DUNGTHLUNTU LAMZIN DISCIPLE YOURNEY
SESSION 6
JESUI RAWNGBAWLPI
Dungthluntu pawl cu Krih thei dingin kawhmi, Khrih ah thang dingin kawhmi, Khrih hrangah fehsuak dingin kawhmi an si.
ZOHSALNAK Netabik kan zirzo mi ah Khrih dungthluntu nun ziangvek asi ti kan zir zo: Khrih dungthluntu cu bulpak Khrih thawn pehzawm awk hlei ah community ah zumtu unau pawl thawn pawlkom awknak nei in Khrih palai si ding thu kan zir.
Tuzarh sung zir ding siar ding pawl lakah ziangtiang na rak tuah ziang na bang?
Bible siar ding mi na siarmi lak ihsin ziangmi na zir ngah?
Thu sut duh mi na nei maw?
THLACAM Can tawite thlacamnak in can hmang uhsi. · Pathian hnenah lungawi thu sim aw: Kawhhran member si in zumtu unau pehtlaihnak na neih mi parah lungawithu sim aw, Khrih ih milesa pawl thawn pehtlaihnak nei in pawlkomnak na neih mi parah lungawithu sim aw. · Pathian in amai duhmi rawngbawlnak Pathian lungput thei thei dingin thlarau bawmnak dil aw. · Pathian hnen thlacam awla fimnak dil aw, kawhhran member sinak ih umzia ziang asi, Pathian in leitlun ah ziangtin hna a tuan ih ziang atumtah, ziangtin a cangvai timi pawl thei thiam dingin thlarau fimnak dil aw.
THUHMAIHRUAI “Ralkap pawl, tipar khual tlawng pawl, ralkap thazang cak pawl! Thla reipi kan cuan rero mi ralpi do awknak hmaitawn ding nan si thlang. Leitlun pumpi mit in an lo zoh. Leitlun pumpi ihsin zalennak duhtu thinlung mit in an lo cuan ih an lo thlun asi.” Atlun ih thutlangtar mi hi American ralbawi General Dwight D. Eisenhower in June 6, 1944, leitlun ralpi voihnihnak ah American ralkap pawl fehsuak dingin thu a pek zawngah a tongkam asi. Himi Eisenhower in American ralkap pawl thu a pek tiangah leitlun ralpi do awknak ah Axis ralkap pawl in Europe ram tampi an neh ih an uk, nasaten an hrem, harsatnak namen lo a um laifang asi. Leitlun pumpi in runsuaktu ding an cuan laifang asi. American le Allied ralkap pawlin European ramah ke an thlak in ral an do taktak hnu kumkhat sungah Europe ram tampi cu Axiz ralkap pawl kut ihsin runsuak an sita, lungawitlak za asi. Cuvek in leitlun pumpi ah milai pawl cu sual,thihnak sal sungah an tang theh. Asinan Jesuh Khrih in thihnak a tuar ih a thohsal hnu ah leitlun pumpuluk milai, sual le thihnak saltang pawl runsuak dingin a ralkap pawl thu a pek zo asi. Jesuh in leitlun ralkap vekin hriamhrei le meithal a hmang lo, a kawhhran hmang in sual cu neh in a um ih a uknak ram cu catbang loin a kau sinsin, a karhzai sinsin asi. Jesuh Khrih dungthluntu dinhmun hi Jesuh cangvaihnak ral do awknak ah na tel ve asi. Jesuh ih mission leitlun pumpi miphun hmuahhmuah hnenah nehnak thu than in ram lak ding mission ah tel ve dingin kawhmi na si. Jesuh ih hnatuan mission ah tampi a telmi lakah a tawi famkim bik in sim theih asi: dungtlungtu si ter vivo ding asi. (Making disciple). Kawhhran mibur cangvaihnak sungtel ah siar tel na si ruangah, ziangtin na dinhmun canpual neihmi na ruat?
Midang hnenah Jesuh thu na sim tikah ziangvek lungawinak maw thinlung tawntehmi na nei?
BIBLE THUANTHU THEI AW Jesuh in leitlun aratsan thu a sim. A ratnak san bik, a mission hnatuannak bik cu a hmaisa bik le neta bik ah a dungthluntui pawl hnenah a simmi ah a fiang zet. A sim hmaisa bik mi cu dungthluntu pawl a kawh tikah a simmi ah a lang. Session 1 ah Jesuh Khrih dungthlun dingin mai duhhrilnak in timtuahnak thu kan sim zo. Tu ah leitlunah Jesuh in ratsan hnatuan mission thu sim hrih uhsi.
