SANTHAR HRUAITU TUAN TLANG SAN: AGE OF COLLABORATIVE LEADERSHIP Kum zabu 21 nak kan thleng zo. Pupa sanlai ih kaihhruai awk dan, pursum leilawn ei hawlnak dan, vengsung khau le ram humhalh dan, senpi vangtlang pawlkom thawn pehpar mi thu thuthukdan, senpi vangtlang kilhim awk dan, nuntu khawsak dan pawl cu santiluang in dunglamah tansan dingin lotheihlo in in nawr zo. Hrin le hnam, peng le tlang, miphun thleidan um nawn loin ramkulh tlangkulh fate sung lawng sinawn loin fimnak thiamnak citintian, miphun dangdang kawm khawm in khawruah kau zet in milaipawlkom, sihcih, tuantlang hruai tlang san a suak zo. Leitlun khuitawk ramkulh khal mahte um theih asi nawn lo. Leitlun pumhuap pawlkom, Asia ramthen, America tlangkulhpi, Europe, Arab ram zate kawm, Africa ramkulh, tivek in siseh leisungsuak zinan zuartu pawl pawlkom, nikhua lam tawlreltu pawlkom, humhim awknak lam tvp ramtinkar pawlkom a karhzai sinsin. Cuvek thotho in biaknak, cozah, cozah asilomi pawlkom, le pursum leilawnnak khalah tuantlang, pawlkom sihcih le khat le khat sawmdawl aw tawn dingin pehzawm awknak tha sinsin neihsan asi. Leitlun khawmual cu leitlun pumpi huap khawte pakhat (global village) vekah a cang zo. Ramsung ramleng pehtlaih awknaknak a thleng aw theh zo. Santhar milai nuntu kan zir ding maw, dunglet-hawi in fehtahratin thuanthu santiluangih fen hloh mi kan si ding maw, hril ding kan nei. Khuahlan san, mi pahnihkhat lalnak (dictatorship) ram malte lawngah mi pahnih khat cu cawisangin hotu lalbik uk awkdan an hmang hrih. Cuvek ramkulh le pawlkom cun leitlun midang, rualban loin dungah tanta an si. Santhar santiluang milai thuanthu in tuantlangsan asizia a langter. Senpi vangtlang le mibur pawlkom ziangtluk leitlun tlan zuam awknak ah a tlancak in a thangso ding timi cu pawlkom pakhat, mibur pakhat, le cozah kumpi pakhat cu ziangtlukin hruaitu pawl tuantlang hruaitlang an thiamih anmai pawlkom lenglamah ziangtlukin an tulsammi bawm theitu pawl thawn tuantlang hruaitlang an thiam, an tuansuahmi, an tuanrah cu anmai pawlkom lenglamah a hlawkpitu ding pawl hnenah ziangtluk an pe suak thei, timi parah a hgat aw zo. Cun khatlamah, miphun pakhat ih cahnak, pitlinnak cu bulpak, insang, veng, khua, ramthen, miphun, nunphung, le ramkulh tin, kilkip in thlirin zohfiah theih asi. Ziang tinkim milai nuntu khawsak cu a thleng aw rero zo, rero lai ih zohman ih kham theih lo in a thleng aw sinsin ding. Thleng awknak hi colh ti nei lo asi. Ziangvek pawl a thleng aw: · Leitlun pumhuap pehtlaih nak Kan pupa pawlin a um ti hman an rak theihdah lomi ramah Laimi tampi kan thleng zo. Kan pupa pawlin an rak theih dah lomi leitlun fimthiamnak bungrua phunphun laimi kut sungah a thleng zo. Leitlun miphun citintian pawhtlang aw tawn in miphun dangdang um tlang asi zo. Ziangkim hi a pehtlai aw theh vekin buainak, duhmi, tihmi, tulmi, neihmi, theihmi, thiammi, sinak phunphun pawl khal an pehzawm pehtlaih sinsin ih ziangvek miphun khal sisehla mahte nung le khawsak theih asi nawn lo.
