DUNGTHLUNTU LAMZIN

DISCIPLE YOURNEY

 

 

SESSION 5

 

 

 

 

THLAWSUAHMI MIBUR

THE BLESSING OF COMMUNITY

 

 

 

 

Jesuh dungthlun cu bulpak thu asi thei nan ziangtik hmanah a pak ih nun asi dah lo.

 

 

 

 

 

 

 

 

 

 

 

 

 

 

 

ZOHFALNAK

A hmaisa ah Pathian in amah thawn bulpak in thukzet le nel zetin thei aw dingin sersiammi kan si tiah kan zir zo. Cucu kan hrangah thlawsuah sangtuk kan canpualtha asi vekin lungawi sopar ten kan nunpi kan cen  dingmi asi. Jesuh dungthluntu dinhmun in Pathian thawn cat bang loin pehtlaih awk ding cu canpual kan neih mi khal asi ih kan tuanvo khal asi, cucu cat bang loin thlacamnak le Thutak sungah kan nunnak in tuah ding mi asi.

Tuzarh Bible zirnak sung ihsin khuimi bik na nun a lo tham bik? Ziang a bang?

 

 

Bible na siarnak ihsin ziang na zir ngah ih ziang na tawnteh mi a um?

 

 

ZIang thu sut duhmi na nei?

Thlacam

Rei lo te cawl in bulpak lole a bur in thlacamnak can

·      Krih ah zumtu mibur lakah na tel ve ruangah Pathian hnenah lungawithu sim aw.

·      Na nun in na tawnteh mi kawhhran sung na umnak, kawhhran member pawl thawn nan pehtlaihnak pawl Pathian hnenah sim aw, lungawithu sim aw.

·      Khrih zumtu mibur lakah ziangvek dinhmun in zovek thawn nan pehtlaih ding ih na dinhmun cekci a lo retnak vekin nundan thiam dingin vanlam fimnak dil aw.

THUHMAIHRUAI

Pathian in milai cu mahte a falin nung dingah sersiammi kan silo, pawlkom awknak nei in nung dingah sersiammi kan si sawn.

Tikcu rei zet mahte lawng, fal zetin na um can ah ziangtin na thinlung in na ruat? Na sungmuril ah na dinhmun le tuar mi pawl zohman in an lo theihpi lo tikah ziangthu na ruat theu?

 

Jesuh Khrih dungthluntu nun cu mahte a fal in nun asi ti sim tikah ziangtin nangmai nun thawn na khaikhin tikah ziang na ruat?

 

 

 

BIBLE THUANTHU

Leitlun milai thuanthu ah thil danglam zetzet a can can a um theu. Cumi lakah kawhhran cu dinthawk asi tikah mangbangza leitlunah Pathian in a tuahmi a um.

Tirhthlah 1:8, Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding,” tiah a ti.

Tikcu ziangmawzat hnu ah Jesuh in a rak simcia mi cu a thleng. Nikhat ni ah mi 3000 in Jesuh dungthlun dingin thleng awknak an co. Milai nun thleng awknak maksak a thleng.

Himi bungcang sung ihsin ziangmi in na thinlung a lo lak bik?

 

 

THUANTHU LAILANG

KAWHHRAN TIMI CU ZIANG ASI?

Tuisan ah “kawhhran” kan ti tikah pawlkom, biak innpi, tvp a phunphun, biaknak lam cangvaihnak mibur pawlkomnak pawl thinlung ah a lang zet ti cu a fiang.

Kawhhran ti tikah na thinlung mitthlam ah ziang a lang?

 

 

Kawhhran na tel nak umnak ih na hmuhtawmi le kawhhran dinsuah pek ih an umtudan pawl na zoh tikah ziangsi danglamnak?

 

 

Kawhhran ti tikah biak innpi asilo, mit in hmuh theih tham theih thilri pawl, pawlkom kha asim duhmi asilo ih kawhhran timi cu “Jesuh ih zumtu dungthluntu mibur kom” asi.

