Nitin nunah ziangvek thuthluknak kan tuah? Thuthluknak tuah tikah ziangtin Pathian duhzawng asi ti kan theithei? Zumtu pawlin nitin nunah ziangtin Bible vekin thuthluknak (decision) kan tuah thei ding? Kan nitin nun thuthluknak tuahmi in khui lamzin ah in hruai? Timi pawl thusutnak sang ding in malte relkhawm hnih uhsi. (Online video clip “Biblical Decision Making” hi FCCI intermediate Sunday school zirnak ihta lak mi asi ih a zoh duhduh rak zoh theih asi.)

 

Nitin ziangvek thuthluknak kan tuah?:

 

Tociamciam aw la, nitin ziangvek ziangzat ziangtikah ziangtin ziangvek thu pawl parah hngat aw aw in thuthluknak na tuah ih cui na thuthluknak in ziangtluk tiang na nunnak ah rahttha rahsia a rahter, na nunkhua hmailam thu lai a lo relsak, ti pawl cahnah parah ngan hnik aw.

 

 A tawizawng in kan sim asile zumtu pawl nitin nun thuthluknak tuah mi pawl cu:

1)      Thluak sungah ruahnak/suangtuahnak a ummi pawl,

 

Mi tampi in an tluak, thinlung sungah a ummi ruahnak, suangtuahnak pawl hi anmai thu thu in ruat thei, ruat lo thei, suangtuah thei, suangtuah lo thei an si ti an ruat dah lo ruangah satan in an thinlung sungah ruahnak tha lo a retsak mi pawlin a bum theu. Kan thinlung sungah alut theu mi ruahnak, suangtuahnak pawl hmuahhmuah hi zingtin kan umnak inn kan thianhlim ih a langmi taksa kan thiamhlim awk vekin kholh fai, thianhlim ringring ding kan si. Ek inn bal cu satpia ti thawn siseh taksa le thuamhnaw bal pawl cu satpia thawn kan kholh fai vekin kan thinlung le thluak sungah a ummi ruahnak, suangtuahnak pawl hi Pathian thu vekin kholhfai ringring ding kan si. Kan ruahnak, thu pomdan, thinlungput pawl cu Pathian thutak thawn a mil aw aw maw tiah cek aw fel ringring ding kan si.

 

Mi zokhal a mai thinlung/thluak sungah a ummi, a lut mi fimkhur ten a kaihrem ih, a cekfel, a do neh lo ahcun lenglam sakhuanak cun a nun a tidanglam dah lo dingih Pathian aw kam le amai tisa ruahnak pawl a thleidang thiam dah lo ding. Kan insang ah lut dingin mipakhat sangka a king tikah zo asi, ziangtuah dingin insung lut a duh, tvp kan theih a tul vekin kan thinlung sungah a ra lut mi ruahnak pawl kha khui tawk ihsin a ra, ziangtuah dingin, ziang tthathnemnak a suahpi ding, tvp kan theihthiam a tul. Ziangah tile na thinlung sungih a ummi kha na sinak taktak cu asi sawn.

 

Ruahnak tampi cu dunglam thuanthu in kan tluak tawdap ah a ret cia mi, a erh zaw cia mi pawl ihsin a ra theu; cupawl lakah mi thatthei ruahnak (killers thoughts) a um ih ralrin peknak, zir ding le hmailam hrang lamzin hmuhtu a um rualrual in thathnemnak um lo, milai thazang ticau tu khal tampi a um ti fimkhur a tul. Cuvek thotho in ruahnak a lut le a suak lawng siloin kan thinlung lamhuai zawng, lungput, thinlung a tlap mi a bal cia mi, pawl kha thirtlap cu meisa thawn an ur ih tidai sugnah an ciah hnu lawngah a fai thei vekin Thlarau Thianghlim meisa thawn ur ih nunnak thutak sungah tuar thar sal  a tul mi asi.

 

Mi tampi cu an lung a awi lo tikah midang, dinhmun le thil pakhatkhat an mawhsiat theu. AN theih lo mi cu anmah lungawi ter dingin Pathian in zohman ttuanvo a pek lo, anmah cu anmai lungawinak hrangah ttuanvo nei tu an si. Cuvek in nangkhal na lung a awi lo asile zo ih mawh hman asilo, nangmai mawh asi. Na dinhmun, na nupi pasal, unau sungkhat, rualpi, kawhhran, pawlkom le cozah, tvp na mawhsiat thei lo. Na kiangkap ah Kio in kaa hang hemhem in lo deh zik hman sehla, na kimvel ah meisa hlio dupdo in kang hman sehla, na to mi lawngpi cu pil zik cuahco vekin thei hman aw la, na lungawi lole nangmai mawh asi. Zohman na mawh siat thei lo. Leitlun van sersiamtu Pathian ih Thlarau Thianghlim na sungah um na cingin na lungawi lo, Pathian fapa ih thisen in leimi na si na cingin nangmah le nangmah cu zianghman ah na siaraw lo vaivok vekfangah na ruat aw aw khal asile, nangmai mawh asi. Pathian in fa sinak covo le dinhmun a lo pek zo na cingin na hmailam ah thimnak lawnglawng vekin an hmu in ni eng mawi te hmu thei lo, lungawithu sim thei lo na sile, zodang hman mawhsiat hlah, na sunglam kha kholh fai tul a um tinak asi. Pathian thianghlim ennak na sungah lang thei lo dingin sualnak thimpi in a lo khuh lai tinak asi.

