DUNGTHLUNTU LAMZIN DISCIPLE YOURNEY
SESSION 11
JESUH IN A DUNGTHLUNTU PAWL A THUAM JESUS EQUIPS HIS DISCIPLES
JESUH IN A DUNGTHLUNTU PAWL A THUAM JESUS EQUIPS HIS DISCIPLES
Key: Jesuh in leitlunah amai mission hna kan tuan theinak hrangah kan tulmi in pek theh asi.
Jesuh in a rundammi zumtu pawl cu rundammi kan sinak tiang in tuahsak lawng si loin a rawng kan bawlnak hrang kan tulmi ziangkim in pek asi ti theihnak in thazangthar ruahsannak thar in pek ringring asi. Tuitum zirnak ah Jesuh in a dungthluntu pawl a thlahnak thu (Mathai 10:1,5-10) ihsin Bible in in zirhmi pawl kan zir ding. Jesuh in milai parah hngat aw lo in ziangkim amai hmin in amai huham cahnak ringih a hna kan tuansuak ding hi a duhmi le tumtahmi hnatuan dan asi. ZOHSALNAK A hmaisa ah Jesuh hnen ihsin zir duhnak lungput thawn tangdornak in kan zir ding thu kan zir ngah zo. Asinan Pathian thutak zir le theih timi cu nunpi nak tel loin a famkim dah lo. Pathian thutak theih le zir nak ihsin nun thleng awknak a rah suakih thulunnak nun a hringsuak ringring asi. Thu kan lung sinsin asile nunrah tam sinsin kan rah theinak lamzin um sun asi. Bible siar ding le tuah dingmi pawl na rak tuah maw? Ziang na bang?
Bible na siarmi sung ihsin ziangmi na zir ngah?
Thusut duhmi na nei maw? THLACAM Zirnak thlacam in thok uhsi. · A tuzarh sung Pathian in a lo zirh, a lo hruainak parah lungawithu sim aw. · Leitlun Jesuh mission hnatuannak ah tel ve dingin, a tulmi thawn Pathian ih thuammi si dingin dil aw. Ziangmi zawn ah thansoh na tul ih ziangvek hnatuan suah na duh timi pawl lailan zetin Pathian hnenah sim aw. · Pathian hnenah a thu theihlawng si loin raltha zet ih a thu ngai in nunpi thei dingin Pathian hnenah thlacam aw
THU HMAIHRUAI Hnatuan pakhatkhat zoh tikah hantuantu in a hmanrua pawl thiam nal zetih a hmang thiam leh thiamlo awlten theihtheih asi. Hnatuan thupi pakhatkhat tuan suak dingin atulmi hmanrua pawl thawn thuam thazetin na theih awk can a um maw?
Jesuh ih hnatuan thupi zet a lo fial tikah a tulmi hmanrua pawl lo pe loin a lo fial dah pei maw? Lungawi umza asimi cu, cutin in fial dah lo asi. Tuitum zirnakah Jesuh in a dungthluntu pawl ziangtin a thuam, ziangvek hmanrua pawl a pek cia theh timi kan zoh ding. Himi zirnak hi dungthluntu nun hrangah a thupi zetmi asi.
Leitlun ah Jesuh ih mission hnatuannak ih na telve nak ah ziangvek in thuam na duh ih ziang hmanrua pawl na tul?
BIBLE THUANTHU Mathai bung 10 hlan cu dungthluntu pawl kha Jesuh hnenah an um, an ei an in an zir, an tlangleng. Asinan bung 10 hnu lamah Jesuh in a kopkop in a thlah hai. Mathai 10:1, 5-10, 1Jesuh in a dungthluntu hleihnih kha hmun khatah a ko ih thlarau ṭha lo dawihlo theinak le natnak le dam lonak a phunphun damter theinak huham a pek….. 5Hi hleihnih pawl cu Jesuh in a thlah ih ṭhatein thu a cah hai. “Zentail ram ah va feh hlah uhla Samaria khawsung ah va lut hlah uh. 6Cuhnakin a hlomi tuu run Israel mi pawl hnenah nan feh pei. 7Feh uh la, ‘Vancung Uknak a nai zo,’ tiah va sim uh. 8Mina damter uh, mithi thoter sal uh, phaarnat a neimi pawl damter uhla khuavang pawl dawihlo uh. Man loin nan ngahmi kha man loin va pe uh. 9Nan kordip ah sui tangka siseh, ngun tangka le dar tangka siseh, pai hlah uh. 10Nan khualtlawnnak lamzin hrangah rawl dilnak ah cawdip siseh, angki hlei siseh, kedam le kianghrol siseh, keng hlah uh. Hnaṭuantu pa cu a sammi hmuahhmuah pek thluh a si ding.
