Milai thinlung cu khuaruahnak mizia pahnih, dunglamah mi hnuk kir tu le hmailam ah in nawr tu-in a luah khat theu. Cutikah, mi zokhalin amai thinlung huham cahnak thawn a duhnak ah feh dingin hril theinak a nei asi. Dunglamah in hnuk kirtu kan thlun ding maw, hmailamah in nawr tu kan thlun sawn ding? Dunglamah mi hnuk kirtu suangtuahnak pawl cun milai pakhat cu siatnak, thatlonak, tihnak le dungtawlhnak thu pawlin mi pakhat cu dung a sip ther theu. Cu tikah, mi pakhatkhat cu amah in a duhlo mi kha a tuah hrimhrim a tul lo vekin amai duhmi kha tuah dingin hrilin tuah theinak khal a nei asi. Na thinlung suangtuahnak cu nangmah in na neh ding maw, ruahnak tha loin na nun kha a lo kai hrem in salah a lo tuah ding? Na thinlung duhnak na pitlin theinak dingah na ruahnak sungah hmun kaupi a luah theu tu suangtuahnak tha lo pawl kha na hlawnlo thei a tulih na thinlung cu Pathian Thlaray huham cahnak hnuai up aw aw in Pathianin na hrangah a duh mi kha tuahsuak dingin na zuam a tul hrimhrim.

 

Mi tampi in hitin an ruat: Milai mizia tha lo pawl cu nule pa hnen ihsin thlah sawng awk mi asi an ti. Asinan mi pakhatin ziangruangah mizia tha lo a nei ih ziangruangah a thinlung ruahnak sungah suangtuahnak tha lo pawlin hmun kau pi a luah theu khal va sisehla milai sunglamah a ummi, Pathian pekmi thinlung huham cahnak a hmang thiam tu cun ziangvek miza tha lo le thinlung ruahnak thalo pawl khal neh theih asi. Na mizia tha lo pawl cu na neh thei ding maw? Nangmah rori in na tuah a tul, “rang cu tiva kapah na hruai thei nan tidai na in ter thei lo, amah na rang hruai mi in a in hrimhrim a tul.” A itthat mi thinlung cu kaihthawh sal a tul theu, kaihthawh lo mi thinlung cun siatnak ah mi a thlen fawn. A itthat mi thinlung cun amai miza tha lo le a thinlung sungah suangtuahnak tha lo pawl khal kha a thlei dang thei fawn lo. Ziangkim in san an neih thluh vekin ziangkim parah thatnak hmuh thiam a tul. Milai thinlung sungah siatnak le thatnak a khai khawm tu a um ringring, siatnak lam na thlun asile na thinlung sung cu siatnak in a luah khat dingih thatnak lam na thlun asi le thatnak in na thinlung a luah khat ding. Na thinlungah a ummi vekin na mithmai ah a lang fawn ding. Mithmai mawi te neih na duh asile na thinlung ruahnak sungah ruahnak mawi le tha lawng hmun luah ter aw.

 

 

    Mi zo khalin thlakhat, zarhkhat sungah an tuah mi hi an zohsal theu a tha. An tuah mi sungah a pitling lo mi le a hlawh tling lo mi siseh tuah sual mi siseh a um asi ahcun ziangruangah timi hawl ding asi. Midang puhmawh ding hawl men loin ziangruangah timi hawlin pitling dingin zuam sinsin ding asi. A harsa mi hnatuan pakhatkhat cun rah man kung sinsin a rah theu timi theih hngilh lo ding asi. Voi tampi cu mi tampi in thil pakhatkhat an tuah sual maw an hlawh tlin lo tikah midang asilole an kiangkap dinhmun pakhatkhat kha an mawh thlukih anmah in an tuah ding mi cu an thulh phah theu. Thil an tuahsual pang mi ihsin siseh a hlawhtling lomi tuannak ihsin siseh anmah le anmah an zir awk dingmi zir hna an thiam lo theu. Cutikah voikhat hlawhtling lonak, thilsual tuah pangnak in an hmailam kha a siatsuah in zianghman tuah ngam nawn loin an zuamnak le phurnak tiang a siat phah theu. A ngaingai ti ahcun thil a tuahsual pang dah lole a hlawhtling lomi hna a tuan dah lo mi cun zirmi malte lawng a nei asi.

