9.                                                         LOT -RALRINNAK

Thok(Oct.18/03)

                                                                                                            'A thukthun' (Seem. 19:16)

 

                        Thuthianghlim cu kan mai zirh awknak hrangah nganmi asi vekin ralrin peknak le nuntudan lam hmuhtu pawl a tel. Kan tuah dingmi, kan tuah lo dingmi le zohthim dingmi pawl in hmuhter.  Hi ca hmahruai ih hmin ka tarlangmi hin Khrih ih kawhhran pawl hmuahhmuah hnenah ralrinnak in pek asi.  A mizia kha kan hmai ah tawiten hmuhter kan si: 'A thukthun'.  Rei lo te sung kan to rem in hi ralrinnak in pek mi zoh in ngaihtuah hnik uhsi.  Lot ih thu hi thaten hruat hnik uhsi.

                        Hi a thukthun aw rero mi pa hi zosaw a si.  Hi pa hi mi rinum zet Abrahman in tupa a si.  Ziang tikah saw a thukthun?  Sodom khua siatsuah ding zingah khan a si! Khui tawkah saw a thukthun? Sodom phar dawl sungih a um lai ah.  Cun zo ih hnenah saw a thukthun? Amah le a sungkua kha khawleng lamah a hruai suak tu ding Vancungmi pahnih pawl hnenah a rak thukthun asi. Cuvek dinhmun le canah Lot kha a rak thukthun!

                        Tongkam ka hman mi pawl hi an mawi tuk lemlo nan suangtuah nak hrangah cun rawl thaw an si thotho.  A hminthang sakhuanak nei tu pawl hnen ahcun tawtawrawt phawt mi vek asi ding.  Himi casiar tu pawl hmuahhmuah hnenah ruatnak tha a pe ding ti ka zum.  Hi pawl hi na thlarau hrangah a lotheihlo ih thil tul an si lo ding ti zoso a thei? Lal Jesu in Lot ih nupui kha thei ringring dingah in fial (Luke 17:32). A rawngbawl tui tongkam hmangin Lot ih thu hi vun ruat tha sal dingah a lo sawm.

                        Hi pawl hi ka lo hmuhter ding:                                                                                                         

                        1)  Lot kha ziangvek minung asi?

                        2)  Cabu sungih Lot thuanthu ngan mi in ziang in sim?

                        3)  Ziangthu ruangah Lot kha a thukthun?

                        4)  A thukthunnak ruangah ziangvek rah a rah suak?

                        Khirhfa diktak ka si ti-awk theinak nei tu le thianghlim nunih a nung duhtu pawl a biktakin thaten ngai thla dingah ka lo duhsak.  Thianghlim nun in kan nung asi ahcun hi thu pawl hin kan tluak sungah hmunkau zet luah hram she.  Kan nuntudan ah 'thukthun’ hlah uhsi.

 

Vawikhatin ka sim sal ding, 'Lot hi ralrinnak pakhat asi'. 

 

1.                     Lot kha ziangvek minung asi?

                        Hihi a thupi bik asi. Hi thu ka tanta ahcun Khrihfa ti aw pawl hnenah ka theihter duh mi hrelh ah ka cang ding. Hi thu hi ka sim fiang lo ahcun casiar tu pawlin, 'Ah, Lot cu mithalo, misual, ten-umza, piangthar lo, leitlun tisa mi a si ih a thukthun khal a mawh lo’ an ti pang ding.

                        Asinan ka simmi hi thaten hminsin aw. Lot kha mi danglam asilo. Lot kha zumtu diktak, mi piangthar, Pathian fa tak, thiamcotermi le mi dik a rak si.

                        Casiar tu lakah mi pakhatkhatin Pathian zangfahnak a co nan um maw? Cucu Lot in a co ve asi. casiartu lakah pakhatkhat in rundam si dingah ruahsannaka nei maw? Cucu Lotkhal in a nei ve. Ka casiar tu lakah mi pakhatkhat cu sersiam thar asi maw? Lot khal kha asi ve. Ka casiartu lakah mi pakhatkat cu khrsitian lamzin bite ah khual a tlawng rero mi a si maw? Lot khal kha asi ve.

                        Hihi keimai bul ruahnak asi tiah zohman in ruat hlah hai seh. Lot hi ka lainat ruangah zohman in mi piangthar si-ter ka tum ah in ruat hlah hai seh. Thlarau Thianghlim in zohman el theih loin a rak tarlang zo, Lot cu 'mi dik' le 'mi ding' a si (2 Pet.2:7,8). Hi Thuthiang sungah kan hmuh thei mi hin Lot nunnak sungah a ummi Pathian zangfahnak cu a takin in hmuh ter.

                        Thil pakhat a fiangmi cu sualnakin a khahnak hmunah a rak nung. A hmuh mi le a theih mi cu sualnak hlir in a kulh (2 Pet.2:8). Asinan amah cu sualnak sungah a pilt lut lo. Babylon ih Daniel, Ahab inn ih Obadiah, Jeroboam inn sungsang ih Abijah vekin Nero ih umnak hmun le Sodom khaw sungah um cingin Pathian hmaiah mi ding si thei dingah mi pakhatkhat cun Pathian zangfahnak a co a tul asi. Pathian zangfahnak lo cun cuvek lakah dingzetin nun thei ding cu a cang thei lo mi asi.

                        Thu pakhat a fiang zetmi a um, Lot in a umnak khua mi pawl 'sualnak a hmuh tikah a thin a na zet' (2 Pit.2:8). A kiangkap milai pawl sualnak ruangah Lot ih thinlung kha hliam in a umih, a riah a sia, a ning a hangih thinnuam loin a um. Anih khal hi a thianghlimmi David vek a rak si, 'milai pawlin na thu an thlun lo ka hmuh tikah ka riah a sia', 'na dan pawl an thlun lo ka hmuh tikah ka mit thli ti bang a luang' (Sam 119:136,158). Hihi St.Paul in a rak simmi vek asi, 'riahsiatnak tumpi le catbang lo ih ninghnanak ka nei... ka thi le ka sa asi mi pawl hrangah' (Rom 9:2,3). Hivek thinlung an neihnak hi ziangdang hman asilo, an thinlung sungih Pathian zangfahnak an neih mi ruangah asi.

                        Lot kha mifel a sinak langtertu a dang pakhat leh cu a kiangkap ih milai pawlin sualnak an tuah mi kha a hmuh tikah 'nitin in a thinlung sungah riahsiatnak a tuar' (2 Pet.2:8). A kiangkapih mitampi pawl vekin a nitin nunah sual thawn cawhpawlh nun in a nung lo. Mi tampi cu an kiangkapih an hmuh le an theih ringring mi sualnak pawl cu pawitilonak an nei ih anmah lala in zianghman sual phuhrung awknak nei loin an tuah theu. Asinan, Lot cu a kiangkap ah a hmuh le a theih ringring mi sualnak pawl kha tuah loten a um tlunah a kiangkap ih sualnak pawl cu a hua zet. Mi tampi cu sualnak hi an hmuh hmasa ahcun an thin a phang in mak an ti zet theu nan, ni a rei deuhdeuh, an hmu tam deuhdeuh tikah a danah an neih menih an hmuh tirah sual maksak an rak ti rero mi pawl sualnak kha anmah rori in nuam ti zet le zianghman thlahrun awknak nei lo ten an tuahtheu. Cuticun an kiangkapah an hmuh ringring mi sualnak pawl cu zianghman pawi tinak an nei nawn lo. Hivek hin mi tampi khawpi sungih a ummi le khual a tlawng mi pawl dinhmunah a cang duh bik theu. Cuvek minung pawl hrang ahcun cawlhni bawhsiat hi zianghmanah an pawi ti lo vekin thilsual dangtuah khal zianghman pawi tinak an nei nawn lo. Asinan Lot cu cuvek milai a rak si lo ih a kiangkapih sual a hmuh tikah riahsia in a nung. Curuangah hihin Lot kha Pathian zangfahnak cotu asi zia a langter.