Jesuh in atlunlam thupek vekin thu lo pe, tuanvo lo pe sehla ziangtin na ruat ding?
A tlunlam thupek sung ihsin khuimi bik a harsa bik ding tiah na ruat, ziangruangah?
THUANTHU LAILANG Jesuh dungthlun dingin kan timtuah tikah Jesuh in kan tulmi ziangkim thawn in thuam theh asi. Pathian, leitlun, le milai thuanthu ziangtin a her timi theihfiang theinak ding hrangah Bible kan nei. Pathian fale pawl pawlkomnak kawhhran sungah mibur pawlkom kan nei. A hnatuan in fial mi tuansuak thei nak ding hrangah hmanrua tha, thlarau laksawng phunphun in pek.
Jesuh ih hnatuan fialmi tuansuak thei dingin thlarau laksawng na co mi pawlin ziangtin a lo bawm?
A hnuailam thupek hi Jesuh hnen ihsin ngah ding na duh maw?
Mathai 10:8, Mina damter uh, mithi thoter sal uh, phaarnat a neimi pawl damter uhla khuavang pawl dawihlo uh. Man loin nan ngahmi kha man loin va pe uh. A tlunih Jesuh thupek mi pawl tuah thei dingah na ruat aw lo asile na dik asi. Nangmah in na tuah thei lo mi pawl cekci Jesuh in nangmai nunnak hmangin tuah a duh asi. Mathai 10:1, Jesuh in a dungthluntu hleihnih kha hmun khatah a ko ih thlarau ṭha lo dawihlo theinak le natnak le dam lonak a phunphun damter theinak huham a pek.
Tuisan Jesuh dungthluntu pawl kha Jesuh in leitlun pum huap in mangbangza hnatuan tuansuak dingin tuanvo in pek asi. Kan neihmi hmanrua tha bik cu amah Jesuh thawn bulpak pehtlaihnak kan neih ih amai thawn hnatuan tlang ding asi. Jesuh thawn nan pehzawmnak ruangah ziangtikah raltha zetin nangmah te na tuah suak thei lomi hna na tuansuak can a um dah maw?
Jesuh in a dungthluntu pawl cu amai huham cahnak le thuneihnak in hantuan a fial hai ih an tulmi hmanrua pawl thawn a thuam hai asi. Cuvek thiamthiam in tuini ah Jesuh dungthluntu pawl cu Jesuh in leitlun mission hnatuan tuansuak tu dingah tuanvo pek mi kan si.
JESUH IN KAN TULLO MI PAWL A SIMFIANG Jesuh in a dungthluntu pawl hnenah an tulmi hmanrua pawl a pek mi a thuam hai lawng asilo an tul lo mi pawl tla fiangzet in a theihter hai asi. Mathai 10:9-10, 9Nan kordip ah sui tangka siseh, ngun tangka le dar tangka siseh, pai hlah uh. 10Nan khualtlawnnak lamzin hrangah rawl dilnak ah cawdip siseh, angki hlei siseh, kedam le kianghrol siseh, keng hlah uh. Hnaṭuantu pa cu a sammi hmuahhmuah pek thluh a si ding.
Asile tuisun ah kan neihmi tangkabawm, thilri pawl kan hlawn theh ding tinak maw si? Si ciah lo. Jesuh in leitlunah an hngat awknak, an rinsanmi pawl parah hngat aw lo dingin a zirh hainak asi. Cutin zaahza Jesuh parah an hngat awk ih an zir ding a duh, a zirhmi asi.
Na nunnak na zohsal tikah zumnak in ke na kar can ziangvek a um dah? Ziang a cang?
Tuisan Jesuh dungthluntu pawl khalin Jesuh dung kan thlun tikah kaimai ruahban lo, leitlun mithmuh thieh thil kan hngat awknak lenglam ah zumnak in ke kan kar a tul asi ti kan fiang awk a tul. Zumnak leitlun khualtlawnnak ah nangmai tuahthei mi, nunphungdan kel ten nung in tuah thei mi fangfang asile kekar hlat na tul ih na umnuam zetin dinhmun lenglam ah na ke na kar a tul asi.
