DUNGTHLUNTU LAMZIN DISCIPLE YOURNEY
HRAMTHAWHNAK THE BEGINNING
SESSION 2
KHRIH CU NUN MURIL ASI
THE CENTRALITY OF CHRIST
Khrihfa pawl cu thlarau lam do thlennak tuahtu, Khrih cu nun muril ah a neitu an si.
KHRIH CU NUN MURIL ASI HRAMTHOHNAK ZOHSAL A hmaisa ah Pathian in milai thuanthu a timtuah dan, a khawkhan le Pathian in milai in kawhnak le hawlsuaknak thuanthu tawi kan zir zo. Jesuh thihnak in kan sualman leiba in peksaknak, saltannak ihsin kan luatnak, Pathian thawn kan pehzawmnak a siatzo mi tuahthatsalnak pawl kan zir. Cuihleiah Jesuh Khrih dungthluntu timi cu ziangkim Jesuh in a tuah vekin tuah asi timi pawl kan zir.
Bible siar ding le tuah dingmi pawl na rak tuah maw? Ziang na bang?
Bible na siarmi sung ihsin ziangmi na zir ngah?
Thusut duhmi na nei maw?
Thlacam Reilote cawl in bulpak lole a bur in thlacam aw. · Jesuh Khrih ah Pathian in a lo rundam ruangah Pathian zangfah thatnak hrangah lungawithu sim aw. · Sual phuannak nei in thlacam aw, na pianthar pekte lai vek thotho in misual na si ih Pathian zangfahnak na tulzia sim aw · Nangmah le na Bible zirpi, na group pawl thlarau mitvangin nan thinlung sangka ong aw dingin Pathian hnenah thlacam aw. THUHMAIHRUAI Eph. 2:19-22 ah Khrih dungthluntu nun cu innpi sakmi vekin tahthimnak thawn in sim asi. Innsak tikah a hramtohnak lungpi vekin Jesuh Khrih cu Khrihfa nun hrampi ti ah in zirh. Na nunnak thuhrampi na hngat awknak muril thleng ding, nan nunsan thlengmi dinhmun thu sim tikah ziangvek tihnak le thinlung ruahbuaimi na nei?
Na thlarau nun tharthawh in nunsan danglam hrang na nun thok tikah ziangmi na lungsungah a cam bik?
BIBLE THUANTHU Luke 19:1-10, 1Jesuh cu Jerikho khua a thleng ih khawsungin a feh vivo. 2Cutawkah siahkhongtu upa pakhat, a lianzetmi, Zakia timi a um. 3Jesuh kha zo a si ti hmuh a duhzet nain amah cu mi niamte a si ih tlunah mi an tamzet ruangah a hmu thei hrimhrim lo. 4Curuangah mipi hmaiah a tlan ih cutawk lamih a feh vivotu Jesuh hmuh duh ah theipi kung parah a kai. 5Jesuh cutawk hmun a thlen tikah a tlunlam a hun zoh ih, “Zakia, zamrangin rung ṭum aw, tuihsun na inn ah ka tlung ding,” tiah a ti. 6Zakia cu zamrangin a ṭum ih Jesuh kha a inn ah lungawi zetin a tlunter. 7Cumi a hmutu hmuahhmuah cu an phunzai hmurhmo ih, “Hi pa hi misual pa ih inn ah a tlung ual!” tiah an ti. 8Zakia cu a ding ih Bawipa ih hnenah cun, “Bawipa, i ngaihnik! Ka neihmi ih hrek cu mifarah ka pe ding; cule ka bummi an um ahcun a let li in ka sam sal ding,” tiah a ti. 9Jesuh in a hnenah, “Tuih sun hi pa ih inn ah rundamnak a ra thleng zo, ziangah tile hi pakhal hi Abraham ih tesinfa a si ve. 10Milai Fapa cu a hlomi hawl ding le rundam dingah a ra,” tiah a ti. Na pianthar hlanah na nunnak ih thupi bik, muril bik ziang asi?
