10.                               THEIHHNGILH LO DING NUNAU           

                             'Lot nupi hi thei ringring aw' (Luke 17:32)

 

                        Tui thuhmahruai ih ka hmanpi bungcang hnak in thuthiang sungah ralrin peknak bungcang hro thak male lawng a um ding. Lal Jesu inLot ih nupi thei ringringding in in fial .

                        Lot ih nupi a hminthang ih sakhua nak rak nei tu a si, asinan an pa cu miding a si (2Pit.2:8). Sodom kha siatsuah a si tikah a pasal hnen ah a suak ve; Pathian dthupek dodal in an pai dung ihsin dunglet a hawi ih sodom  khawpi cu a hi cuan ; cuticun hmakhatte a thi ih cilungah can ter a si. Cule Jesu in a kawhhran mitang pawl ralrinnak pek nak ah ahman, 'Lot nupi thei ringrin uh'.

                        Hihi thungai thlak ih ralrin peknak a si, Khrih in thupi zet in ral rin peknak ah a hman tikah zumtu zate hrangah ngai pawimawh ding a si. Abraham, Jacob, Isaac, Saraah, Hannah, le Ruth pawl kha thei ringring uh tiah in ti lo. A kumkhua ih a thlarau a hlo ta mi Lot ih nupi lawng kha ti tak zet in thei ringring uh, a ti. Zesui tongkam hi pawimaawh zet ih ausuak mi a si.

                        Jesu a mah rori in a ngai pawimawh ih kan hrangah ralrinnak in peknak hi thu ngai thlak ih ruat dingmi a si. A vawihnihnak a ratsal tik ah minung tampi thlarau lam ah ralrinnak nei lo pawl an umding dinhmun thu a sim lai ih a tongsuak mi a si. ' Lot ih nupi kha cing ringring uh ' a ti lai ah khan a thinlung sungah nineta bik kha a sim duhsan a si.

                        Hivek ralrin peknak kan ruah tikah thu ngai thlak ih ralrin peknak a si ti kan theithei. Lal Jesu cu duhdawtnak, zawnruahnak, le zangfahnak ih khatmi a si. Amah cu mi harsa pawl siatsuah dingah le mi tawntai pawl tise ding ah a ra lo. A mah zum lo tu Jerusalem hrangah khan a tap ih, a mah kha thing par ih a kheng bet tu pawl hrangah thla cam thei tu a si; cuti cing cun thlarau hlo mi kha kan hrangah ralrin peknak ah hmang in ralrinnak in pek kha a tul ih a tha a ti. Curuangah hitin a sim, ' Lot ih nupi kha thei ringring uh '.

                        Zesu in hivek tongkam a hman nak hi ralrin peknak sang zet a si. Hi thu a sim tikah a dungthlun tu pawl hnen ah a simmi a si; amah hua tu Farasi le cangan tu pawl hnen ah a simmi a si lo. Piter, John, James le a mah duhdawttu pawl hnen ah a simmi a si. Cuti cing cun hi thu hi an theih a tha ti ah a ruat. Curuangah an hnen ah ' Lot ih nupi kha ringring uh ' tiah a ti.

                        Hithu hi ziang tin simmi a si ti kan ruah tikah ralrin peknak thuk zet a si ti kan thei. ' Lot ih nupi vek in um hlah uh, a thu cawng hlah uh, a dungthlun hlah uh ' tiah daiten a sim men mi a si lo. Asinan tongkam danglam deuh hmang in ' Thei ringring uh'  a timi a si. Kan zaten hi thu hi kan theih hngilh ih kan thlarau dinhmun cu tihnung zet dinhmun ih ding mi pawl hnen ih simvek in a sim mi a si. A daithlangmi pawl cinkennak a thangphawk ter, cule kan zaten kan thluak sungih ret dingah in simmi a si. A au suak ih, ' Lot ih nupi hi thei ringring uh ' a ti.

                        Lot ih nupi ihsin ziang in zirh duh ti hi kan ruat tlang ding ah ka hril mi a si. A thuanthu hi kawhhran pawl hrangah zirhawknak hrang ih tha lawng lawng a si ti kan thei fiang. Nineta bik cu kan hmai ah a um : Khrih ih vawihnih ratsalnak ding cu hmakhatte ah a si thlang ding; kawhhran sung lala ah leitlun tihnunnak pawl cu a thang vivo. Lot ih nupi dinhmun vek kan thlen lo nak dingah kan kiangkap ih nathrik tha lo le thlarau sual cangvaihnak pawl lak ihsin himten um thei dingah fimkhur cio uhsi.

                        Kan thluak sungah hi thil pawl hi fiangkelkel ih kan theihthei nak dingah thil pathum a sangsang ten ka run tarlang ding.

 

1).                    Lot nupi in sakhua nak ih canvo tha pawl a rak nawmpimi ka sim ding.

 

2).                    Lot nupi in sualnak a rak tuah mi ka sim ding.

 

3).                    Pathian in Lot nupi parah ziangvek thuthennak a thlenter ti ka sim ding.

 

1).                    Lot nupi in sakhua nak ih canvo tha pawl a rak nawmpimi ka sim ding :

                        Abraham le Lot ih san lai ah khan sakhua nak diktak cu a rak har ngaingai; Bible, rawngbawltu, kawhhran, sakhua nak lam khih hmuh tu ca suakmi le missionaru tla an rak um lo. Leitlun ih a tam sawn ram mipi pawl cu thlarau lam thimnak sungah an um ; cu lai ah Pathian theihnak atnak le milai suangtuahnak sungah an nung. Zakhat sungah venghnen tha, theihnak ah famkim, le Lot nupi hmin sal ih ralrin pek nak pawl hi a rak um lo. Lot nupi hi a mai san lai minung thawng tampi thawn tahthim cun nunau duh umk zet a rak si.

                        A pasal cu Pathianmi zet a si. Mi rinum zet Abraham kha a pasal sungkhat a rak si. Abraham le an pai thlacamnak cu Lot nupi cun a thei hrimhrim ding. Ziangvek Pathian an bia tile ziangvek zumnak an nunpi ti cu kum reizet sung thlam fate sungih an cennak ah Lot nupi ih theih lo dingin thuhruk a si thei lo ding. Abraham le Lot ih Pathian biaknak hi leitlun sakhua nak men le ei hawlnak men a si lo ih an nuntudan ah kai hruai tu le an nunnak ziangkim ah an nunsan le an lam hruai tu a si. Pathian in a kawhnak vek in Pathian zumnak in theih lo nak ram ah Abraha kha a rak feh suak ih Lot kha a rk hruai nak a si. Hi hmuahhmuah hi Lot ih nupi in a rak thei tengteng. Hi Lot nupi ih dinhmun hi sakhua nak lam ah cun boruak tha zet a si.

                        Abraham in Pathian palai pawl hnen ihsin thutiam a rak dawn lai ah khan Lot ih nupi hi a rak um ve thei men. Hai le Bethel ah maicam a rak sak lai ahkhan Lot ih nupi hi a rak um ve a si thei. A pasal kha an ral ( Cedoraomer ) pawl in an kaih ih , Pathian bawmnak in runsuak a si lai ahkhan a rak um ve thei. Salem lalpa, melchizedek in zu le sa thawn Abraham tong dingih a rat tikah khan a rak um ve . Vancung mi pawl Abraham tong dingah sang thawn an rat lai ahkhan a rak um ve. A pasal hnen ah Sodom khua suahsan dingah vancungmi pawl in an sim lai ahkhan a rak um ih a hmu hai; cuticun vancungmi pawl in khawsung ihsin suak dingah an kut in an hruai lai ahkhan an lak ah pakhat a si ve. Cuticun Lot innsang ih a luat mi lak ah a tel ve . Ka sim bet ding, hi pawl hi sakhua canvo fate men a si lo.

                        Asinan himi pawl hin Lot ih nupi thinlung sungah ziangvek thil tha a rak suahter. Lot nupi thinlung sungah zianghman thiltha a suah pi lo ih a thinlung cu tisa sinak in a luah khat lai thotho. Nitin Pathian mi rinum Abraham le a pasal Lot ih thil tuah mi le an sakhua zumnak le an nuntudan pawl a hmuh mi in zianghman a nun ah danglam nak a neih ter lo ih vancungmi pawl ih ralrinnak pekmi pawl hman kha zianghman ah a siar lo. Cuvek, Pathian ih zangfahnak hnuai ih a nungmi insang ah a ceng nan Pathian zangfahnak zianghman comi nei lo in le Pathian tih lo tu vek in a rak nung, a thinlung sungah ziang hmanthleng awk nak a um lo ih zumlo tu vekin nung in zum lo tu vek in a thi. A theihnak mit kha ziang tik hman ah Pathian thu hnuai ah a ret dah lo: a ngainat mi thil cu ziang tik hman ah vanlam thil ah a thum aw dah lo. A sakhua nak neihmi pawl kha pawnlang ih mawinak men le minung sinak ih pawl kawm awknak men lawng  a si ih thinlung taktak in ziang tik hman ah Pathian tihnak a nei dah lo; a kiangkap in um pawl thawi lungrualnak men le leitlun ih rual pawl nawmnak men ah ziangkim a rak cangvai ih a tak in Pathian thawn pawl awknak le Pathian thu hnaui ih nunnak kha rak nunpi mi a nei lo. A pasal Lot khan Abraham a thlun tik ah tisa ih a pasal dungthlun in a rak feh ve ih a tak in Abraham ih khualtlawn nak ah khan zianghman theihnak le tel nak a nei lo. A kiangkap ih minung pawl tuah vekin a rak tuah ih a pasal Lot ih nuntudan thawn mil aw ding in ziang kim a rak tuah ih a rak nung ve satliah menmen. An pai sakhua nak le cangvaihnak ah zianghma eltainak le dodal nak tuah lo in thinsau zet in a rak tuar ih a tumtah mi cu a tisa sinak ih a pasal thai insang nuam ding lawng a si. Asinan Pathian hmai ah ziang tik lai khal ah a thinlung cu a sual ringring. A thinlung cu leitlun in a luah khat ih leitlun ah a thinlung le a ruahnak hmuahhmuah cu a thum aw. Hivek in a rak nungih a rak nung vekin a thi . Asinan a thihhlan ah a sungmuril ih Pathian thawi an pehtlaih awk nak hi langhngan zet in theih a si lo men ding nan, a thih tikah ziang kan hmu tile a hlan ih a rak nunnak hmuahhmuah  cu Pathian thawi pawl kawm awknak a rak neih lo zia le leitlun ah a thinlung  a rak phum zia pawl a lang thluh.