 

FCCI Intermediate Sunday school zirtu pawl hnenah “ziangtiang fimthiamnak lamah na thleng thei ding tiah na zum?” tiah thu ka sut tikah an lakih pakhat in “kei cu phunhra tlun lam cu ka thleng thei ding ka zum lo” ati. Ka sut sal ih “cumi ruahnak cu khui tawk ishin na tluak sungah alut?” ka ti tikah “ka thei lo” a ti. Voi tampi cu kan thinlung sungih kan ruahnak cu midang thu kan theih mi, dunglam thuanthu, kiangkap um pawl simmi, lenglam ihsin le ttihnung zetmi satan hnen ihsin a ra lut theu. Curuangah mi zokhalin kan tluak bu sungah a ummi ruahnak pawl hi Pathian hnen ihsin a ra mi asi maw ti fiah ringring a thupi zet. Pathian fa kan si hnu khalah tisa in kan um lai poh cu thinlung in a cakkel, a duhkel, a ttihkel, a at kel, a ti-kel te in ruahnak ttha lolo a suahpi theu tikah tisa thinlung sal thim sungah kan tang theu. Curuangah in celcilh tu Pathian Thlarau Thianghlim sal sawnah kan thinlung ruahnak duhnak cu kan up ih a thuhnuaiah kan nun a tul. Culole thinlung cu mi bumhmang bik asi vekin inbum asi ti kan theih lolai ah kanmai thinlung in a tikel ten nitin in bum rero ding ti cu a fiang. Cutin lei tisa ruahnak ihsin a suakmi thawn thuthluknak kan tuah tikah Pathian duhzawng thawn hlapi a rak si theu.

 

Curuangah, na tluak sungah ziang na ruat ding, ziang na suangtuah ding timi kha nitin te thuthluknak (decision) na tuah tambik mi (pakhat) asi ding. Na ruahnak in thlaici na tuh ih cui thlaici cun na nitin nunah rah a rah theu mi asi.

 

2)      Taksa thawn a pehtlai mi pohoh:

a.       Na mit in na zohmi, na hna le kaa sungah a lut mi,

Na mit in na zoh mi na hmuh mi le na kaa le hnaa sungah a lutmi pawl khal kha nangmai thuthu, nitin te thuthluknak (decision) na tuah mi an si. Na nunkhua hmailam saupi sankhuk hrang tiang rahttha a rah thei mi na lut ter dingmaw, na tisa diriamter ding lawng na hawl ding, hril ding na neiih na hril mi vekin second tinte thuthluknak na tuah asi.

 

b.      Na kiangkap ah zo an um, zo pawl kiangkap ah na um:

Na kiangkap ah zo, ziang an um, ziang thawn nan dai aw aw, ziang na tham, khui lamzin na zawh, ziang thil le ri pawl na naihniam rero timi kha na nunkhua hrangah a thupi tukmi an si. Second tinte nangmah in thuthluknak (decision) na tuah rero mi asi.

 

3)      Na kaa sung ihsin a suakmi tongkam,  

Mi tampi voi tampi cu kan tongmi tongfang tlanghra a liam hnu hmanah kan tongmi ih san kan thei man lo theu. Kan tong mi theitu, a ngai tui hna sungah ziangvek in hmual/san a nei ih kan tongkam ih tur in ziang  asiat suah ti ruat setset loin tongkam kan thlah theu.

 

Mi zokhal, amai duh lomi tongter a theih lo vekin na kaa sung ihsin a suak mi tongfang pohpoh ih man cu na at sal ding. A tha asile a that vekin a siat asile a siat vekin. Curuangah na kaa ihsin tongfang pakhat suak dingin thuthluknak (decision) na tuah ih suak lo ding khalin second tinte thuthluknak (decision) na tuah asi. Tong ding tong lo ding, hmun/can le tongfang hril thiamtu cu mifim asi.

 

4)      Neihmi, theihmi, tikcu can, sumpai, milai pehtlaih awknak le nitin thuanthu pawl hman awknak ah second tinte thuthluknak (decision) na tuah.