A tlunah kawhhran cu ziang asi ti mi simfiangnak hi ziangtin na ruat? Na ruahdan hmandan le tawntehmi thawn a kaih aw maw?

 

 

Community ziangvek khal cangvaihnak, tuahmi pakhatkhat ruangah an tawng khawm aw theu. Tirhthlah bung 2 sungah a simmi zumtu community pawl khal tumtah le tuahmi pakhatkhat nei in an tawng khawm aw theu. Zumtu pawl an tong khawm aw theu ih rawl ei tlang, thutha hlawm aw tlang, thazang pe aw tawn in tulsam mi bawm aw tawn in an tikcu can an hmang tlang theu. Cutin Jesuh Khrih ih dudawtnak cu leitlun ah theihter in an mibur nun in an langter.

 

KAWHHRAN IH TUMTAHMI ZIANG ASI?

 

Kawhhran ih tumtah pahnih a um:

1.     Khrih dungthluntu pawl community pakhat sungah khat le khat tundin awknak, thazang pek awknak,sawmdawl awknak, Pathian duhmi hawlin Pathian ren tlangnak

Kawhhran sung na tel tikah ziangsi na ruahsan mi?

Tirhthlah bung 2 nak ah kawhhran zumtu pawl umtudan a simmi in a tlunih kawhhran tumtah pahnih a huap theh. Tirhtlah 2:45, An thilri neihmi le an hlawnthil pawl tla an zuar ih an ngahmi tangka cu an ṭulnak vekin an zem aw.

Midang na bawm tikah ziangtin ziangruangah na thinlung sungah ziangvek ruahnak a suak?

 

 

Jesuh dungthluntu na si vekin midang ih bawmtul dinhmunah na din can a um ding. Cuvek thotho in na kiangkap ah nangmah in na bawm tulmi an um can a um ding. Cuvek can ah nangkhal midang hnen ihsin  bawmnak thazang peknak na co hlan vekin midang in na hnen ihsin thazang peknak, bawmnak an co hlan can a um ve ding asi. Cucu khat le khat kar lakah Pathian duhdawtnak langternak cantha asi.

 

TELIN TUAH VE

Khrih ih dungthluntu pawl kawhhran ah kan umnak cu khat le khat bawmbawi aw tawn dingin asi. Khrihfa pawl hrangah kawhhran cu humhim awknak, thazang pek awknak, tundin awknak hmun asi, ziangkim tuahnak ah mai bulhrang hlawknak mai tanghai nak si loin duhdawtnak in rian awk tawnnak hmun asi.

John 13:34-35, Cule nan hnenah thukham thar ka lo pek: Pakhat le pakhat duhdaw aw uh! Keimah ih ka lo duhdawt vekin pakhat le pakhat nan duhdaw aw ve pei.35Pakhat le pakhat tlunah duhdawtnak nan neih ahcun zokhal in keimah ih dungthluntu nan si kha an lo thei ding a si,” tiah a ti.

A hmaisa bik ah zumtu community sungah bawmbawi awknak, thazang pek awknak a hram thok thei dingin lailan ten zalen zetin pehtlaih awknak thu hla theih awknak a um a tul asi. Na thuhla na thup ringring asi achcun na tulmi bawmnak na ngah dah lo ding. Cuvek thotho in zozokhalin an thinlung sangka ong aw in khat le khat pawhtlang zetin pehtlaih awknak thu hla theih awknak a um lo asile a tulmi bawm awknak thazang pek awknak tuah famkim asi thei dah lo ding.

Ziangvek bawmnak na tulmi na duh zet mi tu nai hrawngah a ummi sim maw?

..

..

ZARHKHAT SUNG CANGVAIHNAK

Bible zir lawng si loin team leader thawn reltlang uhla ziangmi na tuah tikah na thlarau nun na thangso ding timi nangmai dinhmun ih zir in Pathian sangka onsak mi ruat tlang in hawl tlang uh.

