DUNGTHLUNTU LAMZIN DISCIPLE YOURNEY
SESSION 9
JESUH IN A DUNGTHLUNTU A KO (JESUS CALLS HIS DISCIPLES)
JESUH IN A DUNGTHLUNTU A KO (JESUS CALLS HIS DISCIPLES) Key: Jesuh in kan umnak hmun ih ta in hawlsuak ih a dung kan thlun vekin kan nun in thleng asi.
Jesuh in a dungthluntu pawl a ko. Amah in a hawl ih a dungthluntu dingah a hruai hai ih leitlun ah a rawngbawlnak mission hnatuan ah tel ve dingin a sawm. Tuini tiang Jesuh in cucu a tuah rero lai mi asi. Himi zirnak sungah nangmah le na group pawlin Jesuh in a dungthluntu pawl a kawhnak (John 1:43-51) ihsin nan zir ding, Jesuh leitlun a um lai ah a dungthluntu pawl a kawh vekin tuini khalah dungthluntu pawl a ko. Tuisan khalah Jesuh kawhnak aw kan san tikah nun thleng awknak kan nei asi. Nangmai nunah Jesuh in a lo kawhnak pawl na group hnenah simsawng ve aw. Jesuh dungthluntu dinhmun in nun thleng awknak nan tawntehmi pawl khat le khat sim aw ciar uh. Bible zirnak le group cangvaihnak nan tuah rualrual in Bible bungcang pekmi pawl thei fiang zet dingin zuam aw.
ZOHSALNAK Ahmaisa ah Jesuh dungthluntu cu tawp ti um loin a thang rero mi, nun thleng awknak asi ih acuih nun thleng awknak lamzin ah midang bawm in Jesuh dungthluntu siter vivo dingin asi ti kan zir zo. Thlarau lam thansohnak cu Jesuh bang sinsin in thansoh nak asi ih cumi cu mahte lawng in kawhhran mibur lak tel loin than theih asilo. Midang nun zohthim, zohthim tlak nun mah in nunpi nak in khat le khat thansohnak ah sawmdawl awk tawnnak asi.
Jesuh in ziangtin a dungthluntu pawl a ko ti kan zoh hlanah a hnuailam thusuhnak sang aw: Tuzarh hrang mahte tuah dingmi pawl ziang na rak tuah, ziang na bang?
Bible na siar phah in ziang na zir thar mi a um?
Thusut duhmi ziang na nei?
THLACAM
Tuzarh hrang zirnak pawl hi thlacam in Pathian thawn pehzawm awknak in thok aw. A hnuailam vek in thlacam na thok thei: · Jesuh leitlun mission hnatuannakah tel ve dingin siar tel na si ruangah Pathian thangthat in lungawithu sim aw. · Jesuh in a dungthluntu ah a lo ko, na tawntehmi parah lungawithu sim aw. · Jesuh dungthluntu ah kawhmi thu na zir rualrual in Pathian thuthuk theihtheinak Pathian hnenah van fimnak dil aw.
THUHMAIHRUAI America ramah ralkap hrangah mithar an lak tikah Uncle Sam ih tongkam “KAN LO TUL” timi an hmang theu.
Na nunnak ah mibur cangvaihnak ah phur zetin na tel dahmi a um maw, ziangtin?
Zaingthu pakhatkhat ruangah tumtah pakhatkhat hrangah mibur cangvaihnak ah tel dingin sawm awknak mi neh thei zet ziangvek na tawntehmi hmuh mi a um dah?
Jesuh cu leitlunah taksa in a um lai ah dungthluntu pawl a ko. Asinan leitlun ralkap pawl ralkap lakdan thawn cu a bang aw lo. Tuini khalah Jesuh in a dungthluntu ding pawl a ko rero lai asi.
Jesuh dungthluntu si dingin a hmaisa bik cu kanmah in Jesuh kawhnak aw kan sannak asi.
