Ka Duhdawt Ahcun

 

Ka duhdawtmi ih duhmi ka ruat, a duh mi ka duh ih a huat mi ka hua,

Nuam a tizwng ka ruat ih nuam ka ti, a phur zawng ka phur ih tuah ding ka zuam,

Ka duhdawtmi siatsuattu kham ka tum, a dodal tu ka hmuh tikah ka do,

Ka ruahnak sungah hmunkau pi khua a luah ih ziangtik lai khalah ka theih hngilh dah lo,

Ka duhdawt ahcun ka sunglamah hmunkaupi a tha bik le sunglawibik hmun ka pek,

Keimai duhnak hnakin a duhmi tuah famkim ding thupi sawnah ka ret!

 

Duhdawtnak cu ngahnak hnakin peknak le  tuarnak a tel ringring,

Ka duhdawt tikah thiltha ka duhsak, ka theih mi ka sim ih thiltha tuahsak ka zuam,

Ka duhdawtnak cu hmuhsuam nautat asi tikah poi ka ti zet ih tha a nau ter zet theu,

Ka duhdawtnak cu a lingletin huatnak in thungrulh asi tikah, a naa zet na’in tuar nuam ka ti,

Ka duhdawt mi in dung intun tikah ka milai mizia porh awknak neh thei dingin in bawm sawn asi,

Ka duhdawtnak cu ngaidamnak tehfung thawn cuai thlai asi theu.

 

 Ka duhdawt mi cu ka hua thei lo; Pathian duhdawtnak maksakzia!

 

Ka duhdawt mi cu ka hua thei lo, siat tawn le nunnak cem tiang thlen ding khalin,

Ka duhdawt ahcun ka hua thei lo, ka huat ahcun ka duhdawt nak a dik lo tinak asi,

Ka duhdawt ti cingin ka hua ahcun ka duhdawtnak cu mai hrang cangai khorh asi,

Ka duhdawt ahcun ka hua thei lo, ka lungawinak siatsuahtu ah a cang hmanah,

Ka duhdawt ahcun ka hua thei lo, ka hua asile ka duhdawt ka timi ka thei lo asi,

 Ka hua asi ahcun thimlakah ka vak rero ih ka fehnak lamzin ka thei lo asi.

 

Ka miphun ka duhdawt ahcun, ka miphunpi milesa zohman ka hua thei lo,

I-hua tu an um ding, ka lungawinak siatsuahtu an um ding, ka hua thei cuang lo,

Ka neihmi taksa, sumsaw, tongkam, le tikcu can khal ka duhdawtmi siatnakah ka hmang thei lo,

Ka thangsiat thei lo, ka zuar thlai thei lo, an siatnak tuah thei ka si lo,

Ka miphun ka duhdawt ahcun an zaten ka duhdawt hai asi, rualran ten ka duhdawt,

I-duhdawttu pawl lawng ka duh ahcun milem bia pawl thawn danglamnak ka nei lo asi.

 

Ka Pathian ka duhdawt ahcun ka Pathian ih duhdawt mi A fale pawl ka duh,

Ka Pathian ka duhdawt ahcun A fa le huatnak thangsiatnak lakah ka tel thei lo,

Ka Pathian ka duhdawt ih A fale lakah remnak daihnak suahter ka duh ih ka zuam,

A Fapa thisen in a lei zomi, Amai taksa peng ka hua thei lo, ka thenthek thei lo,

Tisa cun a tuar lo, naa ti can a tam, si khal sehla ka hua thei lo, ka thangsiat thei lo,

Ka lungawinak le nunnak khal hi an hrangah a cem ahcun ka lungawi sawn ding!

 

Ka duhdawtmi cu Khrih ah rundam an si ding ka duhsak ih thu ka sim, thla ka camsak!

 

Keimah milai duhdawtnak in ka miphun hrang ka tumtahnak cu a cemzo,

Keimah milai thinlung in miphun, kawhhran le pawlkom hrang duhdawtnak cu a cemzo,

Keimah milai ruahnak lungthin thawn keimah i-ttantu lawng duhbiknak cu a cem zo,

Ziangkim ka nun, ka thinlung, ka lungput, ka duhnak pawl cu Pa Pathian duhnak ah ka hngat zo,

A duh mi ka duh ih nuam a timi nuam ka ti, ka sungin A duhdawtnak a luangsuak,

Ziang ka ngah ding, zo in in thangsiat in in upat ding ti ruahsannak a cem zo,

Khrih ah ka nunnak  sungin Pa Pathian ih duhdawtnak luangsuak ding lawng ka ruahsan!

 

Keimah milai tisa duhnak cun keimai lamtang, i-porh tu ding, i-tantu ding a hawl theu,

Keimah milai thinlung cun keimah i-sunlawih tu ding a hawl theu,

Keimah milai cun thleidan nei in lamtang pawlkom sungtel a hawl theu,

Keimah milai thinlung cun i-ttantu pawl ka porh ih keimah hnakih mifel pawl ka hua theu,

Keimah milai ah porh tlak a um lo, duh tlak a um lo, i-hua uhla, i-thangsiat hram uh,

Cutin keimah ah porh ding nei nawn lo dingin in bawm hram uh! Bawipa lawng sunlawih siseh!

 

Keimah cu ziamral sinsin sehla Lalpa lawng sunlawih si hramseh,

Keimah milai ttanpitu cu hloral sinsin in Bawipa ttantu pawl thawn lawng nun ka duh,

Keimah milai duhdawtnak cun lamtang a nei ih huatmi a nei ringring,

Keimah milai duhdawtnak cun thenthek awknak a suak ter ih huatnak a tipung,

Keimah milai thinlung cun midang nam tla in mahte porh awknak a hawl theu,

Porh tlak lo keimah cu i-hnawnpi uh la Lalpa lawng sunlawih uhsi!

 

Ka duhdawtnak hi ziangtin ka simsuak ding, ka langter ding?

Peng thawnghra ke thawn feh cu a nep tuk, peng thawnghra motor thawn feh cu a nep tuk,

Zan it lo le khawsik tuar cu a nep tuk, cang-el le thinghnah ring in hram lak vah cu a nep tuk,

Khawsik le zandai ah a suk a so ih vahtawih cu a nep tuk, thlahra dan ihsin cangan cu a nep tuk,

Aw, kross parah khenbet tlak ka si lo cu ava poi em, khross ah khenbet si dingin ziang ka tuah ding?

Thangsiat relsiatnak cu a nep tuk, nautat zawkzetnak cu a nep tuk, aw atthlak duhdawtnak!

Aw, duhdawtnak halral maicam parah ka ruangpi hi urkaang siseh la ka va duh so!

 

I thangsiat bawm uh hi ka lei tisa hi, Pathian sunlawinak ruksak tum theu tu hi!

 

Mangbangza Pa Pathian ih duhdawtnak in ka sungmuril ah hmun a luah ih a cangvai hnu ahcun keimah milai thinlung duhdawtnak cu ti mualpho in a um zo!

 

Aw, athlak duhdawtnak in ka lungsung a luahkhat zo! Pa Pathian ih duhdawtnak maksakzia in ka nun a luahkhat zo! Mai hmakhua sual ka tisa duhnak cu khenbet ih a um zo! 

 

Pai duhdawtnak maksak Khrih sungah a phuangsuak aw zo, Thlarau in ka sungah a nung zo!

Pa Pathian duhdawtnak sungah lungawinak famkim le zalennak tlamtling cen uhsi!