IV. Thinlung zate pek awknak cu ziangkim tuah tikah pitlin nak hram thawk asi

 

Milai suangtuah nak hin ziangtluk milai a siatsuah thei in a ti tha thei timi hi thaten ruat hnik uhsi. Voikhat cu damsung thawng tla ding pa hnenah hitim thu an sim: “Milai pakhat hi thisen ziangtluk a suak hnu tiang a nunglai thei, timi kan hliakhlai nakah nangmai taksa kan hmang dingih cule thawng in ihsin na suak ding” an ti. Cule zanah a kezim kha an at pem sak. A kezungzim ihsin zianghman thisen suak mi cu ti tlak asi lo. Zamthim lakah cun an ret ih a ke cu an hren tar sak. Cutikah cupa cun zanvar a ke ihsin thisen a suak dingah a ruatih a kezim ihsin a thisen zianghman a suak lo nan a thaizing ahcun a rak thi zo. Cucu a tihnak ruangah asi. Cuvekin tihnak neih mi hin milai a siatsuah ih milai sunglam huham cahnak, mawinak pawl a siahsuah theh thei asi. Thawngin sungih mithi pa thu na ruat tikah ziangtlukin thinlung ttihnak ruangah milai a siatsuah thei timi na mtithlam in na hmu thei ding.

 

Curuangah na thinlung suangtuah nak ruangah nangmah le nangmah na ti cak aw thei ih na siatsuah aw thei fawn. Nitin ten na taksa naa, na cah lo nak lawng lawng na ruat asi le nangmah le nangmah na siat suah aw asi. Na thinlung sungah na cah lonak, na farahnak, le na dunglamah na duhdan kalh in thil a cangmi pawl lawnglawngin na thinlung a lo luah khat theh ih na hmailam ah a cang ding pawl hmuahhmuah khal cui  suangtuahnak cun ro a lo rel sak asi ahcun na cem asi. Na dunglam thuanthu in na hmalam ah canvo tha na neihmi le na malsawm hmuahhmuah  a lo siatsuahtsak theh asi. Cucu nangmah na thinlung ruahnak sungah hmun na pek hai ih nangmah lala in na hmailam cantha le canvo tha hmuahhmuah cu na siatsuah theh asi.

Thinphannak, tihnak, mah le mah rinsan awk lo nak pawl hin milai lungawinak le sinak ziangtluk a siatsuat thei ti na thei fiang asile milai suangtuahnak hin ziangtluk milai a tuah tha in an siatsuah thei ti na thei ding. Kaihhruai le thunun lo mi milai suangtuahnak cun khui tawk hmanah mi a thlen pi dah lo. Curuang, na duhthusam na pitlin duh asi ahcun, na thinlung sungah hmun a luah theu tu na suangtuahnak pawl kha thaten  na kilkawi ih na kaihhrem le kaihhruai a tul asi.

 

Lamzin parah maw khawlak ah vak suak hnik aw la mi tampi va be vivo hnik aw. An mithmai na zoh tikah minung ziangzat anmai kaihhruai lo mi suangtuahnak ruangah anmah le anmah an siatsuat aw ti na hmu ding. Mi tampi taksa dam lonak nei mi an um. Asinan an taksa nathrik in an taksa a ei siat mi hnakin anmai suangtuahnak sungah tihnak le mahle mah sawisel awknak “ka na asi” tiah ruat aw in an riatsiatnak in anmah cu a siat suah asi.  Mi tampi mi farah an um. Asinan an farah nak hnakin anmah le anmah “Kei cu mi farah ka si, tuah thei mi ka nei lo” tiah an ruat awknak ruangah an thansoh dingzat an thangso loih dunglam an sip sawn theu. Na kiangkap zoh aw la mi tampi na hmu ding. Dinhmun bang aw cio cio, farah cio cio lak ihsin mi hrekkhat cu ca an zir maw sum le pai an hawl maw an hlawh tling zet na hmu ding. Mi hrekkhat cu an dunglam an sip ih riahsiatnak in an thinlung sung a luahkhat ruangah anmai hma khua cu anmah lala in an siatsuah thluh asi. A poi zet.

