Ziangruangah zumtu pawl nitin nunah lungawinak kan nei lo, hnagam daihnak kan nei lo, thlawsuah malsawm kan nunah a lang thei lo, thlarau rah kan rah thei lo, kan thangso thei lo, ti asile thu dang lakah pakhat cu ‘Thlarau Thianghlim” kan ti riahsiat theu ruangah asi. Ziangpawl in Thlarau Thianghlim cu a ti riahsiat theu zoh hnik uhsi:

 

1)    “Keimah a lal” :

Zumtu pawl sunglam nunah Pathian Thlarau in a cencilh tikah Pathian in kan nun pumhlum uk, kaihruai, thunun, zirh, nunsim, fim zirh dingah a thupi bik hmun luah ding a asi. Cutin siloin “Keimah” timi sawn kha zumtu nunah alal tikah Thlarau Thianghlim cu ti riahsiat asi ih zumtu nunah Pathian kutcak a lang thei lo. Cutin zumtu ti aw si in milai thinlung duhnak in zumtu pakhat cu a uk tikah Pathian Thlarau in  hmun a nei nawn lo.

Zumtu na si ahcun: Na sunglam nun lo uktu, khua a luah tambik tu kha zo asi?

 

2)    Sual thup:

Zumtu zokhal “sualnak ka nei lo” kan ti asile thuphan kan per ih “Pathian cu thuphan kan puh” asi. Sikhal sehla, kan sualnak cu kan sir aw aw ih Pathian hmaiah sualthupha cawi in ngaidam kan dil, sual sunzawm nawn lo dingin kan tiam aw, ngaidam zo mi nun kan nunpi tikah Pathian thawn pehtlaih nak cu tuahthat sal asi ringring. Cutin siloin, Khrih thisen in ka sualnak a tleng fai zo, ti tahratin in milai tisa duhzawng in sualnak a tuah sunzawm tu nunnak ah Pathian Thlarau a lang aw thei lo. Cutin Pathian Thlarau cu ti riahsiat asi theu. Zumtu zokhal, Pathian thawn an pehzawm awknak a fel lo, a thianghlim lo, sual zepmi a nunpi, sir awk hrih lo mi sual thup a nunpi, tuah sunzawm mi sual a neih poh sung cu mi lungawi a si thei lo.  

 

3)    Ngaidam lonak:

Helram ah a tla dingmi milai cu vanram co dingin ngaidam zo kan si vekin midang sualnak, mawhnak cu ngaidam tengteng a tul. AN sual tuk asi khal le ngaidam thotho a tul. Zesu in Judas kha kumthum sung a mitsen hman in zoh loin a umpi. Ngaidam lotu cu “hrem in um sheh” tiah camsiat mi asi. Hrem nak cun a sunglam nun cu cancer nathrik vekin a ei dingih ikfik, iksik, kha fialfial, mithmai sia, duhkim dah loin a nung ding. Pawnlangah hmaihnih thawn a cei awk rero khal asile ngaidam nak nun nei lo tu cu a sunglam a thlarau “hrem” asi ruangah sal tang ringring asi.  Cutin, mi ngaidam lomi neitu pawl mi lungawi an um thei lo.  Mi pakhat cu a inn hnen pai fapa thawn an hua aw aw, an rem aw lo asi ahcun a pa thawn nuam le lungawi zetin an um tlang thei lo ding. Kan ngaidam tul mi pawl cu kan duhzawng a tuah lo tu, lole kan huat zawng le duh lo zawng, thinnatnak a tuah tu ngaidam a tul. Kan ngaidam taktak maw ti theih awk thei nak cu hitin asi; an siatnak thu sim/theih maw kan duh an thatnak, an hrang thiltha tuah thei mi kan neih mi ah sup aw lo le lungawiten kan tuah maw, siatnak tuah thei dinhmun kan din laiah kan sup aw maw, cu hmuahhmuah hnakin Khrih ah unau vekin duhdawt ih an hrang thiltha tuah le duhdawtnak leiba lawng nei ding kan si. Pathian fa kan sinak langter tu pakaht cu kan parah siatnak a tuahtu kan ngaidam, kan duhdawtnak ih an hrangah thiltha kan tuah thei mi pohpoh ah thiltha kan tuahnak hi asi.

 

 

4)    Thinhengnak:

“Na thinhengnak ni tlakpi hlah” ti asi vekin, thinheng hnirtheu, ikfik iksik nak in milai thinlung a luahkhat tikah Pathian Thlarau riahsiatnak a suahter. Nu/pa to aw thinheng in zanah ihkhun kil khat le kilkhat ah an it tikah an lakah satan a it ziarziar theu asi ti an thei lo. “Nan lakah satan kethlaknak um ter hlah uh” timi cu khat le khat kar lakah hmuhtiam awk lonak le huat awknak, thinhengnak a um tikah satan a ke a thlak ih zumtu pakhat in a thinlung sungah satan hmun a pek tikah Pathian Thlarau cu ti riahsiat in a um asi. Pathian Thlarau a riah siatter asi tikah zumtu lungawinak a hlo ih Pathian kutcak zumtu nunah alang thei nawn  lo. Pathian in aduhdawt ih a fapa thisen in a leizo mi milai pakhatkhat na hua, a parah siatnak na tuah, asi ahcun na hmailam cu tih a nung asi. Lungawinak hnakin nunsimnak in a lo hmuak cia asi. Cuvek thoth in mai dinhmunah lungawi tawk thei lo, thinheng, hngir teu ringring tu cu Pathian in a hrangah “tha” ati mi hnakin thasawn thei vekin a um tinak asi ih Pathian hnakin fim deuh ah a ruat aw tinak asi. Pathian hnakin fim deuh ah a ruat awk tikah Pathian Thlarau in nun a simmi khal a theithei loih a hrang thiltha le lungawinak khal a hmu fiang thei lo sawn asi.