                        Hi hmuahhmuah lak ihsin zumtu pawl in zir ding tam pi a um ruangah Lalpa a mah rori in thei ringring dingah ralrinnak in pek; tu lai san ih zumtu ti aw pawl ih zir ding thupi zet a um . Mi tampi cu Lot ih nupi dinhmun vek ah an nung; ra aw la in zirh duhmi thei ve hnik !

                        Cuticun, a hmaisa bik ah kan zir thei mi cu, a hmin men ih sakhua canvo tha co nak men hin zo ih thlarau hman a rundam lo, ti a si. Thlarau lam thu ngannak cabu thatha na nei men ding; sakhua nak lam ah phur zet le eng ih khahnak hmun ah na ceng in na nung men ding; Pathian zangfahnak hnuai ah a phunphun cove in kawhhran sungah canco thatha na co ve men ding; thu sim tha bik pawl le zirhnak tha bik pawl na ngai ringring men ding; zumtu mithianghlim le theihnak ah a pitling ih eng hnuai ah a ummi pawl rualpi tha nei in an lak ah na ceng men ding; asinan hi hmuahhmuah lak ah nangmah cu piangthar taktak lo in le Pathian thawn na sungmuril ah pawl kawm awk nak nei lop in le Pathian thlarau cu na sungah nung in Pathian thuhnuai ah tuhlut awnak na neih lo ahcun ni neta bik ah na thlarau cu a kumkhua in a hlo ral ta ding.

                        Hi thu hi caisairtu hrekkhat hrangah cun harsa zet le lungkhawng zet a si ding ti ka sim ngam; asinan ka lo bawm thei lo. Minung tampi a hmun men ih sakhua nak neih a duhtu pawl cun sakhua nak ih canvo thatha le milai ih lawmnak pawl cu an duhmi le an beisei mi a si. Khrihfa hnget khoh si thei dingah phut mi tam zet an nei, Pathian in ziang in phut tihnak in an sakhua nak ah an duh thusam pitlin ter an tum ringring ih an hrangah zumtu diktak an si thei nak ding cu a harsa zet. Pathian mi zet nupi pasal , zumtu mithianghlim rualpi tha, thu sim thiem zet rawng bawltu, kawhhran sungah canvo thatha, kawhhran ah an duh thusam pawl le tisa ah hlawknak, cu pawl a famkim lawng ah Pathian thawn nung in zumnak ah ka hmang aw ding tiah a ruat tu le cuvek thinlung put nei mi tampi an um. Hihi thil dik lo a si, milai sungsuak mi ruahsual nak liolio a si. Thlarau rundamnak dingah sakhua canvo thatha hnak ih thil thupi le tul mi a um. Joab kha David ih ral bwi a si; Gehazi kha Elisha ih rawngbawltu a si; Demus kha Paul ih rualpi tha a si; Judas Iscariot kha Zesu dungthlun tu a si; Lot tha le boruak tha ah an nung nan an sual thawn an thi thluh. Ralrin peknak le theihnak thatha thawn sakhuanak ahcun canvo tha an rak co nan a linglet in thlamual ah an liam kan hmuh mi hin thlarau rundam nak dingah canvo tha lawng si loin cuhnak ih thil thupi a um a si, ti in zirh a si. Thlarauthianghlim ih zangfahnak ih zangfahnak an tul a si.

                        Sakhua naki ah canvo tha le dinhmun tha pawl hi hlut ter ding an si, asinan hi pawl ah hngat awk hi a tihnung zet a si. Kan cangvaihnak ah hivek dinhmun pawl ih hlawknak cu kan hman thiam a thupi zet nan Khrih ih hmun cu luah ter hlah uhsi. Pathian in ziangkhal in pek ahcun lungawi ten hmang uhsi, asinan hi pawl hin ziang a rah suak ding ti kan ralrin a tul. Ziangkim hi kan hman dan ih zir in kan siatnak le kan thatnak ah lam in hruai tu an si. Hivek sakhua nak ih vanvo tha pawl hin thiltha an suahter lo ahcun thil tha lo lam ah mi a thlen theu a si. Kan sia-tha-theihnak sungah an cam ih mawhphurhnak an tam ter deuhdeuh tlun ah mawhsiatnak ah mi a thlen theu sawn a si. Sathau far a ti ter tu meisa thotho in thingkung cu a ro ter ih meisa ih ur dingah a timtuah hai. Thei nal dekdek nan tuahnak zianghman um lo zumnak thi hnak in ziangdang hman in milai thinlung a hak ter lo. Vawi khat in ka sim sal ding; sakhua nak ih canvo a si lo, zumtu pawl zumnak dik ah le rundamnak ah lam a hruai tu,Thlarauthianghlim a si sawn. Thlarauthianghlim rawngbawlnak um loin zohman rundam an si lo ding.

                        Tuisan ih evangilical kawhhran zumtu pwl ka simmi hi cing ringring dingah ka cah duh hai. Thu sim thiam tak na ti mi Pa Kiak ma Pa kuak hnen ah maw va feh aw la a hu simmi cu tha na ti tuk ih midang thu simmi cu zianghman ah na rel lo ding, a rawngbawlnak ih na tel ruangah na lung a awi tawk zet ih a thu thei tu na si cu ropi na ti zet! Cu pawl cu a tha zet, canvo tha zet a si. Kawhhran ah ziangmaw tal ah an lo hmang in na lung ai twk et ding ! Hi khal hi a tha . Cui na rawngbawl tu vek thawng tampi um thei hai seh la cu ka va duh ve. Asinan thu losut ding ka neih mi cu, cu pawl thusimnak na ngai thlak nak in na thinlung sungah ziang ngah mi na nei, ti a si. Thlarau Thianghlim na co zo maw ? Cuti a si ahcun Lot ih nupi thawn zianghman danglamnak nan nei cuang lo.

                        Rawngbawl tu innsang pawl hrangah ka simmi hi thaten hmunsin dingah ka cah duh. Pathian uknak innsang ih um cu canvo tha ngaingai a si. Ziangzan insang thlacamnak, Pathian thu zirh awk nak, cawlhni hman thiamnak, kawmawk nak ah tel kim ringringnak pawl cu canvo tha zet a si. Hi pawl hi na umnak hmun tin ah na hawl dingmi le na sakhua nak ah na neih dingmi pawl cu an si. Hi pawl hi umnak hmun tha ter tu cu an si. Leitlun mi pawl lak ah nung in thla hlawh sang le nun awlsam nun ih nunnak pawl hin mi a tuah tha cuang lo. Hi vek leitlun thil ahhin na lung a awi tawk lo ding ti ralring aw . Na tisa mit ih na hahio mi pawl na ngah ruangah awlaiten vanram ah na kai ding ti ah ruat aw hlah. Nangmai thinlung sung rori ah Pathian zangfahnak cu ca co a tul a si. Innsang ih thlacamnak le sakhua nak ih cangvaihnak pawl cu na tuah ding an si ko ih na sunglam ihsin a nungmi Thlarau ih rah suak mi sakhua nak lawng in vanram lamzin dik ah a lo hruai thei a si ti thei ringring aw . Cuti asi lo ahcun Lot ih nupi thawn danglamnak zianghman na nei cuang lo.

                        Sakhua mi zet nu le pa a nei tu pawl nan hnen ah ka lo simmi hi thaten ngai aw la na thinlung sungah cing ringring aw. Pathian tihzah tu nu le pa ih kaihhruai nak hnuai ah Pathian thu thawn cencilh mi insang ihsin thanlen ding cu canvo tha zet a si. Kan nauhak tet lai ib sia-le-tha kan theih thei ve ten 'Sual thu', 'Khrih thu', 'Helram thu', le 'Vanram thu' pawl zirh awk ringring nak hi thlawsuah nak pakhat a si. Asinan hivek canco tha le eng hnuai ah nung in na pa-thai men lo nak dingah ralring aw! na thinlung cu a hak ring ring lo nak dinah ralring aw! tisa mi thinlung pem lo na si lo nak dingah le na canvo tha hmuahhmuah cu siang siar lo ih na um men lo nak dingah ralring aw! Nunnak sang cu nangmah roriin na ei a tul ih na thinlung sungah Thlarauthianghlim ih theihpi nak na neih a tul. Sual sirnak, zumnak le thiamcoternak pawl hi nangmah bulpak rotin na neih ve a tul a si. Cuti a si lo ahcun Lot ih nupi thawn zianghman danglam nak na nei cuang lo.

                        Tu lai ih khtistian ti aw pawl hmuahhmuah in tui ka sim rero mi hi an thinlung sungah an ret theinak dingah thla ka cam . Hi leitlun sakhua  nak thil lam thu ah canvo tha neihnak men hin thlarau a runfam thei lo a si ti hi theihhngilh hlah hai seh. Theihnak thatha le tinum zet ih thu simmi le mi thangphawk dupdo cangvaihnak pawl hi a tha zet ih thansohnak hrampi cu a si ko, cun mithianghlim rualpi tha neih khal hi thil tha thlawsauh tum zet a si. Cuvek nei tu cu mi lung awi an si ! Asinan cumi tlun ah thil a lotheihlo ih a tul mi a um ih cumi lo in cu sakhua canvo tha pawl cu zianghman an si lo; cui thil pakhat cu Thlarauthianghlim zangfahnak a si. Lot ih nupi khan canvo tampi tha zetzet a nei nan Thlarauthianghlim zangfahnak a co ve lo.

 

2.         Lot nupi ih sual tuahmi pawl :-

                        A sualnak thuanthu hi Thlarauthianghlim in tongfang fiang le theih awl zet in in sim a si; 'an pai dinglam ihsin a her ih a dinglet a hawi; cule cilung ah a cang'. Hi hnak in thil dang simbet mi a um lo. Hihi fiangfai zet ih ralrinnak in pekmi a si. Sual in pawi a khawih zia cu himi tongfang pali sungahhin kan hmu thei: 'Dunglet a hawi'.

