BAWLTLANG

Chin ram kan zoh asile Pathian malsawm thlawsuah mangbangza simcawklo a um laiah kap khatlamah satan lungawizawng thentheknak tampi a um ti khal zeprual asinawn lo. Mi tampi in biaknak lam hruaitu pawl ruangah kan miphun, society kan thenthek aw theh aw asi an timi khal a el ngamtu an um pei maw, ti ding asi. Santhar minung pawlin a tuvek in kan feh vivo ding maw?  Pathian in in hmuhtermi umtu nuntu pawlkom le pehtlaih awknak nei in Khrih ah pumkhat kan sinak langter dingin san thuanthu in in sawmngiar asi. Pathian pakhat, Bawi pakhat, Thlarau pakhat rian in rawngbawl tlang ding kan sinak tawite zoh hnik uhsi.

1) Pathian kan rennaksan
            Man in lei zo mi kan si. Zumtu zokhal kan nunnak hi kanmai ta asi nawn lo. Pathian ta asi. Pathian in a duhnaknak hmunah in ret dingih a duhmi minung pawl thawn amah rian tlang ding kan si. Kanmai duhdan, kanmai tisa thinlung duhnak, ruahdan, pomdan tlansan tahratin kan Pa Pathian ih duhnak rian in leitlun nun hmang ding kan si sawn. Pathian duhnak rian in a nungtu pawl cu ral pakhat do in Bawi pakhat riantu si in kutkai in thlarau ral do in Pathian uknak ram karhzai ter dingin hnatuan tlang kan si.


2) Pathian kawhmi
            Pathian in a Fapa thisen thawn in lei tikah a sunglawi tukmi tumtah hrangah leimi kan si. Mi zokhal phunzai lo ten Pathian in a kawh vekin le tuanvo a pek vekin lungawi sopar ten tuan ding kan si sawn. Mi zokhal Pathian a duhdawtih a nitin nunah Pathian a rian ahcun Pathian in a kawhnak fiang aw in Pathian ih retnak hmunah Thlarau Thianghlim lamhruainak in zumtu unau duhdawtnak in pawlkom le pehtlaihnak nei ding kan si. Leitlun thim lak ihsin kawhhran mi kan si vekin Pathian mithmuh ah milai phunhnih lawng an um: Pathian fate le satan fate. Zumtu zapi ten Khrih ah Pathian ih lakhranmi, kawhhran mi kan si vekin pumkhat kan si.

3) Siahhlawh
            "Milai Fapa cu mi ih ren dingah a ra lo, midang rian dingin a ra sawn asi" tiah Zisu in amai thu asim. Zumtu hrangah zo vek milai thawn kan pawlkom aw ding timi thu ah kan nunphung, tong, le milai duhdan thurualpi parah siloin kan renmi Bawipa Pathian ih duhnak le tumtahnak par sawnah hngataw in zumtu unau duhdawtnak in pawlkom nak nei in pehtlai ding kan si.Kanmai duhnak kan rian lo, Pa Pathian ih duhnak, Thlarau Thianghlim in in theihter vekin kan rian sawn asi. Pa ih duhnak le tumtah tuansuak dingin Thlarau kan sungah hna a tuan sawn asi.

4) Duhdawtnak

            "Mi zokhal a unau a huatu cu a mit a caw" ti asi. Huatnak siloin duhdawtnak sawn in nitin a nungmi kan si. "Mi zokhal Khrih ih duhdawtnak a sungah a umlo ahcun Pa ih ta asilo." Zisu Khrih cun a ral pawl a duhdawtih an sualman peksak in kros parah a thi. "Kapa, an sual ngaidam aw, ziang kan tuah ti an theilo asi" tiah thla a cam sak. Zo vek milai zumtu zumlotu khal Khrih in a duhdawtmi pohpoh duhdawtnak in nitin Bawipa rian in a nungmi kan si. Pathian a duhdawttuk ih a Fapa neihsun a pek mi, a duhdawt tukmi kan hua asile Pathian thawn kan um tlang thei lo ding ti a fiang. Pathian kan duhdawtnak cu mit in hmuh thei mi kan milaipi, Pathian in amai hmuihmel kengin a sersiammi kan duhdawtnak parah a lang sawn asi.

 

5) Judas umlo in zosi Zisu zuartu ding?
            Zisu cu Judas in a zuar bangin zumtu leitlun nunah  zuarthlaitu, dodaltu a um hrimhrim dingmi asi. "Leitlun in a lo do ding. Asinan nan thinphang hlah uh: leitlun cu ka nehzo" tiah Zisu in in tiam asi. Zumtu pakhat nunah leitun in a do lo asile Zisu thuphan a per asi pei maw? Leitlun in in do ding , siatsuah in tum ding. Zisu in Judas cu kumthum sung a umpi, rawl a ei-pi, thu a simmi a ngai ve, asinan Zisu in a hua dah lo, a simse dahlo, a relse dah fawn lo. Amah zuar tahratin a ra hnam lai hman ah "ka rual" tiah a rak ko asi. Zumtu pakhatkhat in midang a relsia a thangsiat tikah a relmi thu cu thudik khal asile a relsetu thinlung sungah Khrih ih duhdawtmi a um lo tinak asi. Milai zohman in an duhdawtmi an relse dah lo. Judas tih hlah uhsi. Leitlun in in khenbet, cangvai thei lo dingin in tuah asile lungawi sawn ding kan si. Tisa a cangvai theilo tikah Pathian a cangvai sawn asi. Pathian in a duhmi tuah thei lo dingin a kham theitu an umlo; Pathian in amah hnakin a caksawnmi zianghman a sersiam lo. Misual mi thalo pawl kut tuar ding tih hlah phang hlah uhsi. Tih phannak ruangah unau dang pawlkom ngam lo in mahte a umtu cu a tihmi hnakih tihnung sawn bumnak sungah a sawltal rero tinak asi. Judas tih ruangah Bawipa Pathian in ruangpum pakhat ah in pehzawm zo mi zumtu unau tlaihsan le duhdawtnak dungtun hlah uhsi.

