DUNGTHLUNTU LAMZIN

DISCIPLE YOURNEY-

 

 

 

SESSION 4

 

 

 

 

 

JESUH THAWN CAAN

TIME WITH JESUS

 

 

 

 

 

 

Bulpak in sungmuril thuk zetin Pathian thei dingin sersiammi na si.

 

 

 

 

 

 

 

 

 

ZOHSALNAK

JESUH KHRIH cu milai thuanthu ah a laimuril, thupibik asi tiah kan zir zo. Leitlun ah a nung dahtu milai hmuahhmuah lakah a thupi bik asi ti khal kan zir zo. Leitlun milai zapi hrangah rundamnak a tuahsuak zo thu khal kan zir zo. Cutin Khrih dungthluntu kan si tikah Jesuh Khrih cu kan ziangkim ah a thupibik, nun sungmuril siter ding thu khal kan zir.

Zarhkhat sung tuah ding timi ziang n arak tuah mi a um ih ziang na hmuhtawnmi in sim thei maw?

 

Bible na siar lai ah na zir thar mi, hlawm duh mi na nei maw?

 

 

THLACAM

REilo te cawl in thlacamnak can, bulpal lole a bur in hmang:

·      Tuzarh sung Pathian na nunah a um ruangah lungawithu sim

·      HNaihnoktu lak ihsin la fianhrial aw thei dingin dil aw la Pathian thu thinlung tak ten na zir ngah thei nak ding hrangah thlacam aw

·      Bible na zir rualrual in Pathian in na hnenah thu lo sim ding, lo be dingin dil aw

THUHMAIHRUAI

Tuisan cu theihnak ah zuam awknak, leitlun hminthang, mi larlar, thu larlar theih duh zet nak san ah kan nung. Hminthang le thu maksak zetzet theih kan duhnak cu kanmah hnakin a thupi sawn, ropi sawnmi theih duhnak ihsin a suak mi asi. Kan zaten Pathian cu bulpak in thuk zet le sungmuril in thei dingin sersiammi kan si.

Lungawiumza asimi cu a cang thei si: Bulpak in Pathian thawn nan thei aw thei asi.

Leitlun mi hminthang le mi lar zetzet pawl thawn rualpi tha si in nan thei aw lo men thei nan ziangzongza sersiamtu, ziang hmuahhmuah lei le van thu neihnak neitu Jesuh thawn bulpak in nan thei aw thei asi.

Bulpak in thuk zet le sungmuril zetin Pathian thei dingin sersiammi na si, timi na theih tikah ziangtin na ruat?

 

BIBLE THUANTHU

Mari le Martha in jesuh cu bulpak in an thei (John 11:5). A hnuailam thuanthu tawiten zoh hnik uhsi:

            Luke 10:38-42, 38Jesuh le a dungthluntu pawl cu khual an tlawng vivo ih khua pakhat an thleng. Martha timi nu in Jesuh cu a inn ah a tlunter. 39Martha ih naunu cu Mari a si. Mari cu Jesuh ih kehram ah a to ih a thusimmi kha a ngai. 40Martha cu hnaṭuan tampi nei in a buai ih a thin a ṭeu ruangah Jesuh hnenah, “Bawipa, ka naunu in hnaṭuan hmuahhmuah i tun ṭheh hi na poisa lo maw si? Sim aw, i ra bawm seh!” tiah a ti.41Cutikah Jesuh in, “Martha, Martha! Nang cu thil tampi parah helhkam le awloksong in na um; 42a ṭul ngaingaimi cu pakhat lawng a si. Cumi cu Mari in a hriil ngah ih zohman in an long nawn lo pei,” tiah a ti.

A tlunih thuanthu sung ihsin ziangmi thu in na thinlung a lo lak bik, ziangruangah?

 

Mari le Martha thawn an biak awknak, pehtlaih awkdan thuanthu ihsin Jesuh thu ziang kan zir thei?

Ziang hrangah a sunglawi man nei bik in an can an hmang thei ti ah Jesuh in a sim?

 

THUANTHU SIMFIANGNAK:

THLACAM IN PATHIAN BE AW.