                        Lot hi Thlarau Thianghlim in a nunnak ah seal a khen mi le hminsinnak a tuah mi, mi dik le mi ding asi.

                        Thudangah kan feh vivo hlanah khrihfa diktak pawl nunah hin tlinlonak, famkim lonak le tlaksamnak pawl hmuh ding a um thei a si ti hi theih hngilh hlah uhsi. Sui hi hnawmbal thawn a cawhpawlh ruangah kan hnawng cuang lo. Pathian zangfahnak hi milai thlinlonak thawn a cawhpawlh ruangah kan hnawng ding asilo. Asinan siar vivo aw la, Lot ih thukthunnak ruangah ziangvek thil a thleng ti na thei ding. Cutin na siar vivo lai khalah Lot kha Pathian fate taktak asi ti theih hngilh aw hlah.

           

2.                     Cabu sungah Lot thu hi ziangtin sim asi.

                        Ka sim duhmi pahnihnakah ka feh vivo ding. Cabu sungah Lot thu nganmi hin Lot hi ziangvek mizia nei mi asi ti in hmuhter ti kan zoh ding.

                        Himi tongkam hi ngaihtuah um zet le makzet asi: 'A thukthun'. A dinhmun le a tikcu pawl hi kan zoh le mak kan ti deuhdeuh ding. Lot in a umnak khua mi pawlih mangbangza sualnak pawl kha a thei. Pathian hmai ah an sualnak pawl hin Pathian thin a hengter.

                        Lot in Sodom khawpi parih thuthennak a thleng ding mi kha a thei cia. Vancungmi pawl in fiangten an sim zo, 'Lalpa in hi khua siatsuah dingah in thlah zo' tiah Lot hnenah an sim. (Seem.19:13). Asinan 'a thukthun'.

                        Lot khan Pathian cu a tongkam vekin ziangkim a tuah tu asi ti a thei, curuangah a ttongzo mi cu a tuah tengteng ding asi ti khal a thei. Asinan a thukthun. Abraham ih tupa a si ih Abraham hnenah reipi a rak ceng zo nan, Pathian hnatuannak pawl kha a rak ngaihsak lo. Pathian in ralrinnak pe in khawsung ihsin suak dingah a sim tikah a ttihnun zia kha Lott cun a thei ruangah a makpa pawl kha khaw sung ihsin suak ve dingah a fial hai. 'Tho uh la, hi hmun ihsin suak uh; Lalpa’n hi khua a siatsuah ding' ati (Seem.19:14). Asinan amah riangri a thukthun. Pathian vancungmi pawl khan Lot le a insang pawl thlansuak dingah an timtuah rero lai an hngak ih an ding ringring kha a hmu. A hna in Pathian thlah mi pawl ih thinheng au thawm kha a thei. 'Hi tawk ih ummi na fanu le na nupi kha hruai aw la feh aw; hi khua mi pawl sual nak ruangah siatsuah na si ve lo nak ding ah' (Sem.19:15). Asinan Lot cu a thukthun.

                        A hmanhmawh ding tikcu ah khan a taw a tlai. Hmasawn ding asi lai ah khan a taw a tlai ih hloptlo ding asi lai ah a nuar. Phar rero ding asi lai ah khan a muangcang. Sa zet ding a si lai ah khan a dai ziahziah.

                        Hihi thil danglam zet le zumharsa asi. Kawpi pakhat meisa in a kang zik cuahco laifangah tthuktthun tthuahttho in a rak ummi mi pakkhat hi ziangvek minung so asi. Asinan Thlarau in kan zir awknak dingah a rak ngan zo. Hi thu kan theih pek ahcun mangbaza vekin a lang nan tuisan khalah Lal Jesui dungthlun tu mi tampi hivek dinhmunah an ding pang ding ti ka phang.

                        Himi casiartu hmuahhmuah in thaten nan cinken ding ka lo duhsak. Ka sim duhsan pawl hi theih sualnak um lo ding khalin ka lo theihter duh fawn. Lot kha a thukthun ti ka lo hmuh ter zo. Tulaisanah nunau mipa ti um loin, khristian ti aw pawl lakah Lot vek mi tthuktthun tampi an um asi.

                        Pathian fa le mi tampi lakah a tufangih an thlarau lam dinhmun hnakin a tha sawn mi nundan ding a thei tu, a tufangah an tuahdan hnakin a tha sawn mi tuahdan ding a thiam tu, a tufang an sinak hnakin Pathian hrangah hna tampi tuan thei nak ding lamzin thei cingin mai dinhmun kelah a um ringring mi mi tampi an um. Kum reipi sungah an cangvaihdan le an tuah mi cu a tha zet nan hma an sawn nawn lo. Anmah kel ringring an si.

                        Khrih cu an nunnak Lu ah an pom ih thutak cu an duhzet. Thusim thatha cu an ngai duh zet. Thuthiang zirhnak thatha khal an ngaina zet, asinan an theihmi nunpi thei lo nak an nei. Vawi tampi Pathian rawngbawl tu pawl riatsiatnak an tuah ringringih anmai lakah hma a sawn deuh mi Khrihfa unau pawl thin tla an na terin an riahsiat ter ringring. An sinak hi thei aw hai sehla cu an dinhmun kel ah an ding ringring lo ding.

                        Vanram a um asi ti cu an zumnan vanram thlen ding khal hngakhlap nak an nei lo: helram a um ti cu an zumnan zianghman tih ciamco nak an nei lo. Lal Jesu cu an duhdawt ko nan A hrangih an tuah mi cu mal takte lawng asi. Satan cu an hua nan vawi tampi satan duhzawng an tuah tikah anmai nuntudan lala in satan cu an hnenah ra dingin an sawm sawn a bang. Tikcu le can cu a tawite ti an thei nan can saupi um lai vekin an nung. Ral do ding an nei ticu an thei aw nan, dai ziarzi ten an um men. Tlan zuam awknak ah tel ding an si ticu an thei aw nan, to men vekin an lang. Thuthen tu cu sangka ah a um ih thinhengnak a ra thleng dingmi a um ti an thei nan; an taksa hrekkhat cu a it that ringring in a lang. An thlarau dinhmun theihfiang tikah mangbaza ansinan; an mah kel ten kumkhaw zariat an um.

                        Cuti asile hivek milai pawl thu thawn pek aw in ziang sim ding kan nei? Pathian zumtu rualpi le sungkhat pawl mang an bang ter. Thin hehhengnak tampi an suah ter. An kiangkap ih ummi pawl hrangah thinlung an-hai nak le thinlung va-vaihnak tampi an suahter. Rinhlelhnak le zum awk lonak pwl an suahter. Cupawl cu an zaten thutlang pakhat suangah an tel thluh : Lot ih farnu le unau pawl an si.