BIBLE THUANTHU Jesuh leitlun rawngbawlnak ah a cancan cu tumhrim in dungthluntu pawl a kiangah a finkhawm theu. Cutin mihrekkhat pawl a ko ih a rawngbawlnak leitlun mission ah tel ve dingin a hruai hai. A hnuailam ah Jesuh in dungthluntu pahnih a kawhnak kan hmu thei. John 1:43-51.43A thaisun ah Jesuh cu Galilee feh a tum. Filip kha a hmu ih a hnenah, “I thlun aw,” tiah a ti. 44Filip cu Andru le Piter umnak Bethsaida khua mi a si. a si. 45Filip in Nathanael a tong ih a hnenah, “Moses in Daan cabu sungah a thuhla a nganmi le profet pawl khal in a thuhla an ngan mipa kha kan tong zo. Amah cu Josef fapa Jesuh, Nazareth khuami a si,” tiah a ti. 46Nathanael in, “Nazareth khua in thil ṭha a suak thei pei maw?” tiah a ti.Filip in, “Ra zohhnik awla!” tiah a ti.47Jesuh in Nathanael a rat kha a hmuh tikah, “Israel mi taktak hi zohhnik uh! A thinlung ah zianghman hrawhhrawlnak a um lo,” tiah a ti.48Nathanael in, “Ziangtin so i theih?” tiah a sut.Jesuh in, “Filip ih a lo kawh hlan theipi kung hnuai ih na to lai ah khan ka lo hmu zo,” tiah a ti.49Nathanael in, “Sayapa, nang cu Pathian Fapa na si! Israel Siangpahrang na si!” tiah a ti.50Jesuh in, “Theipi kung hnuai ih na to lai ka lo hmu, ka ti ruangah i zum a si maw? Hi hnakih thil maksak tampi na hmu lai ding!” tiah a ti. 51Cule an hnenah, “Thungai in ka lo sim: vancung khi a ong aw ding ih Milai Fapa parah hin Pathian ih vancungmi an ṭum le an kai kha nan hmu ding,” tiah a ti.
A tlunih bungcang sungah Jesuh dungthluntu thu ziang in zirh?
Nathanael ziangtin Jesuh dungthluntu ah a cang, a dawtdawt in sim aw?
BIBLE THUANTHU LAILANG DUNGTHLUNTU LE JESUH TAWN AWKNAK Jesuh dungthluntu si dingah a hmaisa bik cu Jesuh thawn tawn awknak asi. Nulepa hnen ihsin Jesuh dungthluntu sinak ro co zohman an um lo. Kawhhran member sinak,kawhhran program ah taimak suahnak, biaknak lam zuamnak in Jesuh dungthluntu si a theih lo. Amah Jesuh thawn tawn awknak in nun thlengnak a suahter ih cutin a dungthluntu kan si theinak asi. Jesuh thawn nan tawn awknak ihsin na nun ziangtin a thleng aw?
John 1:43-52 sungah kan hmuh vekin Philip le Nathanael in Jesuh an tawndan, dungthluntu an can dan a bang aw lo. Nahtanael cun thukthun lawk zetin Philip a rak sang nan Jesuh thawn an tawn awk hnu ah Jesuh cu “Pathian Fapa na si” tiah a co hlang. Bulpak pakhat ciar in Jesuh thawn kan tawn awkdan ah a bang awk theh thei lo, cutin khatin asi ding timi sim theih asilo. A thupi mi Jesuh dungthluntu pawl cun Jesuh kawhnak aw an sang ciar mi ah a bang awknak asi. Rundamnak hrangah ziangvek a dawtdawt in na kalkan a tul timi an lo zirh dah?
Rundamnak na co ngah hnu ah ziangvek pawlin dung a thlun tiah an lo zirh dah?
DUNGTHLUNTU PAWL CU JESUH IN AN NUN A THLENG MI AN SI. Jesuh dungthluntu kan si thei nak cu Jesuh thawn tawn awknak in a kawhnak aw sannak asi. Philip le Nathanael khal cuvek in Jesuh dungthluntu an si theinak asi.