 

Mi pakhatkhat in hlawhtlinnak a duh asi ahcun a man a pek tengteng a tul. Aman a pek dingmi cu sumpai asilo, zuamnak le zuamnak asi. A pakhathakah pitling dingin duhnak a neih hmaisak a tul. A pahnihnak ahcun, pitlinnak hrangah a tul mi tuahnak, zuamnak a neih hrimhrim a tul. Culawng hman si loin pitling si thei dingin a tulmi pawl cu a zuamih a tuan suak hrimhrim a tul. Pitling thei dingin mi pakhat cun amah le amah a zir awk ringring a tul. Nitin a ton mi lak ihsin riahsiatnak thawn beidawng men loin amah milai duhnak le tumtahnak kalh zawngin thil pakhatkhat a thlen tikah hmanah amah le amah a zir awk ih a hlan hnakin cak sinsin le zuam sinsin in tuan a tul fawn. Mi hlawhtling tampi pawl hi a thawk ihsin an fim le an that ruangah si sawn loin a hram thawk ihsin an tuah mi le an ton mi lak ihsin a tha lo bik lak hman ihsin anmah le anmah an zir aw vivo ih a hlan hnakin zuam sinsin le taima sinsin in a tuan tu an si theu.

 

Mi hlawktling tampi cu a zuam, a taima le tuan tento tu pawl an si theu. Tuan a zuam lole a taima lomi, mize pawl hi hnatuan tumpi pek khal an si dah lo ih rinsan mi khal an si dah fawn lo. A sang bik a thleng tu pawl cu an suahkeh ihsin an fim le an that ciamco ruang hnakin an tuah mi parah thinlung takin an tuanih an zuam tento ruangah an hlawhtling sawn mi asi. Mi in upatnak an pek theu mi pawl cu mi tampi in upatnak an pek hlanah anmah te an tuah mi parah fel le taima zetin hna a rak tuan tu an si theu. An tuah mi parah rinsan thlak zetin thinlung tairial in hna an tuan tikah mi tampi in an thei vivo ih rinsan tlak le mi (pi) aiawh in tuanvo pek tlak an sinak an theih mi an si theu.

 

Tikcu pawimawh can ah tuanvo pek theu mi pawl cu thinlung tairial zetin zuamnak lawngin pitlinnak hmuh thei asi tiah a zumih a tuan tu pawl an si theu. Thinlung in zumnak nei lo le kiangkap dinhmun lak ihsin siatnak thatlonak lawnglawng a hmu tu, beidawnnak thu lawnglawng a ruat tu pawl kha tuanvo pek tik khalah tuan suak thei mi nei mumal lo an si theu. Thinlung tairial zetin hna a tuan tu pawl cu midang tampi in an hmuh ban lo, an ruahban lo lai khalah tuanvo la ngam tu le kaihruai ngam tu an si theu.

 

Thinlung in zumnak nei loin hna a tuan tu pawl cu an hlawhtlinnak ding a har ngaingai. An duh mi an ngah hmanah an thinlung sungah cun hlawhtling lo pa thawn an bang aw ringring theu. Mi tampi cu anmah le anmah zum awknak rinsan awknak an nei lo theu ih an neihmi cahnak le fimnak theihnak pawl kha a lakin an hlawn liam theu. Curuangah thinlung huham cahnak thawn thinlung zaten pe in ziangkim tuah tikah hlawhtlinnak cu a cia thluk asi. Voi khatkhat ah an tuah mi a pitling lo hmanah an tuahmi kha ziangruangah a pitling lo timi sung ihsin anmah le anmah zir awknak an neih ruangah hlawknak an nei thotho.

