DUNGTHLUNTU LAMZIN DISCIPLE YOURNEY
SESSION 7
DUNGTLUNTU SINAK FIMFIANGNAK
DUNGTHLUNTU SIMFIANGNAK KEY: Jesuh Dungthluntu timi cu Pathian in rumdannak hna a tuansuahnak ah telveknak asi.
Tutiang kan zirzo mi ah Jesuh dungthluntu ih sinak le hnatuan pawl ziangmawcin kan zir zo. Himi zirnak ah thuksinsin in Jesuh dungthluntu timi cu ziang asi? Dungthluntu in ziang a zum? Ziangsi a tumtah timi pawl kan zoh vivo ding.
John tihnimtu thuanthu (John 1:29-42) ah John in ziangtin Jesuh a rak pehtlaihdan, a rawngbawlnak hmuahhmuah cu Jesuh ah a tawpnak pawl kan zoh ding. Cuvek thotho in Jesuh in a dungthluntu pawl a ko ih a dung an thlun tikah ziangvek in Jesuh ih hnatuan mission ah an tel ve timi pawl kan zoh ding. Nangmai hmuhtawnmi pawl tla zalen zetin sim ve aw.
ZOHSALNAK Ahmaisa zirnak ah Jesuh le dungthluntu pawl thu kan zir ih Jesuh in a dungthluntu pawl hnenah a zirh hmaisa bik le zirh netabik, a thupek netabik tla kan zir. Nitin te canpualtha a um ih piang in Jesuh uknak leitlunah karhzaiter sinsin dingin le a hmin thang sinsin dingin simsuak ding hngilh hrimhrim hlah.
Tuzarh sung zir ding siar ding pawl lakah ziangtiang na rak tuah ziang na bang?
Bible siar ding mi na siarmi lak ihsin ziangmi na zir ngah?
Thu sut duh mi na nei maw?
THLACAM Himi zirnak hi thlacam nak in Pathian thawn pehtlaihnak in thok aw. A hnuailam vekin thlacam na thawk thei: · Jesuh Khrih dungthluntu pakhat si ve dingin dungthluntu dang pawl thawn pehzawm pawlkom awknak na neih thei mi parah Pathian hnenah lungawithu sim aw. · Na nunah Pathian in hna a tuandan pawl par khalah lungawithu Pathian hnenah sim aw. · Pathian thu na zir vekin fimnak dil aw.
THUHMAIHRUAI “Dungthluntu” (Disciple) timi tongfang cun Jesuh Khrih ah rundamnak a cotu pawl nitin ten an nundan, Khrih dung an thlundan thu pawl a lailang. Cutin zumtu zapi ten Jesuh Khrih dungthluntu “disciple” kan sinak a langter. Jesuh Khrih dungthluntu kan sinak cu kanmah hnakin thlarau lamah a pitling deuhtu dung kan thlunnak in asi. Cutin kannih in kanmah hnakin thlarau lamah a pitlungmi, zirhtu dung kan thlun vekin kannih khalin midang pawl kha dungthluntu ah tuah in Jesuh dungthluntu kan karhzai ter vivo asi. Hitin nitin zumtu nunah, dungthluntu in midang pawl Jesuh dungthluntu ah va tuah vivo nak program hi “Dungthluntu lamzin” tiah kawh asi. Dungthluntu ah mi va tuah nak in siseh midang dungthlunnak in siseh zumtu pakhat cu thlarau nun mi pitling asi theinak lamzin asi.
Nangmai tongkam in Jesuh Khrih dungthluntu timi cu na theihfiang dan in sim/ngan aw?
Discipleship ih umzia le tuahtulmi pawl thu ah sut duhmi ziang na nei?