Na sinak langtertu bik ziang asi?
Zakia cu siahkhongtu asi tikah tangka dik lo zetin a rak lak theu ih siahkhongtu tiah mi zokhalih theih mi a rak si. Asinan Jesuh thawn an ton awk tikah a nun lairil, a hrampi bik cu Jesuh ah a cang.
Ziangruangah Zakia in a neihmi hmuahhmuah peksuak tahratin Jesuh Khrih cu a nun muril ah a ret si pei?
BIBLE THUANTHU LAIHLANGNAK KA SINAK LAI MURIL Zakia cu mi zakip huatmi a rak si. Zakia san lai ah siahkhongtu pawl an huat zetnak san pahnih a um: 1. Siah petu pawl hnen ihsin sumpai dik lo zetin an lak ih lennak ngah tu an rak si. Fifir ah ruah an si ih mi zakip huatmi an si. 2. Miphun phatsan in Rome cozah tlawntu tiah ruahmi, Jews pawl ih huat zetmi an rak si. Biaknak lam khalin zoh asile milem bia Rome cozah pawl tlawn tahratin anmai Jews sakhua biaknak tlansan phatsantu tiah ruah an rak si. A tlunih thuanthu khaikhawm tikah Jesuh thawn an tawn awk hlanah Zakia in amah le mah ziangtin a ruat aw ding tiah na zum?
Zakia ih ei in hawlnak nuntu khawsakdan zoh tikah a sinak sung muril, nunsan bik cu ziang a rak si pei?
Zakia cu huat zetmi, society mipi hnawnmi le ten zetmi dinhmun ihsin a thuanthu a thleng aw theh, Jesuh in a duhdawt ih a colhlan mi ah a cang tariai. Cutin Jesuh cu a nun lai muril ah a cang. Cutivek in kannih tla Jesuh kan zum kan co hlan tikah kan nun lai muril a thleng aw ih Jesuh cu kan nunnak ih hrampi lai muril ah a cang asi. Khrihfa pawl hrangah kan thuanthu danglam tertu thilcang mi cu Kross parah Jesuh thihnak asi. Kan theihmi thu hmuahhmuah lakah Jesuh in kross parah kan sual leiba in peksak zo timi thuthangtha kan theihmi cu a thupibik kan nun thuanthu, kan nun lai muril thlengtu asi.
Jesuh Khrih in in duhdawt ih in cohlang asi timi thu theih hi ziangruangah kan hrangah a thupi tuk lawman?
ZIANGKIM KA TUAHMI LAIMURIL ASI
Jesuh cu ziangkim kan tuahnak ih laimuril asi a tul. Zakia ih nun zoh tikah Jesuh in amah zumtu pawl nunah hmun pakhat lawng luah ding a nei: nun laimuril asi. Zakia nunah Jesuh a neih hnu ah sumpai le milai a nun laimuril ah a rak retmi cu a thleng aw verver asi. Zakia in a nun laimuril a thleng hnu ahcun sumpai le milai a pehtlaih nak hmuahhmuah a thleng theh asi. Khrihfa pakhat cun ziangkim kan pehtlaih mi ah Jesuh cu nun laimuril, ziangkim thuhram thawhnak le donnak asi ringring dingmi asi.
Nun thleng awknak hrangah ziangmi a harsa bik pei?
Milai nun laimuril danglam, hmuhdan dang in nun thok tikah ziangvek zalennak luatnak a um?
Luke 18:18-23 siar hnu ah rei lo te ruat tha in milian pa hi Jesuh thlun thei lo dingin ziangin a kham, dunglam ah a tangter bik asi pei?
Jesuh in milai pai thinlung cu a thei ih a sumpai pawl peksuak in a nun laimuril ah Jesuh siter ding cu a harsatzia a thei asi. Milaipa in a sumpai thu ah Jesuh cu thuneitu, muril siter ding a duh lo. Ziangah tile a nunnah a sumpai cu laimuril asi ih Jesuh cu a pahnihnak ah ret a duh asi.