Pathian biaknak

·      Bible siar nak siar theh aw

·      Nitin thlacam

Bulpak Bible zirnak

·      Ca siar dingtimi pawl siar aw la thusuhnak pawl sang aw

Nunpi aw

·      Local church member na si hrih lo pang asile member lut aw. Kawhhran member pakhat in na tuah dingmi pawl pastor lole hruaitu hnenah fiang zet in sut aw.

Bible zohlo: I Kor. 12:27, “Nan zatein Khrih ih ruangpi nan si ih pumpak ciarin a taksa ṭhen nan si fingfing.”zohlo in ngah ding zuam aw.

·      Na rualpi sawm aw la Khrih dungthluntu kawhhran community sung na um ruangah na thathnempi mi pawl sim aw.

·      Kawhhran member dang thawn can hmang aw. Zanriah ei tlang, coffee in tlang, lek tlang in na tikcu can zumtu dang thawn hmang aw.

·      A dangdang…

 

BIBLE SIAR DING: Bible siar phah in a hnuailam ah na lungsung suakmi, Thiang Thlarau in a lo zirhmi pawl ngan aw.

 

1.     Mark 12:1-17

 

2.     Mark 12:18-34

 

3.     Mark 12:35-44

 

 

4.     MARK 13:1-13

 

 

5.     MARK 13:14-37

 

6.     MARK 14:1-21

 

7.     MARK 14:22-31

 

 

PATHIAN BIAKNAK

            Pathian in amah betu, sunlawihtu dingah sersiam kan si vekin siseh amah in in rundamnak ruangah Pathian kan thangthat. Pathian thangthat biaknak cu zumtu pawl hrangah cantha can sunglawi asi. Pathian in in duhdawtnak ruangah amah kan duhdawtnak langter in kan thangthat nak asi. A bur in kan tawn khawm tikah hla thawn siseh a phunphun in kan Pathian cu kan thangthat asi. Kawhhran biak khawm nak can hman tikah a hran in Praise and Worship, Pathian thangthat sunloihnak hla thawn can hman theu asi. A tu zarh sungah Pathian na sunloih thangthat nak zohsal in na hmuhtawnmi pawl sim fiang aw.

 

A tu zarh sungah Pathian na thangthat nak ah na tawntehmi lak ihsin an duhbik mi ziang a um, ziangruangah?

 

 

Pathian thangthatnak ah na fiang hnai lo mi ziang a um?

 

 

 

Pathian thangthatnak can hman tikah nangmah bulpak in Pathian thawn pehzawm awknak, pawlkom awknak nan neih mi a um maw?

 

 

Pathian biak thangthatnakah a tu hnakin tha sinsin in Pathian biak thangthat thei dingin na tumtahmi ruah mi duh mi ziang a um?

 

 

BULPAK BIBLE ZIRNAK

KAWHHRAN HMUITHLAM PAHNIH

 

Bible ngantu in mitthlam ah lang thei dingin simduhmi simfiangnak ah hmuithlam thawn thu sim duhmi ca in ngan mi a um theu.

I Kor. 12:12-14, 12Khrih cu taksa ruangpum bangtuk a si. Taksa ruangpum cu pakhat a sinain taksa ṭhen cu tampi an si. 13Cubangtuk in kannih khal hi Judah mi le Zentail mi, miluat le sal tiin um hman nungla kan zate hin cuih ruangpum pakhat sungah cun Thlarau pakhat ih baptisma lami kan si ih kan zate hin cuih Thlarau pakhat cu intlaang dingah tuahmi kan si. 14Ruangpum hi taksa ṭhen pakhat lawng a si lo, taksa ṭhen tampi a si.

 

A tlunih Bible bungcang na siar tikah ziang ruahnak na thinlung sungah a lang?

 

 

Kawhhran cu “ruangpum” vekin sim tikah kawhhran ih umzia theihfeng a awlsam ter. Jesuh cu kawhhran ih “lu” asi ( Eph. 5:23). Jesuh cu kawhhran ih lu, ruahnak hrampi asi ih kannih zumtu pawl cu taksa ruangpum kan si.

