DUNGTHLUNTU LAMZIN DISCIPLE YOURNEY
SESSION 10
JESUH IN A DUNGTHLUNTU A ZIRH (JESUS TEACHES HIS DISCIPLES)
JESUH IN A DUNGTHLUNTU A ZIRH (JESUS TEACHES HIS DISCIPLES)
Key: Dungthluntu pawl cu Jesuh thu zir ding in le Jesuh hnen ihsin zir dingin kawh an si.
Dungthluntu pawl cu zir duhnak lungput thawn Jesuh dung an thlun. Jesuh hnen ihsin an zirmi pawl cu atakin nunpinak in rah tampi an rahsuak thei asi. Atu zarh sung zirnak ah Jesuh ih tlangpar zirhnak thu (Mathai 5;1-2, 7:24-29) sung ihsin kan zir ding. Jesuh cu zirhtu lakah a ropi bik asi ih a dungthluntu hrangah Jesuh hnen ihsin zir ding cu alotheihlo in a tulmi asi.
ZOHSALNAK Jesuh in ziangtin a dungthluntu pawl a ko ih a kawhnak aw cohlang in a dungthluntu pawl nun a thleng ti kan zir zo. A dungthluntu pawl nun a thlengnak cu voikhat te ah a kumkhua hrangin thleng theh asilo ih amah thlun dingin tiamkam aw in pumpeknak nun thawn a thluntu pawl nun cu a thleng ih a sersiamthar, an nun a tuaithar sal. Cutin thleng awknak cu Jesuh in a zirh, a hruai, an nun nikhat hnu nikhat a thleng aw vivo mi asi.
Tuzarh sung zir ding siar ding pawl lakah ziangtiang na rak tuah ziang na bang?
Bible siar ding mi na siarmi lak ihsin ziangmi na zir ngah? Thu sut duh mi na nei maw?
THLACAM A hnuailam vekin thlacamnak in Pathian thawn pehzawm awknak in zirnak pehzawm uhsi. · Pathian in a uknak sungah a lo kawh ruangah siseh catbanglo in sunzawm in na thlarau nun a lo thleng nak ah lungawithu sim hmaisa aw. · Pathian thutak theihtheinak fimnak dil aw. Pathian thu na zirmi pawl thlarau thuthuk theithei dingin fimnak dil aw. · Pathian Thlarau cu nangmah zirhtu ah cohlang awla a lo zirhmi pawl nunpi dingin thinlung timtuah cia in tiamkam aw aw.
THUHMAIHRUAI
“Thillem” timi tongkam na theih veten na thinlung ah ziang na ruat? A lem cu a tak thawn a bang aw zet nan a tak vekin man a nei lo ih a thatdan khal a tak a bang lo mi asi. Cuvek in biaknak lam khalah Khrih dungthluntu lem an um theu asi. Asile a lem le a tak thleidan theinak ding lamzin umsun cu Jesuh Khrih ih zirhnak thluntu sinak in asi.
Jesuh dungthluntu pawl tuahmi le nundan ziangvek pawl hi a lem in cawn awlbik?
Pathian uknak sungah a lem in cangvaihnak hi a tihnung?
A tak asimi Jesuh Khrih ih zirhnak pawl tuitumah kan zir dingih dungthluntu dik pawlih nundan in kan nun thei nak dingah titak zetin zir uhsi. BIBLE THUANTHU Mathai bung 5-7, Jesuh ih zirnak, tlangpar zirhnak ti ah kawhmi hi a hminthangbik zirhnak, zirhtu ropi bik ih zirhnak asi. Cumilakah cang khaikhawmtu a hnuaiah zoh uhsi:
Mathai 5:1-2, 1Jesuh in mipi a hmuh tikah tlangpar ah a hung kai; cutawkah cun a to ih a dungthluntu pawl a hnenah an ra. 2Cule a kam a kau ih hiti in thu a zirh:
Mathai 7:24-29, 24“Curuangah hi ka ṭongmi a thei ih a thluntu cu lungpi parih inn saktu mifim pa bangtuk a si. 25Ruah napi in a sur, ti a lian ih thlipi in a nuai ciamco nain lungpi parih sakmi inn a si ruangah a sawn lo. 26“Sikhalsehla hi ka ṭongmi a thei nain a thlun lotu cu vunnel parih inn saktu mi-aa bangtuk a si. 27Ruah napi in a sur, ti a lian ih thlipi in a nuai tikah a sawn mai; a tlu ih a siatbal thluh a si,” tiah a ti.28Jesuh in hi thu hmuahhmuah a sim ṭheh tikah miseenpi pawl cu a thuzirhmi kha an mang a bang ngaingai. 29Anih cun Daanthiam pawl vek si loin thunei zetin thu a zirh a si. Zo in ziang a zirhmi na theih tikah na mangbang tertu, na thinlung la zettu a um dah maw, ziangthu zo in a zirh tikah?