Thutthimnakah, can hmandan thu ah ziangsi Pathian thu in a sim? Kan taksa ruangpi cu Pathian Thlarau cennak (biak inn) asi ih kan nunnak cu thisen in leizo mi kan si ruangah tisa duhdan in nung ding kan si nawn lo. Tikcu can awl kan neih mi sungah thiltha ka tuah thei ti thei na cingin ihkhun parah zangzel in a it rero tu cu Pathian in thu a tthen ding asi. Curuangah thlarau lam pitlung, Pathian Thlarau ukmi, mi pakhat mi ze, a um thei lo. Ziangah tile Thlarau in a kiangkap ah thiltha tuah ding a hmuhter ringring asi. Thiltha ti ah thei na cingin a tuah lo tu cu sual tuahtu asi fawn.

 

 

Curuangah, Pathian fate pawl leitlun kan um sungah nitin thuthluknak (decision) kan tuah mi pawl cu ;

1) Kan thinlung sungah ruahnak, suangtuahnak, lungput kan neih mi pawl,

2) Kan taksa thawn a pehpar mi, kan taksa –kan mit, kan hna, ka kaa, sungah kan lut ter mi, 3) kan taksa sung ihsin a suak mi (tongkam), le

 4) kan neihmi thuanthu, tikcu can, pehtlaihnak , cantha, thileri, tvp kan hmannak pawl ah Pathian duhdan vekin thuthluknak tuah thei tucu mi fim, mi thlawsuak le mi lungawi asi.

 

Thuthluknak kan tuah tikah khuitawk in, ziang thuhram parah hngat aw awin thuthluknak (decision) kan tuah ih kan tuah mi thuthluknak in ziangvek lamzin ah kan nunnak a fehpi timi thleidan thiam ding Pathian in mi pakhat cio tuanvo in pek ih mi zocio khal anmai hrilmi thuthluknak vekin an hmailam cun a hngak asi.

 

Voikhat cu FCCI intermadiate Sunday school zir pawl hnenah “Leitlun ah ziang rawl a thaw bik?” tiah thu ka sut tikah, Chocalate, arsa, china rawl, tvp, an sal celcel. Cule an hnenah “leitlun ah ziangrawl a thaw bik? Timi thusuhnak sang thei dingin leitlun ah a um rawl hmuahhmuah nangmah in na ei/tep asilole a ei/tep dah tu pawl simmi na theih ta, hliakhlai hmasa a tul lo maw ka titikah, “Ooo aw” an ti celcel. AN sim sual ti an thei aw aw. Anmah in an ei dah mi rawl (phun maltakte) lak ihsin anmah lala in thaw an ti bik mi kha leitlun milai pawl hmuahhmuah hrangah a thawbik ah an rak ruat sual asi ti an thei aw sal tikah “Ooo aw” an tinak asi. Pitling khal, cuvek cu kan si theu. Kan theihmi maltak te sung ihsun leitlun mi zapi hrangah “thiltha” “tha lo” tiah thu kan rak tthen in thuthluknak kan tuah theu ih kanmai nitin nunah thuthluknak (decision) kan tuah theu tikah kan thuthluknak tuahmi thawn a pehpar mi thu tampi tanta in thuthluknak kan tuah sual pang theu tikah kan mai hrangah thiltha lo arak si theu.  

 

Meithal kap tu pa cun a meithal hmuisel  le a tinmi maltak te a peng pang hmanah a kah duhmi a hmuntin mi a tthelh theu vekin nitin nunih thuthluknak (decision) fate kan tuah mi hin kan hmalam hmuitin mi ihsin lam hlapi ah mi a thlen thei theu asi.

 

Paul in Rome cakuat sungah a ngan mi cu, mi pakhat tisa mizia in a uk mi cun Pathian duhzawng thutak khal a thei thei lo, a theithei lo lawng hman si loin tisa mizia in a ukmi cu Pathian ih ral asi a ti. Asinan, leitlun milai pawl cun zuri cingin kawhhran thu an rel, mi huat mi nei ringring cingin pulpit parah kan kai, a thupten  tisa uknak hnuai ah nung cingin kawhhran ah roral tu dinhmun ah kan ding theu. Tisa mizia in a uk mi in “Pathian duhzawng asi ding” ti ah thutluknak kan tuah theu mi cu Saul siangpahrang pa in “Pathian duhzawng asi ding” tiah raithawinak a pekmi vek kha asi theu ding.

 

Nitin te ziangvek thu thluknak kan tuah ih ziangvek thuhram ah hnat aw aw in thuthluknak kan tuah, cui thuthluknak pawl cun ziangtluk siatnak le thatnak lamzin ah mi a thlen thei timi FCCI Intermediate Sunday school zirhnak video ngai duh pawl rak ngai dingin online ah ret asi.

 

Nitin te Pathian duhzawng duh, hiar, cak, le hril thiamtu si thei dingin Pathian Thlarau thunun/uk nak hnuai ah in na thinlung duhnak, caknak, hiarnak, hal zawng, ngainat zawng, nuam tizawng kha na up awk a tul asi. Na tisa duhzawng na rian sungah ziangkim na tuah mi kha Pathian Thlarau kalhzawng a rak si ringring theu.

 

Pathian duhzawng hril thiamnak fimnak thawn Pathian Thlarau in lam lo hruai hram sheh!