A SEZAWNG LUNGPUT IHSIN KHRIH LUNGPUT

Nunau nu cei-aw, thuamhnaw a neihmi lakah a mawibik a hruh ih zarhpini biak inn ah khawm dingin a feh. A rualnu in ‘ka rual, tuisun cu na mawi tuk” a rak ti. Cunucun, ‘Simaw, cutin asile nidang cu na mawilo intinak maw si?” tiah thinheng nawn in a zoh.” (ttk).

Hnipuansia, hmelsia, dinhmun sia hnakin lungputsia in milai pakhat cu zohsia ah a canter. Lungputsia cun a kiang umtu milai pawl khal a suan vivo tikah insang, sungkhat, rualpi, mibur, kommi, society  le rampi pakhat siatnak tiang a thlenter thei asi. “Mi pakhat cu a thinlungin a ruah vekin asi ding” tiah ngan asi vekin lungputsia, a sezawng lungput cun ruahban loin milai nun a siatsuah, lungawinak a hlohter ih satan lungawinak tipung in Pathian Thlarau riah a siatter asi.

Bible in lungput tuaithar dingin zirh kan si vekin milai zohkhal lungput tuaithar tulmi kan si theh. Asezawng lungput neitu cun amah le mah parah siseh amah thawn a pehtlaih mi midang parah siseh society le leitlunah parah a sezawng lungput a neih tikah lungawinak hnakin phunzainak le midang relsiatnak, mawhsiatnak in a thinlung le a hmur cu a luahkhat theu asi.Cutin amah thawn a pehtlaihmi pawl khal lungputsia nei dingin a ciahneh hai ih satan postman tuan in thusia karhzai tertu ah a cang.

Ase zawng lungput neitu cun amah thawn a pehtlaihmi parah a duhlo zawngin thil a thleng mi poh ah tuanvo a lak dah lo ih thiltha lo, duh um lo hmuahhmuah ah midang a mawhsiat ringring. A parah thilcangmi pawl hi Pathian le amah karlakah thilcangmi asi tiah ruat in a pom thiam lo. Cutin satan hminpi, ‘Mawhsiattu” ti ding khawpin mawhsiatnakin a thinlung a luahkhatih a hmurka khal thusia in tuammi ah a cang. Amah thawn pehpar lomi midang dinhmun le tuahnak par tiangah lungawi loin a phunzai theu asi.

Suahkeh sual mizia in siseh thanlennak insang, hmuhtawnmi, society, le mibur lak ihsin asezawng lungput neitu pawl lak ihsin siseh thusia theih tamtuknak in siseh sunglamah lungputsia thanglian vivo in a sezawng lungput neih a theih asi. Kawlram ah a thangliantu pawl hrang ahcun tongkamsia tamzet an theih ringring mi cu Kawl Ralkap a cohzah thangsiat relsiatnaknak, hruaitu pawl relsiatnak, inn hnen relsiatnak pawlin milai thinlung tampi a tuahsiat asi ti cu rinhlelh ding a um lo.

Asezawng lungput neitu cu a hnih khal a mawi thei lo ih rawlthaw khal a thawtnak a hlo theh, a ihhmuh khal a thaw thei lo, nunkhal man a nei lo ih har fialfialin a tuar theu asi. Asezawng lungput cun milai nun hi Pathian thawn nitin nuam zetin cen dingin a nung thiam loih tuarnak in a leitlun nun cu um fangfang, thusia le thih hngakin nitin a can a hmang. Cutin asezawng lungput neitu cun amah thawn a pehtlaihmi pohpoh nunah a sezawngin a ciahneh tikah a nun ih a rahsuahmi cu thatnak hnakin siatnak in a nehsawn theu asi.