BIBLE THUANTHU John tihnimtu cu leitlunah tumtah mission nei in a ra. Pathian in Messiah a ratnak ding lamzin sialtu dingah tuanvo a pekmi asi. A hnuailam Bible thuanthu in Jesuh leitlun hnatuan mission thu a sim fiang. Cuhlei ah a dungthluntu pawlin ziangvek dinhmun le tuanvo kan nei timi tla asim fiang asi. John 1:29-42, 29A thaisun ah Johan in Jesuh a hnenih a rat lai kha a hmu ih, “Leilung sualnak a phurtu Pathian Tuufa khi zohhnik uh! 30‘Ka dungin mi pakhat a ra, a sinain kei hnakin a tum sawn, ziangah tile ka suah hlanah anih cu a rak um zo,’ tiih a thuhla ka sim rero zo mipa cu amah hi a si. 31Amah hi zo a si ding ti ka rak thei lo. Asinain amah hi Israel mi pawlih an theihnak dingah tidai in baptisma ka pek rero sannak a si,” tiah a ti.32Johan in, “Thlarau cu vancung ihsin thuro bangin a rung ih a parah a rung fut kha ka hmu. 33Amah teu a si tihi ka rak thei thotho cuang lo, sikhalsehla tidai in baptisma pe dingih i thlahtu Pathian in ‘Thlarau a rung ding ih mi pakhat parih a fut kha na hmu ding; cupa cu Thlarau Thianghlim in baptisma petu ding a si,’ tiah i sim. 34Cupa cu ka hmu ngah zo. Fiangtein ka lo sim: Amah cu Pathian Fapa a si,” tiah a hmuhmi le a theihmi kha a sim.35A thaisun ah Johan le a dungthluntu pahnih cu cutawk ah an ding sal ih, 36Jesuh a rat kha an hmuh tikah, “Pathian Tuufa khi zohhnik uh,” tiah Johan in a ti.37Cutiih a timi cu a dungthluntu pahnih cun an thei ih Jesuh hnenah cun an feh ve. 38Jesuh cu a dunglet a her ih an rak thlun kha a hmuh tikah, “Ziang so nan hawl?” tiah a sut. Annih in, “Rabbi, khui-ah so na um?” tiah an let. Rabbi ticu zirhtu Sayapa tinak a si.39Jesuh in, “Ra uhla ra zohhnik uh,” tiah a ti. Cuih tikcu cu zanlam nazi pali hrawng a si. An feh ih a umnak cu an va hmu ih cuih ni cu a hnenah an caam ta.40Cuih mi pahnih lakah pakhat cu Simon Piter ih naupa Andru a si. 41Hmakhatteah a u-pa Simon kha a va hawl ih a hmuh tikah, “Messiah cu kan hmu zo,” tiah a ti. Messiah timi cu Khrih tinak a si. 42Cule Simon cu Jesuh hnenah a fehpi. Jesuh in amah cu a zoh ih, “Na hmin cu Johan fapa Simon a si; sikhalsehla Sefas tiah kawh na si thlang ding,” a ti. Sefas ticu Piter ti thawn a bang aw ih a tican cu ‘lungto,’ tinak a si. *
A tlun Bible bungcang pawlin Jesuh thu ziang in zirh?
THUANTHU SIMFIANG Jesuh dungthluntu timi cu ziangsi umzia? Tiah thusuhnak kan sim tikah dungthluntu hnatuan le sinak hnakin Jesuh ih sinak le hnatuan kan theih hmaisak lawngah dungthluntu ih sinak le hnatuan khal fiang ten kan thei thei ding asi. Tuini ah Jesuh sinak le hnatuan a phunphun in ziangtin mi in an sim theu? Jesuh cu zo asi, ziang asi, ziang a hnatuan timi ziangtin na sim fiang ding?
John tihnimtu in Jesuh sinak a phunphun a sim, “Pathian tufano”, “Pathian Fapa”, “Thiang Thlarau thawn tihnimnak petu” ti ah a sim. Cui hleiah John in Jesuh thu a sim tikah a hlanpi ihsin a um zomi, John ih suah hlan ihsin a um zo mi timi thu tla a sim. Jesuh thu asinak danglam zet thu a sim, Jesuh cu milai menmen asilonak thu pawl a sim fiang. Jesuh cu fala thianghlim pumsung ihsin naute in a rung suak ih milai sinak zaahza, le Pathian sinak zaahza nei in sual nei loin leitlunah a nun thu hi zumnak thurin hngetkhoh asi. Jesuh leitlun a rat tikah tumtah, hnatuan mission nei in a ra. ““Leilung sualnak a phurtu Pathian Tuufa khi zohhnik uh!” (John 1:29). “Leillung sualnak phurtu” tiah a sim.
Leitlun cu sual ruangah siatsuah in a um zo vek in milai bulpak ciar khal sual ruangah thluksiatnak nun in kan nung asi. Jesuh cu sual buainak tuah tha dingin leitlun ah a ra. A thihnak le thawhsalnak in rundamnak sangka in onsak—sual ngaidamnak in tuahsak ih cutin tuahthat sal mi nun in nungin Pathian thawn pehzawm awknak thar in tuahsak zo. Cucu Thuthangtha asi. Jesuh ih mission hnatuan mi ziang na hmu thei?
DUNGTHLUNTU PAWL CU JESUH IH LEITLUN MISSION AH AN TEL VE ASI.
