VII. Thinlung hmunkhat te ah a fimkhawi thei tu cu mi hngetkhoh asi.

Na kiangkap na zoh asile thinlung ruahnak hmunkhat te ah a finkhawi thei lo tu pawl cu an vavai rero na hmu dingih thinlung ruahnak hmunkhatte ah a ret ringring thei tu cu mi hngetkhoh an si na hmu ding. Ziangvek harsatnak le kiangkap hnaihnawk nak lak khalah a duhmi tuahsuak dingin a tuan rero dingih a tumtahmi a pitlin lai hlan lo zianghman in a dal thei lo ding. Ziangvek thlisia hrang lak khalah thinlung daiten a feh cutco na hmu ding. Ziangvek dinhmun lai khalah thinlung daiten a ret thei tu cu micak asi. Micak si thei dingin na thinlung ruahnak kha na fimkhawi ih na tumtahmi parah hnial rual loin na ret thei a tul. Na thinlung daiten na ret thei lo ahcun na thinlung khal hmunkhat te ah na ret thei lo ding, na sunglam huham cahnak khal na hmang thei lo ding. Curuangah na duhmi parah na thinlung le thazang zate na hman awk theinak dingah na thinlung ruahnak daiten na ret thei a tul.

Na thinlung daiten na ret thei hnu ahcun tihnak, thlaphannak  pawl kha na thinlung sungah hmun na luah ter nawn lo ding. Na duhmi le na tumtah mi tuahsuak nak ding lamzin a lo dal tu pawl kha na thinlung sungah hmun na pe nawn lo ding. Cutikah na duhmi tuahsuak thei dingin “Pathian in amai hmuihmel keng in isersiam vekin ka tuah thei, ka tuah, ka ti thei” timi na thinlung ah zum awknak na nei ding. Cucu Pathian dodal in nangmah minungah hngat awknak si loin Pathian in na milai sinak parah a lo pek mi fimnak thiamnak le huham cahnak hmangin na thinlung sungah duhnak a lo pek mi pawl cu tuahsuak thei na si ti zumnak asi. Cutin na ruat tikah nangmah le nangmah kha duhnak sal sungah na tang lo ding khal kha na fimkhur a tul. Na thinlung le thazang zate pe in na duhmi na tuah tik khalah na mimal zalennak tiang hmang thiam nawn loin na duhnak ih sal sungah na tang asile nangmah le nangmah na hloh aw lala a si ding. Na duhnak, na ruahnak, le na tisa pawl kha nangmai thuhnuai ah um theh ding asi. Pakhatkhat kha na lutlunah na ret pang asile na cem asi.

Thinlung le thazang zaten hman awk ti tikah na duhmi tumtahmi lawng kha na thinlung sungah hmun luah ter aw tinak asi. Na thinlung sungah midang siatnak thu na ruat asile na ruahnak kha hlawn hlo aw la thatnak lawnglawng ruat aw. Mi in na parah thiltha tuah hai sehla timi thu na ruat hnakin midang hrangah ziang thiltha ka tuah thei ding timi kha ruat sawn aw. Dunglam riahsiatnak thu in na thinlung a lo luahkhkat asile na ruatnak kha thleng aw la hmailamah a thleng dingmi lungawinak in na thinlung kha luahkhat ter aw. Na cah lonak, tawntaihnak pawlin na thinlung a lo luahkhat asile na sunglamah mangbangza cahnak le fimnak thiltitheinak a um asi timi kha ruat sawn aw.

