DUNGTHLUNTU LAMZIN DISCIPLE YOURNEY
SESSION 12
JESUH IN A DUNGTHLUNTU PAWL A THLAH JESUS SENDS HIS DISCIPLES
JESUH IN A DUNGTHLUNTU PAWL A THLAH JESUS SENDS HIS DISCIPLES
Key: Jesuh in Thuthangtha leitlun deng tiang thlenpitu dingah in ko.
Jesuh in dungthluntu pawl hnenah Thuthangtha sim in dungthluntu va tuah dingin thu a pek. Cutin Jesuh Khrih dungthluntu dingah midang va tuah sin aw vivo in arat sal hlan lo dungthluntu hnatuan cu peh vivo dingmi asi.
Tuitum zirnak ah nangmah le na group in Jesuh in dungthluntu pawl hnenah thupek ropi a pekmi (Matthai 28:16-20) thu zir asi ding. Jesuh thupek ropi simsin vivo thei dingin na tim tuah aw. Jesuh thu pek cu feh ding, Thuthangtha sim ding, dungthluntu tuah ding, baptisma pek ding, zirh ding asi. Cutin Jesuh thu leitlun mi hmuahhmuah hnen tiang thlenter ding, Jesuh hmin thanter ding asi.
Thuthangtha sim dingin thuneihnak kan neihmi pawl sim thiam dingin na timtuah aw. Matthai 28:16-20, le Tirhthlah 1:7-8, pawl zoh in Jerusalem, Juadea, Samaria, le leitlun deng tiang tiah a simmi pawl ziang asi ti fiang dingin nangmah le na group sungah rak zir uh. Himi Bible bungcang pawl fiang zet dingin rak siar nawn leuhleuh aw.
ZOHSALNAK Ahmaisa ah kan zohzo mi cu Jesuh in leitlun mission hnatuan kan tuannak ding hrangah a tulmi ziangkim in pek zo asi. Kanmai huham cahnak, hmanrua parah kan hngat awk a tul lo. Tui zarh zirnak kan thok hlanah a hnuailam thusuhnak ruat tlangin na sannak pawl rak ngan khum aw la na group ah relkhawm dingin timtuah cia aw.
Tuzarh sung zir ding siar ding pawl lakah ziangtiang na rak tuah ziang na bang?
Bible siar ding mi na siarmi lak ihsin ziangmi na zir ngah?
Thu sut duh mi na nei maw? THLACAM Zirnak kan peh sunzawm hlanah thlacam aw. · Pathian hnenah a thutak a lo theihter, a lo zirhmi parah lungawithu sim aw. · Pathian hnenah raltha zetin na zirmi pawl nunpi ngam dingin abik takin a tui tum ih zirnak hi a takin nangmai nun rori nunpi dingin thlacam in dil aw · Tuitum ah thinlung takin Jesuh dungthluntu pakhat ih nun cu ziangvek asi timi nangmai nun rori ah lang dingin thinlung tumruh zetin pumpek awk tumtahnak thawn zir dingin thlacam aw.
THUHMUAIHRUAI
Jesuh dungthluntu na sinak vekin na nunah ziangvek thleng awknak danglam bik na nunah na tawntehmi asi?
Jesuh Khrih in na nun a lo thleng sinsin vekin Jesuh Khrih ih lungtur vekin na lung a tur tikah Amai hmin sunlawinak hrang lawngah na nitin nun na hmang dingih Jesuh in leitlun ah rundamnak Thuthangtha thlenter a duh vekin na thinlung sungah mihlo rundam duhnak in a lo luahkhat ding asi.
BIBLE THUANTHU Jesuh dungthluntu pawl nunah Jesuh leitlun a um lai ah kaisoh can tumsuk can nei in anhai in an um can a rak um. Jesuh an theih pek ah an lung a awi zet, Jesuh kross parah khenbet asi tikah an mang a bang an anhai, Jesuh a thohsal tikah an lung a awi tuk, Jesuh in vanram ah a fehsan sal tikah an ninghang um ngaihnak thei loin an rak um dah. Asinan thu cahta lo in a tlansan lo, an hnenah a nunnak cawpcilh in an tuansuah tulmi thupek a dungthluntu pawl a ko khawm ih a cahta hai asi.
Matthai 28:16-20, 16Dungthluntu hleikhat pawl cu Jesuh ih a fial bangtuk in Galilee tlang parah an feh. 17Amah cu an hmu ih an biak, a sinain a hrek cun an zum lo. 18Jesuh cun a pan hai ih an hnenah, “Lei le vanih thuneihnak hmuahhmuah cu ka hnenah pek a si zo. 19Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. 20Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti.