Jesuh dungthluntu vekin nun ding ahcun Jesuh ih mission theih hmaisak a tul asi. Thieh lawng a tawk lo ih Jesuh ih mission hnatuan nak ah kan tel tengteng a tul asi. John tihnimtu dungthluntu pawl tla in Jesuh an hmuh tikah Jesuh dung an thlun, a tak in an cangvai ve asi. Jesuh dungthluntu diktak si thei dingin theihnak lawng a tawk lo ih Jesui’ leitlun mission ah telve tengteng a tul asi. Midang zumlotu hnenah Jesuh thu na sim tikah na hmuhtawn mi thu ziangtin sim/ngan aw?
Jesuh thu midang zumlotu hnenah kan sim lawng si loin ziangtin Jesuh leitlun hnatuan mission ah kan tel thei ve ding?
Bible sungah kan hmuh vekin Jesuh in a dungthluntu pawl hnatuan a fial tikah mi pakhat lawng a thlah dah lo ih midang thawn a kawp in lole a bur in athlah theu kan hmu. Cutin leitlunah Pathian uknak ram karhzai ter dingin kawp in lole abur in dungthluntu pawl cu hnatuan afial, a thlah theu asi. Amah Jesuh lala khal leitlunah taksa in a um lai ah dungthluntu pawl thawn an vak theu asi. Kannih khal Jesuh ih hnatuandan kan thlun ve dingmi asi. Leitlun ah Jesuh ih mission hna kan tuan tikah bulpak pakhat te lawng si loin mibur (team) hnatuan tikah ziangvek hlawknak thatnak a um?
TEVE IN TUAH AW Jesuh dungthluntu nun cu mahte bulpak in nun asi dah lo. A bur in zumtu dang thawn pawlkom nak nei in nun asi. Cutin mibur in umnak hmun ah midang zumlotu pawl sawm vivo in dungthluntu karhzar ter vivo ding asi.
Can tawite la in zumtu dang pawl thawn can hmang tlang in tuah dingmi tuah aw 1. Khat le khat hrang thlacam sak: Thinlung muril phorh suak in hmuhtawnmi lakah lungawi riahsiat, harsat nak tivek pawl simrelnak can minute ziangzat simaw hmang in thlacam tlang. 2. Nan duhtlang mi relkhawm in park ah lek tlang, zanriah ei tlang, movie zoh tlang, thil pakhatkhat tuah tlang in pawlkom nak nan group in tuah. Awlsambik cu hmaizarh group in tawn khawm hlan ah duh tlang duhmi pawlkomnak hrang nawm awknak tuah asi thei.
THLACAM DILDUHMI PAWL NGAN : …. ZARHKHAT SUNG TUAH DINGMI Pathian biaknak -Bible siar -Bulpak thlacam in Pathian thawn pawlkomnak Bible siar -Bible siar in thusuhnak pawl rak sang aw Nunpi -Tuzarh sungah na can hmanmi cu Jesuh hrangah sunglawi thei bik in hman zuam aw. Na khawm tikah Khrih dungthluntu midang pawl thawn pehtlaihnak san nei zetin hman zuam aw. -John 1:29, zohlo in ngah aw. -Tuzarh nan group tawn khawmnak, Bible study nakah jesuh dungthluntu dang sawm in nan hnenah tel ter aw. -Nitin te ca ngan aw; Jesuh ih leitlun mission ah na tel venak ca sung ah ngan khum aw. Cutin na tuah asile nikhat hnu nikhat Jesuh hrangah ziang na tuah timi a lo theihter ringringtu na cinken thei nak ah tla a tha.
NITIN BIBLE SIAR A hnuilam Bible na siar phah in Pathian Thlarau in a lo zirhmi, na lungsung tapbikmi pawl ngan khum aw: 1. Luke 14:25-35
2. Luke 15:1-17
3. John 17:6-19
4. John 21:15-23
5. Ephesians 4:17-32
6. 2 Tim 2:1-13
7. 2 Tim 2:14-26
RIAN DING LE PE DINGAH Jesuh dungthluntu pawlin Jesuh leitlun a um lai ah ruahsannak tumpi an rak nei. Thuneihnak le siangpahrang sinak thawn a din tikah dinhmuntha ngah an rak beisei. Asinan Jesuh in a dungthluntu pawl hneneh leitlun sunparnak le hlawnthil pawl thuneinak pawl ruahsan lo dingin thu a simfiang hai. Mark 10:42-45, 42Curuangah Jesuh in an zatein a kokhawm ih, “Leitlun ram uktu pawl cu an ukmi pawl kha an lal-hnawh ih an hotu pawl tla cu thu an nei nasa ti cu nan thei. 43Asinain nannih lakah cun hi bangtuk cun a si lo pei. Nanmah lakah pakhat in a tum bik si a duh ahcun nan zate riantu a si pei. 44Nanmah lakah pakhatnak si a duhtu cun nan zate sal a si pei. 45Ziangah tile Milai Fapa hman hi rianmi si loin miriantu si dingah le mi tampi tlen dingah a nunnak pe dingin a ra a si,” tiah a ti.