TEL IN TUAH AW Tirhthlah 7:54-60 le Luke 23:32-46 siar kawp aw. Jesuh thihnak le Steven thihnak an bang awknak pawl rin aw. Tirhthlah 7:54-60,54Khonsil upa pawl in Stefen thusimmi an theih tikah an thin a heng tuk ih an hacang an rial hnawh. 55Sikhalsehla Stefen cu Thlarau Thianghlim in a khat ih vancung a hun zoh tikah Pathian sunlawinak le Pathian vorhlamih a dingmi Jesuh kha a hun hmu. 56Cutikah, “Zohhnik uh! Van a ong aw ih Pathian vorhlamah Milai Fapa a ding ka hmu!” tiah a ti.57Cutikah Khonsil upa pawl cu an hna an kut in an phit ih an aw neih patawp in an au ih Stefen cu an zon! 58Khawpi sung ihsin an dirhsuak ih lungto in an deeng. A deengtu pawl in an puan pawl cu Saul an timi tlangvalpa hnenah an retta. 59Lungto in an den rero laiah Stefen cun Bawipa a ko ih, “Bawipa Jesuh, ka thlarau run la hram aw!” tiah a au. 60A khuk a bilh ih, “Bawipa, an sualnak hi ciing ringring hram hlah aw!” tiah napi in a au. Cutiih a au ṭheh vete in a hnuk a cat.
Luke 23:32-46, 32Jesuh thawn hmun khatih thah dingah misual pahnih khal an hruai ve. 33“Luruh,” an timi hmun an thlen tikah cutawk hmunah cun Jesuh cu thinglamtah parah an thlai ih misual pahnih khal cu a vorhlam ah pakhat, a kehlam ah pakhat an thlai ve. 34Jesuh in, “Ka pa, an sualnak run ngaithiam aw. Ziang kan tuah ti an thei lo,” tiah a ti. Cule amah a thattu pawl cun camcawhfung zuukin a hnipuan cu an zem aw. 35Miseenpi pawl in an cuan ih an zoh ringring laiah Judah mi hotu pawl cun nautatnak thawn, “Midang hmuah a run ngah ṭheu; Pathian ih hriilmi Messiah a si ngaingai ahcun amah le amah khal run aw seh,” tiah an ṭongsan.36Ralkap pawl khal in an hnihsan ve ih amah va fuuk tahratin a man olmi Sabitti thur an pek ih, 37“Judah Siangpahrang na si ahcun nangmah le nangmah run aw aw he!” tiah an ti.38A lu tlun ah, “Hi pa hi Judah Siangpahrang a si,” tiah nganmi ca an taar. 39Thinglamtah parih an khenmi misual pa pakhat cun nautatnak ṭong thawn, “Nangmah hi Messiah na si lo maw? Nangmah le nangmah run aw awla kannih tla hi in run ve aw he!” tiah a ti.40Asinain misual pakhat pa cun, “Pathian na ṭih lo maw si? Kan parih thuṭhennak an tuahmi hi a bangrep ṭheh. 41Sikhalsehla kannih pahnih parih an tuahmi thuṭhennak hi cu a dikmi a si, ziangah tile kan thil tuah ruangih kan tuar tlakmi kan tuar a si. Asinain hi pa hi cu sualnak zianghman a tuah lo,” tiin a mawhthluk. 42Cule Jesuh hnenah, “Maw Jesuh, Siangpahrang ih na rat tikah i hngilh hram hlah aw,” tiah a ti.43Jesuh in cu pa ih hnenah cun, “Thu ka lo kam a si: tuihsun ah keimah thawn Paradis ah na um ding,” tiah a ti.44Sun nazi hleihnih hrawngin cuih ram pumpuluk ah zanlam nazi pathum tiang thimkhawzing a tlung. 45Cule Biakinn ih zaarmi puanzaar cu a tlek ih ṭhen hnih ah a ṭhen aw. 46Jesuh cu napi in a au ih, “Ka pa, ka thlarau na kut sungah ka lo pe,” tiah a ti. Cutiih a sim ṭheh hnuah a thaw a cem. Himi Bible siar pahnih sung ihsin Jesuh Khrih cu nun laimuril siter ding thu na theihnak ziangtin a danglam ter?