Philip nunnah kan zoh asile Jesuh thawn an tawn awk veten a nun a thleng aw ih amah in a congah mi cu midang in co ve dingin midang hnenah a simsin-evangelist ah coplehcilh in a cang tiah simtheih asi. Na theihsual pang lo ding a thupi: Jesuh thu midang hnenah simsin dingin thlarau pitling nun na neih hmaisak a tul lo. Mi hrek cu Jesuh thu midang hnenah simsawng dingin an ning a zak, an nun danglamnak langhngan zetin a lang ding an duh lo theu. Midang zumnak le tikcu hnaihnoktu si an duh lo theu. Thudik cu hitin asi: kan nun danglamtertu nun thleng awknak tawntehmi kan neih tikah midang hnenah simsawng loin mahte umpi in thuh ding cu thilcang thei lo tluk asi. Thildang lam, nun thleng awknak, lungawinak thar kan tawn tikah milai mizia cun um thei loin midang simsin duhnak a nei ringring asi. Na duhdawtmi le ngaihvenmi midang hnenah Jesuh rundamnak thu simsin ding na ruah tikah ziangtin na thinlung a um?
Nathanael tla a hmaisa ahcun a ringhlel nan Jesuh hmaitawn in a tawn tikah Jesuh kawhnak aw a ngai ih a cohlang. Cuntin Jesuh dungthlun in Jesuh a biak tikah amizia cu hmakhat te ah a thleng aw lohli sawn asi. Cucu Nathanael ih nuncan ziaza thleng awknak hram thok asi. Philip le Nathanel cu Jesuh dung an thlunih a thihnak le a thawhsalnak tiang dungthluntu ah an cang lan ta. Kawhhran thuanthu ah nganmi vek asile an pahnih in Jesuh rundamnak Thuthangtha simnak ah thah tiang an tuar tiah theih asi.
Na sunglam thlarau nun ziangvek ziangtin thleng awknak na tawng?
TELVE IN TUAH AW Jesuh thawn nan tawn awknak, na piantharnak thu ihsin midang hnenah Jesuh thu na sim thawk thei asi. Testimony mawi zetzet, thusim nal zet na si a tul lo. Nangmai hmuhtawnmi, na nun thleng awknak thu kha hmang in Jesuh thu midang hnenah rundamnak a tultu pawl hnenah na sim thei asi. A hnuailam ah Jesuh thawn nan tawn awknak, na piantharnak thu tawite nngan aw a sim dan ding practice aw. Cui hnu ah mi pakhatkhat hnenah simsin ding.
A hmaisa bik Jesuh thawn nan tawn awknak thu ngan: .. … Ziangtin na nun a lo thleng? … THLACAM DIL DUHMI NGAN
ZARHKHAT SUNG CANGVAIHNAK Pathian biaknak · Bible siar ding pawl siar aw · Pathian thawn bulpak can hmang aw · Nitin thlacam hngilh lo ten thlacam aw Bulpak zirnak · Jesuh thawn bulpak tawn awknak pawl ca siar in na tawntehmi pawl ca in ngan khum aw Nunpi aw -Tuzarh sungah na testimony zumlotu Jesuh nei hrih lo hnenah sim aw. Na tawntehmi pawl kha theih awlsam bik dingin sim zuam aw. -Nitin nunah Jesuh thawn tong aw in pawlkomnak neih zuam aw. -Mark 2:17 zoh lo in ngah dingin siar aw. Mark 2:17Cuih thu cu Jesuh in a thei ih, “Mi harhdam pawl in sibawi an hai lo; a na mi lawng in an hai a si. Miding pawl ko dingah ka ra lo, misual pawl ko dingah ka ra a si,” tiah a ti. -Jesuh thawn a hmaisabik nan tawn awknak ca sungah ngan khum aw. Jesuh dungthluntu si dingin na tumtah felnak thu ngan aw, ziangtin Jesuh in na nun a lo thleng nak pawl ngan aw.