Jesuh dung kan thlun rualrual in porh awknak le duhamnak kan fimkhur a tul. Dungthluntu dang pawl parah iksiknak le zuam awknak lungput nei dingin ziang in a cang ter?
Ziangruangah midang hnakin cuangmawr deuh, tha deuh si deuh in na thei aw aw?
Midang thatnak liolio hrangah thiltha na tuah tikah ziangtin na thinlungin na ruat?
Jesuh dungthluntu nun cu hi leitlun ah hlawknak hrangah asilo. Cat lo in midang thatnak hrangah pe suak nun, riantu nun asi sawn.
BULPAK ZIRNAK JESUH IN LEITLUN AH MISSION A NEI ASI. Jesuh dungthluntu timi cu ziangsi umzia? Leitlunah Jesuh mission hnatuan tuan ve, rawngbawlpi kan si kan ti zo. “Leitlun sualnak phurtu” (John 1:29) ah a sim zo vekin asi. Asinan thuk sinsin in ziangciah asi, Jesuh dungthluntu nun cu zoh hrih uhsi. John tihnimtu in a rawngbawlnak neta lam lawngah Jesuh thawn an tong aw. Asinan John hnen ihsin zir dingmi kan nei asi. A hnuailam bungcang zoh uhsi. Luke 3:15-17, 15Mi hmuahhmuah in ruahsannak an nei ciamco ih Johan cu Messiah a si pei maw, tiah an mangbangin an ruat fingfing. 16Curuangah Johan in, “Kei cun tidai in baptisma ka lo pek. Asinain mi pakhat kei hnakih tum sawn a ra ding. Kei cu a kedam hri phoih saktu ding hman ka tlak lo. Anih cun Thlarau Thianghlim le meisa in baptisma a lo pek ding. 17Fang seepnak ṭangṭa a keng ih fang pawl a seep ding. Fangngai cu a cuam sungah ṭhatein a ret thluh ding, a sinain a hii pawl cu a mit dah lomi meisa sungah a ur ding,” tiah a ti.
Atlun bungcang ihsin John tihnimtu thu ziang kan zir thei mi a um?
A tlun bungcang ihsin Jesuh thu kan zir thei mi ziang a um?
John san lai Jews minung pawlin Messiah a ra ding tiah an rak hngak rero. Messiah cu ropi zetin a ra dingih leitlun a rundam ding tiah an rak ruat. John khalin Jesuh cu amah hnakin a tumsawn ti a thei. Messiah in Thiang Thlarau le milai pehtlaih awknak a um ding thu a sim, Thiang Thlarau baptisma a um ding thu tla a rak sim cia. Hi thu pawl hi a thupi tuk, ziangah tile Jesuh ih leitlun mission cu leitlun rundam asi ih Pathian huham cahnak le thuneihnak lawng in a ngah mi asi. A tluse zo mi leitlun cu Jesuh in a remthat theinak cu amah leitlun sersiamtu asi. Sual a ngaidam thei nak cu Pathian asi ruangah asi. Cutin asivek in Jesuh ih leitlun mission ah kan tel ve asi ahcun kannih khal a tawp tiang ziangkim tuansuak asi ding ti a fiang cia asi.
Jesuh dungthluntu si dingin Jesuh cu Pathian asi ti a hmaisa ah Jesuh ih identity kan pom hmaisak a tul asi. Jesuh amah rori in hitin a sim: Joh 10:27-30, 27Ka tuu pawl cun ka aw an ngai; keimah in ka thei hai ih annih in in thlun. 28An hnenah kumkhua nunnak ka pek ih ziangtik hmanah an thi nawn lo ding. Zohman in in long thei fawn lo ding. 29Anmah ka hnenih i petu ka Pa cu ziangzongza hnakin a tum ih * amah ih kut sung ihsin zohman in an long thei lo ding. 30Ka Pa le keimah cu pakhat kan si,” tiah a ti.
Jesuh cu Pathian asi ti fiangten ziangtin na sim thei ding?
