V. Thinlgun hmunkhatten khawruahnak in leitlun midang thawn peh tlaih awknak

 

Pitlinnak cu na thinlung hman awknak ih rah suak mi asi. Ziangtin pitling thei dingin thinlung kan hmang aw ding ti zoh hnik uhsi. Hlawhtlinnak cu thinlung hman awk thiamnak ih rah asi kan ti vekin milai thinlung cangvaihdan cu kaihhrem  theih asi.  “Thinlung cu mi bum hmang” asi vekin kaihrem lo mi thinlung cu amah le amah a bum aw ding asi. Curuangah cui thinlung huham  cahnak cu kaihrem tahratin pitlinnak lamzinah hman thiam a tul. Tuisun ni ah na sinak kha na thinlung put ken in a lo hruai mi an si. Na sunglam ah thuphan per duh nak khal a um. Thuphan per lo dingin karihhrem theinak huham cahnak khal a um. Thusia lo ruat ter tu hman-rua khal a um rualrual in thusia ruat lo dingin kaihhremnak huham khal  na sungah a um asi. Curuangah na thinlung sungih hmanrua pawl na hmang thiam asile na thinlung sung ihsin a suak dingmi thiltha lo hmuahmuah cu na do neh dingih thiltha le fimnak lawnglawngin an thinlung cu a luah khat ding asi.

 

Na sunglamah a ummi thiltha lo pawl a lo ruat ter theu tu pawl kha na neh thei asile mangbangza cahnak na hmu ding. Riahsiatnak, mi siatnak, huatnak, thinhengnak, hiarnalnak pawl a lo ruatter theu tu kha na neh hnu ahcun mangbangza cahnak le fimnak kha nangmai sungah a um asi ti na hmu suak aw ding. Cui fimnak le cahnak na sungah a lo sersiam tu in a lo retsak mi pawl cu na thinlung sungah thiltha tuah dingin duhnak a lo pek mi pawl tuahsuak thei dingin huham cahnak le fimnak khal a um asi ti na hmu fawn ding. Culawng hman si loin mahlemah zum awk lonak, “Kei cu ka cak lo, ka ti thei lo, ka dam lo, ka cau” ti ah midang hnak ih niam sawnah a lo ret ringring tu kha na do neh dingih na sungah na duhmi tuahsuak thei dingin huham cahnak pek na si zia na hmu suak aw ding.

 

Hramlakah ramsa a phunphun sa ei mi an umih anmai ramsa pi an deh ih an sa an ei theu vekin na thinlung sungah thiltha thu tha ruahnak pawl ei siat tu ruahnak tha lo suatter tu a um asi. Cu pawl cun riahsiatnak, thinhengnak, lunglennak, zetnak, tihnak, iksiknak, huatnak, hiarhalnak, tihhrutnak, hurkhuannak, mahle mah mawhsiat awknak, le thilthalo a phunphun a lo ruat ter theu ih na sunglam ah thiltha a ummi pawl siatsuah tahratin na sunglam huham cahnak cu a lo siatsuah sak asi. Cu pawl cu na sunglamah an do aw ringring. Nangmah in a tha lo mi hmuahhmuah cu na do neh ih thatnak in na sunglam nun cu na luahkhat ter asi ahcun na nitin nunah na ton mi pawl kha nangmai sunglam huham cahnak in na neh thluh dingih na hrangah zianghman tihding phan ding le thinlung ham kai loin um a tul nawn lo ding.

 

Na sunglam ah a tha lo mi, tihnak thinhengnnak pawl kha na do rualrual in nangmai thinlungput kha leitlun milai nuntu thawn a kaih aw mi asi ti na ralrin thiam ringring a tul. Na thinlungput kha leitlun milai nuntu thawn a kalh aw asile nangmah te hramlakah a ummi na si lo vekin a mal maw a tam maw na nintin nunah kalhki tu na nei ringring ding. Hmailam saupi hrang na ruatcia vekin a cang rero lai mi siseh nihnih nikhat hrangah siseh ruat cia in khua na khan cia a tul.

Na thinlungput le na suangtuah nak pawl hi Pathian hnen ihsin na neih mi vekin diknak le dingnak parah a hngat awk asile na cak sinsin ding. Ziangah tile cui diknak  doneh thei tu ziang huham cahnak hman a um lo. Na sungah a ummi thutak ih cahnak cun a lo hnaihnawktu le siatsuahtu hmuahhmuah a neh thluh asi.

 

Na thinlungput le ruahnak cu diknak ah hram na toh thei lo asi ahcun thaten na ruat ciamciam a tul hrih. Diknak ah hram a toh aw lo mi cun kalhkinak a tong dingih ni khatkhat ah siatnak a tong ding. Thuphan ah hngat aw in na thinlungput cu na thum aw asi ahcun nikkhat nini ah na nunnak pumhlum kha a derthawng zet mi asizia na hmu leh ding. Diknak cu ziangtik khalah a ding suak ringring asi. Tikcu can ziangmawzat sungcu diknak cu nambet asi thei men nan kumkhua hrangah a ding suak ringrign asi. Zohman in lo theih pi lo khal sehla na sunglamah a ummi diknak maw dik lonak khan nan nun khua ah lai a lo rel sak ding asi. Diknak sungah na hngat aw in na thinlung na thum aw asi ahcun na ziktluak vivo ding. Asinan dik lonak le thuphan menah na thum aw asile na tawpnak ni na pan rero asi ti na theih a tul fawn.

