DUNGTHLUNTU LAMZIN DISCIPLE YOURNEY
SESSION 3
BAPTISM AH JESUH DUNGTHLUN IN
DISCIPLE YOURNEY-SESSION 3
BAPTISM AH JESUH DUNGTHLUN IN
Key: Baptism cu sunglam nun thleng awknak langhngan mipi hmai ah nemhngettu asi.
Himi zirnak ah Baptism thu Paul in a zirhmi (Roman 6:1-11) ah hngat aw in kan zoh ding. Jesuh thihnak tawmpi in a thawhsalnak nun tawmpitu zumtu nunthar thu zir asi ding.
ZOHSALNAK A hmaisa zirnak ah Jesuh Khrih cu ziangkim, milai thuanthu, bulpak nunah siseh lai muril asinak kan zir zo. Jesuh cu zaahza Pathian, zaahza milai asinak thu pawl kan zir zo. Jesuh thihnak le thawhsalnak tawmpitu kan sinak, baptism thu kan zir hlanah a hnuailam thusuhnak pawl ruat lang hmaisa uhsi. Bible siar ding le tuah dingmi pawl na rak tuah maw? Ziang na bang?
Bible na siarmi sung ihsin ziangmi na zir ngah?
Thusut duhmi na nei maw?
Thlacamnak in thok hmaisa uhsi. Thlacam: · Nitin te canpualtha neihmi parah Pathian hnenah lungawithu sim hmaisa aw · Pathian hnenah baptism laknak in tangdor nun, thu awi nun ih umzia theihfengnak dil aw. · Pathian hnenah thlacam in baptism rawngbawlnak in local kawhhran sungah Pathian hmin sunloih asinak hrang thlacam aw. THUHMAIHRUAI Milai nunah lungawi umza ni hleice, thilcangmi hleice pawl kan lam in kan aih theu. Tahthimnakah thanksgiving day tivek pwl. Lungawini, can heice pawl cu a phunphun in lomh le aih asi theu. Cuvek in thlarau lam nunah baptism cu zumtu pahat cu hell ram tla ding ihsin vanram kai ding asinak Jesuh Khrih ah rundam zomi asinak mipi mithmuh ah lawmnak, langternak asi. Zirnak kan feh vivo hlanah a hnuailam thusuhnak pawl ruat tlang hrih uhsi. Na san sungah ziang holiday na duh bik, ziangruangah?
Kawhhran sungah baptism tuah tikah, baptism na lak tikah na thinlung ruahnak sungah ziang na ruat in na thinlung ah a tang bik?
Baptism lak tikah lang hngan in nemhngetnak men lawng si loin Pathian thupek thu awi nun, thulunnak langternak a si zia khal kan zoh vivo ding. BIBLE THUANTHU Baptism hi Jews pawlin an rak hman theu mi asi. (Mat. 3:13-17) ah Jesuh khal John tihnimtu hnenah baptism a laknak kan hmu thei. Curuangah baptism cu Thlungthar kawhhran sungah tuah ringringmi a thupi bik pakhat asi.
Roman 6:1-11, 1Asile ziangtinso kan ti ding? Pathian ih zaangfahnak karh sinsin seh tiah sual kan tuah vivo hrih ding maw? 2Tuah naisai hlah! Sualnak ah kan thi zo ih ziangtinso a sungah kan um thei nawn ding? 3Khrih Jesuh thawn kan pehzom awknak in a sungih hnimmi kan si tikah a thihnak sung khalah hnimmi kan si tihi nan hngilh maw si? 4Baptisma kan lak tikah amah thawn phummi kan si ih a thihnak ah khal kan ṭawm ve; cuvek thotho in Pa ih sunlawinak huham in Khrih kha thihnak ihsin a thawhter bangtuk in kannih khal a thar in kan nung ding. 5A thihnak ah khan amah thawn a thi tlang mi kan si ruangah thihnak ihsin thawhter a sinakah khan kannih khal kan tel ve ding. 6Kan nun hlun cu Khrih thawn thinglamtah parah khencih a si zo ti kan thei; cumi cu sual in a khatmi kan nunnak hlunih pum cu a siatral ṭheh ding tinak a si. Cutiin sualnak ih sal kan si nawn lo. 7Ziangah tile mi pakhat cu a thih tikah sualnak in a parah thu a nei nawn lo. 8Khrih thawn kan thih tlang ruangah a nun khal amah thawn kan nung tlang ding tiah kan zum. 9Khrih cu thihnak ihsin thawhter a si zo ih a thi sal nawn lo ding, ti kan thei; thihnak cun a parah thu a nei nawn lo. 10Cule sual thu-ah cun kumkhua daih in a thi ih atu a nun hi cu Pathian ah a nung a si. 11Cuvek ṭhiamṭhiam in nannih khal sual thu-ah cun mithi kan si tiin siseh, nunnak thu-ah cun Khrih Jesuh zaar in Pathian thawn pawlkom in kan nung tiin siseh, ruat aw uh. Ziangmi bungcang na thinlung sung a lut bik, ziangruangah?