Cuvek thotho in Jesuh in leitlunah a mission thu khal fiangten a sim asi: A hnuailam bungcang pawl siar aw la Jesuh ih leitlun mission pawl na hmuhsuak mi ngan aw:
Mark 10:42-45,
Luke 4:16-21,
John 17:1-5,
Jesuh dungthluntu nun cu a hmaisa ah Jesuh ih Pathian sinak famkim ten pom, cohlan asi ih a pahnihnak cu leitlun ah Jesuh mission ah tel ve asi.
DUNGTHLUNTU CU JESUH MISSION AH AN REL VE Jesuh dungthluntu nun cu Jesuh ih leitlun mission cu leitlun rundamtu asi tiah pom le cohlan asi. Cucu step 1 nak lawng asi hrih. Pahnih nak cu Jesuh ih leitlun mission ah telvenak asi. Cangvaihve tel ve a tul.
Asile ziangtin nitun nun a takram ah Jesuh leitlun mission ah kan tel ve ding? A hnuailam ah phun 4 in Jesuh in a dungthluntu pawl huham cahnak a pekdan: 1. Jesuh in dungthluntu pawl a ko 2. Jesuh in dungthluntu pawl a zirh 3. Jesuh in dungthlung pawl hmanrua tha thawn a thuam 4. Jesuh in dungthluntu pawl a thlah A tlun pa 4 lakah khuimi bik theihfiang laihlang fiang na duhbik, ziang ruangah?
Kan feh vivo hlan ah Jesuh ih leitlun mission ah tel ve timi umzia thuk sinsin kan fiang theinak hrangah zoh hrih uhsi. Leitlun pawlkom member sinak in Jesuh dungthluntu kan si lo. Silo; Jesuh dungthluntu nun cu kan nun pumhlum amai hrangah pek, ap asi. Amah in fiang tuk in in sim. Luke 9:23-24, 23Cule an zate hnenah, “Zokhal sisehla i thlun duh ahcun mah zawnruahnak kha tlansan sehla nitinte a thinglamtah phur in i thlun seh. 24Ziangah tile zokhal siseh amah ih nunnak a hum duhtu cu a nunnak a sung ding; sikhalsehla keimah ih hrangah a nunnak a sungtu cu a nunnak a hum ngah ding.
Himi bungcang ziangtin na sang ve ding? Taksa ruangpum in thihnak thu a simmi asilo. Dungthluntu hmaisa pawl cu Khrih dung an thlun nak ah a taktak in taksa thihnak tuartu tla an um ko. Jesuh in in zirhmi cu a dung kan thlun ding asi ahcun kanmah milai tumtah le duhnak hrangah nung nawn loin Jesuh cu kan nunnak parah thu neitu, Lal le Siangpahrang, Bawi ah kan nitin nun thuneitu ah ret asi.
Ziangtin Jesuh hnenah na nun na ap zonak a um?
A ra lai dingmi zarhkhat sungah na nunnak cu nangmah in control non loin Jesuh ih control dingin ziang step na lak hrih thei, ziangtin nun hlannak na nei thei hrih ding?
Pahnihnak ah Jesuh mission ah kan tel tikah hlawhtlinnak cu kanmai hmanrua, cahnak huham parah a hngat aw lo, amai cahnak huham parah a hngat aw mi asi. Kan kiangkapah, kanmai duhnak parah leilungpi a thum aw lo ti theih a tha. Kan tuah that le tam, taimak nak parah kan hlawhtlinnak Jesuh ih mission hnatuan hlawhtlinnak a thum aw lo, amai duhnak, huham cahnak, fimnak le hmanrua pawl parah a thum aw sawn mi asi.
Jesuh in hitin asim: John 15:5, 5Keimah cu Sabit hri ka si ih nannih cu a hnge nan si. Zokhal ka sungah a um ih kei khal a sungih ka umcilh mi cun rah tampi a rah ding; ziangah tile keimah tel lo cun zianghman nan tuah theimi a um lo.
Na nitin nunah Jesuh Khrih na hnenah a um ruangah a huham cahnak in ziangvek hlawknak, thathnemnak na neih phah?
Jesuh Khrih dungthluntu pakhat dinhmun in na nun in ziangvek rah tha a rah suah leh ding tiah na zum?
Jesuh dungthluntu pakhat na si vekin na nun cu amah ah na ap ih na nun ziangkim parah amah thuneihnak lalnak na pek ih amai hmanrua le huham cahnak ringring na nung asi ahcun Jesuh ih leitlun mission hnatuan ah tel ve in a lo hmang ding asi.
|