Mathai 4:18-20, 18Jesuh cu Galilee Tili kapih a feh rero laiah ngakaitu unau pahnih, tili sungah sur vorh in nga an kaih rero kha a hmu. Cuih unau pahnih cu Simon (Piter tiih kawhmi) le a nau Andru an si. 19Jesuh cun, “Ka hnenah ra uhla mikaitu ah ka lo tuah ding,” a ti. 20Hmakhatteah an sur pawl cu an tanta ih amah cu an thlun.21A feh vivo ih Zebedi fapa pahnih Jeim le Johan teih unau a hmu. Anmah cu an pa Zebedi thawn an long sungah an um ih an sur pawl an tholh rero. Jesuh cun a vun ko ih, 22hmakhatte ah an long le an pa tanta in Jesuh cu an thlun.
Jesuh leitlunah a ratsan, a dungthluntu pawl hnenah tuanvo a pekmi mission cu tawiten sim theih asi; “I thlun aw” le “milai kaitu” ah ka lo tuah ding a timi ah a fiang.
Jesuh Khrih dungthluntu ih mission “milai kaitu” timi thu ziang na zir ngah, ziangtin na ruat?
A thi ih a thohsal hnu ah Jesuh in a dungthluntu hnenah leitlun a ratsan, a mission cu dungthluntu pawl hnenah a simsal ih cucu dungthluntu pawl khalih hnatuan, leitlun mission asi tiah tuanvo a pek hai. Mathai 28:18-20, 8Jesuh cun a pan hai ih an hnenah, “Lei le vanih thuneihnak hmuahhmuah cu ka hnenah pek a si zo. 19Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. 20Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti. A tlun Bible bungcang ah a sim vekin Jesuh ih thupek tluntu ka si tiah raltha zetin na sim ngam maw? Ziangruangah?
THUANTHU LAILANG NA MISISON CU JESUH HNEN IHSIN A RA MI ASI Mathai 28:18-20 ah Jesuh thupek mi “The Great Mission” “Thupek Ropi”tiah sim asi theu. Jesuh in a dungthluntu pawl a kawhnak san, a thlahnaksan, tuanvo a pekmi pawl khaikhawmtu asi. Jesuh ih himi thupek a pek tikah “san deng tiang” (v.20) tiah a sim ruangah nang le kai, tuini minung, Khrih dungthluntu pawl khal kan tel asi.
Jesuh dungthluntu thar na si khal le nang le kei Jesuh ih leitlun mission ah kan tel ve asi. Na tel ve asi. Jesuh Khrih ih dungthluntu tuah vivo ding tuanvo mission cu na life mission, na damsan asi ve. Jesuh ih dungthluntu mi va tuah vivo ding timi na ruat tikah ziangtin na khawruahnak ah na ruat in ziangvek phurnak na nei, ziangruangah?
Jesuh ih thupek hrampi cu amai thuneihnak parah a hngat aw mi asi, “Lei le van ih thuneihnak hmuahhmuah cu ka hnenah pek asizo” (v. 18). Lei le van ih thucang mi ummi hmuahhmuah parah thuneitu asi timi mi zapi theihter in duhmi asi. Ziangruangah cucu a thupi? Ziangah tile mission pakhatkhat tuah ding tikah mission tuanvo petu a thupit tluk in a mission khal a thupi asi. Leitlun ralpi voi 2 nak laiah American ralkap menmen in Axis ralkap pawl do dingin thu pek sehla zohman in a thu an ngai lo ding. Asinan American ralkap General pakhatin thu a pek tikah American ralkap pawl in German le Axis ralkap pawl do dingin an pok suak ih an do nak asi. Cuvekin Jesuh cu leitlunah milai in a nungtu hmuahhmuah lakah mi thupi bik asi, a thihnak, a thawhsalnak, a nunnak in ziangkim parah thu neitu asi. Pathian asi, milai khal asi. Curuangah a thupekmi cu amai thuneihnak hnuai ah a ummi parah thu a pek, a duntluntu pawl tuanvo mission in peknak asi. Curuangah a thupek nak in a thu kan lun ding in phut asi.
Jesuh in a thuneihnak thu asimmi ziangtin na sang leh ve ding?