Himi Bible bungcang na siar tikah na thinlung in ziang na ruat hmaisa bik ih ziangruangah?
Jesuh thupek hi dungthluntu pawl hnenah thu a pek thok ihsin ziangtin dungthluntu pawl in sankhat hnu sankhat an rak tuan ih a tak in an rak canter?
Jesuh thupek hi ziangzon ah a fam kim hrih lo?
Jesuh thupek ropi cu leitlun ah milai taksa in a um lai ihsin a dungthluntu hmuahhmuah-nangmah tel in an tuah ringring mi le an tuah rero lai dingmi asi. Jesuh thupek ropi hi fiang le thuk deuh in kan zoh ding. BIBLE THUANTHU LAILANG JESUH IN KHUITAWK AH FEH DING TI IN SIM A hmaisa bik ah Jesuh thupek kan zoh tikah a thuneihnak kan zoh hmaisa ding. “Lei le van ih thuneihnak hmuahhmuah cu Jesuh hnenah pek asi” timi zianghrangah a thupi tuk? Thupek timi cu thuneihtu lawngin pek theih asi. Jesuh in thupek dawtdawt, a dungthluntu pawlin duhhril theih si loin tuahlotheihlo in thupek dawtdawt dungthluntu hnenah a pek asi. Curuangah a thupekmi pawl thu pek thei dingin le tuansuahnak hrang khalah thuneihnak a nei asi ti simfiang hmaisa dingin a thuneihnak thu pawl a sim hmaisa asi. Na nunah Jesuh a lal, a lo uk, na nunah thuneitu asi timi in na nitin nunah ziangsan a nei?
Jesuh thupek ropi kan zoh asile ram huap mi a nei ih tuah ding thupek asi. “Leitlun deng tiang” tiah leitlun pumpi a huap. Cuihlei ah leitlun miphun hmuahhmuah an sinak thu pawl tohmun in simmen ding si loin “feh uh” tiah thupek asi. Thil a cang mi parah rak cangvai men ding silo in mah in tuah hmaisak ding thupek asi. Cutin sim ruangah khrihfa zapi ten hnatuan bang tahratin fehsuak theh ding tinak asilo ih khrihfa zapi ten leitlun dengtiang fehsuak in Thuthangtha simnak hrangah cangvaihnak ah tel theh ding a tul tinak asi. Curualrual in zumtu zokhal mah rori fehsuak in Thuthangtha sim ding khal Pathian in tul a ti asi ahcun man cia ringring in Jesuh thupek thlun dingmi kan si.
Mission hnatuannak ah na telnak hmuhtawnmi ziangvek asi?
Jesuh thupek ah kan zoh asile “miphun hmuahhmuah” tiah a sim. Jesuh thihnak cu leitlun miphun hmuahhmuah hrangah asi tinak asi. Curuangah Jesuh thisen in a tlennak a rundamnak thuthangtha cu a rundammi miphun hmuahhmuah hnenah simsuak dingin dungthluntu zumtu zapi hnenah thupek, tuanvo peknak asi. Curuangah local kawhhran ciar in mai local kawhhran lenglam ah leitlun miphun, Khrih rundamnak Thuthangtha theih hrih lo tu pawl hrangah Jesuh mission rawngbawlnak ah tel ve lo tu local kawhhran cu Jesuh thupek thlun lo tinak a si.
Leitlun miphun hmuahhmuah hnenah Thuthangtha sim ding Jesuh thupek ropi thlun in ziangtin mission ah na tel ve thei ding?
JESUH IN ZIANG TUAH TULMI IN SIM Jesuh in a rawngbawlnak ah tel dingin in sim lawng si loin ziangtin kan tuah ding timi fiang ten in sim asi. Mathai 28:19-20, Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti. Jesuh thupek dawtdawt zoh tikah ziang kan tuah tul timi a fiang. Dungthluntu tuah ding ah in fial. Kan mission hantuan rah suah dingmi cu Jesuh dungthluntu tuah ding asi. Baptisma cu dungthluntu an si hnu ah tuah dingmi asi. Baptisma laknak cu mipi hmaiah Jesuh dungthlunti sinak phuan suahnak asi.
Zumlo tu hnenah baptisma thu ziangtin na sim fiang ding?
