III. Thillung zate peknak in ziangtin na duhmi nan tuahsuak thei ding

Na thinlung zate na pekawk ruangah ziangtin na duh mi pohpoh na ngah thei ding ti cu na mang a bang men thei. Na zum lo men thei. Asinan, ka lo simmi hi thaten ruat aw. Thinlung duhthusam na neihmi pawl kha thaten na zohsal a tul. Thilcang thei lo mi kka mangman vek fangin duhthu na sam men maw, thil a cang thei dingmi, na tuah duh mi kha na thinlung suangtuahnak in duhthu na sam maw?. Na duhthusam kha Pathian duhnak hnuaiah na up awk hnu ah na thinlungih duh mi cu Pathian duh mi le tumtah mi asi ahcun a famkim thei lo ding, a cang thei lo ti zianghman a um lo asi.  Asinan, zianghman tuah tum si loin duhthusam suangtuahnak men kha san nei lo, mah le mah siatsuah awknak men asi Na thluak le na thinlung na seng lak men ih na thinlung a lo ti re thei men asi. Na thinlung thiangten thu na ruat ih na tuah duh taktak mi na thinglung duhthusam cu na thinlung le thazang zaten na hmang aw ih na zuam asi ahcun na duhthusam cu na ngah hrimhrim ding asi. Duhthu na sam tikah na mitthlam in na duhthusam mi pawl kha zuuk vekin na hmuh thei a tul. Thil pakhat na tuah tikah na pitling hrimhrim ding asi tiah zum fawn aw. Laitongin “Zum aw lo ih tilungkhat” an ti vekin mah le mah zum aw lo cingin thil na tuah asile nangmah le nangmah na duhmi ngah thei lo dingin na dal aw rero asi. Ziang na tuah tik khalah cah lonak, tlamtlin lonak, le beidawnnak pawl in na thinlung sungah hmun luah hrimhrim hlah hai she. Suangtuahnak luangliam men ah na thinlung na thazang le na tikcu hmang liam men aw hlah. Ziang na tuah tik khalah na tuah mi lamzin a thawk ihsin a cem tiang fiang zetin na hmu cia thluh thei lo ding nan nangmah cu na tuah duhmi pitlin dingin lamzin dik na feh rero ih cumi pitlin dingin a tul mi hmanrua, thinlung fimnak cahnak le thazang pawl cu nangmai sungah a um hrimhrimm asi ti zumnak thawn feh in tuan aw. Thaisun ah na duhmi na pitlin theinak ding hrangah tuisun ni ah nangmai sunglam thazang na hman thiam awknak parah a hngat aw asi.

Ziang na tuah khal asile leitlun pumpi in na tuah mi kha a dik lo, a tha lo an ti hmanah nangmah in na tuah mi kha a dik a tha asi ti na theifiang ahcun feh vivo aw tuah vivo aw. Pathian lawngin ziang a dik a tha ti hi a thei. Na ruahnak le na duhnak a lo tawm thei lo tu leitlun milai pawl ruahnak le hnaihnawknak ruangah na tuah duh kha ziangtik hmanah dung sip san hrimhrim hlah. Nangmai sunglamah Pathian Thlarau in fimnak cahnak   a lo pekmi kha hmangin a dik a tha asi ti na hmuh fiang mi kha feh pi vivo aw la nangmai sunglam huham cahnak kha na hman thiam asi ahcun na duhthusam cu nikhat hnu ni khat a famkim cutco ding asi. Na tuah mi kha nangmah hmanin na zum lo asile midang cun tha an lo pe ding ti ah ruat hrimhrimm hlah. Na tuah mi kha nangmah hman in na tuah suak thei, tuahsuak thei dingin fimnak cahnak na nei ti na zum aw lo asile midang cun an lo zum dingih thazang an lo pe ding, na dung an lo thlun ding tiah ruat hrimhrim hlah. Na tuah mi cu na kiangkap milai pawlin lo theihpi lo khal hai sehla nangmai sunglam fimnak cahnak in a tha na ti ih na tuah ruangah feh vivo aw la a tawpnakah mi tampi mangbangza na tuahsuak lai ding. Midang pawl cu an fim cuang cak cuang an tha cuang in ruat hrimhrim hlah. Nangmai sungah Pathian hmuihmel keng, milai cahnak huham cu famkim zetin a umih cu pawl cu na hman thiam asi ahcun midangin an duh mi an tuahsuak thei vekin na tuah suak thei ve asi ti zum aw. Ziang na tuah tik khalah “ka tuah a tul, ka tuah thei, ka pitling hrimhrim ding asi, ka duhmi pawl tuah suak thei dingin keimai sungah fimnak cahnak thazang famkim a um asi” tiah zum aw aw.  Cutin na tuah duhmi a lo hnaihnawk tu pawl kha na sunglam huham cahnak thawn doneh thei ringring fawn aw.

Ka sungah a ummi thlarau cun ka thinlung sungah duhnak in pek mi pawl cu tuahsuak thei dingin a tul mi fimnak, thazang, hmanrua pawl in pek asi. Ka duhthusam pawl tuah suak thei lo dingin dodalnak pawl hmuahhmuah cu ka sunglam milai huham cahnak thawn ka do tikah zianghman in doneh thei tu a um lo. Ziangruanmgah tile dodal tu ka nei tam sinsin, harsatnak ka tong tam sinsin asile ka thahri rin sinsin in ka tangih cak sinsin in ka feh. Ka sungah um in icelcilh tu Thlarau THianghlim ih huham cahnak cu a lang tam sinsin asi. Ka ral pawl an cak sinsin asile keimah ziangtluk cahnak ka nei ti ka thei aw sinsin. Ka ral pawlin fimnak phunphhun an hmang asile Pathian in ziangtluk fimnak ka thinlung sungah a ret ti ka thei tam sinsin. Ka sungah a ummi thlarau cun leitlunah ka ton ding mi harsatnak le hniksak nak dodalnak pawl hmuahhmuah doneh thei dingin le ka thinlung sungah duhthusam in ret sak mi pawl tuah suak thei dingin a tul mi hmanrua, fimthiamnak, thazang pawl kha in pek cih theh asi. Cuvek ruahnak cu na nitin nunah na thinlungah um ringring sheh. Dodalnak na tong tam poh asile ziangtluk cahnak na sunglamah a um ti na thei fiang aw sinsin ding. Cutikah nangmah kha na ral lamah tang pang lo dingah relring aw. Curuangah Pathian rawn hmaisa in na thinlung ruahnak thawn thaten na ruat hnu ah na duhthu na sam mi pawl kha na tuah suak thei lo dingmi an um lo. Na tuah lo lawng asi thei. Na thinlung in daiten a ruat mi pawl khka tuah pitlin theih mi lawnglawng an si. Na tuah lo lawng asi thei. Na thinlungin duhthu a sam mi pawl kha tuahsuak thei dingin nangmai sungah fimnak, cahnak le hmanrua pawl an um theh asi. Cu pawl na hmang thiam lo lawng asi thei.