V. Ziangtin milai duhnak cu thil pakhkatkhat tuah dingin kan zirh thei ding

 

Laimi lakah voi tampi milai duhnak hi relsiat a hlawh theu na hmu ding: Cu pa, cu nu cu thu a duhtuk, sinak a duh tuk, upat a duh tuk, a duh aw tuk, tivek an rel mi na thei theu men ding. Duhnak a nei lo tu pawl cu khuitawk hman an thleng dah lo ding. Sunglam ah ret daih men theih loin thu theih/neih duhnak, upat duhnak, len duhnak, fel si duhnak hi pawl hi thiltha an si. Thaten kap suak lomi carek, a tikcu lo ah a puak pangmi cerek cu tih a nunvekin kaihruai lomi le kaihhrem lo mi duhnak cun thiltha lo a suak ter theu ih kiangkapah a ummi mi pakhatkhat lole mibur polkom hrang tiang siatnak a thlen ter theu. Asinan milai sunglam ihsin a suak mi duhnak hi hman thiam asi ahcun pitlinnak lamzin hramthawknak a rak si sawn. Curuangah mi pakhatkhat in thil pakhatkhat a duhtuk in a lang asi ahcun a sunglamah a nungih a cangvai rero mi a um asi ti theihtheinak asi. Cui duhnak cun milai pakhat cu a duhduh nakah a mawng thei vekin cui duhnak cu mai duhnak lamzinah hman thiam asi ahcun pitlinak lamzin ah cakzetin feh theinak thazang mi pe tu asi fawn. Duhnak nei lomi cu a naa asilole a cawr asi ding. Curuangah na thinlung ihsin duhzetmi na nei asile cucu thiltha asi.

 

Cui na sunglamah a ummi mailai-duhnak na neih mi cu midang thawn nan danglamnak khal asi. Cui duhnak na neih mi in midang fehnak hnakin a danglam deuh mi lamzin ah danglam deuh in a lo feh ter dingih a danglam deuh mi hlawhtlinnak khal ah a lo thlen ding asi. Thil tumpi ngah ding na duh asi ahcun thil tumpi duhnak na neih a tul. Tuisunah na kiangkapah mi menmen vekin na hmuh rero mi kha thaisunah mi hminthang zet ah tla a cang thei. Tuisunah dinhmun le sinak bang aw nan si dingih thaisun ahcun nan dinhmun le sinak a bang aw nawn lo thei. Cucu nan sunglam veve ah a ummi nan milai-duhnak kha a bang awk lonak ihsin a thawk mi asi. Cuitlunah nan thinlung sung ihsin na duh mi cu a bang hmanah nan sunglam thinlung fimnak, cahnak huham le nan thazang pawl nan hman thiam dan a bang aw lo thei. Nan pahnih lakah mai milai sinak a hmang thiam tu, mai duhnak kaihrem ih  duhmi a tampi lakah a thupi bik kha hril in cumi tuahsuak thei dingin thinlung le thazang a zaten a zuam tu cun thaisun ahcun danglamnak a nei dingih zianghman thilung duhnak kaihrem thiam lo, thinlung duhnak dangdangah tlan rero tu cun thaisunah a dinhmun cu tuisun a dinhmun hnakin a niam sawn lo hmanah rei pi a daih lo ding asi ti theihsak mei aw.

 

A pakhatnakah, pitlin lam na pan ding asi ahcun tuisunih na dinhmun ah khan na lungawi tawk in na di a riam tawk lo ding. Tuisun ih na dinhmun hnakin sangdeuh tha deuh thlen duhnak na sunglamah a um a tul. Cun, na thinlung sungah na duhmi cu tuah suak thei dingin nangmai sungah fimnak cahnak a um asi ti khal na zum ngam a tul fawn. Duhnak lawng na nei ih nangmai sunglamah na duhmi tuahsuak thei dingin cahnak fimnak a um asi ti na theih lo ahcun midang na rinsan a tul dingih midang hnen ihsin na duhnak tuah suak dingin bawmnak na hmuh lo tikah na beidawngin na kiangkap um mi pawl na mawhtluk zawk rero ding. Na duhmi tuahsuaknak ding hrangah na kiangkap ummi na minung pi pawl parah ziangtik hmanah hngat aw dah hrimhrim hlah.

 

 

Tulai sanah kan tuah rero mi hi tuihlan kum ziangmawzat ahcun thilcang thei lo tla an rak bang men thei. Milai duhnak thinlung hi ziangtin thil pakhatkhat tuah dingin kan zirh thei ding timi hi thupi zetmi asi.

 

Zovek milai khalin tuah duhnak thinlung cu an nei theh. Voikhat cu a kang durdo mi insungah pitar nu te pakhat lawng a rak um. Cule pitar nu te cun a robawm thingkuang kha miesa ah a kangral ding a sianglo tuk ruangah lengah a khai suakih a tlan. Meisa a dai hnu ahcun pitar nu te cun a thingkuang cu a khai thei nawn lo lawng hman si loin pacang cak zetzet pathum an zawm awk lawngah an khai thei mi asi. Cucu milai duhnak a tamtuk a cak tuk tikah ziangtlukin thil a ti thei timi  alang ter. Mi hlawhtling taktak pawl hi thilfate khal thungai thlak in a tuah zum tu an si theu. Thil fate ah taima zetin zuamnak le hlawhtlinnak cun thil tumpi hlawhtlinnak a suahpi theu.