A poi zetmi cu mi tampi in mi pakhat cu a piangthar ih baptisma a lak hnu ahcun a famkim theh tiah an ruat sual pang theu. Piangtharnak le baptisma laknak cu a hram thoknak asi ih Jesuh dungthluntu tha si thei dingin an hram thok sawn asi. Cutin Jesuh dungthluntu si in Jesuh ih zirhnak hmuahhmuah zirh tulmi an si. Jesuh thupek rori sungah a tel mi cu dungthluntu pawl hnenah a zirhmi hmuahhmuah an thlun dignah zirh ding asi. Cucu a thupek asi.
Cutin dungtluntu an nitin leitlun nunah Jesuh zirhnak vekin an nung, a thu an thlun ih thupek ropi nunpitu an si theinak dingah pitling tiang zirh tulmi zirh dingmi an si. Zirhnak ah a thabik cu anmai zohthim dingin Jesuh thupek thlun in nun asi.
Na nunah Khrih nun langtertu zohthim ding zo na nei?
Jesuh dungthluntu midang va tuah vivo dingin siseh nangmah nunah Khrih palai, khrih ih hmuihmel langtertu si dingin ziangtluk nangmah le nangmah na rinsan aw aw?
TUAH IN TELVE “Miphun hmuahhmuah dungthluntu si ter ding” timi Jesuh thupek thu sim tikah mi tampi in feh tahratin Thuthangtha sim ding lawng an ruat theu. Cumicu tuah ding hrimhrim mi asi. Fulltime in rawngbawl ding, part time, can rei lo te sung, a zarh tel, thla tel, kumtel ti in a phunphun in zumlotu hnenah Thuthangtha sim in dungthluntu siter ding cu zumtu zapi tuanvo asi. Cumi lawng asi theh lo, fehsuak lo tu pawl khal Jesuh thupek ropi tuansuahnak ah tel theh ding kan si, local church ihsin Jesuh mission hnatuan nak ah tel theh ding kan si.
A thupi zet pakhat cu thlacamnak in tel asi. Thlacamnak in satan ral donak ah tel ve asi. Ram pakhatkhat, miphun pakhatkhat hrangah hmuitin nei in thlacam aw. A hnuailam pawl vekin thlacamnak ah na tel thei ve asi. Ram pakhatkhat na hril hnu ah cumi ram sungih Khrihfa pawl hrangah thlacam aw. Khrihfa pawl rawngbawlnak hrangah an rawngbawlnak an himnak hrang thlacam sak aw.
Jesuh dungthluntu pawl siatsuah harsatnak petu ram uktu pawl siseh mipi lak ihsin siseh thiltha lo a thleng thei mi lak ihsin humhimnak hrang thlacam sak aw.
Thuthangtha simsuak theinak ding cantha sangka on awknak hrangah thlacam aw.
THLACAM DIL DUHMI: …. ZARHKA HT SUNG TUAH DINGMI Pathian biaknak in can hmang aw. · Bible siar ding pawl siar awla Thiang Thlarau in a lo zirh tharmi pawl ca ah ngan khum aw. Nunpi aw · A tu zarh sungah piantharnak a nei hrih lo tu pawl thawn can hmang tlang dingin timtuah aw. Na can hmandan kel thleng in Jesuh mission ah tel dingin piangthar hrih lo thawn na can pe awla cumi thawn thlarau lam thu relpi in na can hmang aw. · Jesuh dungthluntu canter dingin disciple na tuah dingmi minung pawl hmin list tuah awla an hrang thlacam aw. Na thinlung sungah a lang mi, na unau sungkhat lakah, hnatuanpi, tlawngkaipi, rualpi lakah zozo an si khal le an hmin list tuah awla an hrang thlacam aw. · Cumi hmin list lak ihsin zozo disciple (dungthluntu) ah na tuah thei bik ding timi hmin la hran aw la an hmin sal in thlacam sak aw. · Zohlo in ngah Tirhthlah 1:8, 8Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding,” tiah a ti.