Atlunih Bible bungcang thu muril ziangtin atawinak in sim hnik aw?
A tlun bungcang pahnih kan zoh asile Jesuh hnen ihsin zir tengteng a tul ih zir ngahmi pawl nunpi tengteng a tul ti alang. BIBLE THUANTHU LAILANG DUNGTHLUNTU PAWLIN ZIR DUHNAK LUNGPUT AN NUNPI Jesuh in thu a zirh tikah a zirhmi pawlin an rak theihcia mi nunphung pawl hmangin tleng awknak a tulzia pawl a zirh ih a thar asimi lamzin thar ah a zirhmi pawl a hruai theu. A zirhmi pawl thu hnuai ah tuhlut awk nun a tulzia fiang ten a zirh theu fawn. Mi zapi tuahmi tuah ve menmen si loin Jesuh ih zirhmi ah an nun pumhlum le lamzin hngat aw in thu awi nun nei dingin a zirh hai. Mathai 5:1-12, siar awla khuimi zirhnak in milai nunphung dan in an khawruahdan pawl a kalh in alinglet bik ti ah na ruat? Ziangruangah?
A hnuailam canghnih siar hrih uhsi. Mathai 5:1-2, Mathai 5:1-2, 1Jesuh in mipi a hmuh tikah tlangpar ah a hung kai; cutawkah cun a to ih a dungthluntu pawl a hnenah an ra. 2Cule a kam a kau ih hiti in thu a zirh: Jesuh zirhnak cu mi tampi in an thei, asinan mi zapi in an thlun lo ih a dungthluntu pawl lawngin tlang parah an thlun. Cutin a zirhnak an ngai ngah zir ngah ih thlawsuahmi an si. Ziangvek dinhmun ah Jesuh zirhnak hmual nei cuang in na nunah na zir ngah?
Tuzarh sungah Jesuh hnen ihsin zir ngah dingin ziangvek lungput le dinhmun ah na ret awk ding?
Jesuh hnen ihsin zir ngah dingin lunglut le dinhmunah ret awk cu Jesuh hnen ihsin zir dingin a hmaisa bik tulmi asi. Asinan a tawpnak asi hrih lo.
DUNGTHLUNTU PAWLIN AN ZIR NGAH MI AN NUNPI Zirnak thu rel tikah tlawngta le dungthluntu cu zir ding veve an si nan an bang aw lo tuk: tlawngta cu an zirmi theih duh ah an zir ih dikari an ngahnak hrangah asi. Dungthluntu pawl cun an zirmi vekin thu awi nun, nun ap aw hlan aw dingin an zir ih a takin nunpi dingin an zir mi asi. Curuangah Jesuh in an nun rah in zoh uh tiah fimkhur tul thu a sim theu asi. Mathai 7:15-17, 15“Profet deu pawl khi ralring uh; an lenglam cun tuu bangin nan lakah an tlang; a sinain an sunglam cu cinghnia hrang vek an si. 16Mi ziangvek an si ti cu an tuahmi in nan thei ding. Hling kung ihsin Sabit a rah dah lo; lenhling khal in theipi a rah dah keel lo. 17A harhdammi thingkung ṭha cun rah ṭha a rah ih thingkung ṭha lo cun rah sia a rah.
Na zir ngahmi thu na zum, na lung na cingin a tak in nunpi na harsatcan a um dah maw, ziangvek ah?
Leitlun zumtu nun khualtlawnnak ah thlipi hrang in dungthluntu pawl nun nasa ten a nuai theu asi. Nun hram hnget zet parah hram bun dingin Jesuh zirhmi pawl cu theih, zum, lawng si loin a takin nunpi a tul asi. Cutin thlipi in a hran tluk thei lomi nun hram hgnetkhoh kan neih theinak asi. Jesuh zirhmi ziangvek thuhrampi pawl nunpi lotheihlo asi? (Mathai bung 5-7 ah zoh in)
Ziangvek nunpi, cangvaihnak a zirhnak in a phut, lotheihlo in a tul tiah a zirh?