                        Hiek milai pawl hi an thinlung le an suangtuahnak sungah ruahnak dik lo nei tu an si; zumtu zaten thlarau mi si dingah le thianghlim dingah a cang thei lo ding tiah an ruat. Thianhlimnak taktak cu a ropi zet asi tiah an zumih mi zapi si dingah an tum lo. Cabu sungih thianhlimnak thu siar tla an paih zetih a cancan cu mi nunah thianghlim nun hmuh tla an duh zet theu. Asinan cucu anmai nunah si ve dingin lak le nunpi dingah an tum dah lo. Cule cuvek a thianghlim dinhmun cu ziangti lam hman in an thlen thei lomi dinhmunah an ret.

                        Hivek milai pawl hi an thinlung sungah duhdawtnak dik lo  nei tu pawl an si. An thinlung sungten mi hmuhsual ding phangin an umih asi lo lamah an feh. Zovek milai poh thaw khalin lungrual thei le tha si an tum. Asinan a pakhatnakah a thupi bik, Pathian ti lungawi ding an theih hngilh.

                        Hi pawl hi mah le mah thei aw lo tu pawl an si. Lalpai thupek pawl hi an nunah nupi theih lomi vekin a lang, 'Mai khros phurh ding, kut vawrhlam kut tan ding, le mit vawrhlam porh ding' (Math.9:25;30) pawl hi thilc ang thei ah an ruat lo. Hihi Lalpa in a sim ti cu an el lo nan an sakhuanak ah thutakin hmun a nei lo. An dam sung cu an lamzin sangka ti kau deuh dingah le an khros cu ti zang deuh dingah an zuam ciamco. Asinan an pitlin dah lo.

                        Hivek milai pawl hi ziangtik lai khalah leitlun thawi rualrem tum ringring tu pawl an si. Leitlun thawn rualpi tha an sinak le rem aw zetin an um tlang theinak pawl hi rinhlelh kai zet asinan leitlunah nuamnung an cennak le an thinlung diriamnak an tuah mi pawl hrangah ziangmaw puhmawh ding annei ringring. Vawikhat cu Baibal siarnak ah phur zetin an telve na thei ding nan, a thaizing ahcun bawhlungsitnak ah phur zetin an tel kha na hmu dingih a thai zing leh ah maw nikhatkhat ah simaw, rang tlanzuam awknak ah phur hloptlo zet in an tel kha na hmu dingih a hrekkhat le pheicu phe kah nak hmunah ziangdang hman ruat loin an tel kha na hmu ding. Nikhat cu Pathian thusim thiam zet pai thu sim ngai ah an tah rero na hmu dingih a thaizing cu ca-ngan thiam pa’i thuanthu bu siarah an tah rero na hmu ding. Vawikhat cu Lalpai zanriah kil khawmnak Grape no an dawm na hmu dingih a hnu rei lo te ah zu no phun dang an dawm na hmu ding. A kumkhua in leitlun tisa rualpi pawl thawn pawl kawm aw in nuam nung cen nak ah anmah le anmah diriam awk ter an tumih anmai tisa thinlung in thiltha tiah an ruah mi pawl an tuah. Asinan an dinhmun taktak cu zianghman thiltha tuah mi nei lo an si ih a tak ahcun anmah le anmah an thlarau hliamhma an put aw rero men asi. Zangfakza an si.

                        Annih cu an thinlung sung cencilhtu sual a do neh thei lo tu pawl an si. Zeetnak, daithlainak, thintawinak, porhawknak, hamtamnak, tuar thei lonak, le tisa hiarnak pawl hi ziangtik hmanah an do neh dah lo. Hivek pawl hi an thinlung sungah zianghman hnaihnawknak um lo ten an pai ringringih cu pawl cun an nun hi a hmang theu. Hihi an hriselnak, an nuntudan, an tuarfeinak le an lamzin asi tiah an ruat. A hlan ih an pu, an pi, an  nu, an pa, an unau pawlih rak neh zo mi a si tiah an ti thei lo. Ziangti hman in an sinak cu thleng aw thei an silo tiah an ruat. Cuticun kum ziangzat a rei khal len an thu na theih tinten anmah kel an sing rinringti na thei ding. Curuangah an zaten catlang pakhat sungah ka telh thluh hai; Lot ih farnu le unau pawl an si. An thukthun.

                        A thukthun mi thlarau na si ahcun na lung a awi thei dah lo ding. Na si lo ti na thei aw maw? Na rak si pang ahcun thilmak asi ding. Thukthunnak hi khrihfa pawl lungawinak a siatsuah tu pakhat asi. A thukthunmi sia-tha-theihnak cun milai sunglam ih daihnak le lungawinak pawl kha a dal asi. A vawikhatnak ahcun na tlan cak zet ko. Asinan a hramthawk ih na duhdawtnak kha na hloh; a hramthawk ih na tonmi hnangamnak vek kha na tong dah nawn lo, a zum thawk ih na tuahkel te ah na kir sal lo ahcun Khrih ah na lungawinak  cu na tong sal nawn lo ding (Thup.2:5). Lal Jesu kha misual pawl kutah a um lai ah Piter in lam hlapi ihsin a rak thlun bangin nang khalin Lal Jesu cu lam hlapi ihsin na thlun ve asi ahcun harsatnak lawng na tong ding.

                        Ra aw la zohhnik! Lot ih thuanthu hi hminsinhnik. Ra aw la, Lot ih thukthunnak pawl hi zohnik, cuticun fim ve thlang aw. Thukthun aw hlah.

 

3.                     Ziang ruangah Lot kha a thukthun asi pei?

                        A netaah Lot ih thukthunnakthu ruat khawm hnik uhsi. Hi thusutnak hi a thupi zetih ngai pawimawh zet dingah ka sim duhmi asi. Natnak hrik theihfiang ding cu sibawi thiam pawlin mina tidamnak dingin a hmaisa bikah an tuah thei mi asi. Ralrinnak pek cia mi pawl cu ralthuam thawn thuam cia mi an si.

                        Himi casiartu lakah thukthun phang lo zet in ka thukthun dah lo ding ti ngamtu an um maw? Lot ih thuanthu malte ka lo sim lai ahhin ra aw la in ngai hnik! A tuahvek hin tuah aw la, a neta bikah na thlarau dinhmun cu Lot ih dinhmun vek asilo ahcun thilmak asi ding.

                        Lot ih thuanthu sungah thu pakhat a fiang mi a um, a a thukthun hlanah thiltha lo rak hril mi a nei;

                        Lot le Abraham kha hmunkhatah an rak nung tlang nan an hung lian veve thlang tikah hmunkhatah um tlang ding a cang thei nawn lo. An then awk zik tikah, an pahnih lakih upa sawn Abraham khan hnuaidawrnak thawn a duhdan thlang dingah Lot kha hril thei nak a pek; 'vawrhlam kap na hril ih na feh ding asi le kei vawrhlam kapah ka feh ding' ti ah a ti (Sem.13:9).

                        Lot in ziang a tuah? Sodom kiangte, Jordan phairawn, lennak hmun, ti dai thatnak hmun kha a hmu ti sim kan si. Cutawk hmun cu rannung hrangah rawl thatnak hmun le ramtha zet asi. Rannung tampi a neih ruangah rannung tlannak ram a mamawh mi ram tha zet a hmu asi ti kan thei. A leiram a tha ih tidai a that tlunah umnak hmun tha le nuam zet asi ti kan thei fawn.Curuangah Lot in milai mit zoh nakin a rak thlannak asi. (Sem.13:10).