 

Milai duhnak cu thinklung zate le thazang thawn tuah asi tikah pitlinnak cu hmuh asi theu. Milai “duhnak” hi a cak ngaingai, milai thinlung le thazang khal a duhduh ah a hmang thei theh. Milai thinlung sungah duhnak, caknak, hiarnak pawl a phunphun a suak ringring theu. Cupawl lakah a hrekkhat cu thatnak lamah mi a hruai lo, tlaksiatnak lam ah mi a hruai theu. Curuangah na thinlung sung ihsin a suak theu mi caknak, duhnak, hiarhalnak, pawl kha na hrangah thiltha a si maw si lo tiah na thlei dan thiam a tul ih thiltha lo pawl cu na thinlung huham cahnak thawn na tanta thei a tul. Cutik lawngah na sung ihsin a suak mi thiltha duhnak na neihmi pawl kha pitling zetin a thanglian dingih tuahsuak asi ding. Na nunah famkim lonak, tlaksiatnak na ton dah mi a um ding. Cu pawl cu zohsal in pitling na duhnak le thiltha tuah na duhnak kha hmangin tlaksiatnak ah a lo hruai tu le na pitlinnak lamzin a lo daltu thinlung duhnak, hiarnak, le caknak pawl kha na doneh thei atul. Cutik lawnglawngah na sung ihsin mizia tha kha a thanglian vivo dingih a langih na nunah nuncan ziaza mawi a rah suak ding.

 

 

Thuthimnakah, na thinlungin thu na then thei lohli lo theu ruangah thil na tuah dingmi kha tuah ding tikcu ah tuah loin na tlai theu. Curuangah na thinlung a tlai theu mi kha na thei aw asile hmailamah na ralrin a tul. Ziangruangah tile leitlun tlan zuam awknak ah na taw a tlai asile na canvo tha kha na loh phah thei mi a um. Na thinlung in thil pakhatkhat tuah thawk dingin thu na then thei lo ih na tlai ringring asile nangmah le nangmah na zoh awksal a tul. Zo midang hnen ihsin bawmnak hngak in um hrimhrim hlah. Nangmah na thinlung ruahnak fimnak le huham cahnak kha hmangin ziang na tuah ding, na hrangah cantha a on awk lai ah na hman awk thiam ringring a tul. Midang pawl khi nangmah hnakin Pathian in fim cuang le tha cuangin a sersiam ti ah ruat dah hrimhrim hlah. Na tuah duhmi pawl tuahsuak theinak ding hrangah tikcu le cantha a ummi pawl kha zoh aw la, na neihmi thazang, fimnak huham pawl kha na duh mi tuahsuak thei dingin na hman awk thiam a tul.

 

Thiltha cu awl-ai-ten ngah lohli theih asi lo theu. Cuti sisehla mi zokhalin an tuah theh dingih a man tla a tum theh sawn ding. Curuangah thiltha na tuah tum tikah tairial nak neih a tul. Thiltha na tuah pitling hlanah na duhnak kalh zawngin thil tampi a thleng ding a um tiah ralring cia aw. Har na tuar tam sinsin asile na cak sinsin dingih thiltha na ngah mi kha man nei sinsin in na thei ding. Na duhdan kalh in thil tampi a thleng tikah nangmah le nangmah na thei aw sinsin ding. A lo sersiam tu in na sunglamah ziangvek fimnak le cahnak a lo pek timi na hmu sinsin sing. Cutikah na fimkhur tulmi pahnih a um: na duhmi pitlin theinak ding hrangah thiltha na tuah ding mile na duhnak pitlin theinak dingah a lo dal tu pawl tuah lo ding. Milai sunglam huham cahnak hi phunhnih in hman theih asi. Thiltha tuahnak ah le thilthalo tuah lo dingin mahlemah kaihhrem awknak hrangah hman theih asi. Nangmah in  na duh asi ahcun na duhmi na tuah thei rualrual in thiltha lo a lo siatsuattu ding pawl khal tuah lo in um thei dingin na sunglamah huham cahnak na nei asi.

 

Na tumtah mi ah na dinngam khal a tul. Tumtahmi na nei ih pakhatkhat na tuah tikah nangmah dunglet na hawi asile mi zohman in an lo tlun ngam dah lo ding. Na thinheng lai le na lungawi tuk laiah ziang thu hman then dah hlah. Na thinso laiah thu pakhatkhat na bawtthet asile na ti sual pang ding. Na thinlung fimten na siathatheihnak thawn ciamciam ten thu na ruat hnu lawngah thu then theu aw. Thingheng lai le lungawi tuk laiah thu pakhatkhat na then asile na fimnak kha na hmang loih na phurnak thinlungkha na hmang mi asi. Cutikah na phurnak a reh tikah na sir aw sal thei. Milai duhnak huham hi hman thiam asile milai sunglamah a ummi hmanrua fimnak le cahnak pawl khal tumtahmi tuahsuak thei dingin hman tangkai an si theu. Mai milai duhnak huham hi hman thiam loin theihnak kau ding lawngin a zuam rero tu pawl khi na zoh asile an theihmi cu a tam nan zianghman anmai duhnak in an feh thei loih an kiangkap milai pawl thuthennak vekin an nung.  Curuangah leitlun fimnak le thiamnak na hawl rualrual in nangmai sunglamah a ummi na thinlung duhnak ih huham kha na hman thiam asile na duhmi tuah pitlin theinak ding hrangah na sunglam ih fimnak theihnak thiamnak le huham cahnak pawl kha a zaten zawntlang ten hmang thei dingih nangmah hrang lawngah pitlinnak lawng siloin na kiangkap ummi mi tampi hrangah tlun tlakmi na si thei ding.