· Nunphung le sinak bang aw lo pehtlaih nak Pehzawm awknak a cak in mitintian ramdangdang an thleng, an vak sukso tikah fimnak, thiamnak siseh nunphung le miphun dangdang siseh hmunkhatah um in siseh hnatuannakah siseh pehtlaih nak a phunphun thawn pawh tlang aw zetin nun tlang asi zo. Cuvek lakah mai miphun, mai nunphung, mai mizia thawn a mil aw lawng thawn pehtlaih aw, hnawihnih aw in nun theih asi nawn lo. Ruahdan duhdan nuntudan bang aw lo phunphun, kut thilthiam dangdang nuntlang, tuantlang, hruaitlang, pehzawm sihcih le tuantlang san a suak zo.
· Theihnak fimnak citintian pung Kawlram zoh asile, tuihlan kum 50 sung ahcun sibawi thiam pawl hi a larbik le upat hlawh bik pumcawmnak lam hnatuan le thiamnak nei an rak si vekin mifim bik ah rak ruat an si ringring theu. Sibawi pakhat cu pathian fate pakhat vekin rak zoh, upat le cawisan asi. Santhar san a suak tikah fimthiamnak a phunphun a suak vivo. Sibawi thiam lak khalah thiambik nei an suak vivo. Hmanrua le bungrua hmanmi lei killi ihsin leitlun deng tiang hman tawm awk asi vivo. Santhar san ah fimthiamnak zir theinak cu upa milian pawl hrang lawng asi nawn lo, mikip zir theih dingin sangka on asizo. Mikip in fimthiamnak citintian zir asi zo. Ziangtin cuvek thiamnak phunphun a suak ih leitlun pumhuap tlanzuam awknakah miphun pakhat, ramkulh pakhat, pawlkom pakhat, cozah pakhat sinak in kan tlan ve ding, ziangtin kan miphun Pathian kan cawisang ve ding timi cu thiamnak cikim, kilkip ihsin fimnak theihnak thiamnak bang aw lo, thiamnak le fimnak burkhawm in tuantlang hruaitlang thiamnak parah a hngat aw asi. Mai miphunpi, pawlkom sungtel lawng si loin miphun dang, leitlun kilkip ihsin kan tulmi fiamthiamnak a neitu pawl thawn tuantlang thiamnak parah thansohnak tampi a hngat aw aw asi.
· Mipi phutmi thleng aw mi San a thleng awk vekin mipi lungput khal a thleng aw vivo. Ramleng suak dah lo le khualtlawng dah lo khalin leitlun killi ah ziang a cang timi awlai ten theih thei asi zo. Telephone, social network, tv, email thawn pehtlaih awknak a that tuk zo ruangah lei killi ah a cang rero lai mi cawplecilh in thu hla theih asi zo. Milai mizia cu hmuhmi, theihmi, le nitin nunpi mi in a danglam ter vekin santhar minung pawl mizia cu tampi a thleng aw sinsin. Insang khat hmanah nulepa le fale, santhar thangthar pawl hmuhdan duhdan a danglam vivo. Cuvek lakah ziangvek nuntu khawsak, duhdan hmuhdan pomdan pawlin miphun a cawimawi ih miphun thuanthu a tuahtha ding, ziangtin bulpak, insang, khua le ram, miphun pawlkom pawlin hma la in ke kar tlang asi tikah senpi vangtlang thatnak tambik ziangtin a suahpi thei ding? Ruahdan, hmuhdan, duhdan, pomdan, theihnak, fimnak, thiamnak, ti theimi, thanlennak, tvp bang awlo pawlin senpi vangtlang thatnak hrang hruaitlang tuantlang nak in senpi vangtlang thatnak a tambik a suah thei ding asi.