                        Cui hmun cu Sodom kiang te asi. Asinan Lot in a thlarau nunnak hrangah zianghman ralrinnak a nei lo. A khaw in hnen Sodom mi pawl cu an zual zet! Cucu a zianghman a pawi lo. Annih pawl cu Pathian hmai ah misual rapthlak an si! Asinan cuvek sualnak pawl cun Lot ih thinlungah zianghman danglamnak a neih ter lo. A loram cu a tha zet. Cuvek ram cu a tuu le a rannung pawl hrangah a that tuk ruangah zianghman thukthunnak um lo ten a hrilih a pan.

                        Cucu zumnakin a rak hril mi si loin milai tisa mit zohnakin a rak hril mi a si sawn. A tuahsualnak hrangah Pathian hnenah ngaidamnak a dil dah lo. Hi leitlun thil pawl lawnglawng a hmu ih sankhuk thil pawl kha a ruat ban lo. Hi leitlun hlawknak lawnglawng a ngaihtuah ih a thlarau hrangah zianghman a ruat lo. Hi leitlun a dam sungah ziang a tha ding ti lawng a zoh. Hmalamah a ra thleng dingmi ngaihtuah ding a theihhngilh. Leitlun thil le ri, lennak thu pawlin a thinluung cu hmun a luah theh. Hivek hi Lot ih hramthawknak tha lo asi.

                        Curuangah kan hmuh thei mi cu Lot hin sual a rak tuah lo hmanah mi sual pawl thawn a rak cawhpawlh aw asi. A pakhatnakah kan hmuh theimi cu a thla’m kha Sodom lam hawi in a sak (Sem.13:12). Hinah hin thilsual tumpi a tuah asi.                   Cuitlunah kan hmuh sal mi cu amah rori kha Sodom khua ah a ceng ti asi. Thlarau in fiangzetin a simmi cu Sodom ah a ceng ti asi. (Sem.14:12). Hramlakih a thla’m pawl kha a tanta. A ram pawl kha a tlan san. Cule misual pawl umnak khua zinkiang te ah inn nei in a um.

                        Ziang thu ruangah Lot kha Sodom khua ah a rak vai ti thu cu fiangten sim kan si lo. Ziangvek dinhmun le thu pawl ruangah Lot hin cuvek dinhmunah a thleng ti theih theinak kan nei lo. Pathian in Sodom khua sungih um dingah a fial lo ti cu kan fiang ko ding. A nupi khan hramlak ih um hnak in khawpi sungih rualpi tha tampi thawn um tla a duh sawn asi thei.A fanu pawl pasal tha an ton theinak dingah le hmailam ih an dinhmun ruat ah a pasal kha a rak thlem thlu thei tla asi thei men. Cu lole a fanu pawl khan nunau nun awlsam pawl-rual neih theinak dingah an pabik kha an rak thlem thlu thei tla asi thei. Hramlam ih an umnakah lunglengin an um a har asi thei. Cu lole Lot a mah rori in khawsungih um kha a rak duh tla asi thei. A tuu rual pawl khaw s ungah man tha deuh ih zuar theih nak ding tla a duh asi thei. Zianglam khal si sehla, ziang thu hman theihmi kan nei lo nan Lot kha misual rapthlak zet pawl lakah a rak ceng as ti thu cu a fiang.

Zo/oct.19                     Pathian fa le pawlin Lot insang pawl vekin leiltun hmunpi le nuamnung cennek hmun, leitlun tisa rualpi thatha umnak hmun an pan ih sual citintian tuahnak hmunah an tlangleng tikah mangbang ding kan si lo. Lot vekin harsatnak lakah ralrinnak pek mi hi an hna set an tun men theu (Sem.14:12). Tihnungza harsatnak pawl suahsan dingah a thukthun nak pawl hi zianghman mangbang ding a um lo. Na nunnak ah thuthiang vek si loin na tisa duhnak ha hril tikah le tisa mi pawl thawn nuamnung nan cen tik ah na thlarau cu harsatnak n atong dingih na sankhuk hrangih na nunnak ding cu na thlahthlam vivo ding. Hihi na thlarau thazang cak lo dingin le cangvi thei lo dingin tuah thawn a bang aw a si. Hitin leitlun mi pawl thawn nan rualremnak hi na thinlung sungah sual cu ngai pawimawh lo ding ah le na nitin nun ah dan-pangai ih neih men dingah na tuah aw rero nak thawn a bang aw a si. Hivek dinhmun ih nadin nak cu na thlarau mit khan a sia le a tha hman thlei dang thei nawn lo dingin tluksiatnak lam ah a lo hruai tu ding a si. Hihi na thlarau kut le ke lo ti zeng ih Zion lamzin na pan nak ah thia rero le khur roro cing in le bawkvak ih a lo vak tertu ding a si. Hihi na thatnak bik le na cahnak bik, na ral pai hnen in zuar thawn a bang aw ih ralram ah Satan pa cu tan hmun tha bik na pek vek a si. Cuticun na ral kut ihsin tlansuak thei lo dingin na kut le na ke cu lo tem tar in an thihri kha lo ti kang in lo ti cau tertu ding a si. Samson kha a sam met a si hnu ah a nunnak tiang Palestine pawl hnen ah pek a si vek in nasam kha lo met sak in na mit kha sumhmun ah lo phawrhsak in sal na cannak ding a si.

                        Ka casiartu zate in tui ka sim rero mi hi thaten ruat diang ah ka duh. Hi pawl hi na ruahnak sungah thaten ben hai hnik aw. Na damsung theihhngilh hrimhrim hlah. Zingente na thinlung takten ruat sal theu aw. Zan na ih tikah thei ringring dingih ruat sal theu aw. Na thinlung sungah thukzet in a dengtiang luahkhat ter aw. Na thlarau nun ah thukthun lo dingah naduh ahcun a tul lo piih tisa mi pawl thawi thu rual nak pawl hi hrial aw. Lot ih thil hril sual mi hi thei ringring aw! Thlarau nun ro, mu le mal neihlonak, zeetnak, thlarau ciinak, mawhphurhnak tuahsuah thie lo nak, tisa mi sinak, thlarau dinhmun hnget khoh lo le hmailam khua raut thei lo ih thlarau mit thim nak pawl lak ihsin na luat duh ahcun Lot ih thil hril suaknak hi thei ringring aw!

 

a.                     Umnak le cennak hmun na hril tikah hihi thei ringringaw. Inn tha, inn nuam, dinhmun tha, thli thiang ngahnak, inn hnan tha le dum um, inn san man aw, nun awl samnak pawl lawng hi a tawk lo. Cu hnak ih thil thupi rual tel dingmi a um a si. A siat thei lomi na thlarau hrang na ruah tel a tul. Inn tha ti ih na ruah mi khan vanram ah maw, helram ah a lo hruai dingti na ruat dah maw? Thuthangtha kha theih awlnak hmun ah phuansuah a si maw? Na sangka kiang ihsin a naih nak hmun ah Khrih kha khenbeh a si maw? Nan kingkap ah Pathian fale a lo kil khawi tu ding anum maw? Nunnak na duh a si ahcun ka lo simmi hi na ngai nep lo dingah ka lo sim bet. Lot ih hrilnak kha ngaih tuah ringring aw.