 

 

 

5)    Tisa hiarnak:  

Zumtu pakhat thinlung sung ruahnak suangtuahnak cu tisa caknak, hiarnak, duh amnak, midang thil dawtnak, milai duhnak in a luahkhat tikah Pathian Thlarau cu ti riahsiat asi theu.  “Na ruangpum cu Pathian Thlarau biak inn asi”  ti asi vekin na sunglam ah tisa thinlung khawruah, a thianghlim lomi suangtuahnak, thinlungput, le duhnak pawlin a luahkhat tikah Pathian in a fih tuk mi thil pawl thawn Thlarau Thianghlim cu hmunkhat ah na ret vek khi asi ih Thlarau Thianghlim cu ti riahsiat asi theu.  Aizawl, Mizoram lock-up kan tan lai ka mang theu. Room fatak te sungah milai 20-30 in umter ih a room sung kawm te ah ek le zun thawhnak pung an ret. Zumtu pakhat thinlung cu a bawrhhlawh mi suangtuahnak, tisa duhnak caknak, duh amnak, mihuatnak, iksiknak, hurkhuannak tvp in a luahkhat tikah lockup room fatak te sungah milai 20-30 le zun-ek pung ret khawm vek khi asi. Thlarau Thianghlim cu a tentuk mi thawn kan umter rero vek khi asi. Thlarau Thianghlim ti riahsiat asi tikah zumtu nunah Pathian kutcak a lang thei nawn lo  ih Pathian nunsimnak cu a thleng sawn theu.  “Mi zokhal leitlun a duhdawt ahcuh pai duhdawtnak cu a sungah a um lo” tinak asi. Mi zokhalin leitlun tisa duhnak in a sunglam nun a luahkhat ahcun Thlarau Thianghlim in a sunglamah hmun a nei lo tinak asi.

 

 

6)    Tongkam bawrhlawh:

“Milai cu a lenglam thil hnakin a sunglam ihsin a suakmi in a tibawrhhlawh” ti asi vekin na kaa sung ihsin a suak mi tongkam cu a bawrhhlawh tikah Thlarau Thianghlim cu ti riahsiat asi.  Tongkam cu a thianghlim maw thianghlim lo ti ziangtin kan theithei ding? A theitu pawl hlawknak, hmasawnnak, thlarau lam thansohnak, lungawinak thianghlim suahtertu asi maw, a theitu pawl nun ah riahsiatnak, thinhengnak, hurkhuannak, iksiknak, huat awknak, thleidan awknak, tvp, suahter tu asi maw? Cucun tongkam cu ziangvek asi ti a fianter. Zumtu tongkam fimkhur lo pawl nun ihsin Pathian Thlarau huham cahnak a luangsuak thei lo. Ziangah tile tikhur pakhat ihsin tikha le tithlum a suak tlang thei lo. Na tongkam na fimkhur ih na hnasungah a lutmi kha na fimkhur lo asile na theih loin Thlarau Thianghlim riah na siatter rero tla arak si thei. Thlarau Thianghlim riahsiater asi tikah na kaa sung ihsin a suakmi tongkam pawl cu thlilak voihthawh vek fang an si, hmual an nei nawn lo. Cutikah na lungawinak khal a hlo vivo ding.

 

 

7)    Satan palai tuan:

Zumtu pakhat cu leitlun ah Khrih in palai asi. Voi tampi cu zumtu pakhat in a nitin nunah, a tongkam le tuahnak in satan palai a tuan tikah Thlarau Thianghlim ti riahsiat asi. Ziangtin satan palai zumtu in a tuan thei? Mi zokhalin kan kiangkap um pawl parah ciahneh (influence) nak kan nei cio. Cui kan ciahneh nak cun a rah mi cu Pathian duhzawng maw asi, satan duhzawng? Satan duhzawng asile satan palai tuan thawn a bang aw aw. Thuthimnakah, na kiangkap ah a ummi milai pakhat khat na zoh tikah a tongkam, tuahnak, nun na zoh tikah tisa caknak suaktertu, sualnak lamzin ah a lo hruaitu, midang a lo hua tertu, huatnak thlaici a lotuhtu, zetnak le daithlainak, Pathian thei lo pawl nun vekin a lo nungtertu asile khakha satan palai an si. Na kiangkap milai pawl hrangah satan palai tuan hlah aw la, zumtu ti aw si satan palai tuan rero tu pawl lak ihsin fimkhur aw. Cuticun na sungah alo cencilh tu Thlarau Thianghlim thunun, uknak, kaihruainak, le fim zirhnak hnuaiah na thinlung kha kilkim in ukbet aw.

 

Zumtu unau, na nitin nun ah Pathian Thlarau ti riahse tu si loin a thu hnuai ah a nungtu, khua a ruattu, Khrih ih palai si cio uhsi. Cutikah, Khrih ah thlarau in thangso in rahtha tampi rah sinsin ding kan si.

 

Pathian in malza lo sawm cio hram sheh!