9/11 laiah America ramah vanzam pali a tla, World Trade Tower an taih tikah America ramih TV hmuahhmuah ah cu lawnglawng ni ziangmawzat sung cu a khat theh. Leitlunah vanzam thawngza tampi an tum, an zam rero laiah America ram ih TV zoh tikah leitlun vanzam hmuahhmuah a siat theh, an kaang theh vek asi. Vanzam a tla mi, inn a taihmi lawnglawng a lang. Cuvekin a sezawng lungput neitu cu thusia a theihmi a ruahmi cu catbang loin a lungsungah a ruat ringring ih a thinlung sung a luahkhat, a kaa in a sim leuhleuh theu. A sezawng lungput neitu cun Pathian thlawsuah tampi relcawk lole lungawithu sim cawklo a neih laiah a sebik pakhat a tawnmi cu a sim leuhleuh dingih a ngai paihtu an um tik poh ah a nolh leuhleuh theu asi. Cuvek thotho in midang thu a sim tikah mi pakhat in a lei damsung thuanthu thawngzatkhat  a neihmi lakah a sebik miangmo kha a cing ringring ih a tu le tu, a ngai duhtu an um tik poh ah thusia sim theinak caantha a neih tik poh ah a theihmi milai ih thuanthu siatnak bik cu a sim nolh leuhleuh asi. Cutikah a simsiatmi milai cu thuanthu sia pakhat ruangah amah khalin a zum lo, a rinsan lo, a duhdawtlo, hnatuanpi khal a duh lo vekin midang khalin rinsan lo, duh lo, hnatuanpi duh lo dingin a sezawngin a ciahneh asi.

Asezawng lungput neitu cun thusia rel nuam ati rualrualin ngainuam a ti. Voksa bazar um dingin voksa zuartu le a leitu an thupitdan a bang awk vekin thusia karhzaiter dingin a reltu le a ngaitu an tuldan a bang aw. Cutin asezawng lungput neitu pawl cun thusia reltu khal asi ih a ngaitu khal asi. Cutin amah vek pehtlaihmi a nei ringring ih a pehtlaihmi pohpoh asezawng lungput nei dingin a ciahneh vivo fawn. Cutin asezawng lungput cun insang, mibur, society ah siseh midang parah rinsannak, upatnak, cawimawi duhnak, hnatuan tlang duhnak pawl a siatsuah ih mahte um duhnak, lungrualpi mi mibur fatete in thenthek duhnak pawl a suahter asi.

A ngaingai ah leitlun milai pawl hi kan zaten thuanthu sia, duh um lo, tlukbahnak, tlaksamnak, simsiat ding kan nei theh asi. Zumnak ah kan pa asi mi Abahram siseh Pathian in ‘keimai thinlung keng’ atimi zumnak ah pacangtha, David Siangpahrang siseh, Zisu Khrih in taksa in a umpi ih a zirhmi dungthluntu lakah hotu Peter siseh tluk bahnak, palhnak, tisual pangmi an nei theh asi. Simsetu in an duhmi cu an lawm in an huatmi cu an relsia menmen sawn a rak si. A senzawng lungput nei tahratin thusia a sim duhtu pawl cun an thinlung in khua a ruat thei ih an hmur a cang thei poh sung cu thusia, simsiat ding an nei ringring ding asi. Leitlunah kum reipi rak nungin zohthimtlak thuanthu in tantatu pawl nun kan zoh asile a sezawng lungput rak nei hai sehla an nunnak tuanten a rak cemral dingmi an rak si. Daniel le a rualpi pawl, Joseph ih nun, David ih nun pawl kan zoh asile asezawng lungput rak nei ta hai sehla kan hrangah thuanthu mawite in tanta mi pawl in tanta thei lo ding. Pathian zumtu pawl leitlun nunah kan pehtlaih mi hmuahhmuah hnenah Pathian in kanmah hmangin le anmah hmangin thiltha a tuah duhmi ruatsawn ding kan si.

A sezawng lungput neih hi tisa ihsin a ra mi asi. “Tisa duhnak in a nungtu cu a thi ding,” “tisa duhnak in a nungtu in Pathian duhnak khal a theithei lo ih Pathian lung khal a awiter thei lo” tiah ngan asi. Asezawng lungput hi milai in a duhnak vekin ziangkim a um lo tikah lungput siava a suaknak asi. Laimi pawl hnenah “Mi porh aw nan hua maw?” tiah ka sut tikah ‘hua” tiah a tamsawn in an sim theu. C.S. Lewis in hitin a sim, “Mi porh aw pawlin mi porh aw pawl an hua bik” tiah a sim. A umzia cu mi porh aw pawlih porh awknak cu biak inn sungah mi farah pa thawn  thla a camtu Farasi pa vek kha asi. “Kei cu khi milai vek ka silo, ka porh aw lo” tiah a lungsungten amai thatnak kha a porh awk ruangah asi. Cuvek thotho in midang parah asezawng lungput a neitu cu midang pawl kha amai duhdan vekin an um lo ruangah asi. Milai zohman hi milai pakhatkhat lungawinak hrangah sersiammi kan um lo, Pathian lungawiter dingah sersiammi kan si. Kanmah lungawitertu dingah midang umter a tumtu pawl cu an lungawinak an hloh ih a sezawng lungput an neih phah riangri asi. Cutin midang an simsiat mawhsiat theu asi.