                        Hi sual nak hi thihnak khawp thlen ding ah ka casiartu lak ah pakhatkhat mit hmuh ah a fate tuk maw? Lot nupi ih sualnak hi a parih thuthennak a thlengmi thawn tahthim in a fate tuk in na mit hmuhah a lang maw? Hihi mi htakkhat pawl ruahdan a si ding ti ka sim ngam. Ka lo ruah rero lai ahhin ziangtin na rua ti i sim hnik he. Vawikhat zoh ih na hmuhmi hnak  in thil tampi a um a si: a tongfang ih san hnak ih thil tampi a um a si. Ngai aw la na thei ding.

 

a)                     Dunglet a hawinak cu thil fate asinan, Lot nupi ih a sinak tak tak kha a lang ter a si. Thil fate hin thil tumpi hnak in mi pakhat khat ih sinak ditak hi a langter they, cuticun cui thil fate pakhat cu ti dam theihlo nathrik tha lo a rak si theu. Evi ih ei mi Aple kha thil fate a si, a sinan khakhan Evi cu thianhlimnak ihsin sualnak ah a tlu se zo ti a lang ter. Tlakrawh le cement ih dawl mi inn tumpi hram ah a kingmi fate hin a innpi  cu a hnget khoh lo ih a tihnung um in a sung ih cen ding tian a thlaphan um a si ti a lang ter. Hrampi fate te pawl in thli khui tawk lam ah a hrang ti an lang ter vek in vawikhat te zohfiahnak hin misual thinlung cu ziangtluk sual le ziangvek dinhmun ih um a si ti a theihter ding. ( Mth. 5:28 ).

 

b)                     Dunglet hawinak kha thil fate a sinan, Lot nupi ih thu lun lonak in hmuh ter. Vancungmi pawl ih thupek mi cu a fiang ih theihsual theih lo a si: 'Dunglet hawi hlah' (Sem.19:17 ). Hi thupek hi Lot nupi in a ngai dun lo. Asinan Thlarauthianghlim in a simmi cu 'thawinak hnak in thu lunnak a tha sawn'. Curuangah thulun lonak cu sual nak tha lo pittawp a si ( I Samuel 15:22,23 ). Pathian  in a thu fiangzet ih a sim tikah minung tuanco cu a fiang a si.

 

c)                     Dunglet hainak cu thil fate a sinan, Lot nupi ih zumnak neih lo zia le porhawk nak pawl a lang ter.  Pathian in Sodom cu a siatsuah tak tak ding maw si, tiah a ringhlel a bang; tihnung a um taktak ding kha ringhlel; cuvek tluk ih hmanhmawh ih tlan a tul dingkha a zumlo. Asinan, zumnak tel loin Pathian ti lungawi a theih lo (Heb. 11:6 ). Mi pakhatkhat in Pathian hnak in thiltha ka thei sawn ti in le Pathian ih thu simmi cu ka hrangah zianghman san a nei lo ti ih a ruat tikah a thlarau dinhmun cu tihnung za a si. Pathian in a sersiam mi par ah ziangvek in hna a tuan ti kan theih thei lo ruangah a mai tongkam in maw, a fapa tongkam in maw, a palai pawl hmang in maw thu a simmi pohpoh cu zum tawp ding kan si. Kan theihlonak hin kan mawhphurhnak ihsin in luat ter thei lo ruangah kan zumtawo ih a mah ahkan hngat awk mei a tul a si.

 

d)                     Dunglet hawinak kha thil fate a sinan, Lot nupi kha leitlun nginat ruk nak a neih mi in hmuh ter. A taksa ruangpi cu Sodom khawpi lenglam ah a tlan hno hno rero nan a thinlung cu Sodom ah a um. Inn ihsin a suak tikah a thinlung ngainatnak kha inn ah a tanta. A thinlung in a mit cu a her ter ih a thinlung ih hlawnthil umnak hmun cu a hi cuan. Hihi a sual nak hram thawk nak a si. Leitlun thawi rualpi thatnak cu Pathian thawi ral awk nak a si (James4:4). 'Zokhal leitlun a duhdawt ahcun Pai duhdawtnak cu a sungah a um lo' (IJohn2:15).

                        Casiartu pawl, tui ka thu sungih bungcang ka tarlang mi hi tha zet ih ngaihtuah sal dingah ka lo forh duhsal. Kan Lalpa Jesu Khrih in hi bungcang hi kan thinlung sungah kan cinken dingah in duhsak mi a si tin ka ruat. Lot nupi in leitlun ah a thinlung a pek ih kunglet a hawi nak ruangah a lohral nak hi in theihter duhmi a si tin ka ruat. Lot nupi sakhua nun cu a hram thak ahcun a rak tha lawk zet vek in a duh um zet lawknan leitlun thawn an thenhnih aw ngaingai thei lo. A thawk ahcun a himmi pawl lakah lamzin thaten a zawhve vek nan a thinlung sungih a ruahnak ruk te ahcun leitlun ngainatnak in hmun a luah khat ih cui leitlun a ngainatnak cun a thinlung kha a laksak. Zumtu pawl hrangah leitlun ngainat nak ih a tih nunnak hi Kan Lalpa Zesu in in zirh duh mi a si. Aw, hihi kan zaten theihfiang theinak thinlung le hmuhfiang thei nak mit kan nei cio ko ding, ti ka zum !

                        Thisan ih zumtu tluk in kawhhran misa pawl hi leitlun ngaina lo dingah ralrin pek an tul ka zum lo; sankhat hnu sankhat ah khristian sakhua nak ah nat tha lo a rak um ringring theu ih tuisan ih nat tha lo cu leitlun ngainatnak a si. Hihi thimlak ih pampi tlung vek a si ih sun lai fangih nat tha lo mi siatsuah tu vek a si. Mi tampi cu an thlarau hliamhma pu in an um ih, mi cak zetzet pawl khal cui nathrik cun cangvai thei lo ah a tuah hai a si. A hminthang ih khristian sakhua nak nei duh tu pawl sia-tha-theihnak thangphawk tu dingah hi thu hi ka sim duh. Ka au suak duhmi cu, ' Lot ih nupi hi theihngilh hlah uh ' . Lot ih nupi kha mi tha lo le siakha khal a si lo; rukru le uire khal a si lo; asinan a hminthang ih sakhua nak nun a rak nei tu a si ih a thinlung in leitlun a beiseinak ruangah a dunglet a hawi.

                        Kawhhran sungah mi tampi tihnim nak la zo tu pawl, sualnak diklo nak le leitlun ngainatnak sungah an tlu sia ti kan hmu. Hi vek mi thawng tampi cu a thawk ahcun tha zet in an feh ih vanram kai ding an bangzet theu nan malteten an la kiang aw hrethro ih a neta bik ahcun Khrih cu an dung an tun ih leitlun ah an kir sal theu. Ziang in an vanram lamzin ihsin a cawl ter? Bible a dik lo ti an hmu maw si? Jesu in a thukam a tuah sual lomi an hmu maw si? A silo, a si lamlam lo. Asinan tualsung nathrik an vei a si; leitlun ngainatnak in a kaih hai. jThinlung tak ih evangilical thu simtu pawl hnen ah ka sim duh mi cu : a kawhhran milai pawl kha thaten zohding ah ka sim duh. Dinhmun hnget ih khristian nak ah a bun hnget aw tu pawl hnen ah ka sim duhmi cu, a kiangkap ih a ummi lei un mi pawl kha thaten zoh in ralring seh. Thu dik ka sim a si ti ka ciang. Tui san hi Lot nupi ih nun zoh in ralrinnak ding tikcu le can a si ti ka thei.

 

a).                    Sakhua mi zet insang ihsin a thanglian mi fale lakah mi tampi a thawk ah tha zet in an thawk ih lehhnu ah hliamhma pu in an um. An nauhak lai ahcun sakhua mi zet an bang; Bible bungcang tamzet zoh lo in an sim thei ih Pathian thangthatnak hla tla mawi zet zet in an sak thei; thlarualam ih sual thu pawl cu an thei zet; Khrih an duh dawtnak thu le vanram kai an duh nak thu pawl tla an sim theu; biak inn kawm awk le Pathian thu simmi ngai cu an duhzawng a si; an nu le pa pawl ih an sim theu vek in thlarau ro thil thu khal an sim thei; ' ziangvek nauhak saw an si ' ti ding khawp in thil tha an duh ih an tuah. Asinan an hung thang lian ih an thatnak pawl cu zinglam meiro bang in a hlo lohli ih an ,mizia cu a hlan ih an nuntudan thaw cun a ling a let thluh. Fapa te cu a hung tlangval in thildang zianghman a ngaihtuah nawn lo ih nawmnak le phurnak lawng a zoh, taksa ti hlim awk nak , puai tuahnak , nawmcnnak le tisa mi tak in hmin than nak pawl dawi in a tlan. Fanu te cu a hung fala dekdo in thil dang zianghman a ngaih tuah nawn lo ih hni puan tha, cei awk nak, ler nak, mi ler rualpi tha , thaunthu bu siar nuamnuam, le phurnak a phun phun le leitlun sinak le lennak pawl lawng a zoh. Ziangtin saw a thawk ih an thlarau mi sinak pawl cu a hloh thluh ih an zumnak teh khui ah saw a si ? An zaten an hlo thluh; phum hloh in an um thluh; an thinlung sungih leitlun an ngainatnak in a fen hlo thluh. Lot ih nupi fehnak lamzin ah an feh ih an dunglet an hawi.

