SAN THUANTHU TUAH THA DINGIN PATHIAN A CANGVAI
CAWIMAWI TLAK PIPU SAN LAI THUANTHU: Ni thla siar kum zabi a liam zo maw Laimi khrihfa sinak, pipu ro Lai nunphung pacangtha sinak, dingfelnak le ralthatnak, farah zawnzai le nu-hmei, mi-vai, siattawng tawi-awmnak, zatlang lungkhat ten senpi miphun thuanthu rolung humhim in raal donak, upa le cawimawi tlak upatnak le hruaitu thu hnuai ah tuhlut awknak, Pathian nung thei lo cingin cawimawitlak Lai nunphung santhar kutah an thlenpi. Tingtang an tum lo, zunphir an nei lo, khuangdar, li-le-thal thawn, pupa ro-ram, nunphung, rinsan tlak miphun sinak an rak humhim, lei doraal le thlarau siava lakah bear-am thawn thuanthu tha lo santilian an rak do, ruahsur le niling kheng, thlatang dai le can khirhkhan lakah duhdawt ding duhdawt in lainatnak in santhuanthu an humhim, cawimawi tlak lai pacang lungput, tairialnak le zawnruahnak in khat hai maw. LAI THUANTHU THAWNG INN SUNGAH: Lai khua sungah hruaitu hotu an um nawn lo, thuanthu cu santilian in thimlakah a fen cuahco, mino thatha an hlo theh, farah nakin sumzing bangin laikhua a zel, atnak in lai thinlung cu thawng inn sungah a hren tarh, sualnak in thim khawzing bangin a nuai cuahco, miphun thuanthu thawng inn thim sungah hren tarh in a um! Zing ar khuan a cu, thangpawk in santhar meifar van a cu tuk zo! CAAN REI LO TE HHNIKSAK NAK: Santhar mino pawl, lunglen caan rei lo te, riahsiat caan rei lo te, rilrawn caan rei lo te, hmuhsuamnak tuar caan rei lo te, bawmtu tlaksam caan rei lo te, duhthusam raalkhatah din caan rei lo te, thin-le-ham kai loin um caan rei lo te, mawhsiat mi si caan rei lo te, dik lo zetin relsiat mi si caan rei lo te, theihthiam lo mi santiluang rei lo te, Pathian kan hnen a um lo maw si tiah ai-hram caan rei lote, a um hrih ding. Cu hmuahhmuah cu sungmuril, kan milai sinak hniksaknak fang an si. Cu hmuahhmuah cu kan miphun Pathian ih cahnak le duhdawtnak langter tu ding an si. Kan raal, in siatsuah tumtu a tum poh le ziangtluk kan Pathian a cak ti kan hmu sinsin ding. Santilian a cak sinsin asile Pathian kutcak a lang sinsin ding. Kan duhthusam kan hloh tam poh le a tha sawn mi Pathian tumtah kan hmu sinsin ding. Ziang hmuahhmuah in kan Pathian cu milai santhuanthu lenglamah a um zia a langter lai ding. KA TAHNAK:Zan dairial ah itthat thei lo caan a tam, ka thlarau cu khua zakip fangin a tawi, pitar, putar, nauhak puanhlum nei lo rawl khawp kham lo mithmai sia mithlamah an cam, tihnak le thlaphannak in a khat mi nulepa vengsung milesa mithmai sia in umtu pawl, fim zirnak nei lo mino thatha ramsung ramlengah an cantha a liam cuahco mi, atnak le sualnak in milai thinlung a eisiat, huatnak thlaici in hruaitu pawl a buan tluk. Santhar mino pawl lungsung sualnak thimzingin a nuai zawk rero. Miphun thuanthu cu kan Pathian dodaltu kutah thawng inn sungah siatsuah rero in a um. Tipi-thuanthum raal ihsin miphun thuanthu santilian in a fen duahdo mi cu ka cuan! “Aw, kan Pathian, hi pawl hi, zan ih caan sungtal, ka mitthlam ihsin ilak sak hram aw, zandai hahdam zetin i-itthat ter aw” ti ah zandai ah banphar in hrum rero caan a tam! NA ZUMNAK THLAH HLAH: Na kiangah mi tampi an tlu ding, an ril an bah in sualsalah an tang ding. Huatnak, iksiknak, ngaidam thei lonak, vuihramnak, thangsiat awknak. Tisa nuamnung cennak, sual citintian sal sungah mi thawng an tang ding. Khrihfa ti aw cingin an nitin nun cu Pathian um lo vek asi ding. An kaa sung ihsin a suak mi cu Pathian fate le miphun unau camsiatnak asi ding, Cu pawl hmuahhmuah na hmuh tikah na mang bang hlah, na thin thir hlah sheh! Miphun raal cu na thei, miphun thuanthu thawng sungah thlentu na thei. Huatnak, sualnak, tisa nuamnung cennak, thlei dan awknak, iksiknak. Nunphung nei lo, ziaza tha lo nunnak pawlin nung hrimhrim hlah. Nangmah le nangmah na siatsuah awk asile na miphun siatsuahtu na si. Na kiangkap mi pakhatkhat na dodal asile miphun dodal tu na si, Na unau zuar thlaitu va si hrimhrim