· Siatnak thlen theitu hrang timtuahcia nak Afghanistan ramih Muslim khurbing pawlin leitlun pumpi humhim awknak a hnaihnok thei vekin Japan ramih linghnin in America ram pumcawmnak lam tiaang a hngawng ban zo. New York ah World Trade Tower an siatsuah tikah leitlun pumpuluk pursum leilawnnak le milai pehtlaih awknak a hnaihnok. Ziangtin senpi vangtlang siatnak thlen theitu do asi dingih senpi thatnak ziangtin hawl tlang asi ding? Zo in hmanrua, bungrua, le thiamnak anei, tvp, zoh tikah tihmi le tulmi khal leitlun pumpi in a pehtlaih aw vivo. Santhar santiluang cakzetin a tlan rero mi lakah tuantlang le hruaitlang a thiamtu pawl lawng an dingcang cak sinsin dingih ziangvek harsatnak le milai santhuanthu a her liam khal asile mipi duhmi tuansuak dingin siseh siatnak lak ihsin humhimtu ding ah siseh cakzetin an tlan sinsin ding asi. Leitlun miphun tenau pawl, tuantlang hruaitlang thiam lo tu pawl cu miphun tumpi le ramlian pawlin an dawlh vivo lai ding asi. A tlunlamah tarlangmi pawl hi santhar leitlun milai thuanthu santiluang in a fen reromi cakzetin a tlan reromi kan san milai thuanthu hmuithlam cu asi. Cuvek lakah ziangtin pawlkom, mibur, cozah kumpi le senpi vangtlang hrang thatnak suahtertu mibur cangvai mi dinsuah theih asi ding?
Hnatuan then dangdang tuantlang dan Cozah in dan a tuah, misual hrem ding,
mitha lawm ding, thatnak tha pe dingin, fimthiamnak lam zirnak ah
thiamsangfilawr pawlin santhar bungruanthatha (technology) an suahpi, lamzin
lam hnatuantu pawlin rangzetin khualtlawn theinak lamzin in hawlsak, vanzam le
lawng tuahtu pawl khalin pursum leilawn tlawn vahnak awlsam zet in tuahsak, calai
lam thiamsangfilawr pawlin calai thatha in tuahsak, cutivekin milai thiamnak le
hnatuan kilkip ihsin khatlekhat sawmdawl aw tawnin society, senpi vangtlang
thatnak hrang mah le tuanvo hna tuan cio asi. Santhar leitlun pumhuap pehtlaih
awknak sanah thiamnak, hnatuan, phunkim kilkip ihsin pehtlaihnak tha le hnatuan
tlang dan thiam a thupi sinsin. Khuahlan san vek si nawn loin santhar
minung pawl cun rualran le zalen zetin fimthiamnak zir theih asi zo. Tlawngah
zir lo khalin cabu thatha, cahram thatha, calai innpi ah siseh internet ah
siseh siar cawk lo zir cawk loin fimthiamnak zir ding a um. Bulpak lam hmuhtu a
phunphun hnen ihsi khalin mi tampi in fimnak an zir. Santhar computer lam
hmaihruaitu Bill Gates le Steve Job (l) pawlin thiamnak maksak an hmuhsuakmi
pawl an tlangzarh tikah college dikari hman neilo an si. Santharsan ah mi pakhatin
kilkip in a thiam famkim an um lo vekin kilkip thansohnak lam pan dingin
pawlkom, kumpi cozah le pawlkom khalin thiamnak cikim hlawkpi dingin mithiam
tintian ruai tahratin tuantlang hruai tlang dan thiamthiam an thangso cak
sinsin ding asi. Curuangah fimnak le thiamnak citintian neitu pawl senpi
vangtlang society hrangah rualran, ruantlang, lungrual, kutkai in hruaitlang hna
tuantlang asi tikah ziangvek miphun fate, pawlkom caklo, ramkulh fate bik khal
tuanpi pawlkom dang thawn leitlun ramtha le mifim ram pawl santhar tlanzuam
awknak ah a tlancak ve ding asi. Tahthimnakah, leitlun ram fatete pawl tla UNO
ah an til tikah leitlun rampi pawl thawn cabuai pakhat ah thutha hawl tlangin
le bungrua hlawm aw tawn in hmasawnnak lamzin pakhat parah an feh tlang asi.