 

b).                    Nupa tuak tampi cu an fale an pitlin hlan cu sakhua mi zet in an lang nan an fale an pitlin hnu ahcun dung an sip ih an tlu hlo thluh theu ! An neih awk pek te ahcun Khrih dungthlun ih fel zet in thuthangtha hrangah pum pe aw ding in an lang. Thuthangtha simnak hmun ah dikten an khawm aw theu; umze umlo nunlolam ah an hmang aw dah lo; misual lak khal ah an tlang leng dah lo; an zumnak le an tuahnak cu thaten le rualran ten an feh pi thei. Asinan, Aize! ziang ah saw thlarau zet mi pu le pa pawl insang ahhin thlarau lam tluk ziat nak a thlen theu ? An fale te an hung thansoh vivo tikah an nunnak ih a thupi bik cu Pathian rian ding hnak in an fale hi hmaisa bik ah an ret theu a si ding. Leitlunmi sinak hi an cangvaihdan ah a lang thawk ih an hnipuan hruhdan, an nawm awknak, an hna tuannak ih an tikcu hman dan pawl ahhin Pathian an rawn nawn lo. An kiang kap ih an rualpi pawl mi le an tlanlennak pawl ah an fimkhur nawn lo. A hram thawk ah Pathian hrangih lakhran awk nak an neih mi pawl kha khui ah saw a si ? Leitlun nawm bawlnak pawl an tanta mi ah an kir sal . An innsang tisa thil ih hmasawnnak ah cun ziangvek dinhmun le ziangvek thil khal siseh la tuah an hreh nawn lo. An thlarau mi sinak le an Pathian hrangih an pek awk nak, an lakhran awk nak pawl cu theihhngilh thluh an si. Hi pawl cu an inn kelkawm ih mei inn sia bang in hnawn le ret that men an si. An nunnah thleng awknak a lang; leitlun in an thinlung a laksak hai a si. Lot ih nupi fehnak lamzin ah an ke an kar ih an feh. Dunglet an hawi.

 

c).                    Fale tleirawl tete pwl hi kum kul an ti hlan cu sakhua mi zet vek ih hmang aw mi tampi an um, a inan an hung pitlin ngah tikah an tlu se thluh sal theu. Cuvek minung na kiangkap ah ziang zat ha na hmuh ? An pitlin hlan cu an sakhua nuntudan cu duh um zetzet an si. Mahte mimal ih Bible siarnak le thlacamnak tla an nei theu;  mi farah bawmnak ih hman awk tla tikcu an neih ihpiang in an duh zet theu ; an tikcu rem cang ah Sunday School tla an zirh theu; thlarau mi rualpi tha tla an duh zet; sakhua nak lam thu rel tla an cak zet theu; an ca kuat ngan nak hman ah an sakhua nak ih an hmuh tonmi le sakhua nun mawi pawl tla an ngan tel ih an rualpi tha pe tu an si theu. Cukel tete, ziangvek dinhmun hnget lo ahsaw an rak din ! Tidai bang in duh naknak ih hruai kawi theih mi an rak sisi ! Leitlun duhnak le ngai natnak in a siatsuah hai ! Malteten an thawk ih an thinlung cu leitlun ngainatnak in malteten a luah khat vivo hnu ah Pathian an duhdawtnak cu an hloh ih an duhdawtnak cu leitlun thil ah a thum aw. Hmuh theih thil in an thinlung malte malte in hmun a luah thawk ih mit hmuh theih lo hrang ih an ruahnak cu, kharbawk in hrampi a ei vek in, malte ten a hlo thluh. Kar khat hnu kar khat dung an tawl vivo ih tumtahnak thawi a hram an rak thawh mi an sakhua nak cu a hlo thla . Zirhnak tha ngainatnak an nei nawn lo; mi pakhat khat cu midang pakhatkhat hnak in a sakhua mi deuh tiih simcu duhdawtnak nei lo le mi zawnruat lo a si an ti; veng sung mi pawl ih nuntudan ihsin lakhran awk nak cu pelrelnak men le hawi zawng lo hna a si ti hmuhsuak thar vek in an um; Pathian in a thuthiang vek in ziang a phut hai ti hnak in an veng hnen le an rualpi pawl ih duhnak le lawmzawng tuah ding cu an tummi a si sawn. Cuticun sakhua nak ih a takram thleng ban lo tu pawl thawn an nun an cawhpawlh deuhdeuh. A netabik ah an khristian sinak a tang sun khal kha an theln hloh lawlaw ih leitlun fate ah an cang. Lot nupi ih kekar nak an thlun ih dunglet an hawi.

 

d).                    Kawhhran sungia lulang deuh le upa duh pawl hi a hram thawk ahcun thlarau mi zet le taima zet an rak si nan, lehhnu ah mi ziang maw zat in an hram thawk nak cu an thei nawn lo ih cangvai paih nawn loin an um ? An rak sidah nak tluk in an sakhua nak ahhin zohman in phurnak an rak nei dah lo tluk a si; asinan zangfahnak ih hmasawn nak ah phurnak an nei nawn lo; zohman thuthangtha karzai nak ding ah henhheng zet in hna an tuan nawn lo; thil tha tuah ding ah an pe aw thei nawn lo; thlarau lam zirh awk nak ah an phur nawn lo; Pathian zanfgahnak hnuai ah zohman thansohnak taktak an duh nawn lo; leitlun tisa sinak ih mi upatnak lawng an zoh. Asinan, a tuah cun ziang hmuahhmuah rem that thluh mi an bang ! Thildang duhnak in an thinlung hmun a luah dingmi cu leitlun thil in a khat thluh. Leitlun sumpai, mi fakmi sinak, leitlun calai thiamnak , leitlun ih cawimawinak , hi pawl hi an thinlung sungah a pakhatnak ih hmun luahtu a si. An hnen ah thu na rel pi khal a si le thlarau lam thu rel hnak in tisa thil in an hmur cu a khat sawn ding. Nitin ih an nuntudan kha zoh tha hman aw la, Pathian lalram hrangih beiseinak zianghman hmuhmi na nei lo ding. Asi, an sakhua neihmi cu a nung mi sakhua zumnak a si nawn lo. An sakhua nak cu leitlun ih pawl kawm awknak le nuncan rem awk nak men ah an can zo. Tui hlan ih an khristian sakhua nak sung ih cirhti luang kha tu ahcun a kang zo; thlarau lam ih meisa kha tuahcun a mit depdep zo ih a dai riahriah zo; thlarau lam meisa pawl cu tisa sinak leitlun meisa in a khuh thluh zo. Lot ih nupi kekar an thlun ih dunglet an hawi.

 

e).                    Zungih hnatuan pawl lakah a thawk ah thlaraulam ah phur zet in rei lo te ah leitlun ngainatnak ruangah a tlu sal thluh mi minung ziangzat hmuhmi na nei ? Rawngbawl an thawh pek te ahcun Khrih hrangih hman awk cu an phur zet ih an lungawi zawng khal a si; ziangtik lai khal ah rawngbawlnak ah an pe aw thei ringring, an thu simmi pawl cu a cung zet ih an kawhhran misa pawl cu an hngel a hnget zet. An khawm awknak cu zoh a mawi zet; thu zirhnak, thlacamnak, zumtu pawl vehvaihnak, le thil tha tuah cu an rak hman awk nak tlangpi a si. Alahai ! ziang ruangah thlarau hnatuan in tisa thawn an cem theu ! Delilah cawn par ih Samson bang in an thazang cu leitlun ah a cau theu ! Len duhnak hin an thinlung a luahkhat; tisa mi nupi pasal an nei aw; cuticun porhawknak in an thinlung a luah khat ih Bible siarnak, thlacam nak le Pathian thawi pawl awknak pawl cu an daitlang. Zing ih daitla in an thlarau pangpar mum te cu a car ter thluh. An thu simmi ah Thlarau huham caahnak a tel nawn lo; zarhtin te an hna tuan suah mi a mal deuhdeuh; an nunnak ah an cawhpawlh mi pawl ah fimkhur nak a um nawn lo; an titi tik khal ah an tongkam cu a tisa mi deuhdeuh. Minung ruahnak hnak in Pathian thu cu hma ah ret sawn ding ti an theihhngilh; bi tuk ih feh le dodal tu neih an phang ringring. Cuticun a hram thawk ah Khrih ih ralkap tha vek in le Atirhmi pawl ih roco tu vek ih a rak lang tu pawl cu hlawhfa satliah men vek ah an cang thluh. Zumnak thu ah zohman ih dodal lomi le zohman rundamnak ah hruai mi nei lo ah an cang. Cuticun kawhhran hrekhat cu leitlun mi sinak ih hmun a luah ih Thlarauthianghlim hrangah hmun a um lo theu; mineh thei nak a nei nawn lo ih leitlun in a kut le a ke cu a tawntem sak zo. Lot ih kekar an thlun ih dunglet an hawi .

                                    Hivek thu hi ngai rero ah riahkiatthlak zet a si, asinan a tak ih hmuh tikah riahsiat thlak sawn a si. Hivek thu ahhin mi tampi cu thu elnek na zetzet in an sia-tha-theihnak cu a khat ih leitlunthawn an hnawihnihawk nak ah puhmaw ding tha tawk cu an nei ringring . Cuticun an leitlun mi sinak cun an mit a ti caw ih an sakhua nak ah leitlun mi pawl thawi pawl rual tha zet ih fehtlang thei mi sakhua nak neih a tul ti ah an dinhmun cu duh aw zet in thu an simmi pawl theih tikah riahsiat thlak zet a si.

                        Hihi riahsiatthlak zet asi, lawng tumpi cu a sungah mitampi phur zetzet pawl a khat in a phur ih tipi thuanthum sungah a hrek khat cu leitlun an ngainatnak ruangah tipi ral kai thei lo in dunglet ah hawi ih, ralkhat cu an mit in an hmu ban ko nan, tipi sungah an pil hlo thluh. Hihi a hmu fiangtu hrangahcun riahsiatthlak zet thil pakhat a si . Cuticun zin dik lo ah an feh rero lai ah an mah le an mah cu vanram lamzin pan vek in an thei aw ih hnangam zet in an um hmuh tikah zangfahnak an si. An lu par ah tuakpar in a khat tiamtiam nan,an mah le an mah an thei aw lo. Jacob,David, le Piter pawl thawn an khualtlawnnak cu an thawk nan Esau, Saul, le Judas Iscariot pawl thawn a tawpnak ah an feh tlang. An hramthawh nak cu Ruth, Hannah, Haru le Persisi pawl thawn an si nan Lot ih nupi thawn a tawpnak ah an feh tlaang.