Jesuh dungthluntu na sinak vekin na tumtah mi ziang asi?
Na tumtahmi hlawhtling dingin ziangtin Jesuh parah na hngat aw?
TUAHVE TEL VE Tumtahmi plan neih hi thil thupi zet asi. Jesuh leitlun mission rawngbawlnak hrangah tikcu pek in timtuahnak neih khal a tul hrimhrim mi asi. Leitlun nitin nun hrangah tumtahnak le Jesuh leitlun mission hnatuannak hrang tumtahnak plan neih cu a bang aw lo zet asi. Jesuh leitlun mission hrang tumtahnak plan neihmi cu milai thazang, ruahnak, le fimnak in a tlin lo mi, Jesuh amah rori tel in amai huham cahnak le fimnak lawngin tuahsuah theih mi asi dingmi asi. Nangmah le na group sungah ciamciam ten to khawmin Jesuh leitlun mission rawngbawlnak hrangah tel in tumtahnak plan tuah tlangih Jesuh parah hngat aw dingin plan tuah tlang uh.
Jesuh dungthluntu pakhat si in ziangtin na thangso duh?
Jesuh dungthluntu pakhat na sivek in Jeduh leitlun mission hrangah ziang tuansuahmi neih na duh?
THLACAM DUHMI
….. ZARHKHAT SUNG TUAH DING Pathian bia · Thlacamnak in Pathian thawn cat bang loin pehtlaih in amah thangthat aw Bulpak Bible zirnak · Bulpak Bible siar le zir dingmi pawl bulpak in Bible siar in thusuhnak pawl sang in ngan khum aw Nunpi ding · Lamzin feh phah in na umnak veng sungah thlacam in feh awla, Pathian hnenah na umnak, na duhsakmi minung pawl ziangvek si hai sehla na duhsak timi Pathian hnenah sim aw · Na insungsang minung pawl thawn to ciamciam in lailan ten sut hai aw, a tu hnakin jesuh hrangah na hman awk dingmi na sup awkmi, dunglam ah a lo kai awktu ziang a um timi pawl sut aw, thinlung sangka ong in sut aw la lo sim hai seh. Zohlo in ngah; Mathai 10:27-28, 27Khawthim lakih ka lo simmi hi sun khawvang ah sim sal uhla a thup ih nan theihmi hi innpar ihsin phuang uh. 28Taksapum a that thei nain thlarau a that thei lotu pawl cu va ṭih hlah uh. Takpum le thlarau a pahnih in hell sungih a that theitu Pathian kha va ṭih sawn uh. · Na thlacammi pawl cabu sungah ngan khum awla, Pathian in na thlacam a lo sannak pawl ngan khum aw. Hitin thlacam mi cabu sungah ngan hi Pathian in in sannak pawl hminsinnak tha zet asi.
NITIN BIBLE SIAR IN THLARAU IN A LO ZIRHTHARMI PAWL NGAN KHUM AW
1. Seemtirnak 22:1-18;
2. Seemtirnak 5;1-21;
3. Suahhlannak 6:28-7:13;
4. Joshua 2:1-24;
5. I Samuel 17:1-37;
6. John 4:1-26;
7. Philipians 2:1-18
NA TULMI HNAKIH TAM
Jesuh dung na thlun asi ahcun famkim lo zetin na thei aw dingih, na tuanvo tuansuak thei dingin tlaklo tlinglo zetin na thei awk can a um ding. Atu ah cuti cekci in na thei aw tla asi thei. Cutin na ruat maw ruat lo maw, nangmai felnak tlinnak in Jesuh dungthlun dingin na tlak lo hulhual asi. Na zirnak theihnak in a tlin lo. Nangmai ruahnak le ti theinak in hna tuansuah na tum asile na tlinlo zia na thei aw ding. Jesuh ziangkim thei ziangkim ti thei thianghlim famkim Bawi Jesuh ih dungthluntu palai si dingin na tling lo na tlak lo na thianghlim tawk lo zia na thei aw ding.
