Thinphang, donhar, helhkam

ZUmtu leitlun nunah thinphang, donhar, helhkam in na um asile, a tanglam hi Pathian tongkam pawl hi siar aw:

Pathian Thlarau in a thunung cu na sungah nunter hram seh!

Thinphang

1.               Phannak in zianghman thathnemnak a nei lo, zianghman a suahpi lo

Matthew 6:27-29 :28“Cun ziangah so hnipuan thu ah nan don a har? Hramlakih pangpar khi zohhnik uh; hna an ṭuan lo, pathnuk in thiam an tak fawn lo. 29Asinain atu-ah ka lo sim: siangpahrang Solomon hman, kha tlukin a lian nain, a lennak le a hnipuan in hi pangpar ih mawinak a tluk lo a si. 30Tuihsun ah a nung ih thaisun ah meisa sungih paih ding hrampi hman a ceimawitu Pathian cun cuih pawl hnakin nannih cu a lo thuam sawn lo ding maw? Nan zumnak a va mal lawmmam so!

2.               Phannak in tthatlonak a suah pi.  Proverbs 12:25 :Donharnak in na lungawinak a dawi hlo ding; Asinain zaangfahnak ṭongkam in thazaang a lo pe ding.

 

3.               Phannnak cu Pathian zumnak ih khatlam raalah a um: Matthew 6:30 : 30Tuihsun ah a nung ih thaisun ah meisa sungih paih ding hrampi hman a ceimawitu Pathian cun cuih pawl hnakin nannih cu a lo thuam sawn lo ding maw? Nan zumnak a va mal lawmmam so!

 

4.               Na thinling le ruahnak kilven sak tul: Philippians 4:6-7 : 6Ziang thuhla hmanah donhar in um hlah uh; thla nan cam tinte in nan ṭulmi cu Pathian hnenah dil uhla lungawi aipuang tein dil uh. 7Cuticun minung ruah ban lomi Pathian ih daihnak in nan thinlung le nan ruahnak cu Khrih Jesuh ah himte in a kilkhawi ding.

 

5.               Phannak in thinlung a hruaisual, ruah lo dingmi mi a ruat ter, Pathian zum lotu pawl khawruah vekin mi a ruatter: Matthew 6:25:  25“Cuti a si ruangah ka lo sim: nan nunnak hrangih nan ṭulmi ti le rawl le nan ruangpi hrangih hnipuan pawl thu ruat le donhar in um hlah uh. Thungai ih ti ahcun, nunnak hi rawl hnakin a thupi sawn lo maw? Hnipuan hnak khal in taksa ruangpi hi a thupi sawn lo maw?
Matthew 6:31-33  “Curuangah ‘Ei in ding le sinfen ding tla khui-in so ka ngah ding,’ tiin donhar in um hlah uh. 32Hi pawl cu Pathian thei lo khawvel pawlih an helhkam ringring mi an si. Vancung ih a ummi nan Pa in hi thil pawl nan ṭulzia cu a thei a si. 33Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si.

 

6.               I Peter 5:7 : 7Nan donharnak hmuahhmuah cu Amah ih hnenah ṭhum uh, ziangah tile Amah cu nan zawn a lo ruattu a si.

TTIHNAK

7.               Psalm 27:1:  Bawipa cu ka tleunak le ka rundamnak a si; Zoso ka ṭih ding? Bawipa cu ka beunak lungpi a si; Zianghman ka ṭih lo ding.

 

8.               Isaiah 41:10, Zianghman ṭih hlah, na hnenah ka um a si. Keimah cu na Pathian ka si, zianghman in lo phangter hlah seh. Ka lo bawm dingih ka lo cakter ding; Ka lo hum dingih ka lo run ding.

 

9.               Psalm 27:4-5 , 4 Bawipa hnenah thil pakhat ka dil; Cuih thil pakhat lawng cu ka duhmi a si: Bawipa ih inn sungah ka nun sung hmuahhmuah um ka duh; A mawinak zoh dingah le amah ih duhmi hawl ding, hi a si. 5Harsat caanah amah ih puuk sungah i thup ding; A Biakinnpi sungah himte in i kilkhawi ding ih, A saangmi lungpi parah hnangamte in i umter ding.