                        Thinlung hrekkhat lawng ih sakhua nak neih hi ralring aw. Jesu Khrih cu a pahnihnak ah ret tahrat in Khrih ih dungthlun tu ka si ti aw lo dingin ralring aw. Raulpi le kiangkap milai pawl thawi rhu rual nak men, leitlun mi pawl ti lungwi nak men , vengsung mi nung pawl thawi nuntudan rem awknak men, sakhua mi si in cawisannak le upatnak hlawh duhnak men, leitlun mi pawl ti lungawi nak men, vengsung mi nung pawl thawi nuntudan rem awknak men, sakhua mi si in cawisannak le upatnak hlawh duhnak men, le leitlun tisa ei hawl nak men ih Khrih dung thlun tu na si lo nak dingah ralring aw. Khrih na thlun cengmang a si ahcun Khrih hrangah pum pe aw in thlun aw, nangmai tisa hlawk nak ah Khrih hmun na sal lo nak dingah ralring aw. Na nunnak pumhlum in thlun aw, thutak ah nung aw, diknak in um aw, felfai zet in um aw, thinlung hmunkhat nei aw. Sakhua nak na nei cengmang a si ahcun na sakhua nak cu a tak si seh. Lot ih nupi sualnak vek ah na sual ve lo nak dingah ralring aw.

                        Sakhua nak ah ka feh hla zet tiah ruat aw si, leitlun thawi hnawi hnih aw ringring ding hi ral ring aw ! Ka casiartu lak ah zohman Pastor, Pastor nu, Puithiam, le Puithiam nu si dingah ka fawrh lo. Asinan zokhal an mai kawhhran sung cio ah le an umnak ah zumtu diktak in an tuah dingmi pawl hi tuah hai seh la ka duhmi a si. Ka sim duhmi cu Pathian fa le leitlun karlak ah danglamnak nei viarviar seh la ka duhmi a si. Zianghman el ding ngaihtuah duh aw hlah. Khrih na nunnak ah na tul mi pawl kha na thinlung ah hmun a tam thei bik in pe mei aw. Na thinlung sungah Khrih hnak ih hmun nei kau sawn zohman um hlah seh. Sang tuk thlen na tum lai ah na hloh pumhlum lo nak dingah ralring aw ! Jesu Khrih cu na thinlungj, na ruahnak, le na thluak, na thazang, na cahnak a zate le na thlarau pumhlum in duhdawt aw . Pathian uknak le felnak cu hawl hmaisa aw la ziangkim cu pek belhsah na si ding ti cu zum ngam mei aw. John Bunyan ih a simmi Zinhnih Kar pa vek na si lo nak dingah le cupa tantu na si lo nak dingah ralring aw ! Na thlarau hrangah hmantlak si in na lung a kim thei nak dingah Lot nupi ih sualnak vek kha thlun aw hlah . Aw ! hihi kan Lalpa Jesu in napin ralrinnak a rak pek ,mi a si : ' leilehnak khawl par ah a kut hngat tahrat in dunglet a hawi kir tu cu Pathian uknak ram hrangah a thlak lo a si ' ( Luke.9:16 ).

 

3.                     Lot nupi parah Pathian thuthennak a thleng mi

                        Thuthianghlim in Lot nupi ih nunnak cem dan hi felfai ten in sim, ' Dunglet a hawi ih cuticun cilung ah a cang ' . Hi misual parah thuthen dingah thilmak a thleng . Nunnak petu Pathian in mitthep kar hlan ah a nunnak cu a laksak. Thisen le tisa ih a rak nung mi cu cilung ah a cang.

                        Hivek ton ding cu thlarau hrangah tihnung ngaingai a si ! Ziang tik lai khal ah thi thei dinhmun ih um hi tihnung zet a si. Sungkhat le rualpi tha an kim lai ih thihnak, mai ihkhun par ah daiten ittahrat ih thihnak, Pathian mi pawl ih thlacamnak theih phah ih thihnak, thuthangtha sungih tuahsannak in pek mi thawn hnangam zet ih thihnak, Zesu Khrih ah hngat aw in Thuthiang vek ih famkim nun nei cing ih thihnak; thihnak cu zo cio hrang khal ah kan pumpelh thei lo vek in, thih tha ih thih cu duh um zet a si. Sual nak ruangah ralrin man nak um lo ih hmakhat te ih thihnak, taksa ah cak zet le hrisel zet cingih thihnak, Pathian thinhengnak le thuthennak ruangih thihnak, hi pawl hi tihnung zet thihnak a si. Hivek thihnak hi Lot nupi in a rak ton mi a si. Litanu ih thlacamnak hi mi hrekkhat pawl in an mawhthluk vek in ka mawhthluk lo, ' Lalpa thihhruak nak ihsin in run aw '.

                        Cucu thlarau hrangah zianghman ruahsannak um loin thihnak a si. Mi hrekkhat cun ziang hman ruahsannak nei lo in thlanmual ah a liam rero mi pawl hrang khal ah vanram kai dingah ruahsannak an nei tho tho. A liamcia mi an unau le sungkhat pawl cu an thih zawng te tal ah an sual sir aw in Lal Jesu ih puan zim te an tham man em kei cu an ti ih beisei nak sangpi an neih sak. Pathian zangfahnak cu an vun ruat sal; rukru pai thingkhros par ih piantharnak kha an cun ruat sal; an mah in siamsuak dingah thazang an neih nawn lo hnu ah Pathian zangfahnak rundamnak cu an par ah an thihzawng an ihkhun par ih an ih lai ah a rung thleng hmang ke tiah an ruat. Cu pawl cu ciamciam te ih a thi mi pawl hrangah an sung le khat in ruatsannak an neih theu mi a si. Asinan Pathian thinhengnak tong ih thihhruak nak a tong tu pawl sungkhat pawl hrang ahcun cuvek thuruat ding an nei ve lo ding. Thlarau cu sualnak ruangah hmakhat te ah thuthen a si tik ah zangfahnak in zianghman sim thei mi a nei nawn lo ih thlacamnak can khal a um nawn lo. Cuvek cu Lot nupi ih tonmi cu a si. Cucu zianghman ruahsan ding um lo ih cemnak le hlohralnak a si. Helram ah a feh.

                        Asinan hi pawl hi kan zaten kan hminsin dingah thil thupi a si. Hihi kan thinlung sungah kan cinken ringring a tha: canvo tha zetzet comi nei nacing ih mai duhthlannak liolio ih sual lak ah a tlang tu le canvo tha pawl cu sual tuah nak ah hmangriangri tu pawl thlarau cu thinhengnak tumpi thuthennak hma khat te ah tong thei an si. Pharaoh khan Moses ih thilmak tuah mi pawl a hmu: Korah, dathan le Abiram pawl khan Sinai tlang par ah Pathian in ziang a sim ti an thei; Hophni le Philinehas pal kha Pathian puithiam sang pawl ih fale an si; Saul kha Samuel ih rawngbawlnak hnuai ih nung a rak si; A hab kha kamsang Eilizah ih cawp le cawp ralrinnak a rak pek mi a si; Absalom kha David fapa si in a pai lennak le thatnak rak cen tu a si; Belshazzar khan kamsang Danial kha a rak nei; Ananias le Sapphira khan a tirhmi pawl in thilmak an tuah rero lai ah kawhhran an rak zawm; Judas Iscariot kha kan Lal Jesu ih kaithlun tu a rak si. Hi pawl an zaten thutak eng le theihnak hnuai ah rak ceng in thutak dodal tu an rak si ruangah zianghman tidamnak um man lo in an par ah thuthennak a thleng ih thihter an si. Sual sir awk nak ding ah tikcu  le can an nei nawn lo. An rak nun vek in an thi ih, Pathian tong dingah an hmanhmawh. An sual nak pawl kha zianghman ngaidamnak um lo in an liangpar ah phur cing in Pathian tong ding an si, an mah pawl cu sersiam thar lo mi le vanram um dingah a tlak lo mi an si. Hi pawl hi an thi zo nan thu an sim ringring. Lot nupi vek ih eng dodal tu, zumnak tlasam nun hi tihnung a si, Pathian in sual cu a hua ih ( Sual centu ) pawl hrangah hel cu rem cia in a ret a si.

                        Ka casiar tu hnen ah hremhmun thu rel ding hi ka hreh zet. Lot nupi in a nun tawpnak ah a tonmi ka simmi hi i rak ngai thla phawt aw la. Hremhmun cu a tak ih a um zia le sankhuk ih um ding a si zia simdingah tu hi a tikcu a si tiah ka ruat. Zirhnak sual hrekkhat pawl in kan lu tlun ah tilik bang in in cim cuahco. Pathian cu zangfahnak ih khat a si ih a sersiammi le a duhdawtmi milai pawl cu hremhmun ah a thla siang lo ding, Pathian duhdawtnak cu helram hnuai lam tiang ah a phahniam aw thei ih, milai cu ziangtluk sual an si hman ah a rei le rei lo men helram ih ta hman a rundam thluh ding a si, an ti. A tirhmi pawl ih zirhnak pawl kha thlun nawn lo dingih sawm kan si. Pa Pathian in helram a rak remruat mi, Satan le a ho pawl hrangih a remruat mi thuthennak thu pawl kan hmuhdan hi a thar ih remsal ding ah sawm kan si. ' Ngilnei Pathian thu zirhnak ' cu pom dingah sawm kan si ih, helram cu nauhak tihtarh nak men a siu, tiah zirh kan si. Curuang ah, cuvek thutak dokalh ih zirhnak pawl hi kan dodal mi a si. Thu el awk nak pawl cu thinnat thlak, riahsiat thlek, le beidawn thlak zet a si thei men nan hmaton in kan zoh fiang dah lo men ding. Kei cun, mi pakhat dinhmun in, a dungthlun tu pawl ih rakzirh mi helram cu a tak ih a umzia le sankhuk ih umding a si zia pawl ka pom ih zirh khal a tul a si ka timi a si.

                        Helram a um ti thu hi milai ih suangtuahnak le thu el awk nak satliah men a si lo ti i zum aw. Hi thu hi kawhhran hruai awk nak ah ruahdan dangdang kan neih vek men a si lo ti thei aw. Hi thu hi thupuan sung ih kan theih fiang thei lo mi le Ezekiel bu sung ih a ummi biak inn pawl thu vek ah ret ding a si lo. Hi thu hi thuthangtha a hram ah a um ve mi a si. Pathian thuthen nak ih dikzia, umzia, a thianhlim zia, le zianghman ih ti danglam theih a si lo zia pawl thawn a sihcih aw thluh. Khrih ah bulpak ih zumnak neih a tulzia le thlarau thianternak pawl a tulzia hi pakhat le pakhat an pehtlai aw thluh a si. Curuangah hremhmun a tak ih a um thu kan hnawl a si ahcun khristian sakhua nak ih thutak a zaten a hnawihnih thluh a si.