Nangmah lawng na silo, Khristian zapi ten Jesuh Khrih ih dungthlun tlak lo lawnglawng an sit theh. Cucu thusia vek a bang. Thuthangtha cu ziang asi tile Jesuh ih dungthluntu na si vekin amai cahnak thilti theinak fimnak ringring a nungmi na si ruangah na tlinlonak tlaklonak, thianhlim lonak pawl cu zoh asinawn lo ih amai huham cahnak thianhlimnak ringin nitin na nun ruangah tuanvo ziangkim na neihmi siseh na dinhmun siseh amah ah a hngetmi a famkimmi na si zo.
Amah na tulmi ziangkim asi.
Ziangzawn ah Jesuh dungthluntu famkim lo,tlamtling lo tiah na thei aw aw?
Ziangvek dinhmun le tikcu can ah Jesuh dungthluntu sinak in raltha zetin na nung in na cangvai dah?
Tuzarh sungah Jesuh huham cahnak ringin ziangvek dinhmunah ziang na tuah in na nung ding?
BULPAK ZIRNAK KAN TULMI JESUH IN IN PEK Jesuh cu kan ziangkim kan hrampi ah hmangin ke kan kar tikah kan tulmi ziangkim in pek theu asi. Ephesians 6:10-17, 10A netnak ah, Bawipa thawn nan pehzom awknak le amah ih cahnak ruangah nan thazaang cu cakter sin uh. 11Satan bumsiatnak do thei dingah Pathian ih a lo pekmi ralthuam kha hruk uh. 12Ziangah tile kan domi pawl cu milai an si lo, vanih a ummi thlarau sia cahnak pawl, uktu pawl, thuneitu pawl, le hi a thimmi leikhawvel pumpi uktu pawl an si. 13Curuangah atu ihsin Pathian ralthuam kha hruk uhla caansia a thlen tikah nan ral pawl cu nan do thei ding ih a net tiang nan do hnuah nan ṭanhmun cu nan hum ngah ding. 14Curuangah khoh zetin ding cia uh: taaikhap ai-ah thutak kha nan taai ah khap uh; ṭaangphaw ai-ah dingnak kha nan ṭaangah song uh; 15kedam ai-ah daihnak Thuthang ṭha phuan hiarnak kha hruk uh. 16Catbaang loin thirphaw ai-ah zumnak kha keng ringring uh; ziangah tile Satan in meiling bangtuk a si mi thal in a lo kah tikah cuih phaw cun nan mit thei ding. 17Cule lukhum ai-ah rundamnak kha lak uhla Thlarau ih a lo pekmi ralnam ai-ah Pathian ṭongkam kha keng uh. Cang 12 nakah Paul “kan do mi” atimi hi ziang asi tiah na ruat?
“Ralthuam” cang 14-17 sungah a simmi pawl hmangin ziangvek hlawknak na nei in na nunpi?
Ziangmi ralthuam hmangin na nitin nun thlarau rodalnak ah na thuam awk sinsin na tul?
Pathian thu lungin, thlacam in, Pathian thawn pawlkomnak nun na nunpi asi ahcun cak zetin thlarau ralthuam thawn lo thuam dingin Jesuh in in kam cia mi asi.
Mathai bung 10 ah Jesuh in dungthluntu pawl a thlah hai ih an ra kirsal tikah amah thawn an pehtlaih awknak cak sinsin dingin a phunphun in a thuam hai asi. Mark 6:30-31, 30A thlahmi pawl cu an ra tlung ih Jesuh cu an tong ih an tuahmi hmuahhmuah le an zirhmi hmuahhmuah an sim. 31A hnenih a rami le a kirmi, mi sukso pawl cu an tamtuk ruangah Jesuh le a dungthluntu pawl cu rawl einak caan hman an nei lo. Cu hrangah an hnenah, “Kan feh pei ih kanmah lawng hlimphirte ih kan um theinak hmunah va um uh si; cule malte tal nan cawl thiam ding,” tiah a ti.
Jesuh in leitlun a mission hnatuannak ah kan tel vekin kan tulmi ziangkim thawn in thuam ringring asi. Asinan amah thawn pawlkomnak nun nei in amah thawn kan pehzawm awk ringring tik lawngah in thuammi ralthuam kan hmang thei asi.
A tunai na nunah Jesuh thawn bulpak in neihniam zet le thuk zetin ziangtin pehtlaihnak na nei?