 

10.           Psalm 46:1, 1Pathian cu kan beunak le kan thazaang a si; Harsat caan ah cat loih in bawmtu a si.

 

11.           Philippians 4:19, Cule ziang hmuahhmuah famkim in Khrih Jesuh sung ihsin ka Pathian in nan ṭulmi poh a lo pe ding

 

12.           Psalm 84:2-4, A sung thlen cu ziangtluk in so ka hiar! Bawipa ih Biakinn sung thlen cu ka ngaizet a si. Ka thinlung zatein a nungmi Pathian hnenah lungawi in hla ka sa. 3Sunṭam hman in bu an sak ih Vanva khal in inn an nei. Na biakṭheng kiangah cun an fano an ret. Maw Ziangkimtithei Bawipa, Ka siangpahrang le ka Pathian. 4Na Biakinn thiang sungih a ummi Na hnenih thangṭhatnak cat lo ih a satu pawl cu, Mi lungawi an va si so!

 

13.           Psalm 34:7-9,  Bawipa a ṭihzahtu pawl cu a vancungmi in an kil ih, ṭihphannak in a run hai a si. 8 Bawipa ih ṭhatzia cu nanmah tein tep ciar hnik uh; A hnenih himnak a ngahtu cu mi thlawsuak an si. 9Maw amah ih minung pawl, Bawipa cu ṭihzah uh. Amah a ṭihzahtu cu tlaksammi zianghman an nei lo.

 

14.           Vancung Ih Lennak ; (Mat 6.19-21) 32Tuurun tete tla, nan thinphang hlah uh; ziangah tile nan hnenah Uknak pek cu nan Pa ih lungawi zawng a si. 33Nan neihmi thilri pawl zuar ṭheh uhla nan ngahmi tangka cu mifarah pawl ṭhen uh. A siat thei lomi tangka bawm nan hrangah ngaihtuah uhla vancung ah nan sumsaw pawl khawl uh. Cutawkah cun fifir in an dai thei lo ding ih a tlap thei fawn lo ruangah ziangtik khalah a hloral dah lo ding. 34Ziangah tile nan sumsaw umnak ah nan thinlung khal a um ve ding,” tiah a ti.

 

1. John 14:1-3, 1Jesuh in a dungthluntu pawl hnenah, “Thinlung har le beidong in um hlah uh. Pathian zum uhla keimah khal i zum uh. * 14:1 Grik ṭong um daan ahcun Pathian nan zum ih kei khal in zum ti tla a si thei. 2Ka Pa ih inn ah innkhaan tampi a um ih nan hrangih umnak rem dingah ka feh ding. Cutiin si hlah sehla hiti in ka lo sim lo ding. 3Cule ka feh ih nan umnak ka rem ngah hnuah ka ra sal ding ih ka hnenah ka lo hruai ding; cuticun ka umnak ah nan um ve ding.

 

 

1.  Revelation 21:4 , 4An mitthli hmuahhmuah a hnul sak ding. Thih a um nawn lo ding; ninghang riahsiat, aihram ṭahnak le natnak a um nawn lo ding. Ziangah tile thil hlun pawl cu an hlo ṭheh zo,” tiah a ti.

 

1. Psalm 23:4. 4A thimmi thihnak horkuam sung zawh hman ningla, Maw Bawipa, ka ṭih lo ding; Ziangah tile nang cu ka hnenah na um, Na talhtum le na kianghrol in ka hna in ngamter. 

 

1. Psalm 46:10 Amah in, “Nan do awknak cu baang thlang uh, Keimah hi Pathian ka si kha thei uh; Miphun hmuahhmuah tlunah bawi bik ka si ih leilung pumpi tlun khal ah bawi bik ka si thotho,” tiah a ti. 11Cungnungbik Bawipa cu kan hnenah a um. Jakob ih Pathian cu kan beunak lungpi a si.

 

 

1. Psalm 37:5 5 Bawipa hnenah na nunnak pe aw; Amah rinsan awla a lo bawm ding.

 

1. Matthew 11:28-30, “Thilrit a phurmi le zonzaih a tuartu pawl, ka hnenah ra uh, colhdamnak ka lo pe ding. 29Ka kawn hi phurhnik uh. Kei cu nunnem le tangdornak thinlung neimi ka si. Ka hnen ihsin zir uhla colhdamnak nan ngah ding. 30Ziangah tile keiih kawn phurh cu a nuam ih ka thil khal a zaang a si,” tiah a ti.

 

1.  Matthew 6:34, 34Curuangah thaisun hrangah donhar in um hlah uh; thaisun in donharnak amah tawkin a nei ve ding. Ni ni khat ih a phurhmi harsatnak tlunah a dang beetcih ding a si lo.

