an um zonan thuanthu ah a langsar ah tuituim ah sim duhmi cu 1988 ihsin a thawk mi cangvaihnak asi.

 

Ram le miphun hmin salin leihnuai politics cangvaihnak neih tikah a tihnung zetmi pawl lakah hi pawl hi a tihnung luar cuang; 1) Miphun pakhat sungah miphun hnam fatete kawm khawm aw mi (tribal groups) pawl thenthek awk tikah, 2) Leihnuai political cangvaihnak cu mipi duhdan thawn a bial aw aw ih hriamhrei thawn mipi hro le nekcep nak a suak tikah; 3) le hivek in hnatuan tu pawlin leihnuai politics cangvaihnak cu an pumcawmnak vekah a cang tikah mipi duhdan le ruahnak mi vek si loin a letling in mipi duhnak le lungawinak siatsuah tu lala ah an cang theu.

 

North East India kan zoh asile Naga le Kukis kan unau pawl thuanthu ihsin zir ding tha zet a um. Naga hi miphun pakhat (Nation) vekin India ih zalennak a phuan hlanah Dr. Phizo in nikhat tuan in a rak phuang. Asinan India kumpi cun Naga ram cu India kuthnuai ah ret tahrat in zalennak a pek duh lo tikah Naga pawl cun India Independence ngah ni ih sin atu nitiang India kumpi do in leihnuai politcs cangvaihnak hrangah hriamhrei kai in hna an tuan. Culailakah anmah lakah phun hnam tete parah hngat aw aw in anmai sung politics ah thenthek awknak a suak tikah nasa ten anmah le anmah an that aw aw ih thisen an suah aw aw. Tangkul hnam le Sheimai (Muivah le Isac hoha mi) le kawngiak (Kap Lang) hoha pawl then thek awk ruangah an ralkap ziangmawzat an thih hlei ah an mipi ziangmawzat in an tuar phah.

 

Cun a hlannih Naga pawl le Kuki pawl buainak khal hi tihnung zetmi asi. Manipur state sung ah Tangkul –Naga le Kuki pawl hin ramthen tawm aw aw in an um tikah mi tampi thisen suah awknak a rak suak. Naga le Kuki pawl cu miphun khat tiah anmah le anmah khal an ti aw lo nan ramthen tawm aw aw, state pakhat sungah an um cilh tikah zo in ziangvek tiang thuneihnak a nei ding, zo in zo miphun le ram parah ziangvek tiang thuneihnak a nei ding timi thu ah an buai ruangah mipi ziangmawzat thisen a suak.

 

Cun North East India ah buainak dang arak um mi, Kukis le Paite pawl thah awknak kha hminsin tlak zet pakhat asi ve. Kukis le Paite cun miphun pakhat kan si tiah an pawm veve. Asinan zoin ziangvek tiang thuneihnak a nei ding timi parah thu buai a um tikah meithal thawn nasa ten kah awknak thisen suah awknak a suak.

 

Kawlram sungah Karen pawl hi kum ziangmawzat kawl kumpi an do hnu ah anmah lakah biaknak lam, Khristian le Buddhist tiah an then awk tikah anmah sungah nasaten kah awknak a suak zik te ih mi ziangmawzat cu anmah le anmah kut ihsin an thi.

 

 1988 ihsin a thawk mi Chin pawl lakah 1992 ah thenthek awknak, namen lo buainak a rak suak tikah thisen suak aw lo ten an rak thenthek aw ta. A bik takin Falam misa pawlin CNF an rak suahsan ta. Asinan a hnu lamah CNF (Hakha tonghmang pawl) cun CNF president hlun Pu No Than Kap cu a umnak inn (Aizawl, Mizoram) sung rori ah meithal thawn voithum tiang an kap. Cucu Chin mi thuanthu ah leithnuai politics ah hminsin tlak zet thisen suah awknak a rak si. Cun Falam tlawngta pawl in CNF an suahsan hnu ah CNF cun Tidim peng misa an that ruangah Tidim misa leihnuai politics tuah tu pawlin CNF member asimi an that ve. Asinan mi tampi that aw man loin  CNF in Tidim/Tawnzang peng ah sum an khawng nawn lo ih milai khal CNF ralkap tuan dingin an kai nawn lo tikah rem awknak a suak sal. A tufang ahcun Zomi ti aw pawlin ZRA ralkap hriamhrei kai an neih tikah anmah te humhim awknak an nei ih phunhnam bik pakhat pakhatkhat hriamhrei kai pakhatkhat in hnaihnawk ngam lo ding in mah le mah humhim awknak an nei.