TUAH IN TEL VE Zumtu mibur, kawhhran sungah telnak in Jesuh zirhmi pawl a takin nunpinak tha asi. Jesuh zirhmi theihfeng harsa mi pawl tla zumtu dang thawn nun ih tawntehmi pawl hlawm awknak in theihfengnak tampi mi a pek asi. Curuangah a hnuailam Jesuh zirhnak pawl hi zoh tlang hrih uhsi. Mathai 6:25-34, 25“Cuti a si ruangah ka lo sim: nan nunnak hrangih nan ṭulmi ti le rawl le nan ruangpi hrangih hnipuan pawl thu ruat le donhar in um hlah uh. Thungai ih ti ahcun, nunnak hi rawl hnakin a thupi sawn lo maw? Hnipuan hnak khal in taksa ruangpi hi a thupi sawn lo maw? 26Van ih a zuangmi vate khi zohhnik uh; annih in thlaici an tuh lo, rawl khal an khawm lo ih cuam sung khalah an khawl lo. Asinain vancungih a ummi nan Pa in a cawm thluh a si. Vate hnakin tampi nan sunglawi sawn a si lo maw? 27Nan donhar ruangah nan nunnak caan tawite tal nan sauter thei maw?28“Cun ziangah so hnipuan thu ah nan don a har? Hramlakih pangpar khi zohhnik uh; hna an ṭuan lo, pathnuk in thiam an tak fawn lo. 29Asinain atu-ah ka lo sim: siangpahrang Solomon hman, kha tlukin a lian nain, a lennak le a hnipuan in hi pangpar ih mawinak a tluk lo a si. 30Tuihsun ah a nung ih thaisun ah meisa sungih paih ding hrampi hman a ceimawitu Pathian cun cuih pawl hnakin nannih cu a lo thuam sawn lo ding maw? Nan zumnak a va mal lawmmam so!31“Curuangah ‘Ei in ding le sinfen ding tla khui-in so ka ngah ding,’ tiin donhar in um hlah uh. 32Hi pawl cu Pathian thei lo khawvel pawlih an helhkam ringring mi an si. Vancung ih a ummi nan Pa in hi thil pawl nan ṭulzia cu a thei a si. 33Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si. 34Curuangah thaisun hrangah donhar in um hlah uh; thaisun in donharnak amah tawkin a nei ve ding. Ni ni khat ih a phurhmi harsatnak tlunah a dang beetcih ding a si lo.
Himi bungcang sungah ziangmi thupi, thuhram khaikhawmtu thutak a sim?
Tuzarh sungah himi thutak zirhnak cu ziangtin na nunah na nunpi ding?
THLCAM DIL DUHMI NGAN AW: ZARHKHAT SUNG TUAH DING Pathian thangthat -Bible siar ding pawl siar in Thiang Thlarau in a lo zirh thar mi ngan khum aw -Nitin Bawipa thawn can fianhrial hmangin thlacam -Na it that lo sung poh cu catbang loin thlacam in Bawipa Pathian Thlarau lamhruai nak hnuai ah zir duhnak lungput thawn na can hmang aw. Bulpak nun -Dungthluntu cun zir duhnak lungput an neih ih canpualtha thupiter ringring -Dungthluntu cun an zir ngah mi pawl an nunpi taktak asi Nunpi -Tlangpar sermon Mathai bung 5-7 siar suak aw, a cang thei asile on in siar aw. -Insang lole rualpi pawl thawn Bible zir tlang dingin sawm aw -Bible zohlo in ngah aw: Mathai 7:24, “Curuangah hi ka ṭongmi a thei ih a thluntu cu lungpi parih inn saktu mifim pa bangtuk a si.” -A tak nun ah thlarau rah (Gal 5:22-23) ah a sim vekin nangmai nunah a rah suah mi le na kiangkap milai pawl nunah thlarau rah a rahsuakmi pawl khaikhin in ngan khum aw.
NITIN BIBLE SIAR IN THLARAU IN A LO ZIRH THARMI NGAN KHUM AW: 1. SAM 119:1-24
2. SAM 119:25-48
3. SAM 119: 49-80
4. SAM 119:81-104
5. SAM 119:105-136
6. SAM 119:137-160
7. SAM 119:161-176
NA THINLUNG SINAK TAKTAK A thupi mi cu kan zummi, kan zum kan timi le kan tuahmi a zulh peh awk ding asi. Jeremiah in hitin a sim: Jer. 17:9, “Milai ih thinlung cu zoso a theithiam ding? Ziangdang hnakin mibum hmang bik a si; Damter dingah a harzet, a natnak a besia tuk!”