Curuangah, thiamnak, theihnak, hmuhnak, duhdan, pomdan, ruahdan bang aw lo pawl
thiltha hlawm aw tlangin senpi vangtlang thatnak tumtahmi hmuisel pakhat lam
pan in thazang pe aw tawn le tuantlangdan, rualran zetin canpual tha sangka ong
in zir vivo le tuantlang hruaitlang thiam a thupi sinsin.
Dinhmunah siloin hnatuan ah upatnak Khuahlan pawlkom le mibur khawmnak kipah, cozah siseh cozah asilomi pawlkom ah siseh, hnatuan sang, lubik kaitu hi upatnak sangbik ah ruat in thuneihnak sangbik le midang uk theinak thuneihnak tiang rak pek asi theu. Santhar mibur pawlkom sihcih awknak ah tuansuahmi parah hngat aw in upatnak le hnatuan canpual sangka on thiam vivo a thupi sinsin. Sinak duh ruangah upat awknak, lamtang tuah awknak, duhsakbik le namthlakbik neihnak pawl hi a biktakin miphun tenau, pawlkom tenau pawl hrang ahcun dungtawlh tertu siatnak asi. Senpi vangtlang thatnak, sersiamtu Pathian ih tumtah le duhmi, amai thu vekin society miburpi ruantlang ten remdaihnak in fehtlang tuantlang thei dingin huat awknak, thleidan awknak, thuphan le dik lo nak pawl, a caklo namtlaknak, nekcep awknak pawl cu dungtun tahratin thiltha tuah tlang, hnatha tuansuak theitu pawl hrangah rualran zet canpual sangka on sakin dingnak le felnak in santhar pawlkom mibur cangvaihnak lamzin a hruai a tul. Hruaitu le hnatuantu pawl tuantlang hruaitlang nak hrangah a hnuailam pawl hi an thu in an tul zet.
1. Kaihhuai awknak cu a thangso reromi asi Pawlkom, mibur, cozah siseh cozah silo mi siseh, pawlkom cu a thangso reromi, a thleng aw rero mi asi a tul. Hruaitu dinhmun siseh kaihhruai awkdan siseh santiluang thawn kaih aw in a thangso rero mi asi hrimhrim lawngah senpi vangtlang, hruaitu thiamnak citintian tuantlang hruai tlang a theih. Hruaitu pakhat a thih hlanlo dinhmun hnget ah tohkham retsak asinak hmun poh ah thansohnak daltu ah an cang ih diklo mawilo zetin canpual, tuanvo, thuneihnak hman asi theu. Kaihhruai awkdan, pawlkom ruangzing, hruaitu, le laireldan pawl khal santiluang ih zir in a thleng aw rero mi pawlkom sung lawngah hruaitu thatha thiamnak fimnak citinkim tuantlang hruaitlang theih asi. Cutin san thuanthu in ziangvek thleng awknak a suahpi khal asile senpi vangtlang, ram le miphun, pawlkom hrang a thabik, a hlawkbik tuanrah suahpi theih asi ringring ding. 2. Pawlkom cu a thleng aw reromi pawlkom Santhar pawlkom, mibur cangvaihnak ah a thleng aw dah lo cu a thi ding. Rangzetin a thleng aw rero mi santhar milai thuanthu in a thlenpi mi milai buainak, harsatnak, duhnak pawl khaikhawm in mibur ruantlang ten feh thei dingin siseh santhar in canpual thatha a thlenpi mi pawl senpi vangtlang hrang hlawknak thatnak suahpi thei dingin mibur pawlkom cu a thleng aw rero mi asi hrimhrim a tul. Santhar mino fimnak thiamnak pawl hrangah sangka onsak in santhar santiluang dawi in tlan rerotu si loin thleng awknak a tulmi ah thlengtu si thei dingin mibur pawlkom cu a thleng aw rero mi asi hrimhrim a tul asi. Thleng tulmipawl a tikcu ah thleng theitu pawlkom cu a cak vivo ding asi. 3. A rualran mi tuanvo le thuneihnak zem awkdan Cozah siseh cozah asilomi pawl mibur pawlkom ah siseh khuahlan pawlkom sungah tlunlam upa, hotu pawlin thuneihnak