BIBLE SIAR DING A hnuailam Bible bungcang pawl nitin siar awla Thiang Thlarau in a lo zirh thar mi pawl ngan khum aw. 1. MATHAI 5:1-16
2. LUKE 5:1-11
3. ROMAN 5:1-21
4. ROMAN 12:1-21
5. EPHESIANS 4:17-32
6. KOLOSIANS 3:1-17
7. THUPUAN 21:1-27
JESUI’ THLACAM John 17 nakah Jesuh in thla a cammi pawl in zirh. Jesuh in a dungthluntu pawl hrangah thla a cam ih a thlacammi pawl cu nang le kei hrang khalah asi. A thlacam hmaisa cu: John 17:20-21, 20“Anmah hrang lawngah thla ka cam a si lo; an thusimmi a thei ih keimah i zumtu ding pawl hrang khalah thla ka cam. 21An zatein pakhat an si theinak dingah thla ka cam. Ka Pa, nangmah cu ka sungah na um ih kei khal na sungih ka um vekin annih khal kan sungah um ve hram haiseh. Nangmah in i thlah hi leilung in an zum theinak dingah annih cu pakhat ah cang hram haiseh.
Jesuh in kross parah na hrang thihnak a tuar hlanah na hrangah thla a lo camsak ti na theih tikah ziangtin na ruat?
Jesuh thlacamnak a pum in siar awla. Ziangmi bungcang in na thinlung a lo lak bik, ziangruangah?
Jesuh thlacamnak pawl siar nawn sal awla, rei lo te ciamciam in ruat awla, Pathian aw na theih mi, na thinlung sung muril ah a lo sim mi ziang a um, ngan aw?
BULPAK ZIRNAK DUNGTHLUNTU PAWL CU JESUH THAWN BULPAK TAWN AWKNAK AN NEI Jesuh leitlunah taksa in a um lai ah Philip le Nathanael lawng si lo, a dungthluntu pawl a ko mi kan hmu Matt. 10:2-4; Luke 8:1-3), Peter, James, John, Mathew le Mary Magdalene, Joana, Susanna, pawl tla a kawhnak kan hmu thei. Jesuh cu taksa in leitlun ah a um nawn lo hnu khal Paul a kawhnak tla kan hmu thei. Tirhthlah 9:1-6, 1Cuih caan hrawngah Saul cun Bawipa ih dungthlun pawl kha that dingah a hringhro rero. Puithiam saang hnenah a va feh ih, 2Damaskas khuaih sinakok inn uktu pawl in amah kha an rak theihnak dingah ca ken ding a va dil. A tumtahmi cu cutawkah Bawipa ih Lamzin a thluntu an um a sile nunau mipa tilo kai tahratin Jerusalem ih hruai ding kha a si.3Saul cu Damaskas khua a thlen zikah hmakhatte ah van ihsin tleunak in a kimvelin a run tlet. 4Saul cu a tlu ih, “Saul, Saul, ziangah so i hrem?” tiah aw pakhat a thei.5Saul in, “Bawipa, zoso na si?” tiah a sut.Cuih aw cun, “Na hrem reromi Jesuh ka si. 6Tho awla khawpi sungah va feh aw; na tuah ṭulmi kha an lo sim ding,” tiah a ti.
Saul timi pa cu a leitlun nunah tumtah hngetkhoh thawn a rak nungmi, a hnatuan ah pumpe aw tuk mi a rak si ih Jesuh dungthluntu pawl siatsuah ding khopin pumpe aw mi a rak si. Asinan Jesuh in a ko, Jesuh thawn an tawn awk tikah Jesuh kawhnak aw a sang ih a hmin le a nun pumhlum a thleng aw asi. Paul ih thuanthu ihsin Jesuh dungthlun dingin sir awknak a tulzia in zirh asi.
Sir awknak ti tongkam na theih ve ten na thinlung sungah ziangvek a lang ih ziangtin na ruat?