Khrih dungthluntu dinhmun in Amah thawn nitin can hmang dingin duhril thei na si. Leitlun buainak, hnatuan le duhhril ding tampi lakah Mari le Martha vekin na hrangah a sunglawi bik le man nei bik in na can hmang thei dingin duh hril ding na nei asi.

Ziangtin Pathian ka be ding? tiah thu na sut thei men. Mari in ziang a tuah? Jesuh kehram ah a to ih a thusimmi a ngai. Tikcu hman ten Jesuh kehram ah mahte can fianhrial la in to in Jesuh in a lo biak mi aw na ngai thei asi. Cutin bulpak in thuk zet le sungmuril zetin nan pehtlaih aw in nan pawlkom aw thei ding asi.

Nitin Jesuh thawn can hmang thei lo dingin a lo kham thei tu ziang pawl an si?

 

Thlacam timi cu kan duhmi Pathian tuahter dingin kan simmi asilo; Pathian duhmi thei dingin amai aw kan ngai sawn asi. Amah thawn bulpak pawlkom awknak,pehtlaihnak kan neihnak can asi sawn. Thlacam timi cu Pathian thawn pawlkom awknak, Pathian hnenah kan duhmi le theihmi kan simih Pathian in a duhmi le kan tulmi in simnak can asi. Thla kan cam timi cu kan duhmi ngahnak hrangah asilo Amah Pathian thawn kan neihniam awk sinsin nak sawn asi.

Thlacam kan ti tikah na thinlung sungah ziang a lang tambik theu?

 

 

PATHIAN THU SUNGIN PATHIAN AW THEI

 

Pathian thawn can tam sinsin kan hman tikah Pathian thawn kan nai aw sinsin ih kan nunnak hrangah Pathian lamhmuhnak fiang sinsin in kan thei asi. Acuih ruangah Pathian thu, Bible thiang siar tam hi a thupi tuk asi…. Ziangah tile Pathian in a thu, a tongkam, Bible thiang sung ihsin in bia asi.

 

Bible na siar tikah lole Bible zirhnak na ngai tikah, Pathian aw na thei asi. Bible, Pathian tongkam cu ziangtik khalah a thleng aw dah lo mi asi. Kum thawng siar tel rei ah ngan zo mi asinan Bible cu tuini tiang thar ringring in hmual nei zetin a nungmi thunung asi ringring.

Bible thu ziang na zir dah ih ziang an lo zirh dah?

 

 

 

Bible Thiang sungah fiangfai zetin nitin nuntu khawsak dan in zirh. Thungai tlak in a zir le hawltu hrang ahcun thieh awl te asi ih nitin nunpi dingmi nunthuken pawl in zirh asi. Curuangah Bible thuthuk na theih fiangnak ding hrangah a thupi bik hmanrua cu commentary le bible dictionary pawl an si lo, tangdornak lungput asi. Mari cu Jesuh kehram ah a to ih a aw a ngai vekin tangdor ten Jesuh kehram ah to in Bible na siar ih na zir tikah Thiang Thlarau in theihfengnak a lo pek ding asi.

 

Cutin Bible bungcang pawl na siar na zir rualrual in Pathian aw na thei dingih na nunpi tikah Pathian thawn nan nai aw sinsin ding asi. Cutin nauhak te cun apa thawn an um tlang tam tikah a pai aw cu a thleidang thiam vivo vekin Bible ca na siar sinsin tikah na Pa Pathian ih aw na thei thiam in na thleidang thiam vivo ding.

 

TUAHDING

Himi zirnak hi mibur in thlacamnak in tawpter hrih uhsi. Mibur 6 hnakih tam nan sile a bur fate deuh in nan then asile a tha sawn ding.

Thangthatnak: Tuzarh sungah Pathian in na hrangah a tuahmi ruangah lungawithu sim aw. Amah theih sinsin, pawlkom awknak thuk sinsin neih na duhnak thu sim aw.

Sir awknak: Pathian amah thei thei lo dingin a lo khamtu na mzia tha lo pawl lo theihter dingin Pathian hnenah dil aw. Thil na ti sual mi pawl phuang aw in Pathian hnenah ngaidam dil aw.

Dil: Hmaizarh sung na tulmi Pathian in a lo pek ih amah thawn nan nai awk sinsin nak hrangah thla cam aw. Na group sung midang hrangah thla cam aw.