Kawhhran cu taksa ruangpum vekin sim tikah khat le khat kan tul tawn awkzia tla a lang sinsin. Khrih ah kan tulzia bangran ten rualran awknak nei mi kan si ih tuantlang theh ding kan si.

 

1 Kor. 12:17-18,  Ruangpum hi mit va si thluh bangsehla ziangtinso thu a theih ding? Cule hna lawng sibang sehla ziangin so rim a hnim ding? Sikhalsehla atuih thil umdaan vek hin, Pathian in taksa ṭhen dangdang cu an umnak ding hmun ciarah Amah ih duh vekin a ret a si.

 

 

A tlunlam ih Bible bungcang in kawhhran umzia na theihdan ziangtin a lo bawm?

 

 

Himi bungcang in kawhhran ah na dinhmun ziangvek asi ti ziangtin a lo theihter?

 

 

Dungthluntu Peter in hmuithlam hmangin tongkam thawn kawhhran umzia a sim:

I Peter 2:9-10, 9Sikhalsehla nannih cu hriil cia miphun, Siangpahrang ih puithiam, miphun thianghlim, Pathian ih miphun bulce nan si. Khawthim sung ihsin mangbangza tleunak sungih a lo kotu Pathian in khuaruahhar thil a tuahmi pawl tlang-aupi dingih hriilmi nan si. 10Tuih hlanah cun Pathian ih minung nan si lo, sikhalsehla atu-ah cun amah ih ta nan si; tuih hlanah cun Pathian ih zaangfahnak nan thei lo; sikhalsehla atu-ah cun a zaangfahnak nan co zo.

 

A tlunih Bible bungcang sungah Kawhhran umzia langtertu tongkam hmanmi pawl rin aw.

            Korin kuatkhat ah Paul in asim vekin Peter khalin kawhhran cu pumkhat, community pakhat asinak thu a sim. Tulai kawhhran cu pawl phunphun ah kan thenthek aw celcel. Kanmah lala tla local church dangdang ah kan khawm aw, Pathian kan bia. Asinan Bible thuhrampi ah kan hmuhmi cu Pathian uknak hnuai ah kan zaten pumkhat, Khrih ih community pakhat kan si.

            Kawhhran member kan zaten miphun hleice kan si, Pathian uknak hnuai ah community pakhat asi mi, leitlun miphun kip lakah a tekdarh aw mi kan si.

c.9 nakah a sim vekin “hrilce” “miphun hleice” puithiam miphun tiah kawhmi kan si vekin kawhhran zumtu pawl cu a pehtlai aw theh mi kan siih Pathian ih tumtah mi tuansuak dingin kutkai in hnatuan tlang ding kan si. Pathian zangfah lainatnak co ngahtu kan si vek in acuih kan co mi Pathian zangfahnak cu a tultu pawl hnenah simsawngtu ding kan si. Khrih dungthluntu, Khrih ih community ah pehtlaih aw mi kan zapi ten kan cangvaihnak le pehtlaih awknak in Pathian thangthat le Pathian biaknak a rahsuah ih kan neih mi Thuthangtha cu midang hnenah simsawngtu ding kan si.

 

Peter ih nganmi Bible bungcang na siar tikah kawhhran dinhmun le umzia, hnatuan ziang a lo theihfiang ter?

 

 

Himi Bible bungcang in kawahhran tumtah le hnatuan ah na dinhmun le tuanvo ziangtin a lo theihter?