 

Mah te rinsan awknak a hloh tu cu thinlung kebai an si. A thinlung a cek fel awk sal ih a zumnak a thinlung huham a rem thatsal lo ahcun ziangkim a tuahnak hrangah a hrek tluk cu a hlawhtling lo cia in hnatuan vek asi. Aisnan mahle mah ah zum awknak rinsan awknak a nei mi cun tuisun ah a farah zet men ding nan mi farah vekin a nung lo ding, ziangah tile thaisunah ngah ding mi a nei asi ti a thei. Mah le mah zum awk rinsan awk ti tikah Pathian thu thawn a kalh aw mi asilo. Pathian thei loin milai sinak rinsan tinak asi fawn lo. Pathian in mailai pakhat parah a pek mi fimnak theihnak le cahnak pawl hi a sersiam mi mailai pakhat hrangah a tul mi le Pathian in a sersiam mi mailai pakhat parah tuanvo a pek mi pawl tuahsuak theinak dingah a famkim asi ti zumnak sawn asi.

 

Zumnak nei tu pawl cu an kiangkapah a ummi unau sungkhat rualpi tha pawlin an ruatsual pang theu. Ziangah tile kiangkap minung pawl cun lenglam taksa langdan, sungkhat le pawlkom mibur a langmi lawng an hmuh thei ruangah mi pakhat ih sunglam thinlung huham cahnak kha an hmu thiam lo theu ruangah an ruat sual theu. Cun khatlamah, zumnak a nei lo tu pawl khal an kiangkap milai pawlin an theisual theu fawn. Voi tampi taksa zoh in an rinsan sual theu ih an sunglam thinlung kaw-hawm pi an rak si ziar thei mi an thei thiam lo theu. Zumnak nei lo milai cu an kiang um tu pawl hrang khalah riahsiatnak ti tamtu men an si. Mi tampi in thiltuah duhmi an nei theu. Asinan cumi tuahsuak thei dingin a tul mi cu zumnak thawn feh ih tuah asi. Thinlung hnget zetin thinlung huham a hmang thiam tu cun a kiangkapah ziangvek thil thleng khal sehla a tuah mi kha a thulh lo ih a tuah cutco tikah a tuah suak hrimhrim asi. Thinlung huham a cak sinsin asile kiangkap hnaihnawk tu pawl kha a fate sinsin in a hmu ding.

 

Ziangkim na tuah mi parah awlsam zetin na hlawh tling theh ding ti ah ruat dah hlah. Na fehnak lamzin cu hling le so lakah na thlen can a um thei. Asinan na thinlung hnget zetin na tumtahmi parah na bun ih na mitin na tumtahmi na zoh ringring asi ahcun na tumtah mi na thlen tikah dunglam na zohsal dingih “Aw, Pathian Thlarau lamhruainak hnuaiah, thinlung tairialnak le zumnak huham thawn ka tuah suak asi” na ti leh ding. Pathian zumtu na si le “Pathian in in bawm asi” na ti ding. Asinan Pathian zumtu mi tampi pawlin an ruatsual theu mi cu anmah in an tuah dingmi tuah loin Pathian lawng an ring sual theu. Anmah in an tuah mi parah an thinlung pe loin Pathian an ring thluh theu ih anmah lamah cun cahlonak lawnglawng an hmuh awk tikah an sung ihsin Pathian in a tuah duh mi hman tuah suak loin a liam sawn theu. Asinan leitlunah zumtu mi hminthang pawl cu an duhmi an tuahnakah meisa kang rero sungah hni suamso ten an fehtlang theu ih hling rul lak khalah a naa thei lo vekin hna a rak tuan rero tu an si theu. Na duhmi na tuah pitling ding maw, na hlawhtling ding maw? Na thinlung huham cahnak zaten zumnak thawn tuan aw.