Leilung tlun mifim hminthang pawl thuanthu na siar asile mi pakhat cio in anmah le anmah an sunglam nun ihsin an zir suak awk mi pawl na hmu ding. An sunglam minung sinak sungah fimnak, theihnak, cahnak huham a ummi an hmu thiam ih an sunglam ihsin a cakzet mi milai duhnak pawl kha anmai hrang le an kiangkap minung hrangah a thabik mi tuah suak dingin an thinlung ruahnak le huham cahnak pawl kha an hman awk thiam ruangah an sunglam sinak cun phurnak a pek hai ih an duhmi tuah suak thei dingin zianghman tihnak nei loin an feh ngamnak asi. Leitlun mi hminthang le mi maksak pawl sunglamah a ummi milai sinak pawl cu na sunglam ah a um ve asi ti na ruat dah maw? Na zum lo men ding. Na sunglamah khan leitlun mi hminthang pawl milai sinak sunglamah a ummi milai thinlung ruahnak huham cakzet cu a um ve asi. Nan danglamnak a um hmanah annnih cun an sunglam ih milai thinlung duhnak le huham pawl kha an duhmi tumtahmi tuahsuak thei dingin an hmang aw thiam ih nangcun cuvek na nei ti hman na ruat dah lo tla a rak si men thei. Cuti asile, to ciamciam aw la, mi zohman hnaihnawk lo nak hmunah thu thaten ruat sal aw. Na sunglamah a lo sersiam tu Pathian in ziangvek fimnak le huham cahnak a lo pek asi ti na hmuh fiang asile mangbangza in na phurnak pawl a cangvai dingih na thinlung sungah a ummi duhnak na neihmi pawl tuah suak thei dingin ralthatnak le tuah ngamnak thazang na ngah ding. Tihnak hi theih lonak ihsin a suak mi asi. Voi tampi cu tihnak cu cahlonak ihsin a suak mi ah an ruat theu, asilo, theihlonak ihsin a suak mi asi. Na sinak na theih fiang asi ahcun na hrangah zianghman tih ding a um lo. Na tih khal asile na hmakhua na ti danglam thei cuang lo. Cui bakah na tih asi le na siding dinhmun tleng thei loin nangmah le nangmah na ti cau aw ih dung na sip men asi. Mi tampi cu tihnak an neih mi ruangah an tuar lo ding pi an tuar phah ih an si ding zat an si lo phah. Cuvek lakah na tel pang asile thaten to ciamciam aw la ziangruangah minung na cangih ziangtin na nung ti kha ruat tha sal aw.

“Na si duhmi vekin ruat aw la, sim aw la, tuah aw,” cuticun na duhmi vek na si ding. Tongdang in kan sim asile, Pathian in ka sinak dingah iruat sak mi asi tiah na ruah mi le duhmi vekin nung aw. Na taksa le na thinlung hmuahhmuah cu na kutsungah na ret thei a tul. Na neih lo mi thil pawl ah buai aw hlah. Na neih mi pawl kha nehzetin na duhnak tuahsuak nakah hman thiam tum sawn aw. Mi tampi cu an neihmi kha zianghmanah an siar lo ih an neih mi lo thu ruatah an thinlung cu a bang lak men theu. Na thinlung duhmi tumtah mi na neih rualrualin tuisun ni ah na tuah mi na neih mi kha a tha bik na tuah ih na hman awk thiam ding kha a thu pi. Na tuah mi pawl kha na thinlung fimzet in na ruat suak mi pawl si hai sheh. Na ke karkhat na kar mi cu na thinlungin na ruat hnu ah na kar mi siseh. Na kut kha thli in a lo hran ruangah voihnih khat cu na hawi men ding nan ziangtik lai khalah na thinlung fimzetin thu na ruat hnu ah na tuah lomi zianghman na taksa peng in tuah hrimhrim hlah sheh. Na thinlung sangkha kha thaten khar ringring aw. Tuu retnak in cu zanah thaten na khar lo le cinghnia le tlavangin zanah an lo deh sak thei vekin na thinlung sangka kha thaten na khar ringring lo asile na ruahban lo mi ruahnak tha pawl pawlin na sunglam mawinak cahnak huham pawl kha a lo siatsuah theh pang ding. Cutin na thinlung na kilkhawi thiam asile ziangvek dinhmun le tikcu khalah thinlung daiten na ret thei dingih ziangvek dodalnak le khawm tu khal na pah thlang thluh thei ding asi. Cuticun micak na si ding.