NA MISSION CU DUNGTHLUNTU TUAH ASI
Jesuh thupek lai muril cu “Leitlun miphun hmuahhmuah dungthluntu va si ter” (v. 19) asi. Asile ziangtin kan tuah ding? Khui tawk in kan thok ding? Dungthluntu tuah cu ziangvek asi? Ziang kan tuah ding? Lungawi um za asi mi cu Jesuh in amai hmin in dungthluntu kan tuahdan ding step pa 3 awlsam te in zirh: Feh: Feh loi tohmun in dungthluntu tuah a theih lo. Jesuh in fehsuak in kan insang, rualpi, inn hnen, community, le leitlun tintian ah fehsuakin Thuthangtha sim ding thu in pek. Baptisma: Baptism cu Jesuh Khrih cu keimah bulpak rundamtu ka bawi asi Jeush zumnak cu mipi hmai ah phuansuahnak asi. Kan hnatuan cu midang pawl kha sual nawn lo dingin va tuah asilo, kawhhran ah khawm aw ringring dingin va tuah asifawn lo. Kan hnatuan cu Jesuh Khrih rundamnak Thuthangtha sim in a theitu le cohlang tu pawl kha Jesuh Khrih ah an zumnak phuangsuak dingin tuah asi. Zirh: Dungthluntu tuah timi cu piangtharnak ah a tawp lo. An piangthar hnu ah Jesuh ih zirhmi hmuahhmuah thlun dingin zirh dingmi an si. Khatlam zawngin sim asile Jesuh Khrih zumtu thar, dungthluntu thar pawl kha Jesuh dungthluntu ih nundan ding pawl cipciar in zirh ding kan si.
A tlunih tuah ding pa 3 lak ah ziangmi na hrangah a harsa bik ding, ziangruangah?
Jesuh dungthluntu dinhmun in ziangvek tawnteh mi hmuhtawmi na nei?
Jesuh dungthluntu va tuah sin hi “discilpleship” tiah an simmi cu asi. A thangso reromi, theh ti um lo mi asi. Tikcu a lak zet ding. Leitlun damsung Jesuh dungthlun ka theh zo ti a um lo. Jesuh dungthluntu cun thangso rero ding, thantawp ti khal a um lo asi. Thinsau ten,nangmah le nangmah na zohawk tikah beidong mei hlah. Cuvek thotho in na rianmi, Jesuh tunghltuntu pawl par khalah na thinsau ter aw la beidong mei hlah.
TELVE IN TUAH AW Nangmah bulpak nunah ziangtin Jesuh Khrih cu na rundamtu ah na co hlang ih ziangtin Jesuh dung na thlun timi cu na hmanrua tha –midang dungtluntu va tuah sin ding na tul zetmi asi ding. Zumtu hrek khat cu ziangtin Jesuh thawn an tong aw,rundamnak an co timi midang simsin an ning a zak, an harsat zet theu. Harsat cing khal in sim ding asi, midang zohman hnoihnok lo ten tawnteh mi thu sim ding asi.
A awlsam bik cu a hnuailam thusuhnak sang phah in sim aw: Jesuh Khrih na cohlan, na piangthar hlan nun ziang vek asi?
Jesuh Khrih ziangtin na thei ih ziangtin a dungthluntu ah na cang?
Jesuh Khrih dungthluntu na si hnu ah ziangtin na nun a danglam, a thleng aw?
Nangmai hmuhtawnmi testimony cu nangmai hrangah siseh na testimony ngaitu hrangah siseh hmual nei zet asi thei. Can a umdan ih zir in na group lakah na testimony sim aw. Group sungah na simnak in midang hnenah Jesuh rundamnak Thuthangtha sim thiam dingin zir awknak tla asi. THLACAM DIL DUHMI ….. ZARHKHAT SUNG TUAH DINGMI Bible siar/zir lawng si loin zarhkhat sungah ziang tuah ding timi na group leader thawn ruat khawm uh. Pathian biaknak · Bible siar ding pawl siar theh aw · Pathian hnenah thlacam in leitlun ah Jesuh mission ah na tel ve nak hrang thlacam aw. Nitin ten Jesuh dungthluntu tuah sin dingin thlacam aw. · Nitin te Pathian thawn can hmang in tikcu pe aw. Bulpak Bible zirnak · Bulpak Bible zir ding pekmipawl Bible siar lawng si loin zir aw, thusuhnak pawl sang aw Nunpi aw · A tuzarh sungah a malbik mi pakhat hnenah Jesuh Khrih rundamnak a tultu hnenah na testimony sim aw · John 14:6, “Keimah cu lamzin, thutak, le nunnak ka si” timi zohlo in ngah aw. · Na kawhhran pastor lole kawhhran hruaitu tuzarh sungah tong aw la ziangtin Khrih rundamnak Thuthangtha karhzai ternak ding hrangah na tel thei ve ding timi sut awla tuah aw. · Leitlun pumpi miphun hmuahhmuah cuan aw. Leitlun ah ziangvek in zovek pawlkom pawlin Jesuh Thuthangtha an sim ih ziangtin na tel thei ve ding timi ruat aw.