BIBLE SIAR DING PAWL SIAR IN NA ZIRNGAHMI A HNUAI LAM AH NGAN KHUM AW
1. Mark 16:1-20
2. Luke 10:1-16
3. Luke 24:36-53
4. John 20:1-31
5. Romans 10:1-21
6. Romans 16:1-27
7. 2 Korin 10:1-18
TLAKSIAT TIHNAK Tlaksiat le hlawhsam kan tihphannak ruangah Jesuh dungthlun si dingah a thu pek an thlun thei lo theu asi. · At thlak, mi aa tiah mi in in ti ding kan phang theu · Thusutnak pawl theih lo kan hmang · Hnon mi si kan phang, mi ih co hlan lo kan phang theu · Kan mai sual palhnak, tlamtlin lonak mi in sawh ding kan phang theu, tvp a tam tuk Kan sinak taktak khal asi: kan tlu ding, kan bah ding, mi in in hnong ding, in nautat ding, in hmuhsuam ding, in hua ding, thusuhnak hmuah hmuah kan sang thei lo ding. Cui lai can ah Jesuh kan bang sinsin a rak si sawn. Asinan theih ringring dingmi cu Jesuh thupek kan thlun dingah kan sung dah lo asi. Hnonmi, nautatmi kan si lai ah Jesuh kan bang sinsin sawn asi. Cuhnakin kan fehlo, kan sim lo, kan neihmi Jesuh thu midang kan simsin lo tikah kan hlawhsam cia, kan sungcia asi sawn. A rah suahmi cu kan kut sungah a um lo; kanmah in kan tuah tulmi cu Jesuh thupek thlun in tuah ding lawng asi. A rah suah cu amai kutsungah a ummi asi.
Jesuh Thuthangtha midang hnenah simsin dingah ziang na tih, na phang, ziangin a lo dawnkham theu?
Tihphannak in ziangtivek canah Jesuh thupek ropi tuansuak thei lo dingin a lo kham?
Na tihphannak maw, a lo khamtu pawl pahtlang thei dingin ziang na tuah ding?
BULPAK ZIRNAK JESUH IH KHUITAWK FEH DING TI IN SIM Jesuh in a leitlun mission hnatuan tumpi ah tel ve dingin in ko: leitlun pumpi minung rundamnak hnatuan ah tel ve dingin in ko asi. Cutin hnatuan in kawh theinak thuneihnak a nei ti kan thei.
“Jesuh cun a pan hai ih an hnenah, “Lei le vanih thuneihnak hmuahhmuah cu ka hnenah pek a si zo,” (Mathai 28:18).
Thuneihnak nei timi cu midang hnatuan fial theinak a nei tinak asi. Curuangah Jesuh in leitlun pumhuap in hnatuan fial theinak thuneihnak a nei asi. Hnatuan in fial thei lawng si loin a thuneihnak hmangin leitlun hmuntin kip ah feh in a hnatuan tuantu ding kan si. Culawng hman silo, lei le van sangka tawh (key) keng in a hnatuan fialmi tuah tu ding kan si.
Cutin kan sim tikah kanmah parah phurrit pawl a zang theh asi. Kanmai huham cahnak fimnak thiamnak thilti theinak thuneihnak parah a thum aw mi hnatuan asilo. Milai thinlung thleng tu, milai mizia thleng tu, milai thlarau hringtu, milai nun thlengtu, milai duhnak thlengtu, milai nun sersiamthar saltu Amah Jesuh asi. Cutin kan sungah hna a tuan duh ruangah “FEH UH” tiah in fial mi asi. Dungthluntu tuah dingin na ke kar suak tikah Jesuh thuneihnak parah na hgat aw maw, nangmai parah na hngat aw sawn? A hnuiah khuimi na nai bik check aw!
1 2 3 4 5 6 7 8 9 10
Nanmah parah Jesuh parah
Jesuh thuneihnak parah zaahza hngat aw thei dingin ziang na tuah a tul?
A tu cu Jesuh ih “FEH UH” tiah thu in pek nak thuhram pi ziang asi ti kan fiang zo. A thupek kan thlun ding a tang hrih asi. Mathai bung 28 sungah feh uhla leitlun miphun hmuahhmuah a dungthluntu va si ter ding thu in pek. Vancungramah a feh hlan te ah a thupek mi asi.
Tirhthlah 1:7-8, 7Jesuh in an hnenah, “A cuih tikcu le nithla cu ka Pa ih thuneihnak ih khiah-mi a si ih nannih theih ṭulmi a si lo. 8Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding,” tiah a ti.