Nun Ap: Na nun pum Pathian hnen apnak in himi zirnak tawpter aw. A ra dingmi zarh sungah Pathian hrang ah na nun ap aw, amah thei sinsin, ahmanmi si sinsin dingin thlacam aw.

 

Thlacam na dil duhmi ngan aw:

 

……

ZARHKHAT SUNG TUAH DING

Group Bible study hlei ah na team leader thawn rel tlang in zarhkhat sungah ziang na tuah asile na hrangah na thangso bik ding timi ruat khawm in timtuahnak nei aw.

PATHIAN BIAKNAK

-Bible siar ding pawl kha siar theh tengteng aw.

-Pathian thawn bulpak can fianhrial in can hmang tengteng aw.

-Bulpak nitin thlacam nun nei aw, thlacamnak ding hmun le can khiah cia in neih thei tum aw.

BULPAK BIBLE STUDY

-Bible siar ding pawl siar awla, thusuhnak pawl sang in bulpal Thiang Thlarau pawlkomnak in na hmuhsuahmi pawl ngan khum aw.

-Thlacam dan pawl ngan khum cia mi zir in thlacam aw.

 

NUNPI DING

-Local church ah khawm aw awla, Pastor in Bible zirh mi le thusimmi pawl note ngan aw la hminsin aw.

-Bulpak in pehtlaih mi insang rualpitha pawl thawn thlacam tlang Bible siar tlang dingin na timtuah in can hmang aw.

-Bible cang zohlo siar ngah ding: John 14:1, “keimah cu thukhal tha ka si. Ka tuu pawl ka thei ih annih in in thei.”

-Pathian thu na siar, thla na cam, Bible na zir mi ihsin na tawntehmi pawl ca in ngan, hla ah phuah, lole hminsin dan tuah in hminsinnak tuah aw.

 

Bible siar phah in na lungsung tap bikmi ngan aw:

1.     Mark 9:14-32

 

 

2.     Mark 9:33-50

 

 

3.     Mark 10:1-16

 

 

 

4.     Mark 10:17-31

 

 

5.     Mark 10:32-52

 

 

6.     Mark 11:1-19

 

 

 

7.     Mark 11:20-33

 

 

CAAN FIANHRIAL

Mi pakhatkhat theihfiang na duh asile amah thawn caan na hman tam a tul. Cuvek in Pathian theih sinsin na duh asile Pathian thawn caan tampi na hman sinsin a tul. Curuangah ziangtikah khui tawk hmunah Pathian thawn can ka hmang ding timi fiangten tumtah nak ca sungah ngan cia in khiahcia mi can le hmun nei aw:

Nitin Bawipa thawn can fianhrial ka hmannak ding hmun le can:

Ziangtikah: …………………………..

Khuitawk hmunah: ……………………

 

Na ruahmi pawl ngan khum aw:

..

 

BULPAK BIBLE ZIRNAK

ZIANGTIN BIBLE ZIR DING

Khrih dungthluntu pawl tuah tengteng dingmi cu Bible siar hi asi. Bible cu ngantu Pathian mi hman 40 lenglo in kum 1500 sungah an ngan khum theh mi asi. Asinan cutluk rei, ngantu cuzat in an ngan suahmi asinan a sungthu muril pawl cu khaikhawm tikah a bangrep, rem aw theh mi asi. Curuangah Bible cu ngunngaih zetin kan zir tul mi asi.

 

Ziangtin Bible zir ka thok ding tiah na ruah har tla asi thei.

 

A hnuailam Bible bungcang pawl hi siar in na hmuhsuahmi le ruahnak pawl ngan aw.

 

Sam 119:9-16, 9Ziangtin so mino in ziaza thiang a neih thei ding? Na thupekmi thlun lawngin a nei thei ding. 10Ka thinlung zatein nangmah lo rian dingah ka pe-aw, Na thukham pialsan lo dingah i kilkhawi aw. 11Ka thinlung sungah na daan cu ka ret zo, Na parih ka sual lonak dingah. 12Maw Bawipa, nangmah ka lo thangṭhat; Na daan pawl i zirh hram aw. 13Na thukham in pekmi pawl cu ring zetin ka saal ringring ding. 14Sumsaw tampi neih hnakin Na thupekmi thlun ah ka lung a nuam sawn. 15Na nunsimnak cu ka zir ding ih, Na thuzirhmi pawl cu ka ruat

ṭha ding. 16Na daan pekmi ah lungawinak ka nei ih, Na thupekmi pawl cu ka hngilh

lo ding.