 

 

1. Psalm 121:1-2, 1Tlangpar khi ka hei cuan; Khui-inso bomnak ka hnenah a rat ding?  2Keimah bomnak cu Bawipa ih hnen ihsin a ra; Lei le van tuahtu Bawipa ih hnen in.

 

1. Proverbs 3:5-6, 5Bawipa cu na thinlung zate in rinsan aw. Nangmah ih ruahnak le theihnak kha rinsan aw hlah. 6Na tuah mi kipah Pathian cu thei ringring awla, Amah in lamzin dik a lo hmuh ding a si.

 

1. Psalm 56:3 , 3Ṭihphannak ka neih tikah, Maw Ziangkimtithei Bawipa, Nangmah ka lo rinsan a si.

 

1. Jer 29:11, 11Nan hrangih tumtahnak ka neihmi cu keimah lawngin ka thei. Tumtahnak ka neihmi cu siatralnak si loin mi neinung nan sinak dingah a si; cuih tumtahnak cu nan ruahsannak le nan hmailam hrang a si.

 

Ziangtin tuah ding: 

 

1. Romans 12:1-2 , 1Cuti a si ruangah ka u le ka nau tla, a tam zetmi Pathian ih in zaangfahnak ruangah hin nan ruangpumpi cu a thiangmi le cohlan tlak raithawinak bangtuk in Pathian hnenah pe uh, tiah ka lo dil. Cumi cu Pathian hnenih nan pek dingmi biaknak taktak cu a si. 2Hi khawvel daanah hin kop nawn hlah uh; cuhnak in nan thinlung kha tharthawh tahratin thleng aw sawn uh. Cutiin Pathian ih duhnak cu nan thei ding ih Pathian ih hmaiah ziangso a ṭha, ziangso a lungawi mi a si tile ziangso a famkimmi a si ti nan thei ding.

 

1.  Math. 6:33-34; 33Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si. 34Curuangah thaisun hrangah donhar in um hlah uh; thaisun in donharnak amah tawkin a nei ve ding. Ni ni khat ih a phurhmi harsatnak tlunah a dang beetcih ding a si lo.

 

 

1.  Psalm 32:8-10, 8 Bawipa in, “Na thlun dingmi lamzin ka lo sim ding. Ka lo zirh dingih ka lo hmuh ding. 9Rang le laak vek cun aa hlah; Na thu ngaitu si dingah annih cu Kakharh le hmurhri in dirh an ṭul,” a ti. 10Mi ṭha lo pawlih tuarmi cu a tam ngaingai; Asinain Bawipa a rinsantu cu A hmunmi a duhdawtnak in a hum hai a si.

 

1.  Philippians 4:4-7, 4Bawipa thawn nan pehzom awknak ah hin nan lung awi ringring hram uh; ka nolh sal hrih ding: nan lung awi hram uh! 5Mi hmuahhmuah hnenah nan lungnem uh. Bawipa cu a ra cing ding. 6Ziang thuhla hmanah donhar in um hlah uh; thla nan cam tinte in nan ṭulmi cu Pathian hnenah dil uhla lungawi aipuang tein dil uh. 7Cuticun minung ruah ban lomi Pathian ih daihnak in nan thinlung le nan ruahnak cu Khrih Jesuh ah himte in a kilkhawi ding.

 

 

1.   Psalm 103:1-4, 1Maw ka nunnak, Bawipa cu thangṭhat aw; Ka sungih ummi hmuahhmuah in, A hmin thianghlim cu thangṭhat uh. 2Maw ka nunnak, Bawipa cu thangṭhat awla, A ṭhatnak hmuahhmuah hngilh hlah aw. 3Amah in ka sualnak hmuahhmuah i ngaithiam ih, Ka natnak hmuahhmuah i damter. 4A thukmi thlaan ihsin i suah ih, A hmunmi duhdawtnak le lainatnak thawn i thlawsuah.

 

1.  2 Corinthians 12:9-10, 9Asinain i run let ih, “Ka zaangfahnak cu na hrangah a tawk a si; ziangah tile na ṭonṭaih caan hi ka cah bik caan a si,” a ti. Curuangah Khrih cahnak le humhimnak cu ka hnenih a umnak dingah ka ṭonṭaihnak khalah hin hmaihngal zetin ka lung a awi. 10Cuticun Khrih ruangah ka ṭonṭaih tikah siseh, hmuhsuam nautatnak, mangbang vansaannak, hremnak le harsatnak ah siseh, lungkim zetin ka um thei zo. Ziangah tile ka ṭonṭaih caan hi ka cah laitak a si.