Voi tampi mah le mah bum awknak thang sungah kan tla lut theu. Kan zummi a dik, a tha ti men lawng in kan duhtawk theu ih tuahnak tel lo cu tihnungza a rak si ziar. Jer. 17:10, 10Keimah Bawipa in milai ih thinlung cu ka hmu ih an sunglam thil ka hniksak. Mikip an nuncan daan in ka zoh ih, An tuahmi vekin ka tuah rul ve,” a ti.
Tikcu reilo te sung daiten um in Pathian hmaiah um in cek aw fel aw. Pathian hnenah na thinlung lo cek felin na sinak taktak lo theihter dingin dil aw: Ka zum na timi le na tongkam, tuahnak Pathian mithmuh ah a zulh peh aw maw, ti lo theihter dingin thlacam aw.
Pathian in ziang alo theihter?
Pathian in a lo theihter mi na sanletnak hrangah ziang na tuah a tul?
DUNGTHLUNTU PAWL CU ZIR DUHNAK LUNGPUT THAWN AN NUNG Cat bangloin a phone a tham rero tu pakhat cu na biak khal asile a thinlung zaten a lo pek ih na thu a ngai ding cu a har zet ding. Cuvekin leitlun thu, kanmai duhmi in kan thinlung a luahkhat tuk tikah Pathian in in biak duh tikah asi ve pang pei maw? Pathian in ,”ka lo zirh duh nan nang cu: · Na hnatuan na buai tuk · Na thinbang in na ruahnak a lo luahkhat theh · Nuamnung na duh tuk · Ka tongkam na ngai duh lo, in ti rero tla asi thei. Pathian aw kan theih le theih lo cu kan thinlung sangka ong in zirh duhnak, theih duhnak, nunpi duhnak thawn nitin kan can kan hmang maw timi parah a thum aw asi. Dungthluntu diktak cun Pathian aw ngai in an leitlun nun an nung, cutin Pathian in a simmi pohpoh nunpi dingin an man cia ringring.
Pathian aw theithei lo dingin ziang hnatuan, ziangvek dinhmun, kiangkap minung, thiltimi pakhatkhat in a lo kam theu?
Khrih dungthluntu taktak pawl cu Pathian thu theih duhmen in a tawk lo ti an thei; Pathian thutak an theih theinak ding hrangah an pum an pe, thildang hnakih thupi bik ah an ret asi. Pathian thu theih cu duhlo cingin theih asilo ih duhnak ngaingai thawm hawl in pumpek nun nei in zianghmuahhmuah hnakin a thu theih cu thupibik ah a rettu pawl hnenah Pathian a phuang suak aw ih Pathian aw an thei theu asi. Dungthluntu pawl cu zarhkhat voikhat biak inn ah fah tahratin midang thusimmi ngai in an thang lo, zarhkhat voikhat Bible study tuah men in a tawk lo, thlarau nun cawmtu ah a tawk lo. Anmah rori in an hawl ih theih duhnak taktak thinlung thawn Pathian thutak an hawl, tanta tulmi an tanta ih an nunah a thupi bik ah an ret ringring asi. Nitin te Jesuh aw thei dingin thinlung sangka ong aw tanta tulmi tanta in an thinlung sangka ong in Pathian aw an ngai ringring asi.
A tu ah Jesuh hnen ihsin zir duhnak na neih mi hi na lungawi kim tawk maw? 0 ihsin 10 tiang na lungkim zia sim hnik aw. Lungkim lo lawlaw : 0, 1 , 2, 3, 4, 5, 6, 7, 8, 9, 10: lungkim tuk
Mathai bung 5 ah dungthluntu pawl in Jesuh zirhnak ngai dingin tlangparah an kai. Dungthluntu pawl in Jesuh zirhnak ngai dingin lam hla feh in tanta mi nei in an pan hi tuitum lawng asilo. Mathai 17:1-2, 1Ni ruk hnuah Jesuh in Piter le Jeim le a nau Johan kha tlang saangpi parah a kaipi ih anmah lawng an um. 2Cule an mithmuh rori ah Jesuh cu a hmuihmel a thleng aw; a hmai cu ni bangin a tleu ih a hnipuan cu mi tlet thei khopin a raang.
Hitum khalah dungthluntu pawl in Jesuh hnen ihsin a zirhnak ngai ngah dingin ziangkim dunglam ah an tanta ih an tikcu can, thazang pe in tlangparah an thlun asi. An hlawhngahmi cu zianghman ih lei thei lo mi mankhung thutak asi.