 

I John 2:3-6. 3Pathian thupek kan thlun ahcun amah a theitu kan si ti a fiang a si. 4Mi pakhat khat in Pathian ka thei tiah a ti nain a thupek a thlun lo ahcun thuphanper a si ih a sungah thutak a um lo. 5Sikhalsehla Pathian thu a thluntu cu a sungah Pathian a duhdawtnak famkimin a um tinak a si. Pathian thawn pehzomnak kan nei ti kan theih fiangnak ding cu hiti in a si: 6Zokhal Pathian thawn pehzomnak ka nei a titu cun Jesuh Khrih bangin a nung ding.

 

Bible thu theih a harnak cu bukhat le bukhat a danglam nak pawl theih a har ih thu hla theih awk ter tam men si loin milai nun thleng awknak hrangah Pathian tongkam asi tikah siar men le thluak in theihnak men men in Bible thei taktak tu si a theih lo.

 

Bible thutak cu nunthleng awknak Pathian hmanrua asi vekin mai nun ih tawnteh taktak lomi theih nak cu a famkim mi asilo ih mah rori in nunpi lawngah a thuthuk theihtheih asi. Curuangah Bible thutak cu nunpinak in na theih ngah asile Jesuh Khrih thawn thei aw sinsin in dungthluntu tha na si sinsin ding. Bible in hitin a sim:

 

Hebru 4:12, Pathian ih thu cu a nungih a cak fawn. Kap hnih hriam ralnam hnakin a hriam sawn. Nunnak le thlarau an ton awknak le hlikhlok le thlik an peh awknak tiang a suntlang thei a si. Milai thinlung ih duhnak le ruahnak tla a thei thluh a si

 

2 Tim 3:16-17, Ca Thianghlim hmuahhmuah hi Pathian ih thawkhummi a si * ih thutak zirhnak, zirhsual simhrinnak, a sualmi remsaalnak ah le dingteih nitin nunnak ih zirh awknak ah a ṭha. 17Cutiih Pathian hna a ṭuantu cu mi tlamtling a si ding ih thil ṭha phunzakip tuah dingah thuam famkim neimi a si ding.

Bible cu leitlun cabu dang vekin milai ruahnak le hmuhtawn mi nganmi asilo; Pathian mi pawl in Thang Thlarau thawkkhumnak in ngan mi asi.

 

2 Peter 1:20-21, 20Amah cu leilung seem hlanah Pathian ih hriil ciami a si zo ih atu nanmah ih hrangah neta bik caanah hin Pathian in a langtermi a si. 21Thihnak ihsin a thawhtertu le sunlawinak a petu Pathian kha Amah thawngin nan zum. Cuti cun nan zumnak le nan ruahsannak cu Pathian parih bunmi an si.

 

Bible cu cabu dang hnakin a danglamnak nangmai tongkam in ngan hnik aw?

 

Bible cu milai ihsin a suakmi siloin Pathian tongkam, Pathian hnen ihsin a ra mi asi. Curuangah Bible thu thei fiang dingin tangdornak le theih duhnak taktak ruahsannak thawn thutak hawl ding asi. Bible na zir, na siar phah in a hnuai thusutnak pawl ruat phah in zir aw.

·      Ziang thutak le thuken pawl himi  Bible bungcang in a zirh?

 

 

·      Ziang thupek (command) le thukam (promises) himi bungcang sungah a um?

 

 

·      Tuini ah siseh a ra lai dingmi canah ka hrang ziang in zirh ih ziang ka zir ngah?

 

 

Bible na siar zir tikah Jesuh tongkam hi cing ringring aw.

John 8:31-32, 31Curuangah Jesuh in amah a zumtu pawl hnenah, “Ka thu zirhmi nan thlun ahcun keimah ih dungthluntu ngaingai nan si ding; 32thutak cu nan thei dingih cuih thutak cun a lo luatter ding,” tiah a ti.