ZARHKHAT SUNG TUAH DINGMI Bible siar le zir lawng si loin na group leader thawn thlacam nak in na hrangah ziangmi na tuah asile Jesuh Khrih in na nunah hmun kau sinsin, laimuril hmun a luah thei ding timi ruat in timtuah aw. Pathian biaknak · Bible siar ding timi kha siar theh aw. · Pathian thawn can fianhrial nangmah te hmang aw. Pathian thawn pawlkomnak in na can hmang aw. · Nitin te Pathian hnenah thlacamnak can khiahcia in ret in hmang aw. Jesuh Khrih cu na nun sungmuril, laimuril hmunluahtu siter dingin Pathian hnenah thlacam aw. · “Ka Pa ka Pathian, Jesuh Khrih ruangah tui hlan ih ka tuah mi ruangah in duhdawtnak a nep cuang lo ih hmailam ah ka tuah dingmi ruangah in duhdawt hleice cuang lo, ka hrang na duhdawtnak cu a famkim in a hmun rignring asi ti ka thei” tiah hram thawk in nitin thlacam ringring aw.
Bulpak Bible zirnak · Ca siar ding pawl siar theh aw “Khrih cu nun laimuril” asinak pawl siar aw. · Jesuh Khrih cu ziangkim tuahnak ah nun laimuril asinak pawl siar aw. Nunpi aw -Na umnak kawhhran thawn thaten pehtlaih aw. Na nunnah Jesuh Khrih cu lai muril asi vekin na neihmi tla na umnak kawhhran ah na pek ding zat pe aw. -Phi. 1:21 “Kei ka hrang ahcun nun cu Khrih asi ih thih khal a hlawk sinsin” zohlo in ngah aw. -Midang hrangah thiltha pakhatkhat tuzarh sungah tuah aw. Nangmah parah zianghman thiltha a tuahsal thei lo tu hnenah thiltha pakhatkhat tuah aw. -Jesuh cu na nun laimuril ah ret aw. Tuzarh sungah na tikcu le na sumpai na hmannakah Jesuh Khrih cu na nun laimuril si dingin schedule tuah cia aw.
Bible siar in na lungsung tapbikmi ngan aw: 1. Mark 4:1-20
2. Mark 4:21-41
3. Mark 5:1-20
4. Mark 5:21-43
5. Mark 6:1-13
6. Mark 6:14-29
7. Mark 6:30-44
JESUH IN HMUN KAUSINSIN LUAH
Piantharnak
Nitin nunah Khrihfa zumtu, Khrih dungthluntu nunah Jesuh Khrih in hmun kausinsin, nitin nun laimuril ah a luah sinsin asi. Khrih dungthluntu nunah thil pahnih a cangmi a um: Pathian thianhlimnak thei sinsin, mai milai mizia sualnak thei sinsin sual hua sinsin nun. Curuangah Paul, mithianghlim in amai thu a sim tikah “Misual khawlbawl ka si” a ti theinak asi. Misual pakhat in Jesuh Khrih a neih hnu ah a rei deuhdeuh tikah Khrih in a nun ah hmun kau sinsin hmun a luah sinsin. Cutin kross ih man khunzia a thei sinsin ih a nun pumhlum cu lungawinak, duhdawntak, zangfahnak, thatnak, dingfelnak, tvp in a khat sinsin asi. Cutin Khrih dungthluntu nun cu Jesuh Khrih ih hmuihmel bang sinsin in nitin thlengter, sersiamthar ringring asi. Cuticun zumtu nun ah nikhat hnu nikhat nun laimuril, nun ziangkim ah hrampi, khawruah, thinlung duhnak, tongkam, le cangvaihnak khalah a laimuril asi sinsin asi.