6) Leitlun Eng
            Voikhat cu nunau nu te pakhat pastor pa hnenah a feh ih a hnatuannakah harsatnak thu asim: "Ka hnatuannak ah keimah lawng zumtu mi piangthar ka si ih a hartuk. In nautat ih in hnihsan. Pastor pa ziangtin ka tuah ding in sim aw" tiah thu a sut. Pastor pa in "na hnatuannak company ah meisa an vang maw? tiah thu a sut. Cutikah nunaunu te cu a thinheng tuk, "cu lamlam i sut, ka harsatnak thu ka lo simmi i sang sawn aw" a ti. Pastor pa cun "ka lo sut mi in sim hmaisa awla" ati ve. Nunaunu te cun "vang e" tiah a let.  Pastor pa in a sutsal lala, " khawthim lakah maw khaw-eng ah si meisa cu an vang?" tiah a sut bet. Cule nunaunu te cun  "mi aa dah tilo zosi khaw-engah meisa vang dah" tiah a let. Pastor pa in "nangmah cu leitlun eng na si" a titikah nunau nu te cu a tap. "Bawipa ka Pathian, i ngaithiam aw, leitlun thimlakah na ennak langter dingin i retmi ka rak thei lo asi” tiah tapin thla a cam. Zumtu pakhatkhat kan kiangkap pawl thu, hnatuanpi pawl thu, Bawipa in rian dingin in fialmi milai pawl thu ah kan phunzai lole an sual an tha lo tuk tiah kan hnawng asile Khrih ih palai, leitlun eng kan sinak kan theih hngilh tinak asi thei. Phunzai lo ten kan tongkam siloin kan nitin nun in Khrih hmuihmel a langmi sawn in midang in Bawipa hmel an hmu dingmi asi sawn. Thim le eng an um tlang thei lo. Na sungah Khrih a um asi ahcun Khrih ih eng cun na kiangkap thimnak pawl a eng ter theh dingmi asi sawn. Eng in thim a tih dah lo.Eng a umnak kipah thimnak cu a hlo vivo asi. Zumtu pawl kan umnak poh ah leitlun eng kan si.

7) Bangawk lo nak
            Nupa tuakkhat hnenah thu sut fiang sehla Bible Seem 1:1 ihsin Thupuan 22:21 tiang Pathian thu an pawmdan le nunpidan a bangaw theh lo an tampi ding. Milai ruahdan pomdan hmuhdan cu danglam hrimhrim dingmi asi. Ruahdan duhdan hmuhdan a bang awk lo ruangah a abur in ruahnak lak khawm in Thlarau Thianghlim bawmnak kan tulnak asi. Mi pakhat in a theih theh lo ruangah khat le khat kan tul awknak asi. Asinan Pathian Thlarau ih ukmi kan si ahcun Pathian cu amah le mah a duhdan a thenthek aw dahlo vekin zumtu mibur cu ruantlang ten thukhat ten kekar tlaang asi sawn. "Zisu in, zokhal amai duhnak a tanta lotu cu ka dungthluntu tlak asilo" a tivekin zumtu zokhal mai duhnak cu tanta tahratin zumtu unau pawl hnenah Pathian duhnak langmi ziang a um timi ruatin midang thawn Bawi pakhat, Thlarau pakhat, Pa pakhat ih duhnak riantlang kan si. Kan bangawk lonak, danglamnak hnakin kan bang awknak pawl a thupi sawn ih a cak sawn deldel asi.


8) Pumkhat kan Si
            Mi pakhatin zanthing-ai tampi a nei ih khawnziat ah a pen khawm khal asile a mai ta thotho an si. Thingkhawn pa hra, panga, tvp in a then darh lole khawnkhat lawngah a peng khawm khal asile a tam le a mal a bangaw ih a man khal a bangaw thotho asi. Cuvekin zumtu Khrihfa pawl cu kan zaten Khrih ih ta, Khrih ih taksa peng zawm, ruangpum pakhat kan si. Mi zokhalin amai taksa peng pakhatkhat a thangsiat, relsiat, dodalin amahte la-hran awk a tum asile theihlonak thangin a awk tinak asi. Evi cun Pathian hnakin thasawn thei vekin a thei awaw ih theirah a ei tikah satanih bum in a um vekin theihlonak thangsungah awkin a um asi. Zumtu hmuahhmuah Khrih ah pumkhat kan si ih mai taksa peng zawmpi hua thei kan silo, dodal aw thei kan silo. Rawngbawlnak thu ah leitlun mithmuh ah pawlkom dang dangah hnatuan tul hman sehla Khrih kan zaten pumkhat kan si.

Zumtu zapi ten, Thlarau pakhat kaihhruainak in Bawi pakat, Pathian pakhat rian in rawngbawltu kan si. Lungawi sopar ten kutkai in Bawipa rian cio uhsi.