PATHIAN BIAKNAK BIBLE SIAR DING 1. Mark 14:32-52
2. Mark 14:53-72
3. Mark 15:1-15
4. Mark 15:16-32
5. Mark 15:33-47
6. Mark 16:1-8
7. Mark 16:9-20
PRAYER MISSION Jesuh in a dungthluntu pawl hnenah leitlun mission thu ziang a sim: Luke 10:1-2, 1Cuih hnuah Bawipa in midang sawmsarih le pahnih a hriil ih amah a fehnak ding khawkip le hmunkip ah khan pahnih pahnih in a rak thlah sung. 2An hnenah cun, “Rawl khawm ding a tamzet nain a khawmtu ding an malte a si. Curuangah rawl khawmtu ding tam sinsin a thlahnak dingah lo neitu hnenah thla cam uh.
Jesuh dungthluntu tuah dingin Jesuh thupek na thlun rualrual in thlacam hngilh hlah. Na mission tuansuak dingin thlacam cu hmual nei bik le man nei bik asi.
Curuangah na pehtlaihmi milai pawl lak ihsin Jesuh Khrih ih rundamnak Thuthangtha theihttul pawl hmin list tuah aw. A tam thei bik in ruat aw. An hmin ngan aw. Pathian hnenah thla cam aw la an hnenah Pathian amah le mah phuang suak aw dingin an hmin sal in Jesuh Khrih rundamnak an co ngah thei nak ding hrangah thlacam sak aw.
Ka thlacam sakmi hmin list:
BULPAK ZIRRNAK NA MISSION CU LEITLUN PUM ASI Bible sungah Thuthangtha pa 4 pawl in Jesuh ih thu pawl in sim. Tirhthlah bu in kawhhran dinthawk dan thu pawl in zirh. In zirhmi cu Jesuh Khrih in amah dungthlun duhtu pawl hnen ihsin a rawngbawlnak hram a thok timi kan hmu. Tirhthlah 1:7-9, 7Jesuh in an hnenah, “A cuih tikcu le nithla cu ka Pa ih thuneihnak ih khiah-mi a si ih nannih theih ṭulmi a si lo. 8Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding,” tiah a ti. 9Cutiih a sim ṭheh tikah Jesuh cu an mithmuh rori-ah vanah laakso a si ih mero in a phen ih an hmu thei nawn lo.
A tlunih Bible bungcang hin The Great Commission thawn ziang pehtlaih awknak a nei?
Jesuh in hmun pathum a sim: Jerusalem, Judea ram hmuahhmuah le Samaria, le leitlun deng tiang. Jerusalem cu Jesuh a rak tlanlennak amah thawn a nai awk biknak hmun asi. Cuvek in nang khal nangmah thawn a naibik, na insang, community, pehtlaih mi ihsin na thok thei asi.
Na insang, rualpitha pawl hnenah Jesuh thu sim dingah ziang thu sutnak na nei?
Na ngai pawimawh bikmi minung pawl hnenah Jesuh thu sim dingin ziangtin ke na kar hmaisa bik ding?
Pahnihnakah, Judea ram hmuahhmuah le Samaria ram timi pawl cu Jerusalem leng lam, a kiangkap minung miphun pawl thu a simmi asi. Cuvek in nang khal na insang lenglam, na khua, community ah nangmah thawn a nai aw mi minung pawl hnenah Jesuh rundamnak Thuthangtha sim in dungthluntu na tuah thei asi. A tlunih thu simmi ziangtin na thinlung sungah ruahnak a suak hmaisa bik?
Na inn hnen, veng, community ah Jesuh theihpitu, Jesuh rundamnak thu sim dingin ziangtin ke na kar hmaisa bik thei ding?
A pathumnak ah “Leitlun deng tiang” thuthangtha sim in dungthluntu va siter dingah Jesuh in a dungthluntu pawl thu a pek. Cuvek ngaingai in dungthluntu pawl in Jerusalem lawng si loin a kiangkap le leitlun hmun tintian ah kawhhran an din ih dungthluntu an tuah vivo. Missionary na si tengteng ding tinak asilo, leitlun pumhuap Khrih Thuthangtha simnak ah na tel ve thei dan a um asi. “Leitlun deng” tiang thuthangtha sim ding timi na theih tikah ziangtin na ruat?
Jesuh thupek thlun thok dingin ziangtin ke na kar thok ding?