 

A tu ih na zir ngahmi in tui hnu ah Bible na zir, na siar tikah tui hlan vek si loin ziangtin danglamnak thawn na zir in na siar ding?

 

 

ZIANGTIN THLA CAM DING

Thlacam cu Jesuh dungthluntu pawl hrangah catbanglo in Jesuh thawn pehzawm pawlkom awknak, Pathian hnenah duhmi sim theih nak le Pathian aw theihnak asi. Thlacam cu bulpak Pathian thawn pehzawm pawlkom awknak hrampi asi.

Asile ziangtin thla kan cam ding, khuitin kan thok dingih ziangtin kan tawpter ding?

 

 

Jesuh in thlacam in zirhmi sung ihsin thlacam dan tlangpi zir ding kan nei asi.

 

Mathai 6:9-13,  9Curuangah hi bangtuk in thla nan cam pei: ‘Vancung ih a ummi kan Pa, na hmin thianghlim cu upat si ko seh; 10Na Uknak thleng hram seh; Vancung i na duhnak tuah a si

bangin leitlun khalah tuah si ve seh. 11Nitin kan ṭulmi rawl in pe aw. 12Mi in kan parah sualnak an tuah ih kan ngaidam bangtuk in, Kanmah ih sualnak khal in ngaidam ve aw. 13A harmi hniksaknak tuarter loin, siatnak ihsin in hum hram aw.’

 

Jesuh in thlacamnak tlangpi in zirhmi lak ihsin ziangmi na hrangah  alang hngan in a sunglawi hleice?

 

Tuihlan na thlacamnak ah na tawnteh mi pawl ziangtin na sim  thei?

 

 

Jesuh in thlacam in zirhmi sung ihsin thu thlangpi pawl la then in thlacamnak hrangah kan hman asile: “Pray” mirang tong ih ngan mi thlacam hi ziang asi san neihter hnik uhsi.

P-stand for praise: Pahtian thangthat nak, “Van cungih a ummi ka pa, na hmin sunglawi seh” V. 9). Pathian cu zo asi, asinak ruangah thangthat nak in thok ringring aw.

 

R stands for repent: Pathian duhnak hnakin nangmai duhnak na thupitter mi pawl tla  ruatsal in sual sir nak nei aw. “Na uk nak thleng hram seh. Vansungah na duhnak a kim bang in leitlun khalah kim ve seh,” (v.10) tiah in zirh vekin Pathian duhnak sawn kha na nunah thupit ter ringring dingin Pathian hnenah thla cam aw.

A Stands for ask: Jesuh in nitin tulmi hrang dildan in zirh, “in pe aw, in ngaidam aw, in run aw” (v.11-13). Thlacam tikah Pathian in na tulmi lo pe dingin dil aw.

Y stands for yield: Thlacam tikah thlacamtu ih duhnak famkim ding kha a thupi sawn si loin Pathian duhnak sawn a famkim ding, Pathian hmin sunlawinak sawn kha a thupi asi zia lang ter ding asi. “Uknak le huham le sunlawinak cu a kumkhua in nangai ta asi” (v.13) ah asim vekin ziangkim thlacamnak in tawpnak cu Pathian duhnak, Pathian uknak, Pathian tumtah, Pathian hmin sunlawinak, Pathian huham cahnak, ziangkim Pathian sawnah a tawp dingmi asi.

 

Thlacam tikah Pathian hnenah tulmi duhmi simnak atel rualrual in Pathian aw ngai ding khal a tel tengteng a tul asi. Milai ruahnak, duhnak, tihphannak le duhnak pawl kan sim rualrual in amah in thupi ah in retsak mi in sim duhmi ngai a thupi sawn ringring asi. Pathian in kan thinlung sungah in sim duhmi fiang ten kan theih thei nak ding hrangah hnaihnoktu pawl um lo dingin fianhrial zetin Pathian aw kan ngai a thupi asi.

Pahtian aw na ngai na thei asi ti fiang ten na theih awknak na sim ngam mi a um maw?

 

 

 

 

 

 

Can lak in tlunlam ah thlacam dan ngan mi vekin thlacam aw la na nunah ziangtin na tawntehmi ngan aw. Ziang a bang?