                        I zum aw, hi thu ah milai suangtuahnak le ngaihtuahnak le ngaihtuahnak men ziang hman bet mi ka nei lo. Thuthianghlim in fiangzet le famkim zet ih a simmi a si. Bible in a zirhmi kan thlun ih kan pom a si ahcun a sung ih ummi helram thu hi kan hnawl thei lo a si. Bible sungih tongfang pawl hin san annei a si ahcun hremhmun ( helram ) timi cu a um a si. Thuthiang hi ciang zet le dik zet in kan let ding a si ahcun cutawk ( hremhmun ) ih a feh ding pawl  khal an um a si. Hi mi thu ah Bible in a simmi tongfang pawl hin san le sullam a nei lo a si, a ti ahcun a rua hnak cu zianghman hman tlak lo dinhmun ah a thleng zo a si. Curuangah helram a um ti thu kan el a si ahcun kan mah khal hi kan um lo a si ti ih thu el nak suah pi rero thawn a bang aw in ka ruat.

 

a.                     Na ruahnak ah thaten ret aw, Pathian cu mizangfah thiam le mi zawnruat thiam a si ih a Fapa Jesu Khrih cu misual rundam dingah a rak thlah a si ti ah in zirh tu Bible thotho in Pathian cun sual cu a hua ih sual sungah a tang ringring tu le rundamnak in ruat sak mi a hnawl tu cu a hrem hrimhrim ding a si tiah in zirh. 'Pathian in leitlun a duhdawt tuk ' tiah in zirhtu bungcang lala in 'Pathian thinhengnak cu zum lo tu pawl par ah a cam' ti ah in zirh a si (John 3:16, 36 ). ' A zum ih tihnimnak a co tu cu rundam a si ding' tiah in zirh tu thuthiang thotho in ' a zum lo tu cu siatsuah an di ding ti ah in  zirh (Mk. 16:16 ).

 

b.                     Na thinlung sungah hi thu hi hnget khoh zet in ret aw, Pathian in fiahnak par ah fiahnak in pe zo, a zum lo tu le thinlung a hak tu pawl cu a hrem hai dingih a ral pawl par ah phuba a la ding a so, cuvek thotho in thinlung a pemmi pawl par khal ah zangfahnak a pe thei a si. A hlunmi leilungpi kha tidai thawn a kholh fainak, Sodom le Komorah kha meisa in a khlohkholhfainak, Pharaoh ih ralkap pawl kha tipi sungah phim an si nak thu, Korah par ah thuthennak, Dathan le Abiram canaan ram ram sarih par ah siatsuah nak-hi pawl kan zoh tikah mangbang za in Pathian ih thuthennak cu kan hmu thei. Hi pawl hi kan hrangah san nei in thuthiang sungah ngan tel nak ih thuthennak pawl lak ah kan fimkhru thei nak ding ah a si. Leitlun ih misual le a thu ngai lo pawl par ah Pathian thin hengnak ih thuthen nak cu kan hmailam sangka ri te ah a um a si tin ralrinnak in pek. Hi pawl hin in simmi cu ' mi tha lo pawl cu helram ah hlawn thlak an si ding ' ti a si ( Sam 9:17 ).

 

c.                     Na ruahnak ah hi thu hi ciangzet in ret aw. Lal Jesu a mah rori in helram cu sankhuk ih um ding a si thu fiangzet in a sim zo. Milianpa le Lazarus ih tuanthu khan na thinlung lo khur ter ding a si. Thu a sim tik a mai ruahnak le suangtuahnak men ih sim a si lo. Zohman ih theihpi lomi thu a sim khal a si lo. Zohman ih theihpi lomi thu a sim khal a si lo. Hitin a sim, 'Thu nan theih mi hi keimai sung ih a suak mi a si lo, asinan i thlah tu ih tongkam a si' (John 14:24 ). Helram,meidil, siatnak. sankhuk siatsuahnak, sankhuk meidil, hremhmun, siatsuahnak, thimnak, rulkhuk thi dah lo umnak, meisa mit dah lo, tahnak hmun, rak rero nak hmun, hacang rial nak hmun, sankhuk hremhmun-hi pawl hi Lal Jesu a mah rori in a hman mi tongdam, helram thu a sim nak a si. Thuthangtha sim tu zo an si khal a si le, helram a um lo ti tu pawl lak ihsin la diang aw aw. Hivek in an sim tikah an theih lo nak le thuthiang par ah an rin um lo nak pawl lawng an lang ter a si. Thuthangtha buli rinum zet ih a siar tu cun Lal Jesu ih simmi hel ram a umnak thu hi hnawl ding cu a cang thei mi a si lo.

 

d.                     A neta bik ah hi thu hi na thinlung sungah feltan kilkhawi aw. Thuthianghlim in helram thu a simmi kan hnawl ahcun kan rundamnak le kan sankhuk inn pi vanram thu a simmi pawl khal zianghman lo ah an cang thluh a si. Thihhnu ah mithianghlim le mi sual pawl lakah zianghman thleidan nak a um lo ding ti ah an ruat maw si? Thihhnu ah mi zaten buai celcel in an cawhpawlh aw thluh ding maw si ? Cuti a si ahcun vanram cu vanram a si zik ual lo. Mi pahnih lungrual thei dah lo cu dai zet in ziang tik hman ah hmun khat te ah an um tlang thei lo ding.Cun thih hnu ah thlarau in kan nung ding ti teh an zum lo maw si ? Cun helram cu a tikcu a cem ti a um ding maw si? Kum ziangmaw zat hrem an si hnu ah misual pawl thlarau cu vanram ah lak soh an si dingmaw si? Cu ti a sile, Thlarauthianghlim ih rawng bawnak thianternak cu khui tawk vek ah a tul ding ? Hi lei damsung ah milai pawl cu vanram thawn mil aw ding in tuah kan si: helram sungah thiangternak aum ti zianghman theihmi kan nei lo. Cuvek thuthiang vek ih hram nei lo mila ruahnak le suangtuah nak lak ihsin la kiang aw aw! Helram cu misual pawl hremnak ah sankhuk in a um ding ti thu hi vanram cu mithianghlim pawl hrangah sankuk in a um ding ti thu ngan mi tluk in Bible le vanram khal sankhuk in an um lo na ti thawn a bang aw a si. Greek tong in 'Sankhuk hremhmun ' ti a sim nak ih a hman mi 'Sankhuk' timi tongfang hi Lal Jesu in 'snkhuk nunnak' ti thu a sim tik ih a hman mi 'Sankhuk' timi tongfang thawn a bang aw. Cun, cui tongfang thotho cu Paul khal in 'Sankhuk' Pathian ti a sim nak ah a hmang (Rom. 16:26 ).

                        Hel thu Bible in a simmi hi milai suangtuahnak men a si tiah el a awl zet men ding.

                        Hi pawl hi i tampi hna sungah rumro zet in a awn ding ti cu ka thei. Asinan ka mang a bang lo. Ziangtik khal ah thu kan sut ringring ding mi cu: ' Hihi thuthiang vek a si maw?'. Hihi a dik a si maw? Curuangah hi thu hi khristian ti aw pawl lak ah cawp le cawp ah kan theih ter leuhleuh a tul.

                        Helram thu Bible in a ngan mi hi milai suangtuahnak men a si ti ah el a awl zet men ding. ' Hmu bi', 'Zirhnak hlun', Lungruh zet ih  Pathian thu fehpi, le thil dang le tongdang a phunphun in sawisel nak kan thei dah. Tui san ahcun mizapi pom thei ding hmu kau le pom kau deuh Pathian thu zirhnak kan mamawh a si tiah sim kan si theu. Bible in a zirh kauh tluk in ka hmu kau ding ih cuhnak ih bi khal in a si lo ding. Cutin Pathian thu a la then ih tisa thinlung in a duh lo mi pawl tanta tahrat in Pathian ih nun simnak pawl a hnawng tu cu Pathian hmuh nak dik lo le fehsual an si.

                        Hremhmun thu ka sim tikah mi hrekkhat pawl cu tawk hmun ah a feh ding an um a si ti thei cing in thinnat nak le riahsiat nak nei lo ih au rero men ka si lo ti cu Pathian in a thei. Thuthangtha cu misual khawnbawl pai hnen khal ah thuthangtha cu duh zet in ka sim ding. ' Na sual cu sir aw la, Lal Jesu cu zum aw, cuticun rundam na si ding '. Asinan thutak hrekkhat la then ih misual pawl mithmuh lo ah thup men lo ding in  Pathian in i kham.Curuangah thuthiang sungh helram a um thu a sim vek in vanram thu khal a simmi pawl hi ka thup thei lo ih mi pakhat cu rundam a si thei vek in a kumkhua ih hlo ral thei khal a si ti thu cu fiang zet in ka sim ding. Ralventu in meisa kang thawk rero hmu na cing in zianghman thu theihternak a pek lo ahcun a daithlan ruangah mi sual a si ih a par ah thuthennak a thleng ding; si bawi pa in mina thi zik cuahzo cu thei na cing in na dam a si a ri ahcun cupa cui sibawi pa cu rualpi tha a si thei lo; cuvek thotho in rawngbawltu zokhal an si le, helram thu a sim dah lo ih thup men tu cu mi rin um lo a si, mi zangfah thiam taktak khal a si dah lo ding. Vawi tampi cu thuthangtha sim tu pawl lak ah mipi hna ih a kha mi thu pawl hi an sim duh lo theu. Thutak sungah a thlummi thutak a um vek in a kha zet mi thu khal a tel a si. Sikhain mina cu a ti dam bang in an hna hteihnak ih a kha zet cu an thlarau damnak a rak si theu.