Kross parah Jesuh in na hrang ziang a lo tuahsak timi na theih fiangih na nunnak cu amah Jesuh hnennah na ap hnu ah na nun laimuril ah Jesuh in hmun kau sinsin a luah sinsin in na thei aw maw? Simfiang aw.
Na pianthar hlan hnak hmanin na sualnak ih sualzia le ten um zia pawl a tu ah fiang sinsin in na hmu maw? Ziangtin?
BULPAK ZIR AWKNAK KA SINAK IH LAIMURIL Zakia le Jesuh an ton awk tikah Jesuh in Zakia hnenah a neihmi pawl pesal dingin le mi farah bawm dingin a fial lo. Zakia in amai palung in a tuah mi asi. Zohhnik:
Luke 19:8, Zakia cu a ding ih Bawipa ih hnenah cun, “Bawipa, i ngaihnik! Ka neihmi ih hrek cu mifarah ka pe ding; cule ka bummi an um ahcun a let li in ka sam sal ding,” tiah a ti.
Zakia thinlung ziangin a tuvek in a thleng asi pei?
Jesuh in ziang a tuah ruangah Zakia ih nun muril a thleng aw theh asi pei?
Na nunnak ah hlawhtlinnak lole siattawnnak na thuanthu pakhatkhat na sinak muril vekin na sunglam a lo luahkhat tu a um maw? Zumtu Khrihfa pawl hrang ahcun Jesuh in kross parah a thihnak le a thohsalnak cu kan nun thuanthu danglam tertu, kan sinak langtertu asi. Amah in kross parah thihnak a tuar ih a thi ih a thohsalnak ruangah Khrih ih sinak kan tawmpi ve asi. A hlan ih kan sinak pawl cu malh theh asi zo ih dingfelnak, duhdawtnak, le ngaidamnak in in thuam zo asi.
Roman 3:26, 26Sikhalsehla atu-ah cun Amah ih dingnak kha langfiangter dingah minung ih sualnak cu a umsan meen nawn lo; cutiin a dingnak a langter ih Jesuh a zumtu hmuahhmuah cu Amah thawn rualremnak a coter hai.
Roman 5:6-11, 6Zianghman ti theimi kan neih lo laifangah Pathian ih khiah mi tikcu caanah Khrih cu misual pawl hrangah a thi. 7Miding hrang hmanah mi pakhat khat thih ding cu a olmi thil a si lo. Miṭha hrangah cun thih a ngamtu pakhat khat an rak um khal a si thei. 8Sikhalsehla Pathian in ziangtlukinso in duhdawt ti cu a langter: misual kan si hrih na cingin kan hrangah Khrih cu a thi! 9A thisen thawng in kannih cu Pathian thawn kan rem awk zo ruangah ziangtlukinso Pathian thinhengnak ihsin Amah in in runsuak sinsin ding! 10Hlanlaiah cun Pathian ih ral kan rak si, sikhalsehla atu cu a Fapa thihnak ruangah a rualpi ah in tuah zo. Pathian ih rualpi kan si zo ruangah Khrih ih nunnak in ziangtlukin so in runsuak sinsin ding. 11Hi lawng hi a si hrih lo; Pathian rualpi ah in cantertu kan Bawipa Jesuh Khrih ruangah Pathian ih thil tuahmi ahhin kan lung a awi ngaingai a si.
A thlunih Bible bungcang pahnih in Jesuh Khrih ah na sinak thu ziang a lailang? A hnuailam thutlangpi pawl siar in thusuhnak pawl sang aw. Case study #1. Mi pakhat, sakhua mi insang, milai felnak ngaisang zet, mi tha zet tiah a ruat aw tu pa in “keimah cu mi tha ka si” a ti.