Sir awknak timi cu thleng awknak, ruahnak thleng in lamzin thleng ti thawn khal a bang aw. Jesuh ih in kawh tikah kan sir awk ih kan nun thleng awk dingin in ko asi. Mathai 4:17, Cuih tikcu ihsin Jesuh in, “Nan sual sir uh, ziangah tile vancung Uknak a nai zo,” tiah thusim hram a thok. Mark 1:14-15, Johan kha thawngih an thlak hnuah Jesuh cu Galilee ah a feh ih Pathian ih Thuthang ṭha a sim. “Tikcu a kim zo ih Pathian Uknak a nai zo. Nan sualnak pawl sir uhla Thuthang ṭha cu zum uh,” tiah a ti.
Jesuh dungthlun dingin na timtuah tikah ziangvek sir awknak nun na nei?
Sir awknak cu Jesuh dungthluntu si dingin a lotheihlo in a tulmi asi. Voikhat sir awknak ah a cem lo ih nitin nunah sual ihsin zir aw, kirsal in Jesuh dung kan thlun ding mi asi.
A tu ih na dinhmun ah na nun na cek awk sal tikah ziangvek zawn ah na sual na sir ih Jesuh dung na thlun a tul?
Na nitin thlarau nun ah sir awknak lungput nei in sual ihsin kirsal ringring in Jesuh dungthluntu tha si thei dingin ziang na tuah a tul?
DUNGTHLUNTU PAWL CU JESUH IN A THLENGMI AN SI
Paul in Jesuh dungthlun dingin a thinlung thuthluknak a tuah mi cu Jesuh ih kawhnak aw a fiang awk nak in asi. A hlanah Jesuh dungthluntu pawl thattu dinhmun ihsin Jesuh dungthlun ah a cang. A nun thleng awk cu a hnuailam ih Paul cakuatmi ah a fiang zet.
2 Korin 5:17, Zozo khal Khrih thawn an pehzom awk tikah cun mithar a si; a nun hlun cu a cem ih nun thar a thok zo.
Nangmai nun ah na nunhlun ziangvek pawl an hlo zo?
Jesuh na tawn hnu ah ziangvek nunthar na nunpi?
Nun thleng awknak in kan tawntehmi cu thiamcoternak asi. Jesuh thawn kan tawn awk tikah sual ngaidamnak kan co. Cutin Pathian hmaiah thiamco ter kan si. Roman 5:9-10, A thisen thawng in kannih cu Pathian thawn kan rem awk zo ruangah ziangtlukinso Pathian thinhengnak ihsin Amah in in runsuak sinsin ding! 10Hlanlaiah cun Pathian ih ral kan rak si, sikhalsehla atu cu a Fapa thihnak ruangah a rualpi ah in tuah zo. Pathian ih rualpi kan si zo ruangah Khrih ih nunnak in ziangtlukin so in runsuak sinsin ding.
A hnuailam Bible bungcang pawl siar awla, thiamcoter na sinak thu na fiangmi pawl ngan aw:
Hebru 9:19-22
Roman 5:6-9
Galatian 2:15-16
Thiamcoternak cu Jesuh thawn tawn awk tikah a dungthlun dingin thutiam aw in nun thleng awknak in kan co mi asi. Asinan cuzat lawng asi hrih lo. Nitin ten kan nun in thleng, in tuaithar sal ih nikhat hnu nikhat amah bang sinsin dingin in thleng rero asi. Cutin catbangloin kan sungah Jesuh hna a tuan sunzawm rero mi cu thianternak (sanctification) tiah kawh asi.
2 Korin. 3:18, Kannih tla cu kan zatein kan hmai puanih tuammi kan si nawn lo ruangah Bawipa ih sunlawinak hi thlalang bangin a langtertu kan si. Cuih sunlawinak cu Thlarau a si mi Bawipa hnen ihsin a rat ruangah kan nunnak hi sunglawi sinsin in le Amah bang sinsin in in thleng vivo a si. Jesuh dungthluntu pakhat na sivekin cangbanglo in thlarau nun thleng awknak danglamnak na nei maw? Ziangvek cekci asi, sim aw.
Thuk sinsin thlarau nun thleng awknak nun na neih thei nak ding hrangah ziangvek pawl in a dal? |