 

 

KAWHHRAN AH TUAHMI PAHNIH

Kawhhran member, Khrih dungthluntu kan sinak ah tuah ding tampi kan nei ih cutin nitin thlarau nun thangso thei dingin. Pathian biaknak, Pathian aw ngai in Thuthangtha ngai thlaknak, midang rennak, kan neihmi peksuahnak, tvp, tampi tuah ding a um. Asinan cumi tampi lakah thil pahnih kawhhran in a tuahmi thu zohtlang uhsi. Pakhatnak cu baptism asi:

 

Roman 6:3-4,  Khrih Jesuh thawn kan pehzom awknak in a sungih hnimmi kan si tikah a thihnak sung khalah hnimmi kan si tihi nan hngilh maw si? 4Baptisma kan lak tikah amah thawn phummi kan si ih a thihnak ah khal kan ṭawm ve; cuvek thotho in Pa ih sunlawinak huham in Khrih kha thihnak ihsin a thawhter bangtuk in kannih khal a thar in kan nung ding.

 

“Baptism” timi tongfang sim ve ten na khawruahnak sungah ziang  alang, ziangruangah?

 

 

Zumtu pakhat in baptism a lak tikah Jesuh Khrih zumtu asinak mipi hmaiah a phuansuah awknak asi. Tidai sungah hnim asi tikah Jesuh Khrih ih thihnakah a thi ve ih tidai sung ihsin kaihthawhsal asi tikah Jesuh Khrih ih thohsalnak a tawmpi ve tinak a langter asi. Khatlam zawngin kan sim asile mi pakhat in baptism a lak tikah mi piangthar asinak mipi hmai ah a langternak asi.

A hnuailam Bible bungcang pawl siar aw la Jesuh in Baptism thu ziang a zirh, na zir ngahmi a hnuailam ah ngan aw:

Mathai 28: 18-20: Jesuh cun a pan hai ih an hnenah, “Lei le vanih thuneihnak hmuahhmuah cu ka hnenah pek a si zo. 19Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. 20Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti.

 

Tirhthlah 2:37-41: 37Cuih thu an theih tikah an thinlung a khoih zetih Piter le a dang tirhthlah pawl cu, “U le nau pawl, ziangso kan tuah ding?” tiah an sut.

38Piter in an hnenah, “Nan zatein nan sual sir fingfing uhla Jesuh Khrih hmin in baptisma lak uh; cuticun nan sualnak ngaidam nan si ding ih Pathian laksawng Thlarau Thianghlim nan ngah ding. 39Ziangah tile Pathian thukamnak cu nanmah le nan faate pawl hnenah le Pathian thawn a hlat awmi an si nain Bawipa kan Pathian in a kawhmi pawl hmuahhmuah hnenah a si,” tiah a ti.40Piter in thu tampi a zirh ih a forh hai. “Hi miṭha lo parih a thleng dingmi hremnak ihsin luat dingah zuam aw uh,” tiah a ti. 41Piter ih simmi cu mi tampi in an zum ih baptisma an lak; cuih ni ni khatah an pawl cu mi thawngthum tlukin an karh. 42An zatein tirhthlah pawl hnen ihsin an zir ih, tirawl ei tlaangnak le thlacam tlaangnak thawn pawlkomnak an nei ringring.

 

Tirhthlah 8:26-40:

 26Bawipa ih vancungmi in Filip hnenah, “Na timtuah awla thlanglam ah Jerusalem ihsin Gaza fehnak lamzin ah vung feh aw,” tiah a ti. (Atu-ah cun hi lamzin cu an hmang nawn lo.) 27A ti vekin a tim a tuah ih Filip cu a feh. Culai ah Ethiopia mi pakhat an khua lamih a tlungmi a tong. Cupa cu tilpermi a si ih Ethiopia siangpahrang * nu ih neihmi sumsaw hmuahhmuah a kilkhawitu bawi a si. Amah cu Jerusalem ah Pathian bia dingin a feh. 28A ra tlunlam ah a rangleng parah to in profet Isaiah cabu a siar. 29Thlarau Thianghlim in Filip hnenah, “Feh awla khi rangleng khi va naih aw,” tiah a ti. 30Filip cun a hei dawi ih profet Isaiah cabu a siar ti a thei. Filip in, “Na siarmi hi a tican na thei maw?” tiah a sut.31Cupa cun, “Zotal ih in simfiang lo ahcun ziangtinso ka theih thei ding?” tiah a sawn. Cule Filip cu a rangleng parah to ve dingin a sawm. 32A siarmi Ca Thianghlim cu a tanglam vek hin a si:

“Amah cu thah dingmi tuu bangin an hruai ih, Tuu faate a hmul an met laiah ai loih a um bangin,

ṭong loin daitein a um. 33Hmuhsuam nautatnak a tuar, ṭantu zohman a nei lo; Leitlun ihsin a nunnak an laksak ruangah, A ci thlahmi pawl sim ding zohman an um lo,” * tiin a um.