 

b.                     Pumcawmnak le hnatuannak ih sawmnak na neih tik ah ka lo simmi hi thei ringring aw. Lakkha tam le mal, hlawh that le that lo, hnatuan awl le har, hlawknak tam le mal, thinlung diriam nak um le um lo, hi pawl lawng ngaihtuah ding na si lo. A siat thei lo mi na sunglamih na thlarau kha ruat tel aw. Cui na dinhmun cun na sunglam ih na thlarau cu a cawm dawl ding mawl, a ti thla vai ding maw ti na ruat tel a tul. Cui nadinhmun thar cun a tumsuk ter ding maw, a thangso ter ding maw ti na ruat tel a tul. Cawlhni tin te na thalrau hrangah zarhkhat ah ni khat tal nasengthei lo ding maw? Pathian duhdawtnak in ka lo sim, na tuah mi hi tha ten ngaihtuah aw. Hman hmawh zet in thuthen aw hlah. Na umnak ding kha na leitlun duhdan in na zoh vek in Pathian duhdan khal in zoh hna thiam aw. Na duhnak khan a lo neh zet men ding. Asinan Lot ih thil hrilmi kha theih hngilh aw hlah.

 

c.                     Nupi le pasal hawlnak ah hihi thei ringring aw. Nei hrih lo na si ahcun na mit a lo la tun, na lung awi nak a lo tuah sak thiamtu, na ruahnak ih tha nati awk mis, dinhmun, innle lo tha tawk men hin na lung lo kim ter hlah seh. Hi pawl hnak ih thildang ruah pawimawh ding a um lai, a siat thei lo mi na thlarau kha ruat aw. Na kawppi ruangah na thlarau cu a thangso ding maw, a tumsuk ding maw ti ruat tel aw. Na rualpi cun vanlam a lo pan pi ding maw, lei tisa sinak lam ah lam a lo hruai ding maw ti ruat ta aw. Na sakhua nak a lo thangso ter ding maw a lo dung tawlh ter ding maw ti ruat tel aw. Hi pawl hi na thinlung tak ih naruahtel dingah thla ka lo cam sak. Baxter in a rak simdah vek in na tuah ding na thenhnih awk hlan ah 'ruat aw la' 'ruat sal aw'. 'Kawn bang aw lo thawn zawm aw hlah' (2 Kor.6:14). Thit umawknak hi piantharnak hrangah ralrin tul zet mi a si. Lot ih thil hril dan kha theih hngilh aw hlah.

 

d.                     Hmun pakhatkhat ah hnatuan pek na si tikah hihi thei ringring aw. Hlawhtha le hnatuan a hmunmi men ah a tawk lo, hnatuannak ih pu hngat awk nak le hnatuan sang kai thei nak men ah a tawk lo. Hi pawl hi an lamzin ahcun an tha zet ko nan, ziangkim an si hrih lo. Cui hmun ah hna tuan tik ah na thlarau lam hma na sawn ding maw, na tumsuk sawn ding maw? Thuthimnak ah cawlhni in hnatuan pawl hnen ah hna na tuan ve tikah ziang na bang ding? Pathian hrangah le na kumkhua nunnak hrangah na tikcu kha ziangvek ih hmang dingha na si. Thuthangtha simnak le ngainak ah ziangvek can tha nei ding saw na si? Hi thu hi thaten na ruat dingah nemten ka lo simmi a si. Hihin na thlarau hrangah na tangka bawm a lo khat ter lo ding, na thlarau hrangah farahnak le midang par ih hngat awknak lawng a lo thlen ding. Na cawlhni hman nak le na Pathian biaknak cu dinhmun tha men ah na zuar ding maw? Ruat aw hnik aw. Isau ih rawl haikhat kha thei ringring aw le, Lot ih thil hril sualmi kha thei ringring aw!

                        Casiar tu hrekkhat in hitin an ruat mending,'zumtu in tihding a um lo: amah cu Khrih ih tuu a si ih a siat ral dah lo ding, siatnak tumpi dinhmun ah a thleng thei dah lo ding. Cuvek thil fate thil manhi a thu pi tuk thei dah lo ding'.

                        Asi, cuti ih ruat tu lak ah na tel men ding. Asinan ralrinnak ka le pe; hi pawl hi na ngaih that ahcun na thlarau cu a thangso dah lo ding. Zumtu diktak cu a thukthun ah hlawn a si dah lo ding. Asinan a thuthun ahcun a sakhua nak cu athangso ka tiah ruat rero cu a lak le duhthusam men a si. Hmasawnnak cu thingkung nemte vek a si, ti na pek that lo le na zoh that lo ahcun sualnak leitlun ahhin a cawr dingih a thang thei dah lo ding.

                        Cuvek ih hmasawnnak a ngaihsak lole a zuam lo tu cu thih cu a thi lo ding nan ziangti hman in a thangso thei lo dingih a tum suk sawn ding a si. Sui hman khi a boruak duh lo zawng ah na ret ahcun a rawng a dal na hmu ding. Thir sa dohdoh hman kha boruak a duh lo zawng ih na ret ahcun a dai mei ding. Kahpathir kha ti sa hemhem dingah meisa nasa zetpek a tul, a sinan dai ter sal dingah cun thildang zianghman a tul lo, a mahte ret men aw la tidai malte na tawih hman ah a dai dingih hak remrek ah a cang ding.

                        Tu ahcun thikse zet le phurzetmi khrihfa na si men thei. David ih hmasawn lai vek innathei aw men thei: 'Ka thawn dah lo ding' na ti men ding (Sam30:6). Asinan bum in na um lonak dingah ralring aw. Lot ih hril mi vek na hril ih Lot ih lamzin vek ah nafeh ahcun Lot ih dinhmun vek ah na thleng ding. Nangmah le nangmah kha Lot ih tuah vek ih tuah dingah na ke kar aw la a mah vek ih mi vanduai le mi thukthun na si kha na hmu aw cing ding. Samson kha Pathian in a tlansan vek in, Pathian na hnen ah a um nawn lo ti na hmu men ding. Harsatnak nak karlak ah nangmah le nangmah ningzahnak thwn thu thenhnih aw thei loin na thlahrung aw phetphet na hmu aw mei ding. Nathrik thalo ih ei siat mi vek in sakhua nak ah siatnak na tong ding. Na thlarau thazang kha a cak lo vivo dingih zianghman na theihnak um loin cauhnak na nunah a thleng ding. Cutin na feh vivo dingih na kut kha Pathian hnatuannak ah na kar harsa zet ding, na zumnak cu antam ci hnak ih a tum lo zia na hmu ding: hivek dinhmun ih na din lai ah na ral cu tilian bangin a ra thleng lohli kha na hmu dingih na theih man hlan ah na hngawng a tiang lohli ding.

                        Aa! na sakhua nak ah thukthun ding na duh lo ahcun hihi thaten ruat aw! Lot ih tuah vek ih tuah lo dingin leh a lamzin zawh lo dingin ralring aw!

 

4.                     Lot ih thukthunnak hin ziangvek rah a rah suak

                        A thukthunmi Lot ih thlarau khan a neta bik ah ziangvek rah a rah suak ti zoh hnih uhsi.

                        Hi thu hi tulai san ih khrihfa ti aw pawl hrang hrimhrim ah ka run tarlang ding. 'Ziangkhal sisehla Lot kha vanram a kai ih thiamcotermi siin vanram ah a um thotho ding' ti ah a ruat tu tampi nan um ding. 'Thildang ka mamawh lo, vanram ka kai ahcun cucu ka hrangah a tawk a si' tiah na ti men ding. Hivek ruahnak neitu na si ahcun ka simmi hi rei lo te sung ngai hnik! Lot ih thuanthu in in zirhmi lak ihsin pahnih pathum hrang ka run lo sim kei, na thinlung ruahnak kha a vun lo rem tha deuh men din.