Himi Bible bungcang na siar tikah Baptism thu na theihnak ziangtin a fiangter?
Himi zirnak thu ruat khawm tikah tihnim, ti thlerh, kawhhran serh le sang timi pawl thei fiang dingin relkhawm a tha.
BIBLE THUANTHU LAILANG
BAPTISM CU RUNDAMNAK THLAM LANGTERTETU ASI.
Roman bung 6 sungah sual thu le rundamnak thu simfiangnak kan hmu. A hmaisa in Paul in rundamnak hrangah key asi mi Pathian zangfahnak cun sual ngaidamnak in pek (Rom 5:18-21) tiah kan hmu. Paul in a sim bet mi cu sual ngaidamnak hrang Pathian zangfahnak a co zotu cun sualnak in a nung sunzawm thei nawn lo thu in zirh.
Himi thu simfiangnak ah Jesuh Khrih ah rundamnak hmuithlam langtertu ah Baptism thu a sim. Roman 6:3-4, 3Khrih Jesuh thawn kan pehzom awknak in a sungih hnimmi kan si tikah a thihnak sung khalah hnimmi kan si tihi nan hngilh maw si? 4Baptisma kan lak tikah amah thawn phummi kan si ih a thihnak ah khal kan ṭawm ve; cuvek thotho in Pa ih sunlawinak huham in Khrih kha thihnak ihsin a thawhter bangtuk in kannih khal a thar in kan nung ding.
Zumtu pakhat cu baptism pek asi tikah Jesuh Khrih cu thlan sungah phun asi vekin tisungah hnimphim asi. Jesuh Khrih cu thlan sungah phum in a um lanta lo vekin zumtu khal tisungah hnim lanta si loin Jesuh cu thlan sung ihsin a thawhsal vekin zumtu khal tisung ihsin a suaksal asi. Paul in cang 8 nakah, “Khrih thawn kan thih ahcun a thohslanak khalah kan tho ve ding tiah kan zum asi” a ti. A tlunlam ah simfiang vekin baptism thu ihsin zumtu pakhat cu ziangtivekin rundam asi timi a fiangter asi. Rundamnak cu ziangtivek in thihnak thawn tahthim theihnak a um?
Jesuh dungthluntu na sinak in ziangvek nunthar na tawntehmi a um?
Baptism cu rundammi, nunthar sinak, sunglam thleng awknak cu pawnlam ah langin nemhnget nak, kawhran sungah Pathian uknak hnuai ah nungin a thu thlun dingin tiamkamnak khal si.
BAPTISM CU RUNDAMMI SINAK MIPI HMAIAH PHUANSUAHNAK ASI.
Baptism cu a tlunlam ah sim zo mi lawng si loin leitlun damsung nun cu Jesuh thupek vekin ka nung ding tiah pumpek awknak, tiamkam awknak khal asi. Mipi hmaiah phuansuah awknak nei in baptisma laknak cu Jesuh a thohsal hnu ah thupek ropi thlun dingin tiamkam awknak khal asi.
Mathai 28:19-20, Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a
Himi Bible bungcangah ngan khummi Jesuh tongkam hi ruahnak pekmi men asilo, Jesuh dungthluntu zumtu hrangah a lotheihlo in tuah tengteng tulmi thupek (command) asi. Baptism cu Jesuh thupek (command) asi ti tikah ziangtin nangin teh na sang let ve ding?