“Jerusalem,” “Judea”, “Samaria”, “leitlun deng tiang” Jesuh theihpitu, rundamnak Thuthangtha sim suak dingin ziangtivek in Thiang Thlarau bawmnak na tul? Jesuh simmi cu sunglam ihsin pawnlam a khihhmuh. A nainak bik ihsin a hlatnak lam a khihhmuh. Jerusalem cu Jesuh ih thu a simnak hmun thawn a nai nak bik asi. Judea cu Jesuh thu asimnak ramkhulh hmin asi. Samaria cu Judea ramthen leng lam asi. Miphun zawng in siseh ramthen zawngin siseh a bang aw lo mi asi. Atlunih simmi ram le hmun pawl ah na um kherkher lo ding. Asinan Jesuh simmi na hrang asive. Jeruslam cu nangmah thawn a nai awknak bik asi; nangmah thawn a naihniam aw bik minung pawl an si: na insang, hrinpi, cipi, unau sungkhat, innhnen, natuanpi, tlawngkaipi, khawpi, rualpi pawl an si. Juadea cu a kau sinsin in na khawtlangpi, miphunpi, state khat sung ummi, peng le tlangkulh sung minung, ramsung minung pawl tiah sim theih asi. Samaria cu nangmai kiangkap nai an sinan nangmah thawn miphun bang aw lo mi pawl kha asim duhnak asi. Netabik ah Jesuh in leitlun deng tiang fehsuak dingin thu in pek asi. Jesuh dungthluntu hmuahhmuah in leitlun pumhuap in khua ruat in mission tuanvo kan nei asi. Leiltun pumhuap miphun hmuahhmuah Jesuh dungthluntu siter ding tuanvo kan nei asi. A tlunah sim vekin zovek minung pawl Jesuh dungthlunntu siter in na rian thei ding? Zopawl an si ngan khum aw.
Na “Jerusalem”
Na “Judea”
Na “Samaria”
Na “leitun deng tiang”
JESUH IN ZIANG TUAH DING TI IN SIM
Leitlun miphun hmuahhmuah dungthluntu siter dingin mission hnatuannak ah kan tel theidan ding Jesuh in in sim. Mathai 28:19-20, 19Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. 20Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti. Hnatuandan dawt 4 a um: 1. FEH: Leitlun ah feh in tuahnak le tongkam in thlaici tuh ding kan si 2. DUNGTHLUNTU SITER: Thlaici kan tuhmi hmang in Thiang Thlarau in milai nun a thleng tikah sual sirnak thawn Pathian kawhnak aw co hlang dingin kan bawm ih Krih dungthlun kan si ter vivo. 3. BAPTISMA: Mipi hmaiah Jesuh an zumnak phuansuahnak baptisma laknak in Jesuh ruangpum kawhhran pehzomnak neither vivo asi. 4. JESUH THUPEK THLUN DINGIN ZIRH: Dungthluntu thar pawl thawn fehtlang tuantlang in Pathian thu kan zirh ih Pathian thu an thlun in an nunpi theinak ding kan bawm, cutin anmah khal midang Jesuh dungthluntu va siter ding tiang nun pitling an neih theinak ding kan bawm. Kawhhran member pawlin step 3 nak kan theh tikah kan tuanvo a cem ah kan ruat theu. Asilo. Kan fiangnak ding ahcun thiamcoter kan sinak, rundamnak kan co mi cu a hram thoknak, a thupi tukmi, a lotheihlo in a tulmi, Jesuh Khrih ah nunthar, thihnak ihsin nunnak hram thawhnak asi. Cuvek thiamthiam in baptism cu mipi hmaiah sunglam nun thleng awknak langhngan in langtermi asi. Asinan cuvial lawng si loin kan hnatuan cu a pehzawm vivo ding mi asi. Dungthluntu ah tuah tahratin midang Jesuh dungthluntu ah an va tuah ve thei nak dingah nun pitling an neih theinak ding hrangah zirh vivo dingin thupek mi kan si. A hnuailam vekin dungthluntu lamzin tluan Jesuh thupek na thlunnak ah ruat in tuah aw. Cutin nangmah in na tuah lawng si lo, dungthluntu ah na tuah mi in an nunpi vivo dingin zirhsin ding na si.
A hnuailam step 4 ah Jesuh dungthluntu midang pawl in jesuh dung an thlun nak ihsin ziang na hlawkpi?
AN FEH SUAKNAK:
JESUH DUNGTHLUNTU AN TUAH NAK:
BAPTISMA AN PEK NAK:
AN ZIRHSINNAK:
Nangmah in teh, jesuh thupek taunsuak dingin, Jesuh thupek step 4, midang Jesuh dungthluntu siter dingin ziangtin na tuan, na tel ve?
1. FEH SUAKNAK:
2. JESUH DUNGTHLUNTU MI VA SITER:
3. BAPTISMA PEK:
4. JESUH ZIRHMI ZIRHSINNAK:
JESUH THUPEK: “Lei le vanih thuneihnak hmuahhmuah cu ka hnenah pek a si zo. Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” (Mathai 28:18-20). |