                        Pathian thutak cu lathen ih a thup tu pa in ziangvek duhdawtnak saw a neih ? Ka rualpi tha bik cun ka hrangah thil tihnung pawl hmuah hmuah i sim thluh ringring a si. Misual pawl hma ihsin hmailam ih a thleng dingmi pawl a thup tu cu ziangvek milai saw a si ? Fiangten kan sim lo ahcun satan kan bawm rero thawn a bang aw a si.' A sualmi thlarau cu a thi ding ' ti ahkan sim lo ahcun satan kan bawm rero thawn a bang aw a si. Mi tampi cu thihnimnak an la zo ih an nunnak ah fel lonak le famkim lo nak an neih ruangah hel thu hrimhrim hi a theih an dih lo. Rawngbawl tu pawl hin hmailam ih a ra thleng ding Pathian thinhengnak thu pawl hi rin um zet in rak sim hai seh la mi ziangzat an piangthar in a piangthar in a piang thar mi ziangzat fel zet in an um ding ti zo saw a sim thei? Thu ngai ten hi thu thawn peh aw in mawh kan phur ding ti ka phang; kan sungah Khrih ih neih lo mi duhdawtnak ziaza kan nei a si hmang! Zangfahnak thu cu kan sim ih thuthennak thu cu kan tanta theu; vanram thu cu tampi kan sim ih helram thu cu malte lawng kan sim; ruahnak niam, cangdanmawi lo, thu ah kan sim dingmi tampi kan sim nawn lo theu. Kan par ah thu a then tu ding cu Lal Jesu a si ti kan theih hngilh theu. Cun Khrih in a rak zirhmi thu cu zokhal in a zirh a si ahcun a sual thei lo a si ti kan theih hngilh theu fawn.

                        Thuthiang vek ih a hrisel mi khrihfa na si ahcun,ka lo sim, Pathian thu na zirhnak ah helram thu khal zirh tel ve aw. Pathian cu duhdawttu Pathian a si vek in thuthen tu Pathian khal a si ti hi na thinlung sungah tha ten rem fel aw. Cuticun thuthen tu cun a mah duh dawttu pawl sankhuk ih an nunnak ding vanram cu a remcia bang in a thu lunglo ih sualnak hnuai ah a hmang aw tu pawl hremnak ding ah sankhuk hremhmun cu a rem ca a si. Piang thar lo le sual ngaidam nak a co lo tu pawl cu Pathian hmai ah vanram ah leng ding ah an tlak lo ih sankhuk hrem hmun ah hrem an si ding, tihi na thin lung sungah ret ringring aw. Cuvek misual pawl hrangah vanram ah zianghman an nuamawk nak ding a um  oih an lungawi nak ding khal a um lo.A mah awi a thlak mi an mai hmun ram te ah an feh a tul; cui hmunram cu hremhmun (hel) ti ah kawh a si. Aw! tuisan zumnak tlaksamnak san ah Pathian thu cu a sivek le a sim vek ih zumhi ziang tluk thil ropi saw a si!

                        Thuthiang vek ih khrihfa hrisel na si theinak dingah, na rawng bawl nak ah helram thu sim tel ringring ding ah fimkhur aw. Cuvek ih milai tisa duh lo zawng a sim tel dah lo tu thusim tu na si ah cun na zumnak khal ah a lo tuah tha cuang lo ding ih, Khrih lam ah a lo hruai tu khal a si lo ding, cui tlun ah sakhua nak ih thinlung diriam nak men ah a lo itthat ter sawn ding. Cuticun nangmah le na thu simmi a ngai tu hmuahhmuah hrangah tihnung za dinhmun a lo thlen ding. Pathian thu cu a hrekkhat na hnawl ahcun a dang khal kha hnawihhnih lo in na um thei lo ding. Pathian thu cu a taw le a lu a zawm aw thluh a si. Curuangah khui tawk hman lak then theih a si lo. Pathian zangfahnak le vanram thu lawng a sim theu tu pai thu sim nak cu a tlamtling lo le a famkim lo mi thu simnak a si ih tihnung za dinhmun ah zumtu pwl a thlen thei tu zirhnak a si. Pathian thinhengnak le helram thu pawl ih a tihnun zia na sim tello ahcun Pathian thu la then tu na si ih a hrek cu na tanta a si. Na thu simmi pawl cu a lar zet men ding nan thuthiang vek a si lo; na thu simmi cun mi a ti lungawi dingih an di a riam ter men ding nan mi a rundam lo ding. Pathian in a simmi hmuahhmuah zianghman thuhruk mi nei lo in thu sim aw. Cucu a siatkhat thlak in a hrang tuk an ti men ding; midang pawl tih tarh rero cu mihrangah thil tha a si lo na ti men ding. Asinan thuthangtha ih tumtah mi pakhat na hrelh a si, ' midang pawl a ra thleng lai dingmi thinhengnak ihsin runsuak ding ah ' na mawhphurhnak na tuah suak lo a si. Minung in tihnak an neih tik ah khur  cing in Pathian hmai ah a ra kir mi tla an um thei a si. Mi tampi in an thlarau hrangah tih a nung mi thil ra thleng ding pawl cu an tih sinsin ahcun thiltha a si ding.

                        Khrihfa hrisel mi na si ding ahcun na dinhmun a tawpnak ding thaten ruat sal theu aw. Lungawinak na tong ding maw, vansang le hangcang rial nak na tong ding maw ? Midik pawl thihnak vek in na thi ding maw, Lot ih nupi thihnak vek in na thi ding maw ? A kumkhua in na nung thei lo; ni khatkhat cu na cemni a thleng leh ding. Thusimmi netabik na theih can a um leh ding; a netabik thlacamnak cu na hrangah cam a si leh ding; na hrangah Bible cu a neta bik ah siar a si leh ding; duh thu samnak, ruahsannak, tumtahnak, khawkhannak, thlahrunawk nakpawl cu ni khatkhat ah an tanta leh ding. Hi leitlun cu na suahsan dingih a thianghlim mi Pathian hmai ah na din can a thleng leh ding. Aw ! cu tikah cun na fim puppi ding. Aw ! cutikah nineta ih na cemnak cun na ruahnak a lo luah khat ding ! Na thia rero ding maw, na lung a awi ding.

                        A kumkhua in na ngaihsam thei lo ding; na hmai ih a thleng mi na ngai pawimawh zet can a thleng leh ding. Na thlarau hrangih thil tul mi pawl hi a kumkhua in na ngaihthah thei lo ding ih Pathian hmai ah na sual nak hmuahhmuah hrangah salt suah na tong leh ding. A kumkhua in hla sak ringring, khawm ringring, ei le bar ringring, casiar ringring, hni kurko ringring, lungawi zuamzo ringring, thil tha tuah ringring , khawkhang ringring, le sum ngaihtuah ringring in na um thei lo ding. Thal can ih cucik kharbawk pawl kha nisa lak ah a kumkhua in an um thei lo. Tlailam ni a liam tik ah an tikcu cu a kumkhua in a liam ta ding. Cuvek cu na dinhmun a si ding. Tu ahcun na sakhua nak cu zianghman ngaihsak lo in na um ding; Pathian rawngbawl tu pawl ih thu simmi pawl cu zianghman siar lo in na um ding; asinan nitlak nan tikcu a nai rero thlang a si, cuticun Pathian thawn hmaton in nan tong aw ding. Cule na tawpnak cu a lo sim ding. Zianghman ruahsannak um lo in Lot ih nupi vek na si ding maw ?.

                        Tui ka thu sutnak hi thinlung tak ih ruat phah in hmaton in na ngaihtuah ding ah Pathian zangfahnak in ka lo ngen a si. Na thinlung cu leitlun ah phum aw in Pathian zangfahnak cu na ngaihthah men in daithlang ih na um ding ka duh lo. Nitin ih na nutudan, nun khawsak dan le na cangvaih dan pawl in ' Pathian duhdawtnak cu na sungah a um lo ti  ' a lang ter lai ah na kaa cun naal zet in Pathian duhdawtnak thu cu sim in nangmah lala cui pai duhdawtnak ih nung in na rel awk rero ding ka lo duh sak lo. Pathian ahcun zangfahnak tiva bang in a um, asinan thinpem ih Khrih ah zumnak nei tu pawl hrang lawng ah a si. Pathian ih duhdawtnak cu sim theih rual lo le milai tongkam in simfiang theih rual a si, asinan cui duhdawtnak cu Khrih ah zumnak ih nung tu pawl hrang lawng ah a si. Cui duhdawtnak ahcun phurnak nei dingin hawl aw. Sual a si ti na theih mi pawl kha tanta aw ;ral tha zet in leitlun cu suahsan aw; Pathian hnen ah tap phah in bawmnak dil in thlacam aw; a tu le a kumkhua hrangah Khrih par ah zianghman leitlun ah seherh mi nei lo in hngat aw tawp mei aw; ziangvek phurrit hmuahhmuah khal a ke hram ah thum mei aw. Thildang zianghman ah na thinlung kai awk aw hlah seh, na thlarau rundamnak hrangah hngat aw tawp mei aw; nangmah le vanram karlak ah zianghman in lo dal hlah seh, a lo dal tu cu ziangtluk man khung hman si seh la tanta men aw. Hi leitlun lawng hlun pi hi na ke hram ah a pil cuahco mi a si; na hrang a lotheihlo ih a tul mi pakhat cu lawng sungah him dam ten um in lawng cawlhnak hmun ah na thlen thei nak ding a si. Hril na sinak le kawh na sinak cu ciangfel ding in zuam aw. Ziang vek khal na kiangkip ah cang khalseh la vanram cu na ta a si ti ciang ding in zuam aw. Na inn le na lo ah ziang thil khal cang seh la cu hmuahhmuah hnak in vanram na thlen theinak dingih na lamzin zawh mi kha tha ten zoh ringring aw, Khawm nak hmun ah to ve ringring ih Pathian thu tla sim le rel vel theu cing in Lot nupi vek ih helram feh hnak cun tui na dam sungah leitlun thil cu hnihsan men ih vanram na sankhuk cennak hmun ah ca co ve ding cu a let thawng khat in a tha sawn deldel a si.

