HUAT TUAR

“Huatu zaarep duhtu zaarep” ti a rak si. Milai kum pitling cincun huatu nei dah lo an um lo thei men. Mi ih huatmi si loin mi hrekkhat cu mahlemah hua aw zet tla an um. Mi in an lo huat tikah an mawh hrimhrim lo tla asi thei. Mi zapiten kan sual theh ruangah mi zapi ten midang ih huatlak hrimhrim kan si tinak khal asi, in huatu cu an mawh lo tla asi thei. Asina’n, huatu pawlin mi pakhatkhat an huat tikah an huatmipawl an sualtuk ruangah asilo, anmai tisa huatnak thinlung mizia diriamter dingah asi sawn. Ziangah tile huatu pawlin an duhmipawl lakah an huatmi hnakin a sualsawn tla an um ringring theu asi. Misual an hua si loin anmai duhzawng diriam ter lo tu an huatmi asi sawn. Huatu siloin huatmi na si ahcun na lungawi sawn aw. A lo huatu va hua ve hrimhrim hlah. Zumtu diktak na si ahcun Satan in na kiangkapah huatu a ret ringring ding, na dik maw, dik lo maw, nangmah lo huatnak ding thu an hawl dingih huatnak ding thu an hmuh lo tikah thuphan tiang an lo puh caan a um ding. Asinan nangmah lam in va hua ve hrimhrim hlah. Zisu in amah thattu pawl tla a hua lo ih ansual ngaidamnak a dilsak sawn asi. Zisu in amah thattu Judas kha kumthum sung a umpi lai ah huatnak a langter dah lo. Zisu Thlarau na sungah a um asi ahcun huatnak na nei lo dingih milai zohman na hua lo ding. Huatnak le duhdawtnak Pathian an um tlang thei lo: mi a huatu ih sungah Khrih a um lo; Khrih na sungah a um lo asi ahcun Pathian ta na si lo, sata-huatnakih-pa ih ta na si sawn tinak asi. Mi in an lo huat ruangah va hua ve hlah, mi na hua asile na mit a caw ih lamzin parah mitcaw vak vekin ziangtikah na ke na sit ngah ding ti hman thei aw loin lamzin parah a vaktawi rero mi na si.

Bible thuanthu sungah kan zoh asile huatu pawl an dik dah lo: Kain in Abel a hua ih a that; Joseph unau pawlin Joseph an hua ih an zuar; Saul ih David a hua ih thah a tum; Haman in Mordekai a hua ih thah a tum; ziangtik hmanah mi huatu pawl an zikthluak dah lo. Huatu va si dah hlah.

Mi ka hua maw hua lo ziangtin ka thei aw thei ding? Milai in an duhdawtmi ih sualnak, mawhnak le palhnak midang hnenah an simse dah lo. na hua maw hua lo, na thei aw ko.

Huatu pawlin an thinlung sungah an huatmi pawl huatnak dingsan thu an nei ringring. A lo duhtu pawlin lo duhnak dingsan thu an nei ringring ding. Ziangthu ruang hmanah mi va hua dah hlah aw; midang, khat le khat hua aw dingin thu va tuah hlah, thu va tlanpi dah hlah, satan palai (postman) va tuan dah hlah. Huatnak cu satan hnen ihsin a ra mi asi; Pathian nung cu duhdawtnak Pathian asi. Huattuar tikah tuar nuam lo zet asi; asinan huatnak in Khrihfa zumtu a neh dah lo. Huatu pawlin an theih lo mi ral an do rero asi. Huatnak cu khensar nathrik vek asi: huatnak cun huatu ih thlarau a eisiat rero asi. Duhdawtnak cun duhdawtu ih thlarau a hringter ih nun hram hnget zet a neihter asi.