                        A hmaisa ih ka simmi ihsin ngai thawk aw la na nunah lak tum aw. Khristian nun thianhlimnak le Pathian hnatuannak ih hman tangkai mi sinak hi a peh zawm aw ringring. Lalpai dung famkim zet ih thlunnak le lungawinak hi a feh tlang ringring. Curuangah zokhal a nunsungah a zumnak ah thukthun a si ahcun a sansungah hman tangkai mi le Pathian mi-hman ropi si ding cu beisei duh hlahseh. Cuitlun ah thianhlimnak ropi thawn Khrih hmuihmel pu in a zumnak ah hnangamnak le daihnak famkim nei ding khal ah ruat aw dah hlah seh.

                        Lot kha Sodom khua ah kum reipi a um ding ti zumnak a um, Rinhlelh dingum loin, Pathian thu simin Sodom khua mi pawl kha an sual nak ihsin sir aw dingah le Pathian duhzawngih nung dingah kaihhruai nak ding tikcu le can tha a rak nei tengteng ding. Asinan Lot khan Sodom khua mi pawl kha zianghman a dang lam ter hai lo ticu hmuh theih a si. A kiangkip ih milai pawl kha zianghmana kaih hruai thei lo zia kan hmu. Leitlunmi pawl hman in upatnak an pek theu mi Pathian hnatuantu pawl ih sinak an neih mi vek kha Lot in a nei lo ih Sodom mi pawl khan zianghman hmaisawng nak annei lo a si ti a fiang.

                        Lot ih inn lenglam ah mi pakhat te hman miding hmuh ding an um lo. A inn hnen pawl lakah mi pakhat te hman piantharnak nei le Pahian tihzah in nung an um lo. A hnatuan pi le a rualpi pakhat te hman khan Lot ih biak mi a Pathian kha an thangthat lo. A siahhlawh mi pakhat te hman khan an pu pai Pathian kha an be lo. A tuu khal pawl lakah mi pakhat te hman khan 'ka pu ih Pathian cu biak tlak a si' tiah thinlung thlengpakhat hman an um lo. Sosom khua kil tin ih misual pawl lak ah an sual nak thu a sim tikah pakhat hman in a thu lung in an sual an sir ti hmuh ding a um lo. 'Nang ramdang mi takko, nang in ziang saw in ti thei? ti ah an ti (Sem.19:9). A nunnak khan zianghman rihnak a nei lo ih a tongkam khan zianghman man a nei lo; a sakhuan nak khan zo hman hruaisuak mi a nei lo.

                        Asinan ka mang a bang lo. A thukthunmi thlarau in zianghman Pathian hrangah thiltha an tuah dah lo. An kiangkap ih ummi pawl ih theih tham ding in alnak annei mal tuk. Annih cu annun ah mi zate ih siar thei ding 'Khrih ih cakuat an si lo' (2Kor.3:2). An nunnak ah zianghman cawntlak le hmantlak, mi hip thei a um lo tlun ah an nunnah Khrih nun mawi langter mi zianghman an nei lo. Hihi thei ringring uhsi.

 

b.                     A pahnihnak ah Lot in a innsang mi, a sungkhat le a pawlrual pawl kha vanram lamzin ah a hruai suak lo a si tihi zohhnik uhsi.

                        A innsang ah ziangvek mi an um ti sim kan si lo. Khaw sung ihsin an suah tikah khan nupi pakhat le fanu pahnih a nei ti cu hmuhmi kan nei.

                        Lot ih innsang cu a tum maw a te khal a siseh la, a innsang um rori pawl hman khan zohman Pathian tih an um lo! Sodom khua kha siat suah a si zik cuahco ih kha tluk tihnun lai hman ahkhan a makpa pawl thu a sim ih ralrinnak a pek hai tikah an rak hnihsan men a si ti kan hmu (Sem.19:14). Ziangtluk tihnung tongkam saw a si! Asinan an nih cun, 'na tongmi cu zo in saw lo ngai sang? tiah ziang siarlo in an rak sawn. Leilungpi a cemhlan lo cu a thukthunmi thlarau ih hmuhtonmi cu ningnat thlak zet lawnglawng a si ringring ding.

                        Lot ih nupi kha ziangvek a rak si? A sungkhat pawl thawn khawpi sung cu a suahsan ve nan hlapi a thleng man lo.Hmanhmawhzet ih khawpi suahsan ding a tulnak zumnak a nei lo. A fehsuak tikah a thinlung cu Sodom khua ah a tanta. Tuah lo dingah fiang kelkel in ralrinnak pek cia mi a si nan a dunglam a her ih a thinlung tannak hmun cu a hi cuan (Seem.19:17). Curuangah hmakhat teah cilungpi ah a cang.

                        Lot ih fanu pahnih kha ziangvek an si zohhnik uhsi! Sodom khua ihsin an luat nansualnak tuah ding lawng ah a si. An mah hringtu an pa rori hman khathlemthlutu ah ancang ih sualnak pittawp thlen tu ah an cang.

                        A tawizawng in, Lot kha a innsang ah a zumnak thu ahcun a mah te lawng in a ding in a lang! Thlarau hlo pakhat tehmanhruai suak dingah sersiam a rak si lo!

                        Hihi ka mang a bang lo.A thukthun mi thlarau pawl hi an innsungsang mi pawl lawng hin a sumnak cu theihpi an si theu ih an mai innsang mi hman in hnawn an si theu.An innsungsang mi pawl hin an sakhua nak ih a ciangkuang lo mi an hmuh tik ah zianghman cawn tlak an hmu lo. Curuangah an thuthluknak cu riahsiatnak lawng a si. 'A nih hin Pathian a zum ahcun tui ih a tuah mi vek hi a tuah lo ding' tiah an ti ih zianghman cawntlak an hmu thei lo. Curuangah a thukhun mi nu le pa in Pathian mi zet fale an nei dah lemlo. Nauhak pawl hin an theihnak hnak in an hmuhmi hin an zir tam sawn theu. Na innsang ih nauhak pawl in ziang na sim ti hnak in ziang na tuah timi par ah an zir sawn ding. Hihi na thinlung sungah ret ringring aw.

 

c.                     Lot kha a thih tikah mithmuh theih ih thlarau mi sinak zianghman tanta mi a nei lo. Cucu ziangruangah ti zo hnik uhsi.

                        Lot in Sodom khua a suahsan hnu ah an thuhla tam pi theih mi kan nei lo nan,kan theih mi umsun hman cu duh um lo zet le ningzah thlak zet lawng a si.

                        Zoar khua a rak suahsan dan le puk sungih a rak umnak thu malte lawng theihmi kan nei. Kan theihmi a zaten duh um lo zet le hmasawnnak um lo, thlarau lam le minung lam sinak khal in thlaksiatnak lawng lawng a si.

                        Sodom ihsin an tlansuak hnu ah ziangtluk rei a nung ti kan thei thei lo. Khui tawk ah ziangvek in le ziang tikah a thi ti le Abraham thawn an tong aw sal maw sal lo, cun a thih zawng ah ziang thu a sim ta ti khal zianghman theih mi kan nei lo. Tulai tongcun Arte thih a a thi ti ding a si ko. Abraham, Isaac, Jacob, Joseph le David pawl hi an thih hnuh hman ah anthu hla le an tongkam pawl theih ringring an si nan, Lot ih thu cu riahsiatthlak zet in ziang hman theihmi kannei nawn lo. Tongkam khat te tal a duh thu le a ningzah nak khal theihmi kan nei nei lo. Lot hin ziangvek vanduai thlakzet thihnak a rak tong ti hi na ruat dah maw?