 

Na sunglamah huham cahnak na neihmi na hman thiam asi ahcun ziangkim na tumtah mi na tuahsuak thei asi ti na theihfiang asi ahcun na neihmi na Pathian in a lo pek mi fimnak thiamnak le thazang cahnak hmangin na sunglam ah duhnak a lo pekmi pawl kha tuah famkim theih asi ti khal na hmu fiang ding. Cutikah na sunglam ah cutluk mankhung mi ruahnak thinlung kha thulolak suangtuahnak luangliam menah na hmang siang lo dingih na duhmi tuahsuak nak dingah na hmangaw sawn ding asi. Suangtuahnak luangliam timi pawl cu na theih duh asile ziangpohpoh tuahsuak thei lo dingmi ruat rero, siatnak le thatlo nak thu pawl ruat rero, dunglamah a liam cia mi thu pawl thinna zetin ruat reronak pawl kha asi.

 

Thudik le thutha in na thinlung a luahkhkat asi ahcun thudik duhtu le mitha pawlin an lo pan ding. Thu tha lo, bum awknak, thuphan pernak, thinhengnak, thinatnak, huatnak, iksiknak, le cah lonak, pawlin na thinlung a luahkhat asile zohman na kiang um an paih lo ding. Na kiang um duh tu pawl hman kha nangmah lo bum duhtu pawl an si sawn ding. Asilole, nangmah vek lala milai pawl an si thei. Rei lo te sung an lo lawm dingih na hnen ihsin duhmi an nei nawn lo asile an lo tlansan sal ding. Asinan na thinlungin thutha le thiltha lawnglawng na ruat asile mitha le mi fel tampi in na mithmai ah a langmi an hmu ding. Cutikah na mithmai ah a langmi ihsin mi tampi na kiangkap ah a ummi pawl parah hmual anei ding. Cutin na kiangkap um pawlin na sunglam nun mawinak an hmuh tikah nang khalin thazang na ngah vivo ding. Na cak sinsin ding. Na en nak le alnak cu na kiangkap um pawl in an hmu vivo ding. Cuvek thiltha ruahnak in mitha tampi thawn na peh zawm aw vivo dingih na duhnak pitlin theinak lamzin a ong aw vivo ding. Thinlungput tha le dik neih cu ziangtluk a thupi ti na thei zo. A lo hmu tu pawlin an lo rinsan theinak dingah na thinlungput mawinak kha na mithmai in a lang ter atul asi. Na thinlung sungah a um lo mi kha na langter tum rero khal asile thli lak ih voih thawh vek fang asi ding. Rei lo te a thu dingih a hlo ral cingcing ding.

 

A cancan cu mi pakhatkhat hna na tuan pi dah lo mi thawn nan  ton awk tikah rinhlehnak na neih can a um thei. Ziangruangah ti na thei lo ding. Milai thinlung sungah a ummi ruahnak suangtuahnak hi mithmai ah a lang asi. Ni a sa ih tlaici kan cin tikah thlai cu a kho ih a thang. Ni eng le thlai karlakah a pehtlai aw mi thil a um asi. Cucu ziangvek asi ti zo hman in an ngai pawimawh mi asi lo. Nangmah le nangmah kha thaten zoh aw sal aw. Mangbangza Pathian sersiam mi na sinak na hmu aw ding. Pathian in a sersiammi sungah mangbangza cahnak fimnak huham a ret mi na hmu ding. Cumi na hmuh tikah na lungawinak cu na kiangkap ah a ummi milai le thilleri parah a hngat aw nawn lo dingih nangmah sungah ziangkim na duh mi tuah suak theinak huham cahnak fimnak na neihmi ruangah na lung a awi ringring dingih a lo sersiam tu thawn nitin na pawl kom awknakah lungawi thu sim ding lawng na nei ding. A lo sersiam tu na mawhtluk nawn lo ding.

Na ka sung ihsin tongfim a suak thei nak dingin na tong hlanah na sunglam na rawn ta a tul. Daiten na sunglam fimnak na rawn ta asile mangbangza in na tongkam ah fimnak asuak vivo ding. Voi tampi cu mi tampi in thu ruat hmaisa loin an tong tikah anmai tong mi lala hman an zum lo theu. Cutikah an tongmi kha an phatsal a tul theu. Cutikah an kaa sung ihsin  ausk mi tongkam pawlin huham a nei nawn lo vivo theu. Na sunglamih fimnak huham cahnak kha na rawn hmaisa ih na tongin an sim asile na tongkam ah huham cahnak a um fawn ding. Cucu na kiangkap um mi in an hmuh an theih tikah nangmah ah zumnak an nei ding. Ka tonghlanah thu ka ruat hmaisa dingih ka sunglam huham cahnak thawn thu ka sim ding. Cutikah ka sunglam thlarau in in simmi pawl ka tong suak thei dingih tongfang ka hman mi pawl khalin ka sim duh mi pawl kha a ngai tu pawl hna sungah fiangzet le hmual nei zetin a theih ter ding asi.