Huatu pawl cun huat ding an nei ringring; pakhat hnu pakhat huatmi an nei ringring. Duhdawttu pawl khalin duhdawt ding an nei ringring, duhdawtnak dingsan an nei ringring. Huatnak in huatmi par hnakin huatu parah siatnak a thlenter sawn asi. Huatupawl in an huatmi kha midangin hua ve dingin thu an tuah theu. Lungput, mithmai, tongkam le tuahnak in huatnak langtertu le tipungtu si dah hlah. “Mi a duhdaw tu cu Pathian fate asi”. Duhdawtnak tipungtu ruahnak, tongkam, tuahnak, le tumtahnak thawn nung aw. Huatnak ih huham hnakin duhdawtnak a cak sawn.

Na kiangkap ah huattlak zet mi dik lo, mi tha lo nahmu ringring ding: thlalang na zoh tinten na hmu ringring ding. Hua hlah! Pathian in a duh lo. Huatlak milai na hmuh tikah thiltha tuah ding a um ti thei aw la, khukbil in Pathian hnenah hlan aw aw, thiltha tuahtu, Pathian hmanrua tha si dingin thlacam aw. Huattlak milai na hmuhmi pawl ziangthu ruangah huat thlala an sinak pawl midang simsawng hlah aw. Satan postman tuan hlah aw. Satan ih hmin cu “accuser” “mawhsiattu” ti khal in kawh asi; satan hminpi si  na duhlo le midang mawhsiat dah hlah aw. Milai zokhalin huattlak sinak an nei theh asi. Leitlunah thiltha lo na hmuhmi pawlin midang lo huater hlah seh, na lungsungah huatnak hrimhrim thanglian ter hlah aw. Cuhnakin zangfah lainat duhdawtnak in na khat ai ahcun an hrangah thlacam aw. Pathian theifiangtu pawlin midang mawhnak hnakin anmai sualnak a tumsawn in an hmu ringring, ziangtik hmanah midang parah thuthentu an si dah lo, huatnak tipungtu an si dah lo ih duhdawtnak, remdaihnak tipungtu, rualremnak tipungtu ansi sawn. Pathian le milai karlakah rem awknak Thuthangtha karhzaitertu an si ih khat le khat karlakah rualremnak suahtertu an si sawn asi.

Huat na tuar tikah a lo huatu pawl lakah thleidan thiam a thupi: A lo siatsuah duh hrimhrimtu, thiknak ruangah huatu, theih lo nak ruangah huatu, lungput dik lo ruangah huatu tla an si thei. Joseph unau pawlin Joseph cu siatsuah rori an tum vekin le Paul huatu pawlin “Paul kan thah lai hlanlo rawl ei lo ding” tluk in huatnak in an lungsung a luahkhat zo ahcun remthat tum rero cu bangthlak men asi. Pathian hnenah thlacam sak aw, Zisu hmin in thlawsuah dilsak sawn aw. Fala na si ih tlangval dang na neih ruangah na tlangval pa in a lo hua asile ziangtin remnak tuah a theih ding ticu na thei ko. Theihnak famkimlo, mi ih bum ruangah a lo huatu an um thei, thu an theihtulmi theihter aw. Cutin tuah tik khalah an thinlung sangka oncan lawngah sim aw. Huatnak lungput diriamter dingin a lo huatu pawl cun huatding dang an hmuh hlan cu an lo hua ding, an camriam ding, an lo dekcawk in anmai huatnak thinlung diriamter dingin an lo zawt rero tla asi thei. Phang hlah, cuvek milai pawl cu an sungah thlarau sia in celcilh mi vekin milai pakhat hnu pakhat, hmun dangdang an thawn khal asile huatmi nei ringring pawl an si. An umnak kipah huatmi nei loin an um thei lo, thusia an duh zet dingin dodal awknak le huat awknak thu rel cu an rawlthaw asi. Cupawl hrangah Pathian thu in an nun a thleng ti lo ahcun leitlun damsung an tesinfa tiang an roh ding mi vekin milai mizia sual an ci-le-kuangin an neihmi asi. Pathian hnenah thla camsak aw.

A netnak ah, huattuar tikah hua ve hlah. “Mi a duhdaw lo tu cu Pathian a thei lo, ziangah tile Pathian cu duhdawtnak asi.” (I John 4:8).