34Cupa in Filip cu, “I sim hnik! Profet Isaiah ih a ṭongmi hi zo ih thu so a si? Amah ih thu maw, midang ih thu so?” tiah a sut. 35Cutikah Filip in cuih Baibal caang ihsin thokin Bawi Jesuh Thuthang ṭha cu a sim ṭheh. 36Cutiin an vung feh vivo ih tidai a umnak hmun an thleng. Cupa cun, “Hinah tidai a um. Baptisma co dingah ziangso i dawntu a um?” tiah a ti. 37(Filip in, “Na thinlung zatein na zum ahcun baptisma co ding na si,” a ti. Cupa cun, “Ka zum; Jesuh Khrih cu Pathian Fapa a si tiah ka zum,” a ti.) * 38Cuih Ethiopia pa cun a rangleng cu a dinter ih Filip thawn tidai sungah an vung ṭum ih Filip in baptisma a pek. 39Tidai sung ihsin an hung suah tikah Bawipa ih Thlarau in Filip cu a lak hlo. Cuih bawi in Filip cu a hmu nawn lo; a sinain lungawi zetin a inn lamah a tlung. 40Filip cu Ashdod a va thleng; Sisaria ah a feh ih lamzin tluan khua kipah Thuthang ṭha cu a sim vivo.

 

A pahnihnakah, kawhhran member, Khrih dungthluntu kan sinak ah kan tuah theu mi cu Bawipa zanriah asi. Jesuh amah in a dungthluntu pawl hnenah tuah ringring dingin in cahta mi asi.

 

Luke 22:19-20, 19Cun saang hlom khat a lak ih Pathian hnenih lungawi thu a sim hnuah a phel ih a dungthluntu pawl hnenah cun a pek. “Himi hi nan hrangih ka pekmi ka taksa a si. Keimah in theih ringringnak dingah run tuah uh,” tiah a ti. 20Cuvek thotho in zanriah an ei ṭheh tikah khuathai cu an hnen ah a pek ih, “Hi hai cu nan hrangah ka thletmi ka thisen thawn nemhngetmi Pathian thukam thar a si.

 

Veng kawhhran dangdang in an hmandan a bang rep lo khal asile a tumtahmi le duhsan cu bangrep ringring asi; kan Bawipa Jesuh Khrih cu kan mai hrangah a thihnak langtertu theih hngilh lo nak asi.

 

Bawaipa zanriah na hman tikah ziangveh hmuhtawnmi na nei?

 

Bawipa zanriah hmanmi thu thawn pehpar in thusuh duhmi ziang na nei?

 

 

Bawipa zanriah kan hmanmi hi a thupi zetmi, Jesuh dungthluntu kan sinak langtertu asi ih Khrih ah pumkhat kan sinak langtertu khal asi. Cuvek thotho in Bawipa zanriah kan hman tikah kawhhran ih tumtahmi tla in theihtersal ringring asi. Jesuh Khrih cu kan sualman leiba pe in kross parah a thih ih a thosal asi ti in theihter ringring vekin kan co ngahmi thuthangtha a tultu mi tampi an um asi ti khal in theihter sal ringring asi. Bawipa zanriah kan hman tikah leitlun ah rundamtu nei lo tampi an um ih rundamnak Thuthangtha sim duhnak tla in neither asi.

 

Baptism le Bawipa zanriah thu kan zir ngah zo vekin Khrih dungthluntu pakhat dinhmin in ziang kan tuah sunzawm vivo a tul?