Mathai 17:1-13 siar awlam dungthluntu pawl in Jesuh hnen ihsin ziang an zir ngah?
Ziangti vek can ah Jesuh cu nangmah zirhtu ah na co hlang ngah?
Mi tampi cu tlangsang par kai paih lo in Jesuh dungthluntu tha an si dah lo; Jesuh thu an thei nan, tlangsang an kai paih lo, an thang dah lo, an kel le bawr in thlarau lam nun pitling si thei dah lo in an um theu. Riahsiatza asi. Pathian aw khal an thei dah lo. Asinan Jesuh zirhnak thlun dingin ziangvek tlangsang par khalah kai tahratin dunglam ah ziangkim tanta in Jesuh hnen ihsin a zir tu pawl covo cu lei hlawnthil man in lei theih asilo.
Nitin, nahzi kar tin, Jesuh aw ngai in a thu thlun dingin ziangtin nangmah le nangmah na thei aw ter cingcing thei ding?
DUNGTHLUNTU PAWL CUN AN ZIR NGAH MI AN THLUN Bible thu pawl siar tikah tuksumza tampi a um. Asinan Jesuh tlangpar sermon mi lak ihsin a netalam ah a simmi hi tuk a sumbik ding tiah zum a um asi. Mathai 7:21, “ ‘Bawipa, Bawipa,’ tiih i kotu hmuahhmuah in vancung Uknak an thleng thluh lo ding; vancungih a ummi ka Pa ih duhnak a tuahtu lawnglawng an thleng ding a si.”
“Vancungih a ummi ka Pa ih duhnak” atimi hi ziang asi tiah na mangbang rero tla asi thei men. Pathian thu ngai timi hi thildik tuah menmen in a tawk lo. Angaingai ah thildik tuah na cingin tumtahmi a dik lo ahcun Pathian in a hua zet asi. Isaiah 1:11,15, 1 Bawipa in, “In pek ringring mi thawinak pawl hi ka duhzet ah maw nan ruat? Thawinak ih nan ur mi tuu pawl le nan ṭilva thau zetzet pawl hi ka khop zo. Nan caw, nan tuu le nan me thisen pawl hi ka ningtuk zo! …15Baan pharh in thla nan cam hman ah ka lo zoh lo ding. Ziangtluk tam ih nan cam khal le ka lo ngaisak lo ding; ziangah tile nan kut cu thisen in a khat a si Mathai bung 7 le Isaiah 1 na siar tikah ziangvek in na lungsungah na ruat?
Tuisan kawhhran nangmai hmuhtawmi parah hngat aw in Isaiah 1:11 hi ngan sal hnik aw. (Isaiah in amai san minung pawl hnenah ca a ngan vekin tui na umnak kawhhran ah Pathian in ca a lo ngan ter si bang sehla).
A lem le a tak cu a rah in theihtheih asi tiah Jesuh in a sim. Jesuh in a simmi hi Isaiah in a rak simmi thawn thu hmunkhat asi.
Isaiah 1:16-20 siar awla Pathian thu lung pawl nun ah “rah” ziangvek an rah timi ngan aw.
Jesuh dungthluntu pawlin Thuthlungthar ah cakuat an ngan tikah “rah” thu nasa ten an simfiang asi. A lar bik cu Paul ih ngan mi hi asi thei;
Gal 5:22-23, 22Sikhalsehla Thlarau ih a rahsuahmi cu duhdawtnak, lungawinak, hnangamnak, lungsaunak, mi zaangfahnak, ṭhatnak, rintlak sinak, 23nunnem tangdornak le suup theinak tla an si. Cubangtuk rah umnak ahcun daan cu a ṭul nawn lo.
Jesuh dungthlun cu tumkhat lungkimnak in thuhluknak tuah men a tawk lo. Cutin hmakhat te ah rah a rah theih fawn lo. Inn hnen te ka duhdawt kei, rem daihnak ka tuah kei, rah tampi ka rah ding ti theih asi fawn lo. Jesuh dungthlun in a zirhmi vekin kan nun tikah a mah bang sinsin in kan nun a thangso vivo tik lawngah thlarau rah cu zumtu nun ah a rah suak vivo dingmi asi. Khatlam zawngin kan sim asile thiltha tampi tuah nak in Jesuh dung kan thlun asilo. Thlarau rah kan nun ah a rah suak mi in Pathian kan sungah hna a tuan rero asi ti langtertu asi sawn. Thlarau rah ziangmi na nunah a lang hngan bik?
Thlarau rah ziangmi na nunah a lang mal bik?
|