cu an kai bet ih an hnuailam hnatuantu pawl cu sal asilo hmanah siahhlawh vekin hnatuan fial an si tikah siseh pawlkom sung thuthluknak cu ruahnak famkim neilo, thuneihnak lawng duhtu pawlin an kutsungah an kaihbet tikah siseh senpi vangtlang le pawlkom mibur in an hlawkpi ding zat hlawkpi loin an sun phah ringring asi. Santhar san ahcun mi zokhalin anmai hnatuan, tuanvo tuansuak thei dingin a tulmi thuneihnak tuansuak thei dingin thuneihnak le bungrua pawl pek an si hrimhrim a tul. Santhar mibur pawlkom sungah ukbet awknak um nawn loin mi zocio khal in anmai duhhrilnakin anmai fimnak thiamnak hmangin anmai tuanvo tuansuak thei dingin zalen zetin a tulmi thuneihnak khal pek an si sawn. Fimnak thiamnak citinkip kawmkhawm in tuantlang hruaitlang thei dingin a zalenmi pawlkom, thuneihnak le tuanvo ruantlang ten zem awknak pawlkom asi hrimhrim a tul. 4. Mi zokhal tuanvo le mawhphurh cekkim mi Khuahlan mibur pawlkom sugnah hotu lubik pawl cu an dik maw diklo maw, an fel maw, fel lo zohman ih thusut ngam an si lo. Anmah hnakin mifel, fimnak thiamnnak an um tik khalah sangka onsak an silo. Asinan santhar mibur cangvaihnak ahcun mi zokhal hotu lubik ihsin tuanvo neitu zapi ten an hnatuan, le tuanvo, senpi vangtlang thawn a pehtlaihmi an nun cu cekkim ringring an si. Cutin zokhal an nun thuhruk, thuneihnak thup, zohman ih tham ban lomi nun le dinhmun nei an um loih senpi vangtlang hmai ah zovek hotu pawl khal thusut theih, an tuanmi , tuanvo, le nuntudan khal cekkim theh mi an si ringring atul. 5. Tuantlangdan ruangzingtu mibur Mibur zapiten thiamnak fimnak le ti thei mi a bang aw dah lo. Curuangah kaihruai awknak lam thiambik nei pawl, fimnak nei pawl cu pawlkom mibur ruantlang ten tuantlang hruaitlang nak tuahtha dingin thuruattu, laireltu mibur, pawlkom ruangzingtu mibur, a hran in hrilbikmi an um hrimhrim a tul. Cuticun pawlkomn ruangzingmi thleng tulmi siseh tumtah mi tuansuaknak hrangah tuansuakdan le laireldan ah siseh thleng tulmi milai, hotu, hnatuantu, le dan le dun, pehtlaihmi le bugnrua siseh a tikcu te ah thleng in remrel thiamtu mibur hran neih hrimhrim a thupi zet. Hotu tuanvo neitu pawlin anmai duhzawng, anmai dinhmun humhim nak ding hrangah pawlkom ruang an zing tikah thuthabik hawlsuak hnakin khamtu ah a cang ringring theu asi. Santhar fimnak hmang thiam, cohlang thiam in pawlkom ruangzing lam thiamsangfirlawr pawl rawn in pawlkom ruangzing tuahthatu mibur neih ringring a thupi fawn. 6. Hruaitu lakah thiamnak citintian kawmkhawmmi Khuahlan pawlkom mibur pawl lakah hotu lubik cu pathian fate vek an rak si theu. Thuneihnak sangbik pek an si ih an thu el ngamtu le an hnatuan thusut ngamtu khal an um lo, suttheih khal an si lo. Sihman sehla, santhar san ah mi zokhalin rualran zetin fimnak thiamnak zir le hawl asi zo vekin leitlun fimthiamnak a karhzai vivo tikah milai zo khalin fimnak citinkim thiam an um lo. Society pakaht ah thathnemnak nei lo, man nei lo milai khal an um lo. Curuangah fimnak thiamnak cikim tuantlang hruaitlang thei dingin hlawhtlinnak ding hrangah fimnak thiamnak cikim neitu hruaitu le hnatuantu mi tampi hrang sangka kauzet rualran zetin a ong aw mi pawlkom asi hrimhrim a thupi fawn.