hlah, huatnak le siatnak in sakmi innpi cu thawng innpi asi! Na zumnak kai hnget aw: na kaa ihsin a suak mi na tongkam, na mit in na hmuh mi mithmuh theih thil, thil le ri pawl, na khawruahnak sungah khua a luahtu suangtuahnak, na taksa in nitin a dai mi, ziangtinkim nangmah thawn a pehtlai mi, na hnenah a lut a suak mi sum le pai, Pathian cohlan tlak mi siseh! Cu hmuahhmuah ah thianghlim in Pathian thu sungah nung aw. A lo siatsuahtu ti ah na ruah theu mi, farah zawnzaihnak, nautat hnmuhsuamnak, hnawn mi sinak, thuphan puhmi sinak, tlaksamnak, relsiatmi sinak, cah lonak, bawmtu nei lo, tvp, kha a lo siatsuah tu an si lo, a lo ti cak tu sawn an si. Na ruahnak in nangmah lo that hlah seh! Na theihnak, ruahnak, le neihmi, pehtlaihmi parah hngat nawn loin, mithmuh theih lo Pathian cahnak sawn ah ding sinsin aw! Siatnakle thatlonak luansuaknak hmanrua ah cang hrimhrim hlah, na dinhmun ruangah na Pathian maw mi pakhatkhat vuihram hrimhrim hlah, na sungah Pathian Thlarau a um ahcun leitlun danglam ter thei tu huham cahnak asi, santhuanthu danglamter dingin mangbangza caknak pek na si zo, na miphun thuanthu danglam ter dingin nangmah na danglam hmaisa a tul! KAN RAAL HNAKIN KAN PATHIAN A CAK SAWN: Kan miphun Pathian cu kan miphun raal hnakin a cak sawn! Miphun thuanthu siatsuahtu cun thansohnak sangka a khar, vengsung kaihhruai awknak a siatsuah, hruaitu pawl a hrem, nunphung hlo dingin lamzin phunphun in a lemsiah, a hro, a khirhkhuah, santhar mino pawl zuu le sualnak lamzin sangkapi a onsak, fimnak tlasam dingin le atnak le sualnak thang sungah lutter theh a tum. Sihmansehla; Ram inhnen ah santhar mino thawng tel catial fim zirin an nung, America ramkulh ah zatel mino thatha phunsang ca zir in an thanglian, mino leitlun khawmual tinah santhar leitlun minung pawl thawn an zuam aw aw, harsatnak cun tuarfainak a neihter, nautatnak cun tairialnak a neihter, farah nak cun Pathian tihzahnak fimnak a neihter, hremnak cun sangka dang a onsak, leitlun khawmual tinah zohman ih kharsak theih lo sangka pi kan miphun Pathian in in onsak. Fimnak kan tlasam kan tilai ah leitlun fimnak ih a ban lomi Pathian thuruk fimnak inpek. Lennak kan tlasam kan ti lai ah tlasam cingin hngelhnget nun in zirh. Sualnak tilian in infen lai ah sual sirnak in kan lungsung sersiamtu hmaiah tang indor ter. Huatnak ral thlaici sia in milai thinlung a siatsuah lai ah senpi hmaiah ti mualpho asi. Vuaktek mi kan si kan ti laiah leitlun khawmual tinah canpualtha sangka pi onsak kan si. Kan cak lo kan ti lai ah Pathian huham cahnak cu kan sungah a famkim. Relsiat kan si laiah Khrih thisen in thiamco ter zo mi kan si, Hnawn mi kan si kan ti laiah Pathian tangsungah pom kan si. Sangka in kharsak laiah leitlun khawmual tinah kan thleng. Pehtlaih nak kharsak kan si laiah leitlun khawmual tinah sihcih awknak tha sinsin in pek. Siatsuahtu in in hnihsan rero laiah a theih lomi van malsawm kan miphun parah vur kan si. Hremmi pawl cu leitlun zalen ram fahniang pawl thawn kan tlangleng! Aw, cui lungawinak thuruk cu Laimi zapi ten nunpi cio uhsi! Kan miphun raal hnakin kan miphun Pathian a cak sawn asi ti leitlun pum, san minung hmuaihmuah in theih haiseh! Hihi thei ringring aw, na nun lamhruaitu siseh! Na miphun raal hnakin na miphun Pathian a cak sawn. Na miphun raal ih salah tang nawn hlah! Na tuahsual pang mi hnakin na tuah that lai ding mi a thupi sawn. Na cah lonak in Pathian tumtah a kham thei lo. A lo siatsuahtu hnakin na sungah thatnak a tuah duhtu a cak sawn. Na sualnak hnakin Pathian ngaidamnak a cak sawn. Riahsiatnak in na lungsung hmun luah hrimhrim hlah seh! Na phur a rit asile Pathian in rit phur thei dingin a lo rinsan tinak asi, cahnak a lo pe ding. Na raal a tum asile raal tumpi neh theinak huham na sungah a um tinak asi. Thawng inn sungah kan miphun thuanthu tuahtha dingin Pathian cu kan hnenah a um, a cangvai rero asi. Santhar ni eng mawi cu hmailam hrangah a suak rero zo! |