 

“Duhnak a um ahcun lamzin a um” an rak ti theu vekin na thinlung sungah duhnak na neih asi ahcun lamzin cu a um hrimhrim asi. Na ruahnak sungah beidawnnak le riahsiatnak in khua a luah theh asile nangmah le nangmah cek fel aw salin nan thinlungput kha na tuah thatsal a tul tinak asi. Na thinlung sungah khua a luahtu ruahnak hrekkhat pawl kha na hlon hloh tengteng a tul tinak asi. Culo asile na sunglam huham cahnak fimnak le mawinak pawl kha a lo eisiat sak thluh dingih na duhmi pawl na tuah suak theinak ding hrangah a lo sersiam tu in hmanrua tha a lo pekmi pawl kha a lo siatsuah sak thluh ding asi.

 

Pitlinnak lamzinah a lo hruai suak tu ding ruahnak tha kha na thinlung khua luah tu si hrimhrim dingin nangmah na rin um a tul. Cuticun leitlunah na tlaici cin mi pawl rahtha an rah theinak dingah ni tha a tlang ringring ding asi ti khal na zum ngam a tul fawn. Na thinlung sungah thutha lo a um tikah nangmah in na thinlung ruahnak cu na kaihrem lo tinak asi. Ziangkim na thinlung sungah khua na luahter dingmi pawl cu nangmai sunglam fimnak in na kaihhrem ih siangnak na pek mi lawng an si a tul.

 

Na thinlung sungah thutha lo na ruat tikah na ruahnak cu a cangvai ciamco ih thiltha lo dang suak dingin lamzin a sial ciamco asi. Thinnatnak le tlaksiatnak thu lawnglawngin na thinlung a luahkhat asi ahcun thinnatnak dang le tlaksiatnak dang suak sal dingin na ruahnak cu a timtuah ciamco asi. Asinan an thinlungah thatnak le thutha in hmun a luahkhat asi ahcun na hmailamah thiltha le thutha tuahsuak thei dingin nan sunglam huham cahnak le fimnak pawl cu an timtuah aw asi.

 

Na thinlung sungah tihnak, phannak, thinhengnak pawl in a lo luahkhat asile hitin ruat sawn aw: “Keimah I sersiam tu in ka duhmi tuahsuak thei dingin ka sunglam ah fimnak, cahnak huham le hmanrua pawl I pek asi. Ka sungah duhnak I pek vekin ka duhmi tuahsuak thei dingin le hmanrua I pek mi pawl hmang thiam dingin nitin in huham cahnak thawn ka sungah a cangvai mi a um asi. Ka hlawhtlinnak cu lenglam milai pawl khawkhannak le bawmnak ah a hngat aw lo ih ka sunglamah I sersiam tu in ipek mi hmanrua pawl ka hmanthiamnak parah a thum aw asi.”

 

Na nitin nunah na ton mi le tuah mi pawl lak ihsin a thupi lo deuh mi pawl parah na thinlung suangtuahnak na hmang/khawhral theh lo nak ding na fim khur thiam a tul. Na tuahmi le ton mi lakah ziangpawl kha a thupi bik an si ih ziangvek tluk hman rua, thazang le tikcu hman ding ka si ti kha na ruat thiam a tul. Zianghman nangmah le nangmah rilhlelh awknak um loten na fehnak lamzin kha lamzin ding asi maw ti mi na zoh thiam a tul fawn. Cuticun nunnak, diknak le huham cahnak thawn a thuam aw mi lamzin parah na feh asi ahcun na hma khua cu a eng cia mi lamzin mawi asi ding ti cu zum ngam aw. Cumi dinhmun na thleng hrih lo khal asile cumi na zumnak in na lung a awi ter in na tha a lo ti cak dingih dunglam riahsiatnak le tlaksiatnak, na duhnak kalh zawngin thil a thleng dah mi pawlin na thinlung sungah hmun an luah nawn lo ding. Cutikah na hmel a eng dingin na sunglam nun mawinak kha na kiangkap um pawlin an hmu thei ding asi.

Nintin in na tonmi le na tuah mi parah na thinlungin fiangzetin a lo hmuhter thei lo mi a um ding. Khuatsung ih tidai sungah hnawm a um tikah tidai cu a nawi ter. Insungah music phunphun on celcel lakah zoin ziang asim ti theih a harzet vekin na nitin nunah na ton mi pawl kha ziang an si ti na thei thluh lo ding. Curuangah nikhat hnu nikhat ah na ruahnak na tuahmi le na thinlung sungah khua a luah tu ruahnak pawl kha na zoh fel awk sal cingcingih thiltha lo pawl cu tanta in na duhmi na tumtahmi a pitlin ter tu hrangah lamzin a lo hruai tu pawl kha na thinlungah hmun na pek ih na tuah sunzum vivo thiam a thupi.