Baptism cu kawhhran hrangah thatnak tampi a um asi. Baptism peknak in kawhhran sungah zumtu thar, Jesuh dungthluntu thar phuansuahnak, laklutnak khal a langter asi. Baptism cu zumtu zapi ten kan hlawm awkmi asi ih kan zaten ruangpum pakhat, thlarau pakkhat baptism a co mi kan si theh asi. Paul in hitin a sim, I Kor. 12:13, 13Cubangtuk in kannih khal hi Judah mi le Zentail mi, miluat le sal tiin um hman nungla kan zate hin cuih ruangpum pakhat sungah cun Thlarau pakhat ih baptisma lami kan si ih kan zate hin cuih Thlarau pakhat cu intlaang dingah tuahmi kan si. Baptism na lak theh in ziangvek si na hmailam nun kekar ding pawl?
Na umnak kawhhran sungah baptism thu thawn pehpar in ziang na tuah thei mi a um?
TUAH IN TELVE Baptism hi local kawhhran sungah rawngbawlnak thupi zet mi asi. Zumtu thar pawlin Jesuh thawn bulpak pehzawm awknak, piantharnak an hmuhtawnmi pawl an sim, testimony an simmi pawl hi Thuthangtha simsuahnak tha zet asi.
Nan local church ah baptism service a um tikah Jesuh Khrih ah rundamnak a co hrih lo tu, zumlo tu rualpi na neihmi pawl rak sawm awla, baptism cotu pawl ih testimony rak ngai ter aw.
Nangmai nunah Jesuh na zumih baptism na lak nak ihsin na nun a thleng aw mi pawl zum lotu hrintharnak a co hrih lo tu hnenah sim aw.
Ziangruangah Jesuh thupek thlunin baptisma na lak (na lak hrih lo asile na lak ding thu) timi thu zumlotu hnenah sim aw.
Nan local church ah baptism service a um tikah zumlotu, piangthar hrihlo rak sim tengteng aw. Zosi na sawm dingmi hmin ngan cia aw.
Thlacam na dil duhmi: … …. …
ZARHKHAT SUNG TUAH DINGMI:
Pathian thangthat · Bible siar ding pawl Bible na siar phah ah Thiang Thlarau in a lo theihtermi, na zir tharmi pawl a hnuailam ah ngan khum aw la group tawn awknak ah sim dingin timtuah cia aw. · Nitin thlacamnakin Pathian thawn bupak pawlkomnak nun nei in na tikcucan hmang ringring aw. Bulpak zirnak
· Baptisma la hrih lo na sile baptism la dingin na thinlung timtuah in na local church pastor hnenah sim aw. Baptism la zo na sile baptism na lak tikah na tiamkam awk vekin Jesuh Khrih hrangah nitin a thupek thlun in dungthluntu tha nun nei in nung awla, midang kha Jesuh dungthluntu an si theinak hrang bawmtu tha si aw. · Baptisma na lak tikah nangmai tawntehmi nun thleng awknak thu pawl na pehtlaihmi insungsang, rualpi, hnatuanpi, group pawl hnenah sim awla an hmuhtawnmi pawl sut in an hnen ihsin zir ve aw. · Zohlo in ngah, Roman 6:4,
NITIN BIBLE SIAR A hnuailam Bible bungcang pawl nitin siar awla, na zir thar mi, Thiang Thlarau in a lo zirh thar mi pawl ngan khum awla na group sungah simsin dingin timtuah aw. 1. Mark 6: 45-56
2. Mark 7:1-13
3. Mark 7:14-37
4. Mark 8:1-13
5. Mark 8:14-26
6. Mark 8;27-38
7. Mark 9:1-13
JESUH BAPTISM LAKNAK Jesuh Khrih cu zaahza Pathian zaahza milai asi tiah kan zir zo. Jesuh Khrih zaahza Pathian zaahza milai asinak ih kan hrang a thatnak cu milai nitin tawntehmi pawl amah in taksa in leitlun ah a rak tawn theh mi asi-cumi lakah pakhat cu baptisma hi asi.
