HNATUANPI NA DUHLO MI MI 7

By Phil Cooke @ Churchleaders.com

A hnuailam mi pasarih pawl hi pawlkom na tuannak ah ralring ringring aw, hivek minung pawlin a thabik ruahnak le tumtahnak tla an siatsuahthei asi.

1.   Ar hla fingkhat thei

(The One-Trick Pony)

A theihmi pakhat par lawngah hngat aw in pawlkom le midang hmuahhmuah parah cuai a thlai, umter, fehter a tum ringring. Cui a theihmi pakhat khal cu a tikcu le can, hmun le ram thawn a kaih aw lo mi arak si. A theihmi le hmuhmi, pomdan thlun thei lo tu pohpoh cu dik lo ah a ruat ringring. Lamzin dang a um timi khal a ruat dah lo ih a pom thei dah lo. A theihlo mi theihbet dingin tangdor nun nei in zir kal a duh lo. A theihmi pakhat “Cepa na khuang thlah hlah law” ti vekin a kai feofeo. Cui a theimi cu pawlkom hrang ah a thabik le dikbnik a rak si fawn lo. Pawlkom thatnak thilthabik le canpualtha lamzin daltu asi.

2.   Kelpa tanhmun khuar (The Empire Builder)

Pawlkom sungah tuanvo neitu asinan a tumtahmi cu pawlkom pumpi thansohnak, thatnak asilo, amai bulpak lamtang tuah, dinpitu, a thuvekin ziangkim fehter dingin le pawlkom canpualtha akutsungah ret dingin bukhur ringringtu asi. Hruaitu le midang vaw thla dingin lamtang a tuah ringring dingih pawlkom sung thu thluknak le caanpualtha pawl cu anmai duhzawngin fehter dingin a neihsun thazang, ruahnak, le pawlkom bungrua tiang a hmang ringring. A tuansuahmi hnakin a siatsuahmi a tamsawn ringring. Pawlkom pumpi thatnak hrang hnakin amai bulpak ruahnak le duhdan in ziangkim fehter ding thupi sawnah a ret ringring mi asi.

3.   Tlinlo (The Incompetent)

Tuanvo tuansuak dah lo. Tuanvo zem tikah hruaitu pawl thu el loten a lak ringring, a tuansuak dah lo. Hruaitu pawl thu cu a el lo, tuanvo cu a cuh ringring, nan a tuanvo a tuansuak dah lo. Midang hnaihnoktu, hnatuan pelhsolh tertu asi ringring. Kum xxx tiang pawlkom sungah rin um zetin a um nan, a tuanvo a tuansuak dah lo ruangah pawlkom thansohnak daltu asi ringring. Mihlun asi tikah tuanvo pek lo awk le a mawi lo ih tuanvo pek le a tuansuak dah fawn lo tikah pawlkom thansohnak daltu asi.

4. Saphu depte (The Hysteric)

Pawlkom sungah thu fate maw, a tum maw, thubuai le harsatnak a um tikah amah thawn apehtlaihmi pohpoh hnenah thu a sia thei bikin thu a Karhzai ter ciamco. Pawlkom thatnak duhsak ngaingai vekin a lang nan a tongkam le umdan in a siatsuah ringring. Midang ruahnak sungah thlaphang dingin, tih dingin le an lungawinak le phurnak siatsuah ding ko in a tongkam a thlah, thusia phurtu le karhzai tertu asi. Cutin pawlkom sungtel pawl hrangah tihnak, thlaphannak, phurnak co tahratin buainak le harsatnak a um taktakmi hnakin cumi pa ih thusia a karhzaitermi in pawlkom a siatsuah sawn ringring. Mipi phurnak a siatsuah ih rinsan awknak tla se dingin thusia a thlah vivo. A thazawng in ziangtin buainak le harsatnak kan pahtlang ding timi a ruat dah lo, a suahpi dah lo.

5.   Absalom

Hruaitu pawl tlaksiatnak ziangtin ka bawm ding ti um loin hruaitu pawl tlaksiatnak le harsatnak cu hmanrua tha ah hmang tahratin mipi, pawlkom sungtel pawl amai lamtangah tuah a tum ringring. Midang siatnak cu a hmanrua tha asi ih lamtang mibur, a mah tantu a hawl ih hruaitu pawl tlamtlin lonak sim le rel cu a rawl thaw bik asi. Cuticun pawlom sungtel pawlin an pawlkom parah siseh an hruaitu parah siseh an rinsannak, phurnak, duhnak, hngat awknak, pehtlaihnak pawl a siatsuah. Cuvek minung pawl cu pawlkom sungah an um rei poh asile pawlkom siatsuahtu an si.

6.   Cangcel (The Spineless)

Zianghman dinhmun a nei lo. Pawlkom sungtel asinakah hngat awknak thuhram, thuken a nei lo. A kiangkap minung pawlin an sim le relmi thu parah a hngat aw. A pawlkommi, pehparmi, kiangkap milai pawl ruahnak parah a hngat aw. Thlihrannaknakah a sawi aw duldo. Rinsantlak le hnatuan tha, zumnak in kekarpi dingah a tlak lo. Hnaihnoktu, zumnak le phurnak ti cautu men asi.

7.   Thuzep (The Denier)

“A tha pah te ko lai” ati ringring. Thilsual, a dik lo mi a hmuh khal asile a zep ringring. A lungsung lam ahcun dik lo zetin a theih khal asile thutak a hmaiton ngam dah lo. A zep tahratin “tha pah te ko lai” ati ringring. Hmaiton ahcun a tha a tinan dunglam ah zepzel nun a nei ringring. Hmaitonah a tongmi le dunglam le a thupin a tongmi a bang aw dah lo. Pawlkom siatnak thleng cuahco tiang khalin thu a zep ringring. Rinsan tlak lo, thutak dinpi ngam lo tu asi.

Thubet: Mi zokhalin khuimibik simaw, kan nunah ziangmawcin kan nunpi theu ding ti a zum um. Midang mehtawk khih nak ah si loin mahlemah cek awk felnakah, kan hnatuanpi, midang in hnatuanpi dingin an duh lomi, kan umnak le tuannak pawlkom siatsuahtu, dungtawlhttertu, hnaikhnoktu, le midang thanau tertu kan si lonak ding hrangah mah le mah zir awknak sihram seh tiah duhsaknak thawn cangantu pa ih ngan mi leh sawngmi asi. Kawhhran dinhmun in kan sim asile Bawipa Pathian in ziangvek milai khal a thleng thei: Bawi Zisu in dungthluntu a kawh tikah mi tha cia zohman an um lo, an sualnak thawn a ko ih a remthat, sersiamthar, nunthar, thinlungthar a pek hai sawn asi.