Bawi Zisu cu amah thattu dingin Judas kha amah in a dungthluntu dingah a ko ih  ahruai. Cutin kumthum sung a umpi. Kumthum sungah Zisu in Judas ih siatnak a rel dah lo, a simse dah lo, a sezawngin zoh in mithmaisia a langter dah lo. Amah zuartu ding asi ti a thei cia. “Nanmah lakah mi pakhat in in zuar ding asi” tiah dungthluntu pawl a sim tikah an mang a bang theh. Judas asi ding tiah zohman in an thei lohli lo. Ziangruangah tile Bawi Zisu in amah zuartu ding Judas kha thleidannak, huatnak, mitmeng, le tongkam in a langter dah lo. “Zisu Khrih ih Thlarau nei lo tu cu Pathian ta asilo” tiah ngan asi. Zisu Khrih ih Thlarau kan sungah a um asi ahcun Zisu in a duhdawtmi cu kan duhdawt ding asi. Zisu in a hmuhdan vekin a lungput vek kan sungah a um ding asi. Ziangvek zumnak, doctrine, le biaknak dinhmun sang, tuahnak, peknak le raithawinak nei hman nungna Zisu Khrih ih Thlarau kan sungah a um lo ahcun cu hmuahhmuah cu mahlemah bum awknak men asi.

Pathian in amah hnakin a caksawn le thiltithei zianghman a sersiam lo. “Lei le van ih thuneihnak hmuahhmuah kan hnenah pek asi zo” tiah a simtu Zisu ih Thlarau kan sungah a um asi achun thilcang thei lo mi zianghman a um lo. Zisu in a duh le duh lo lawng asi. A thupi sawn mi cu kan lungput cu Zisu Khrih ih lungput vek asi dingmi asi. Zisu thawn duhmi, huatmi, nuam timi, hmuhdan, pomdan bang aw ringring ding kan si. Zianghmuahhmuah hi Pathian in a khau-khih cia vekin ziangkim a cang asi tiah ngan asi. Cui hleiah Pathian dodaltu Satan in milai le sersiammi parah a tuahsiatmi pawl hmuahhmuah khal Pathian in amah zumtu le amah in duhdawtnak in a kawhmi pawl hrang ahcun an hrang thatnakah a canter tiah sim kan si fawn. Mi pakhatkhat a lung awi thei lo, a thazawngin hmuhnak a nei lo asile amahlemah siseh midang le dinhmun pakhatkhat mawhsiat loin Pathian le amah karlah ah pehtlaihnak remthat tulmi a um tinak asisawn. Pathian thawn an duhmi, duh lomi, nuam timi, huatmi, tumtahmi bang aw ringring in leitlun nun hmang uhsi.  

Milai pakhat ihsin insang, mibur, pawlkom, society le rampi tuahtha dingin milai thinlung sung ihsin a thawk asi. Lungput dik, thiang neihnak ihsin a thawk asi. Milai thinlung cu Pathian lawngin a thleng thei, “Thinlungthar ka lo pe ding” ati vekin Zisu Khrih ih Thlarau kan sungah a um, a lal, asi ahcun Pathian mizia kan sungah a thanglian dingih Zisu Khrih ih hmuhdan, le lungput cu kan sungah a thang lian ding asi. A sungah Zisu Khrih a um, a ceng, a laltertu zumtu leitlun nun cu hnangam daihnak, duhdawtnak, zangfah ngilneihnak le a thazawngin ziangkim hi Pathian in “a tha” ativek in hmuhthiamnak lungput dik le thiang khal a suakter asi.

Zisu Khrih hmuihmel bang sinsin in thang uhsi!

Cangantu: Rev. Hre Mang, Pastor @ Falam Christian Church of Indianapolis, USA. Zirnak, B.A. in political Science, M.P.A. Master of Public Affairs, B.Th. & Th.M, Theological Studies. 1988 ah Mandalay University kai lai ihsin Burma rampum buai ruangah kawlram suahsan in “8888” tlawngta cangvaihnak teltu asi. 2000 ah US Congress ih tuahmi scholarship program thawn USA ah feh in tlawngkainak pehzawm in siseh Indiana State government hna kum 7 a tuan hnu ah Pathian kawhnak cohlang in pastor a tuan. Zirnaklamah Ph. D. in Leadership, Tennessee Temple University ah a zir rero lai.