 

Leihnuiah politics hriamhrei kai cangvaihnak lakah tihnung zet buainak a suak theunak san hrekhat cu;

1)      Leihnuai political party nu phunhnam bik (a tribal group) pakhatkhat thuhnuai ih um, phunhnam bik misa duhnak vekin cangvaimi, asi tikah;

2)      Cuvek phunhnam bik (a tribe or two) dinmi political party pakhatkhat cun phunhnam fate dang pawl parah thuneih le rorel a tum tikah;

3)      Cuvek political party cun phunhnam fatete dang pawl hnenah hriamhraim thawn hringhro tahratin milai tanzang (leihnuai ralkap tuanding ah siseh thinlphur le hnatuantu ding ah siseh) a lak tikah, sumpai le bungrua pawl thahrum hmangin a lak tikah, buainak, thisen suah awknak tiang a suak theu.

 

Curuangah Chin mi zovek political party le cangvainak khalin ralrin tul mi, tuah lo hrimhrim dingmi cu:

 

1)      Mipi thawn a fehtlang lomi political party in ziangtik hmanah ram le miphun a tungding dah lo;

2)      Thathrum (hriamhrei) hmangin Mipi hnen ihsin sumpai, bungrua lak lo ding; a lak tu an um asile misual, dan buar (criminal) an si

3)      Mi zovek khal amai mimal duhthlannak tel loin politics cangvaihnak hrangah hnatuan fial lo ding, a fial tu an um asile misual, leitlun khawmual dan (international law) buar tu asi.

 (Asinan ziangvek political lole social organization khalin anmai member sung ihsin sumpai, thazang, le bungrua khal an membership policy vek in a la in a khawng theu fawn).

 

Dothlennak cu hriamhrei le sumpai cahnak si loin mipi thanzang thawn neh asi theu.

 

Ziangvek political party khal mipi in thuneihnak an pek hlan lo, mipi parah thuneihnak an nei lo. Ziangvek political party khalin mimal zovek khal an politics cangvaihnak ah tel dingin fial theinak thuneihnak an nei lo, cuvek tuah tu an um asile misual (criminal) ansi. Zovek political party khalin an sian lo cingin mipi hnen ihsin neihsumsaw le bungrua laksak theinak an nei lo, cuvek laksak tu cu misual (criminal) an si.

 

Curuangah kan ram tungding thei dingin kan milesa pawl cangvaihnak hi kan miphun nunphung le dan le dun, kan biaknak sakhua danhram pawl, le leitlun khawmual nunphung dan le dun (international moral norms and laws) vek thawn a mil aw mi si ter dingin mi pitling zovek khalin tuanvo, mawphurhnak an nei theh. Sumdawng, biaknak lam hnatuan Pastors, lothlo, le tlawngta, tvp zovek ti um loin kan ram thuanthu tilian bangin a fen rero tu thuanthu lamzin sial le tuahtha dingin tuanvo an nei theh asi. Tuihlan a liamcia mi ah thil a cang zo mi ihsin zir in a tufang thuanthu ah ziangvek cangvaihnak in mipi duhmi le ruahsanmi a rahsuak thei ding ti hawl tlangin mipi au aw cu ngai thla in zo cio khal thuanthu in an hmaika ah a thlenmi tuanvo cu an tuan cio asi ahcun ram a thangso dingih mipi an lung a awi ding asi.