Luke 3:21-22, 21Mi hmuahhmuah baptisma an lak ṭheh hnuah Jesuh khal a lak ve. Thla a cam laifangah van a ong aw ih, 22Thlarau Thianghlim cu a tlunah thuro bangtuk in a rung fu. Cule vancung ihsin aw a thang ih, “Nangmah cu ka duhdawtmi ka Fapa na si. Na parah ka lung a awizet,” tiah a ti.
Himi Bible bungcang in ziangtin na thinlung khawruah a lo luahkhat bik ih ziangruangah? Pa Pathian in Fapa hnneah a tongkam hin Jesuh in leitlun ah milai hnenah a rawngbawlnak a thoknak ding hrangah thazang petu asi ding. Cuvek thiamthiam in kannih khal leitlun kan rawngbawlnak hrangah thazang laknak kan nei ve asi. Roman 8:16-17, . 16Hitiih kan au ahhin Pathian ih Thlarau in kan thlarau a pehzom ih Pathian ih fa kan sinak kha a fiangter. 17Fa kan si ruangah Pathian in a minung hrangih a retciami thlawsuah a cotu ding kan si; cule Pathian in Khrih hrangih a retciami khal Khrih thawn kan co tlang ding. Ziangah tile Khrih tuarnak a tuar vetu kan si ahcun a sunlawinak khal kan ṭawm ve ding a si.
Pa Pathian cu Fapa parah a lung a awi zet timi tongkam theih tikah ziangtluk hnangam tlakza so asi. Kannih zumtu pawl khal Jesuh Khrih ah Pa Pathian cu kan parah a lung a awi zet asi, kan sualpalhnak in ngai dam theh zo ih in mawhsiat nawn lo asi. Baptism kan lak tikah Pa Pathian thawn pehzawm awknak,pawlkomnak thar kan nei ih a sunglawi tukmi dinhmun ah kan ding asi.
Bulpak in Pathian fate na sinak parah ziangtin na thinlungin na ruat?
Tuini ah Pathian duhdawtnak ziangtin na nunah na langter ding?
BULPAK ZIRNAK THLUNGHLUN SAN LAI AH BAPTISM Baptism hi Thlungthar san ihsin a thokmi siloin ThuThlung san lai khalah an rak hman theumi, tidai thawn kholh, thianfainak hi an rak hman theu mi asi. Curuangah Jesuh amah rori khal baptism a laknak asi (Mat. 3:13-17). Thlunghlun san lai ah tidai hi hremnak hman rua ah siseh runsuaknak hmanrua ah siseh Pathian in a rak hmanmi tla kan hmu thei asi. Noah san lai ah misual pawl hremnak ah Pathian in tidai a hmang ih zumtu pawl cu tidai hmangin hremnak lak ihsin runsuak an sinak thu khal kan hmu. Noah le insang cu tilik ihsin runsuak an si ih Israel pawl kha tipisen sung ihsin runsuak an si. Cuvek thiamthiam in baptism khal sual lak ihsin runsuaknak cu langhngan in langternak ah hmanmi asi.
Siar aw: Seem 7:11-8:14. Himi Bible bungcang sung ihsin ziangmi in na thinlung a lo la bik ih ziangruangah? Siar aw: Suahhlannak 14:15-31, Himi Bible bungcang in Pathian hremnak le rundamnak thu ziangtin a langter? Cun Thlunghlun san lai ah tidai hi thianfaiternak hrangah an rak hmang theu. Puithiam 14:8 ah siseh Puithiam 16 nakah siar awla tidai hi thianfai ternak ah an rak hmannak thu pawl na hmu ding. Puithiam 16:23-24, 23Cule Puanthlam sungah Aaron cu a lut pei ih Hmun Thianghlim Bik sung a luh hlanih a hrukmi puithiam thilthuam pawl cu a phuak pei ih cutawkah a ret pei. 24Hmun thianghlim ah ti a kholh-aw pei ih amah ih hnipuan a hruk pei. Cuih hnuah a va suak pei ih Israel miphun ih sualnak le amah ih sualnak pawl thlahnak dingah mei-ur thawinak a tuah pei.