Himi in a sinak a nunnak laimuril ah ziang a ret in a lang?
Hipa hrangah Jesuh Khrih cu a nunnak sinak ih laimuril siter dingin ziang a bang ding, a nun muril ah a ret mi thleng aw dingin ziangvek harsatnak a um ding?
Case study #2. Nauhak lai ihsin hremnak, ti duhdahnak, a pitlin tiang a tuartu pakhat in “Kei cu mi tha lo ka si” a ti.
Himi hrangah Jesuh Khrih cu a nunnak laimuril si ter dingin ziang a bang ding, thleng awknak nun nei dingin ziangvek harsatnak a um ding?
Case study #3. Nunau mipi sinak lam ah a tladau, hlothlau mi in “Khrihfa diktak ka si thei pei maw ka thei lo, ziangah tile kei cu ka nuncan ziaza ka hlo thlau” ati.
Himi hrangah Jesuh Khrih cu a nunnak sinak laimuril siter dingin ziang abang, danglamnak nun nei dingin ziangvek harsatnak a um pei?
Nangmai thuanthu zohsal hnik aw. Ziangvek in na nitin nunah Jesuh Khrih cu na nunnak sinak ih laimuril na si ter thei ding?
BULPAK ZIRNAK ZIANGKIM KA TUAHNAK IH LAIMURIL
Zingthawh. Thaithawh. Rawl. Thianfainak. Harhdamnak. Coffee. Hnipuan thleng. Traffic. Meeting. Ca zir ding. Email. Facebook. Suncaw. Dawrkai. Inn. Zanriah. Cazoh. Zirnak. Thuthang. Zan it. Tvp.
A tlunlam ih ngan mi pawl vek le a dangdang pawl thawn na nitin nunah tuah ding hlir in a khat ih nun cu na busy zet tla asi thei. Nun can hi a loam zuahzo. Na nitin nunah Jesuh hnakin thupitter mi thildang tampi na thinlung ruahnak sungah an zuam aw rero tla asi thei.
Ziangmi thil pawl in na thinlungah Jesuh hnakin thupi sawn hmunluah dingin an zuam aw rero?
Na nitin nunah Jesuh hnakin thildang pakhatkhat maw, a thupi sawn asi ti ziangtin sim theihnak a langmi a um?
Thufim 3:5-6, 5Bawipa cu na thinlung zate in rinsan aw. Nangmah ih ruahnak le theihnak kha rinsan aw hlah. 6Na tuah mi kipah Pathian cu thei ringring awla, Amah in lamzin dik a lo hmuh ding a si.
Ziangtik can khalah Amah ruah ringring thei ringring timi cu ziangsi na hrang ah um zia?
Tikcu malte la in na nun kapli in zoh in Jesuh cu na nunah thupibik, laimuril ah ret aw. A hnuailam thusuhnak pawl sang aw, ca in ngan aw.
Milai pehtlaihnak (relationship):
Midang thawn na pehtlaihnak ah Jesuh cu na nunah a thupibik, laimuril asinak langter dingin ziang na tuah?
Ziangzawnah Jesuh cu na nun laimuril, thupibik ah na ret lonak a lang?
Sumpai thu (Finances):
Na sumpai thu Jesuh cu na nunah a thupibik, laimuril asinak lang dingin ziang na tuah?
Ziangzawn ah Jesuh cu na sumpai thu ah a thupibik, na nun laimuril siter lo in na um theu?
Tikcu/Can hmandan (Time/Schedule):
Ziangtin Jesuh cu na can hmandah ah a thupibik,nun muril na si ter?
Ziangzawn ah Jesuh cu na nunah a thupibik dinhmun na pek lo theu?
Nulepa sinak: Ziangtin nunnau mipa sinak ah Jesuh cu na nunah thupibik, laimuril na si ter?
Ziangzawn ah Jesuh cu na nunah thupibik dinhmun na ret lo?
|