                        Ka thu cemternak ah ka casiar tu pawl hnen ah an sia-tha-theihnak khawng ding inthusutnak malte thawn ka cawl hrih ding. Lot ih nupi thuanthu cu na thei zo, a can vo that nak le a tawpnak ih tihnunzia pawl khal na lung sungah an fiang kelkel zo. Thlarau laksawngtel lo in sakhua canvo tha pawl cu zainghman a si lo zia; zumtu ti aw si, leitlun thawi kai awk aw ringring tu si ih a tihnun zia; helram a tak ih a umzia le Pathian in leitlun sakhua nak ih cavo tha nei le sakhua nak ih rak hmang aw tu kha a mai zangfahnak tel lo cun zianghman ah a siar lo zia pawl na hmi zo. Na thinlung sungah thu malte ka run thehlut ding ih i rakngai thiam aw. Tu lai san ih sakhua enghnuai ah le theihnak hnuai ah tlangleng in, tui a pil cuahco mi leitlun lawng sungih a um mi pawl hrangah ralrin pek nak malte ka run tarlang duh. Thlarau lam khual a thawng tu pawl lamzin kil tin ah 'Lot nupi hi thei ringringuh' ti ah ka tar vivo duh a.Khrih a vawihnihnak a rat tikha itthat ledaithlangin a lo tangding maw? Ala! Mi tampi an si. Sodom khua mi le Noah san lai minung pawl vek in an ei ih an in, thlai an cing in inn an sak, nupi pasal an nei aw, nuamnung can in annung ih Khrih cu ral san nawn lo ding vek in an nung. Tui ni ah cuvek lakah mi pakhat na si ve ngelcel ahcun ka lo sim, 'Ralring aw: Lot nupi kha thei ringring aw'.

 

b.                     Na khristian nak ah hlim dawk lo, dai dawk lo in na um maw? Cukel tete! Mi tampi an sisi. Lal pahnih rian an tum; lennak le Pathian rual pi that kawp an tum. Pakhat khat ah kawp bulba nei lo in thlarau palap si antum; khristian taktak an si lo, cun khatlam ah leitlun mi taktak vek in an lang lo. Khristian an ti aw nan an nun ah Khrih thingpar ih a thihphahnak 'sual' thawn an nung ih an sungah Khrih duhdawtnak taktak a um lo zia a lang. Cun leitlun mi ti zik le thu an thei ih an zumnak ahcun tongthei zet in an tang tengteng. Cuvek lak ah mi pakhat a si ve maw? Ka lo sim, 'Ralring aw: Lot nupi kha thei ring ring aw'.

 

c.                     Ruahnak pahnih lakah thu thenhnih aw thei lo in leitlun ah na kir zik zuakzo maw? Aze! Cuvek cu mitampi an sisi! Khros phurh ding cu an tih: sakhua nak ih lungphum tu pawl tonmi an tih, nautatnak le harsat nak pawl an ruat ngam lo. Nelrawn ram car ah Manna ei le thinphang ih um an ning ih Igypt ram ah cang thei seh la kir sal an duh.Cuvek lakih mi pakhat na si ve ahcun, ka lo sim, 'Ralring aw: Lot nupi kha thei ringring aw'.

 

d.                     Na nun ah sual thup na nei ringring maw? A khai! Cuvek milai tampi anum! Sakhua nak ah hla pi an feh zo ih thiltha tampi an tuah zo, Pathian fa an bangnak dingah thil tampi an tuah zo. Asinan an thin lung sungah an ngainat zet mi sual thup an kawl ringringih cucu ziang tih hman in anthen thei lo. A thup ten tisa mi sinak, leitlun thawi rualpi that awk nak, mi thil dawtnak, hiar nak, mai tisa duhnak di riam tr nak, hiveksual nak pawl hin anvun cu an taksa ah a kawp bang in an thinlung sungah a kawp ih a bet feofeo. An milem pawl cu an khui thluh ko nan hi sual thuhruk pawl hin an thinlung sungah a luah khat ringring ih Pathian Thlarau cu cui sual pawl thawn milai thinlung sungah ceng ding ah a thianghlim tuk. Cuvek lakah pakhat na si ve maw? Ka lo sim, 'Ralring aw: Lot ih nupi kha thei ringring aw.

 

e.                     Sualnak fate tiih na ngai pawimawh lomi thawn daithlang zet in na um maw? Cukel! Cuvek minungcu an tam tuk ual! Thuthangtha ih zirhmi a lotheihlo ih a tul mi pawl cu an pom. Thil bawrhhlawh pawl lak ihsin an la kiang aw ih langhngan ih Pathian dan buarnak ihsin ankil him aw, asinan a ningnat thlak zet mi pakhat cu, thilf ate ti ih an ngai mi sual pawl ah pawi tinak an nei lo. Cule ningnat thlak zet incui an sual pawl hrangah cun puhmawh ding an hawl thei ringring. Malte thinhengnak, malte capohnak, malte ruahnak tlaksamnak, malte theihhngilh hman nak, malte mi va rel siatnak, malte ei ruk nak, hivek pawl ah Pathian thinhengnak a tlak lo an ti. Zohman mi famkimkan um lo ih Pathian khal in cuvek tluk lawmman cu in phut lo ding! an ti. Cuvek lak ah mi pakhat na si ve maw? Na si pang ahcun ka lo sim, 'Ralring aw: Lot ih nupi kha thei ringring aw'.

 

f.                      Sakhua nak ih canvo thatha na neih mi ah na thum aw pang maw? Ai! Cuvek zumtu mi tampi an um e! Thuthangtha tha zet ih ngaihthlak ringring nak, kawhhran rawngbawlnak a phunphun ah tel kim vek nak, thlacamnak hmun ih tel ringring nak, cuticun hi pawl le hmasawnnak ih rawngbawlnak a phunphun a hnuai ah an nung ih cui an canvo tha ah an thinlung an thum. Cule cui canvo pawl ih an tel nak ah mi fak an hlawh nak pawl ahcun anlung awi tak ih an tel nak ah mi fak an hlawh nak pawl ahcun anlung awi tawk ih an nawmnak khal cuvek canvo ahcun a si. Milian zet vek an bang ih thil le ri neihnak ah an thangso zet, mamawh mi zianghman nei lo an bang (Thup.3:17); asinan cuti ih an um lai ah, zumnak, zangfahnak, thlarau mi thinlung, vacung ram ih a um ding pawl hrangah a tul tengteng mi thil pawl zianghman neih mi an nei lo. Cuvek lakah mi pakhat na si ve ahcun, tuini ah ka lo sim, 'Ralring aw, Lot ih nupi kha thei ringring aw'.

 

g.                     Sakhua thuhla na theihnak ah na hngat aw maw? Mi tampi in anhngat aw! An nih cu midang vek in theihnak nei lo mi an si lo: zirhnak dik le dik lo khal an thei thiam. Thu an elthei,thu anruat thei,anruahnak hrangah tanlak an thiam zet, thuthiang khihhmuh ding an thei zet; a sinan cuti a si laiah an piangthar hrih lo, sualnak le thimnakhnuai ah mithi an si. Tu i ni ah cuvek lakha mi pakhat na si ve ahcun ka lo sim, 'Ralring aw, Lot ih nupi kha thei ringring aw'.

 

h.                     Sakhua mi ti aw cingin leitlun thawnna kaihhnih aw ringring maw? Cukel! Mitam pi an sisi! Mi dang pawl in khristian a si in ti hai seh, ticu an tum tawk a si. Thutak mi, mi ciamciam, famkim, khawm taima mi ti ah mi ih ti ding cu an duh thusammi a si; asinan cuti a silai ah an hnipuan hruhdan, an rual pi du zawng, nuam an ti zawng, anlung awi nak, an thinlung catbang lo ih a luah tu cu leitlun thil in a khat, hi pawl hin an sinak ciah leitlun mi ansinak cu a lailang thluh. Cuvek lakah mi pakhat nasi ahcun ka lo sim 'tui ni ah ralring aw, Lot ih nupi kha thei ringring aw!

 

i.                      Na thihzawng ah Pathian hnen ah sir awknak nei dingah ruahsannak na nei maw si? Ala! Mitampi cuvek ruahnak nei an um! An si ding vek in in ansi thei lo nak cu an thei aw; asinan an piangthar hrih lo ih Pathian fa ah an tel hrih lo ruangah thi tlak an si. Asinan an mah le an mah cu an hnem aw ih an thihzawng ih ni netabik ah Pathian hnen ah sir aw sal inKhrih hnen ah ra ding in rundamnak co dingah an ruat aw, cuticun an thithzawngte ah leitlun cu suahsan ih Khrih hnen ah ra in sual ngaidam mi le thiamcoter mi si in Vanram kai cu an tum. Mi tampi cu hmakhat te ah thihnak an tong theu ih an that lai ih an nundan vek in mithi khua an thleng theu ti an theihhngilh. Cuvek lakah mi pakhat nasi ahcun ka lo sim,'Ralring aw, Lot ih nupi kha thei ringring aw'.

 

J.                      Evangilical kawhhran misa na si maw? Mi tampi cu an si. Ala! cu hnak ih hla an feh nawn ! Cawlhni tinte Pathian thuthangtha simmi cu an thei ringring ih an theih tamtuk nak ah ci rawt lung hnak ih hak deuh a an cang. Thu simmi pakhat hnu pakhat tha zetzet cu an thei ringring ih thlakhat hnu thlakhat zum dingih, sir aw ding in le Khrih hnen ah ra in rundam si dingah sawm an si ringring. Kum khat hnu kumkhat a liam vivo ih danglam nak an nei cuang lo. An ke cu an duh zawng thu sim thiam pai ke hram ah an ret ih an duh zawng sual khal cu an ke hram ah a um ringring thotho. Cuvek lakah mi pakhat na si ve ahcun tui ni ah ka lo sim, 'Ralring aw, Lot ih nupi kha thei ringring aw'.

                        Aw! Himi Lal Jesu ih tongkam hin kanthinlung sungah thuk zet in hramthla hram seh! kan ihhmut lai fang ah in thangharh in,mithi vek ih kan ih laifang ah in kai tho hram seh; ngawng tawh zet ih kanum laifang ah in fimvar ter hram seh; dai ziarziar ih kan um lai fang ah in ti hlum hram seh ! Satan in depde zet in kan thinlung sungah thlemnak a thlenter lai ah in hum tu si hram seh. Kan ral donak ah in fimkhur ter tu si hram seh! 'Khrih cu tanta aw la, leitlun ah rak kir sal in i thlun aw' tiah Satan in in sawm rero lai ah khui tawk kan feh ding ti in simthei tu si hram seh. Leitlun ah thlemnak harsa kan ton lai ah 'Na thlarau a lo rundam tu ih ralrin nak a lo pek mi kha thei ringring aw' ti aw thei tu si cio uhsi. Aw! Thlarau! Na Lalpai tongkan na theihhngilh zo maw si? Aw! Thlarau! Thlarau! Lot ih nupi kha na theihhngilh zo maw si?