Tuzarh sungah ziangtin ziangvek canah Jesuh thawn bulpak pehtlaihnak nun na nei ding?
Jesuh leitlun mission hnatuannak cu kanmah bulpak thuneihnak in kan tuah thei lo ti theih hngilh lo a tha. Asinan ziangkim thuneihnak neitu Jesuh in thuneihnak in pek zo asi (Mat. 10:1). Kannih cu kan cak lo asinan amah cu cakkim asi. Tongkam ah kan famkim lo, anih cu a famkimmi asi. Na hnatuan cu nangmai bulta asilo, na thuneihnak cu nangmai thuneihnak asilo. Kawh na sinak cu Pathian thulung ding lawng asi. Pahtian a thu ngai dingin a tu ah ziangtin a lo ko? (Tikcu la in a mai aw ngai aw).
JESUH IN KAN TULLO MI A FIANGTER Leitlun nunah voi tampi cu Pathian thu lun hnakin thusuh milai in an hmang theu. Tirhsiang zetin pek awknak hnakin phunzai an hmang theu. Zangfahnak le ruahsannak thu sim hnakin simsiatnak sim an hmang theu. Milai thinlung cun Jesuh leitlun mission ah tel ve thei lo dingin puhmawh ding a thei ringring theu. · Hnatuan ka hloh pang ding · Bible thu ka thei tawk lo · Thlarau laksawng ka nei lo · Thaisun lamah ka zuam leh ding tivek in Pathian rawngbawlnak ah tel lo dingin puhmawh ding an nei rignring theu asi. Pathian in tuahter a lo duhmi tuah lo dingin ziangvek puhmawh ding na nei ve? Jesuh dungthluntu pawl khalin cutin an rak si ve dah. Cuiruangah Jesuh in zianghman keng lo in a feh ter hrim. Sumpai, kianghrawl, hnipuan thlengawknak, zianghman keng lo in Jesuh thupek parah hngat aw dingin a thlah hai. A tu zarhkhat sungah ziangmi pawl in na tikcu a hlei in an lo lawng ih Jesuh mission hnatuan ah tel theilo dingin an lo cawkbuai? Jesuh mission hnatuan tuan suak dingin ziang parah na hngat aw theu, sumpai, mibur thazang, innsang sunglekhat, pehtlaih mi, tvp? Jesuh ih dungthluntu pawl hrangah Thuthangtha in in simmi, kan ken tul lo mi pahnih: · Kan milai thupitnak ken a tul lo Luke 9:46-48, 46Dungthluntu pawl cun anmah lakah zoso a tum bik, timi thu-ah an el aw. 47An ruahmi kha Jesuh in a theih ruangah nauhakte pakhat a hruai ih a kiangah a dinter. 48Cule an hnenah, “Ka hmin in hi nauhakte a cohlangtu cu keimah i cohlang a si; keimah i cohlangtu cu i thlahtu a cohlang a si. Ziangah tile nanmah lakih mi nauta bik cu a tum bik a si,” tiah a ti.
Jesuh dungthluntu na si vekin midang thawn tahthim dingin thlemnak na tong theu ding. Khrihfa zumtu dang pawl thawn voi ziangzat na tahthim aw theu?
1 2 3 4 5 6 7 8 9 10
a pahnihnak ah Jesuh dungthluntu ih kan tanta tulmi cu mai dingfelnak nun, le midang soiselnak asi.
Luke 9:46-50, 49Johan in, “Bawipa, mi pakhat cu na hmin in ramhuai pawl a dawi rero kan hmu ih kan dawn; ziangah tile kan bu sungtel a si lo,” tiah a ti.50Jesuh in, “Dawn hlah uh; ziangah tile zokhal sisehla a lo dodal lotu cu a lo bawmtu an si,” tiah Johan le dungthluntu dang hnenah a ti.
Midang in Jesuh dung an thlun daan thu ah voi ziangzat na soisel in cuai na thlai hai theu?
1 2 3 4 5 6 7 8 9 10
Thlemnak sungah tluksiat a awl zetmi cu kanmah lawng hi a dikbik, Jesuh dungthlundan dikbik, doctrine tha bik, mizia tha bik, Pathian biakdaan dikbik, Thuthangtha sim bik, midang piangthar ter bik, kan si tiah mah le mah tha hleice in porh awknak thangsungah tan aw zet asi.
|