Puithiam 16:20-28, siar awla himi Bible bungcang in Thlungthar ih baptism kan hmanmi ziangtin a khihhmuh ngan aw?
Cun Ralbawi Naaman ih thu in tidai ah kholhfainak thu in zirh, 2 Siangpahrang 5 ah siar aw. Naaman cu Jordan tiva ah voi 7 hnim aw dingin Elisha in a fial vekin a tuah tikah a phaarnat ihsin a dam. 2 Siangpahrang 5:10, Elisha in a hnen-um pakhat a hei thlah ih Naaman hnenah cun, “Feh awla Jordan Tiva ah voi sarih in ti va bual aw. Na titsa an cerh sal ding ih na dam ding,” tiah a va sim. A hramthok ahcun Namaan in a damnak ding hrangah Jordan tiva ah voi 7 hnim aw ding timi thu a theih tikah a thinheng zet lawk nan, Pathian kamsang thu lungin a tuah tikah damnak a ngah asi. 2 Siangpahrang 5:1-19 siar awla, Namaan thuanthu sung ihsin ziangmi in na thinlung a lo la bik, ziangtin?
Thulunnak hi baptism kan lak tikah ziangruangah a thupi tuk asi pei? THLUNGTHAR AH BAPTISM PA 3
Thlungthar Bible sungah Baptism cu tuah dingin thupek (command) kan si. Curualrual in Bible sungah baptism zohthim ding ziang aum kan zoh hnik pei.
Tirh 2:41-42, 41Piter ih simmi cu mi tampi in an zum ih baptisma an lak; cuih ni ni khatah an pawl cu mi thawngthum tlukin an karh. 42An zatein tirhthlah pawl hnen ihsin an zir ih, tirawl ei tlaangnak le thlacam tlaangnak thawn pawlkomnak an nei ringring.
Baptisma lak tu zumtu pawl cu Jesuh Khrih ih ruangpum, Khrih ah pumkhat kan si zo ih zumtu pawl tawn khawmnak ah tihnak um lo, duhdawtnak in pawlkomnak, neihmi hlawm aw tawn in ti le rawl ei tlangnak, lungawi nuam le hahdam zetin pawlkomnak hmun asi.
Na umnakah Baptism la hrih lo pawl an lak ve thei nak dingah ziangtin na bawm thei ve ding?
Tirh 8:26-40, siar aw. Ethiopian pa ih baptism laknak thu asi. Himi bungcang sung ihsin ziangthu in na thinlung a lo lak bik ih ziangruangah?
Midang hnenah Baptism thu, a thupitzia le a umzia, pawl zirhsin dingin na ruat aw maw, ziangruangah?
Midang hnenah Jesuh thupek thlun in Baptism la dingin na forhfial thei pei maw?
Tirh 10:17-43 ah Kornelius Baptism laknak thu kan hmu thei. Bible na siar hnu ah himi bungcang sung ihsin Pathian na theihdan ziangtin a lo bawm?
Kornelius insang ah thilcang mi Thirh 10:44-48, 44Cutiih Piter a ṭong rero laiah a thusimmi a ngaitu hmuahhmuah parah Thlarau Thianghlim a rung thleng. 45Joppa ihsin Piter thawn a rami Jesuh zumtu Judah mi pawl cu Zentail mi hnen khalah Pathian in a laksawng Thlarau Thianghlim a burh ti kha an hmuh tikah an mang a bang ngaingai. 46Ziangah tile cute pawl cu ṭong phun dang in an ṭong ih Pathian ih maksak zia an thangṭhat kha an theih ruangah a si. Piter in, 47“Kanmah ih kan ngah zo vekin himi pawl khal in Thlarau Thianghlim an ngah ve a si. Curuangah tidai ih baptisma la ding kha zo in so a dawn thei ding?” tiah a ti. 48Curuangah Jesuh Khrih hmin in baptisma lak dingah thu a pek. Cule an hnenih caam hrih dingin Piter cu an sawm.
Himi Bible bungcang sungah in zirhmi cu Pathian rundamnak cu mi zapi hrangah asi. Rundamnak a co zo tu hmuahhmuah in Baptism laknak in Pathian uknak sungah Pathian insang sungtel sinak hram thohnak asi.
|