                        Thuthiang hin tumtahnak nei in ziang thu khal hi a sim a si. Lot hi riahsiatthlak zet ih a nunnak a ce kan hmu. Ziang hman hrin le hram tanta mi nei lo in le hmin neilo in a hlo ral ta. Thuthlungthar ah khan Lot cu 'miding' le 'midik' a si tin sim kan si, asinan Lot ih thlarau kha rundam a si le silo rinhlelh ding tha zet kan nei ka ti.

                        Asinan, riahsiat thlak zet in a nunnak a cem hi zianghman mangbang ding kan nei lo. Thukthunmi thlarau cun an tuhmi vek in an at sal ding a si. An thlarau in an taksa pumpi a suahsan zik zawng ahhin an thukthunnak pawl a lang suak theu. A netabik ahcun hnangam nak malte cu an nei. Vanram cu an thleng ding ticu a fiang, thinphang le cau hnianghniang in, bang zet le mitthli thawn, thimnak le thli sia kar lek in vanram cu an thleng din. An nunnak cu an him ding nan, meikang lak ihsin runsuak mi vek an si ding, an rim a hmui celcel ding (1Kor.3:15).

                        Hi thil pathum ka tarlangmi pawl hi ka casiartu hmuahhmuah in thinlung tak zet ih nan ruat cio ding ka duh. Ka sim duhsan pawl hi theih sual aw hlah. Hihi mangbang za a si, mi zokhal in an thlarau hrangah a tul mi an theihsual a si ahcun zianghman puhmawh ding an nei lo a si.

                        A thukthun lo zumtu nannih khal nan zaten leitlun ah Pathian hmanrua tha zet nan si thluh ding diah ka lo ti hrimhrim lo. Noah khan kum 120 sung thu a sim ih zohman in an zum lo. Lal Jesu amah rori kha a minung pawl in an rak pom lo.

                        Cui tlun ah a thuktlun lo zumtu pawl nan innsang ih nan sungkhat pawl kha an zaten nan piangthar ter thluh ding tiah ka lo ti fawn lo. David ih fale tampi kha Pathian tihzah lo an um. Lal Jesu kha a mai innsungsang minung pawlhman khan an rak zum lo.

                        Ka sim duhsan sawn cu hitina si; Lot in a tisa mit zoh nak in thila rak hril sual mi le a thukthunnak, a thukthunnak le leitlun ih a innsang le a kiangkap ih ummi pawl parah zianghman rahtha a rah lo nak pawl ih pehzawmawk nak sawn a si. Thlarau in kan hmuh dingah a simmi a si tiah ka zum. Thlarau in Khrihfa a ti aw pawl hmuahhmuah in ralrinnak kan neih thei nak dingah in hmuhter a si tiah ka zum. Cui tluln ah ka sim rero mi thuanthu sung ihsin kan zir ding thil pawimawh zet a um a si tin ka ruat.

                        A cemlam ah, thucah malte, a biktak in, Khrih ah zumtu ka si a ti awl pawl hnen ah ka run sim hrih ding.

                        Na thinlung lo riahsiat ter ka duhmi a si lo. Khristiansinak ih thatlonak zawng in lohmuhter ka duhmi a si fawn lo. Ka duhmi cu Khrih ah rualpi unau vek ih ralrinnak lo pek ding lawng a si. Ka hmuh duhmi cu na lungawi, na him, na nuamawk, lethiamcoter na si ding a si. Na hrangah thiltha a lo duhsak tu vek in ka sim mi a si.

                        Tui kan tikcu le can hi mitmapi Lot vek ih thukthun can a si. A hminthang ih sakhua mi sinak cu tui hlan hnak in a kau sinsin ih tuihlan hnak in a thuk lo sinsin a si. Ziangvek dinhmun ih ding pawl khal khristian sakhua nak sungah pom theihah an cang thluh. Mai tisa duhnak vek in nung si in mitampi cu kawhhran member si in le a hrek khat le phei cu  kawhhran upa tianghman ah man an si. Tu lai kawhhran pakhatkkhat ah hmin pe ve aw in, an phurnak ah a mawi tawk rak phurpi ve in,tui san ih kawhhran hrui awk nak ih thu buai pawl cu  sim ve theu in, sakhua lam casuah thar lar deuhdeuh cu lei ih cabuai par ah mawi zet in ret ve  tatrat in, khawmawknak tinte ah pelh loten khawmaw ve in; vengsung kawhhran ah thawhlawm tam tawk tak thawh ve in; thu sim tui thu sim thiam dan le a thu simmi pawl ih thatnak pawl cu sim ve theu in; sakhua lam ih cangvaihnak ih mi thinlung la deuhdeuh pawl thu cu sim ve in; phurnak mi thlik za ter khawp ih cangvaih nak ah au khuang ve in-hivek ih sakhua mi pakhat sinak hi tulai san ah hmun kip ah kan hmuh thei mi a si. Asinan hi pawlhin mimal nun ah a fal te ih Pathian thawn pawl kawm awk nak nun a nei ter lo theu. Thawiawknak hi malte a si lole zianghman phutmi a um nawn lo theu. An hrangah khros phurh hi a tul nawn lo theu. Mai khros phurh ding aiah vangtlang sakhua nak ah mipi lawm tlak ih tel vek nak hin a ai kan awh ter theu.

                        Asinan Pathian thawn neihniam zet ih mimal nun ah feh thei ding ih cu thlaraumi thinlung neih a tul. Mikhual le khualtlawng vek ih nungin tikcu hmandan ah, thu rel mi ah, nawmnak ah, thuamhnaw hrukdan pawl ah leitlun thawn dang aw ding in le khui tak hmun khal ah Khrih hrangih rah tha rah thei ding in; khui tawk hmun khal ah kan Lalpai cite vek ih ning ding in thalcammi, thin hnuaidawmi, hmatamlo, thinsau, tawzawng, thiltha tuah ding ah lem awl, mi duhdaw thei, tuarfai, thinnem mi si ding in; thatnak hrangah thiksia ih sual nak hmuahhmuah cu hua ding in; leitlun thawi hnawihnih aw lo tei nung thiam dingin, hi pawl hi Pathian thawi a feh tlang tu pai neih ding le nunpi ding lak ah malte lawng a si lai! Khristian a ti aw ve mi pawl lak ah hi pawl hi nunpi le neih an si lo theu,cucu a pawi ngaingai. Cu pawl cu khristian a ti aw pawlcun anneih hrimhrim dinga si nan, hi vek nun neih lonak hi zianghmanah kawhhran sungah an ngaihsak lo, cuticun zokhal an kiangkap ih anumpi pawl an ti lung wi tak ah cun hi pawl nei lo khal in zumtu mitha ah an pom ih hi vek thlarau thinlung put pawl hi nei dingin mi tampi in an tum nawn lo theu.