7. Milai bang awklonak lakah tumtahmi tuansuak dingin hmuisel thiam Milai bang awk lonak ruangah hnatuan tlang thei lo vekin an ruah theu mi hi a dik lo. Lungput diklo ruangah asisawn. Bang awk lo nak, miphun sinak, thiamdan, fimnak thiamnak, duhdan, hmuhdan, ruahnak bang aw lo pawl hnatuan tlang thei dan a um. Mi pakhat cio bang awk lo nak cu dunglamah tanta in zapi ten duhtlangmi, tul tlangmi le a bang aw mi tumtahnak funkhawm aw mi hrangah hnatuan tlangdan lamzin a um. Thiamnak, hmuhnak cikhat lawng hmang thiamtu pawlkom hnakin fimnak thiamnak cikim kawm khawm in hruaitlang tuantlang pawlkom cu a thangso cak sawn deldel ding asi.
8. Pawlkom hmin, bungrua, le ziangkim cu senpi ta asi Khuahlan san vekin pawlkom lubik, mibur hotu pawl ih kuthnuai ah sal le siahlawh vekin hnatuan san asi nawn lo. Senpi vangtlang, mibur sungtel, hnatuantu le hruaitu zapi te in anmai ta, anmai tha an timi, an mai ruahnakin anmai duhmi an tuan asi ti ah an ruat thei dingin pawlkom tumtah le ruangzing, hnatuan laireldan pawl khal senpi telkimnak pawlkom asi thei ding a thupi. Cutikah mi zokhalin an thazang, an fimthiamnak le neihmi sup aw le midang hmaisawng awknak, phuhrun awknak um loten a rualten zalen zetin hna an tuan tlang cio tikah a tam bik hlawknak a suahter sawn asi. 9. Lungkim tlangmi mibur cangvaihdan kenkawh Duhdan, hmuhdan, pomdan, fimnak thiamnak le sinak bang aw lo ruantlang ten hnatuan tlang hruai tlang asi tikah zapi lungkim tlangmi lairel tuanrel dan neih hrimhrim a tul ih neihmi dan le dun kenkawh hrimhrim khal a thupi fawn. Pawlkom cangvaihnakah, ziangkim thuthluknak cu lailan zetin a thup zianghman um loin a thabik hawltlang lungkim tlangmi asi hrimhrim a thupi. 10. Tikcu bikhiah nei in thleng tulmi thlengnak Damsung hotu tuan, damsung thleng dah lo mi pawlkom dan le dun tivek umnak hmunah fimnak le thiamnak cikim nei hruaitu pawl hnatuan tlang a theih lo. Tuanvo neitu siseh laireldan siseh thleng a tul tikah a tulvek in a tikcu te ah thleng tulmi thleng dingin timtuah cia ringring mi pawlkom asi a thupi. Ziangkim hi a thleng awk rero vekin milai nun thuthlung thleng theih lomi nun thu hrampi siar lo, pawlkom laireldan, hnatuandan, kaihhruai awk dan pawl cu catbang loin thleng tulmi thleng ringring mi pawlkom asi a tul. 11. Pawhtlang zet thu hla theihter awknak Pawlkom mibur lakah thuthup, thuruk a um tikah diklonak a karhzai theu. Curuangah pawlkom tumtah, tuanreldan, dindan ruangzing, le hmuisel pawl ziangkim hi hnatuantu le hruaitu zapi ten lailan zetin fiang zetin a tikcu ah thu hla a theihtu ding pawlin an theih ih thuthluknak ah a teltu ding pawlin an ruahnak ciamciam ten burkhawm thei dingin canpualtha an co cio