 

1.  Ephesians 2:4-9, 4Sikhalsehla Pathian ih in zaangfahnak cu a tlamtling ngaingai ih in duhdawtnak khal a tumzet ruangah, 5kan sualnak sungah thlarau lamin mithi cia kan si ko nain Khrih thawn nunnak ah in thoter sal zo. Pathian ih zaangfahnak thawngin rundammi nan si. 6Khrih Jesuh thawn kan pehzom awknak thawngin Pathian in Khrih thawn vancung ramih uk tlang dingah amah thawn in thoter sal zo. 7Hi bangtuk ih a tuahnak cu ziangdang ruangah a si lo; Khrih Jesuh sung ihsin kannih in duhdawtnak a tumzia kha kumkhua daih in langter a duh ruangah a si. 8Ziangah tile nannih cu Pathian zaangfahnak zaarah zumnak in rundam nan si. Hi rundamnak cu nan ṭuannak ruangih nan ngahmi a si lo, Pathian ih laksawng a si. 9Cuhrangah zo hman porh awk ding a si lo. 10Pathian in kan ṭuan ding hrangih a rak timtuah ciami hnaṭuan ṭha ṭuantu dingah Khrih Jesuh sungin kannih cu siamtharmi

 

 

1. Titus 2:11-14, Ziangah tile Pathian in a zaangfahnak cu mi hmuahhmuah rundam dingah a langter zo. 12Cuih zaangfahnak in Pathian ziaza thawn a mil-aw thei lomi nun daan le leilung taksa hiarnak pawl baansan dingah in zirh. Cule mah le mah a uk-aw theimi le dingnak le hi leikhawvel ah hin Pathian ih duhzawng thawn a mil-awmi ziaza ih kan nun theinak dingah in zirh fawn. 13Cutiin a maksakmi kan Pathian le in Runtu Jesuh Khrih ih sunlawinak a lang ding tiin kan ruahsanmi Ni sunglawi cu kan hngak a si. 14Amah ih nunnak rori kha kannih pawl ṭhatlonak ihsin runsuak dingah le thil ṭha tuah a hiartu si dingah le amah ih bulta mithiang ih in canternak dingah kan hrangah a pek zo.

 

1.   John 14:12-14, 12Thungaite in ka lo sim: Keimah i zumtu cun ka tuahmi hi a tuah ve ding; a si, ka Pa hnenih ka feh ding ruangah hi hnakih thil mak sawn hman a tuah ding. 13Cule ka Pa ih sunlawinak cu Fapa sung ihsin a langnak dingah ka hmin in nan dilmi hmuahhmuah cu ka lo tuahsak ding. 14Ka hmin in nan dilmi pohpoh cu ka tuah ding a si,” tiah a ti.

 

 

1.  1 Thessalonians 5:16-18, 16Cat loin nan lungawi uh; 17thlacam ringring uh. 18Ziangvek dinhmun khalah lungawi thu sim uh. Cucu Khrih Jesuh ah Pathian ih a lo duhsakmi a si.

 

1. Hebrews 4:14-16, 14Curuangah kan zumnak hi khoh zetin kaihnget uh si. Ziangah tile Pathian Fapa Jesuh cu kan Puithiam saang maktak a si ih amah cu Pathian umnak rori ah a thleng zo. 15Kan Puithiam saang cu kan ṭonṭaihnak in theihsak lotu a si lo. Kanmah vekin sualforhnak a phunphun a tong vemi a si; a sinain anih cu a sual lo. 16Cuti a si ruangah Pathian bawi tokham cu ralṭha zetin pan uhsi; cutawkah zaangfahnak a um. Cutawkah ngilneihnak kan co ding ih kan ṭul tik caanah zaangfahnak kan ngah ding a si.

 

1. Jude 1:24-25,  24Tlu suak loin a lo kilkhawi ih sualmawhnak nei loin lungawinak thawn a sunglawimi a umnak ah a lo thlenter theitu, 25amah lawng kan Pathian le Runtu a si mi hnen ahcun, kan Bawipa Jesuh Khrih thawngin a cem ciami caan ah siseh, atu le hmailam caanah siseh, sunlawinak, thawmliannak, cahnak le thuneihnak cu kumkhua in kumkhua tiang um camcin hramseh. Amen.

 

 

1.  Psalm 73:26, Ka thinlung le ka taksa hi ṭumsuk deuhdeuh hmansehla, Pathian cu ka cahnak a si.  Amah lawng hi kumkhua ih ka covo a si.