NA MISISON AH KAWHHRAN A TEL ASI Krih ih dungthluntu in leitlun pumhuap dingthluntu si ter dingin tuanvo na nei asi (Mat. 29:19). Cuvek thotho in Jerusalem, Judea ram hmuahhmuah le Samaria ram pawl khalah rawngbawl ding tuanvo na nei asi. Nangmah te lawngin Jesuh thupek zapi ten na tuan theh thei lo, nangmah hnakin a tumsawn mi Khrih ih mibur community ah na tel a tul asi. Khatlam in sim asile Jesuh thupek na thlun ih na tuansuak nak ding hrangah kawhhran na tul asi.
A tlunih thusimmi parah ziangtin na ruat?
Session 4 ah kan zir zo vekin Khrih dungthluntu pawl cu Khrih ih ruangpum kawhhran pehzawmtu kan si. Mahte lawng a cangvai mi kan si lo. Cutin kan umnak kawhhran ciar ah tuanvo in pek vekin thlarau laksawng khal pek ciar kan si. Roman 12:4-8, 4Kan ruangpi hi pakhat a sinain taksa ṭhen tampi an um ih cuih taksa ṭhen pawlih hnaṭuannak cu an bang aw lo. 5Cu bangtuk in kannih khal mi tampi kan si nain Khrih thawn kan pehzom awknak ah cun pum khat kan si. Kan ruangpi ih taksa ṭhen pawl an peh awk thluh vekin kan peh aw thluh ve a si. 6Curuangah laksawng phun dangdang kan ngahmi cu Pathian zaangfahnak kan cozat ciarin hmang uhsi. Kan ngahmi laksawng cu Pathian thu phuan ding a si ahcun zumnak kan comi zat in phuang uhsi; 7cubangtuk ṭhiamṭhiam in midang riantu ding kan si ahcun rian uhsi; zirhtu ding kan si ahcun zirh uhsi; 8midang thazaang petu ding kan si ahcun pe uhsi. Kan neihmi thilri kha midang hlawm ding kan si ahcun siang zetin hlawm uhsi. Hotu ding kan si ahcun taimazet in ṭuan uhsi; midang hnenah zaangfahnak langtertu ding kan si ahcun lungawi soparte in langter uhsi.
Jesuh dungthluntu na si vekin ziangvek thiam hleicetmi, thlarau laksawng, ti thei zawng, laksawng na co mi a um?
Kawhhran member pakhat dinhmun in na laksawng co mi pawl kawhhran tungdingtu dingah ziangtin na hmang thok thei ding?
Jesuh dungthluntu pawl cu zokhal anmah le tawk zawn ciar in Kawhhran sungah riantu an si thei nak ding hrangah thlarau laksawng pek an sit theh. Cutin kawhhran member pakhat ciar in anmah le laksawng comi vek ciar in Jesuh an rian tikah kawhhran a harhdam asi.
Ephesian hnenah ca a kuat tikah Paul in hitin a ngan: Ephesian 4:15-16, 5Duhdawtnak thinlung kengin thudik kan sim kan rel sawn pei ih kan lu a si mi Khrih sungah a phunkim in ṭhang ding kan si. 16Amah Khrih ih uknak hnuai ah taksa ruang parih ṭhen dangdang pawl cu remte in an peh khawm aw ṭheh. Hlikhlok ruhcaang pawl in taksa ruangpi cu hmun khatah an kaikhawm ṭheh. Curuangah taksa ruang parih ṭhen dangdang cu anmah ih hnaṭuan ding ciar an ṭuan tikah taksa ruangpi cu a zatein duhdawtnak in a ṭhangso a si.
A pehawknak dawtdawt in a um: Jesuh dungthluntu sinak in Jesuh thawn kan pehzom awk tikah kan thlarau a harhdam. Jesuh thluntu dinhmun in thlarau laksawng kan co mi ciar kan hmansuak tikah kawhhran a harhdam asi. Leitlun thuanthu ah kan hmuh vekin a harhdammi kawhhran cu leitlun thuanthu an thleng asi.
Kawhhran ruangah na umnak community ziangtluk thlawsuah asi ti ziang na hmuhmi a um?
Kawhhran in leitlun a thlawsuah mi na hmu maw?
Pathian in a lo duhsakmi cu Jesuh Khrih cu bulpak in thuk zetin na thei ih nitin amah thawn nan bulpak pehzawm awknak thansoh ter sinsin asi. Cutin thlarau laksawng na co mi pawl cu Khrih ih mission thansohnak, a ram karhzainak, kawhhran tungdingtu ah hmang ih na umnak khua, veng community tuah thatu ah nahman awk dingmi asi.
Jesuh Khrih ih dungthluntu pakhat dinhmun in hmailam pan in na thansoh vivo nak ding hrangah ziang na tuah sunzawm ding?
|