                        Tui can ah, tui ka ca siartu hmuahhmuah zumtu pitling nun nei dingah ka lo fawrh duh a si. Hi pawl hi hersan aw hlah. Lailan tuk in ka sim ruangah ihua aw hlah. Ka lo sim bet ding, 'Pathian ih a lo kawhnak le a lo hril nak hi a kumkhua ih hnget sinsin dingah zuam sin sin aw' (2 Pit.1:10). Ka lo sim bet ding zee aw hlah, daithlang aw hlah, hmasawnnak le na mit hmuh ah thiltha malte na tuah tikah duhtawk mei aw hlah, leitlun mi pawl hnak ih malte tha deuh ih na theih awk tikah na lung awi tawk mei hlah seh. Acang thei lo mi na tuah tum lo nak dingah nemte in ralrinnak ka lo pe, cucu Khrih ka rian tisi leitlun thai rualpi that awk ringring hi thil si thei lo hulhual a si. Na hminpumih lo ko in ka lo fawrfial duhmi cu na thinlung zaten Khrih cu rian ve dingah, thianhlimnak cu na nunah a lang ve thei nak dingah, thianternak cu dinhmun sang singsin in an co ve thei nak dingah, cuticun nun thianghlim ih nung ve dingin, na taksa kha thawinak nung vek ih hlan aw dingin le thlarau thawi nung dingah a si.(Rom 12:1;Kal5:25). Vanram ruahsannak le cawimawinak na beisei nak thawn ka lo fawrhfial mi a si. Lungawi ding le sawrtlakmi na si ding ahcun thukthun aw hlah.

                        Tikcu le can in ziang a phut leh ding ti na thei maw? Rampi pawl an khurhhnin nak, hlawn thil pawl phorhlet thluh nak, lalram hmun tin ah san ling a let mi, le milai ruahnak sungah cawlhhahdamnak um lo in phar le zuamnak pawl hin ziang an sim ti na thei maw? Hi pawl hin Khristian 'thukthun aw hlah' an lo ti a si.

                        Jesu Khrih vawihnihnak a ratsal tikah ralring in na um ding maw, nu tai khap thaten na kilh maw, ne mei inn tha teh vancia in a um maw, nangmah le nangmah teh na Lalpa tong dingah ralring in na tim na tuah maw? Cuti a sile thukthun aw hlah!

                        Na sakhua nak ah theihnak dik le Thlarau theihternak thawn hnangamnak le nawmnak neih na duhmaw? Thlarau theihpinak na nei ding maw, na zumnak kha thei aw la mithmaisia in um aw hlah, na dinhmun le na tonmi pawl kha zianghman sawisel aw hlah, riahsia le beidawngin um aw hlah, mal zet le lunglengmi khristian si aw hlah. Cuvek na si ding ahcun thukthun aw hlawh!

                        Na Pathian in a lo rundamnakah ciangfel zet in, natnak le thihnak hnarban ih na um tik ah teh na hna a ngam thei ding maw? Na thlarau mi in Khrih cu van sangka ah ding in a lo hmuak kha na hmu ding maw? Cutu a sile thukthun aw hlah!

                        Na thihhnu ah na sungkhat le rualpi tha pawl ih khui tawh na feh dingti theihtheinak an nei ding maw? Hnangam zet in thlanmual ah kan lo thlah thei ding maw, rinhlelh ding um loten na fehnak le na umnak cu vanram a si tin kan run sim thei ding maw? Cuti a sile thukthun aw hlah! Hi leitlun na damsungah hmantha le sawrbawk tlak na si ding maw? Na nun an hmuh in miin Pathian an thangthat ding maw? Na nuntudan riangah na kiangkap ih a lo hmu tu pawl in na biakmi na Pathian an thathat ding maw, na Pathian biak an hreh sawn ding maw? Misual pawl kha an sual sir ih Khrih hnen ah ra dingin na hruai tum tikah na hruai thei ding maw? Na nunnak an lo zoh tikah na zumnak le zirhnak pawl na thlunmi thlun duhnak thinlung le na Pathian thangthat duhnak  an nei ding maw? Cuti a sile thukthun aw hlah!

                        Na fale na inn sungsang minung pawl kha 'na fehnak ah kan feh ve ding ih na Pathian cu kan be ve ding' ti duhnak na nei ter thei ding maw? Sakhua nak ngaihsak lo le daithlang an si lonak dingah hmna na hruai thei ding maw? Cuti a sile thukthun aw hlah!

                        Khrih a rat sal tikah lukhum na co ding maw? Na lukhum comi teh vanram ah a te bik le na dinhmun teh a niam bik a si kei maw? Thuthun aw hlah!

                        Aw! Kan lak ihsin mi pakhat hman hi thukthun hlah uhsi! Tikcu hi a thukthun lo ih thihnak, thuthennak, satan, le leitlun pawl khal an thukthun lo a si. Cuticun Pathian fa le khal hi an thukthun lo a si.

                        Himi casiartu lak ah mi pakhat khat thukthun ih thei aw an um maw? Himi ca na siar rero lai ah na thinlung ten phurrit vek in na thei maw? Cunna sungmuril ah thip fialfial vek ih theih awknak na nei maw? Na sunglam ih thil pakhatkaht in hurhuk in,'Kei mah hi ka si' a lo titu a um maw? Cuti a sile ka simmi hi ngai aw. Cuvek in na sunglam ah hurhuk rero a ummi cu nathlarau hrangah atha lo a si. Tho aw la thiltha tuah aw.

                        Na tukthuan a si ahcun Khrih hnen ah lo hruai in tidam na tul a si. Hlanlai ih tidamnak si hlun te na hman sal a tul a si; hlanlai ih tiva hlun te sungah na kholh fai awk sal a tul a si. Khrih hnen kir in ngaithiam na dil a tul a si. Na kelawh in Khrih zangfahnak hnuai hma nasawn ding ahcun ka lo simmi lamzin pakhat lawng a um a si. Tui ka lo simmi hi tuah tengteng aw!

                        Na nunnak hi khua hlanlai ih thil hmuhsuak sal mi vek ah raut aw hlah. Thlarau ram ro ramcar ah na ke kar thei lo ih naum khal a si le tidamnak a um nawn lo tiah ruat aw hlah. Kan Lalpa in thlarau hriak thih tu ding a remruat zo a si lo maw? Hi leitlun ah natnak citin tian a ti dam zo ti kha na thei a si lo maw? Thlarau sual ziangvek khal kha a dawi hlo thei ti na thei a si lo maw? Mi tawntai pa Piter ih tluksitnak hman kha Jesu cun a kai tho sal a si lo maw? Cuticun a tidam mi pawl khan nehnak hla thar an sak thei ti na thei a si lo maw? Aw! zianghman rinhlelhnak nei aw hlah, thinlung duhnak taktak thawn zum mei aw la na sunglam nunnak a lo thang phawk sal ding a si. Na thukthunnak kha tanta aw la thupha cawi in a hnen ah ra mai aw-vawi le khat ah Khrih hnen ah ra mei aw. Kamsang pawl tongkam hi thlawsuah mi an si: 'na sualnak pawl hmuahhmuah phuang theh aw'... 'na tluksiatnak ihsin ra kir sal aw, cule tluksiatnak ka lo ti dam ding' (Jer.3:13,22).

                        Cuticun kan mai thlarau dinhmun kan theih awk vek in midang thlarau dinhmun khal thei ve aw uhsi. Ziangtik can khal ah kan unau nu maw, kan unau pa maw a thukthun kanhmuh a si ahcun thangharh lohli uhsi, ding thawk ter tum uhsi, tha thawhter tum uhsi. Tikcu cantha kanneih lai ahhin pakhat le pakhat ha pe aw ton uhsi. Duhdawtnak le thiltha tuahnak ah fawrhfial aw uhsi (Heb.3:13;10:24). Zohnen khal ah 'Unau pa, unau nu, Lot na theihhngilh maw si? tiah sim awk ding tih hlah uhsi. Thangharh aw la, Lot hi thei ringring aw! Tho aw la thukthun nawn aw hlah. Cuticun Khrih ah na roco mi pawl cu tuisi thawk in man hla tak in hman thiam thlang aw!