ding a thupi. Thuhla lailan zet le fiangfai zetin theihter awknak hmunah hmuhsual awknak siseh a tul lo piin liamkuan siseh hlawkpi ding sunphahnak um loin senpi vangtlang thatnak a tambik a suahpi theu sawn asi. 12. Thuthluknakah rualran le zalen zetin ruahnak suahpi burkhawm theinak Martin Luther in dothlengnak a rak thawk hlan sung cu Bible hi zumtu mi menmen kut sungah retsian a rak si lo. Pawlkom mibur umkhawmnak ah siseh cozah le cozah asilomi pawlkom ah siseh hotu pawlin tefa fangnau, mipi pawl ruahnak an rak ngai pawimawh loih ziangah an rak siar lo lawng si loin namthlak an rak si ringring. Pawlkom mibur lakah zalennak a um lo. Santhar sanah zovek milai khal sisehla nauta bik ihsin lubik tiang ruahnak tha timi siseh thusut duhmi siseh thu hla burkhawm thei dingin ziangtik lai khalah sangka a ong ringringmi a zalenmi pawlkom asi hrimhrim a thupi. Thuthluknak tuah tikah a thu thawn a pehtlaih mi mi zapi hnenah a tikcu teah thu hla theihter in an ruahdan hmuhdan duhdan cu thuthluknak hrangah burkhawm thei dingin mi zocio hrang khalah sangka onsak an si ringring ding mi a thupi. 13. Felfai zetin dan le dun thawn a fehmi pawlkom Milai cu thu in kaihruai awk asi. Curuangah mibur umkhawmnak kipah thu, senpi vangtlang pehtlaih awkdan thu, dan le dun a um ringring a tul. Cui lungkim tlangmi cu lungkim tlangtu pawl hrangah hman dingmi thlun dingmi dan le dun asi ih hotu le tuanvo neitu zapi ten lungkim tlangmi dan le dun, kaihhruai awkdan, laireldan vek cekci in kenkawh le lairel hnatuan ding asi. Cutin sim tikah thleng theih lomi tinak asi loih thleng a tul tikah a thlengtu ding pawl cu dan le dun a tuahtu, a neitu le a pehpar mi milai pawl an si ringring dingmi asi sawn. Pawlkom, mibur kaihhruai awkdan, laireldan cu hotu le hruaitu mimalte pawl duhnak tlamtling tertu hmanrua, an dinhmun humhim awknak funghreu vekin hmanmi si loin senpi vang, pawlkom sungtel le mipi pawl duhnak, tumtah tlamtling ter dingin hnatuan dan, zapi ten hngat awknak thutlangpi, thurampi asi sawn dingmi asi.
Santhar pawlkom sungah santhar hruaitu pawl cu miphun dangdang, fimnak thiamnak dangdang ihsin tumtahmi pakhat tuansuak dingin laireldan, pawlkom ruangzing lungkim tlangmi sungah mai tabul vekin hnatuan tlang hruaitlang dingmi an si. Santhar milai thuanthu santiluang in hruaitu pawl tuantlang hruaitlang sanah a thlenpi zo.
Rawnmi cabu pawl: · 62 Michael M. Beyerlein, Sue Freedman, Craig McGee, and Linda Moran Exhibit 1. The Ten Principles for Building Collaborative Organizations · JOURNAL OF ORGANIZATIONAL EXCELLENCE / Spring 2003 · The Collaborative Organization By Rachel Conerly BY Tim Kelley & John Mitchell |
WELCOME TO MY PAGE > CA SIAR AW! >