Seemtirnak 15:1-6; 16:1-5; 17:18-19

1Cuih hnuah Abram hnenah Bawipa a lang ih, “Abram, na thinphang hlah; Keimah cu a lo humtu phaw ka si. Na hnenih ka laksawng cu a uakzet ding,” ti ah a sim.

2Cutikah Abram in, “Maw Pathian Bawipa, fa le ka nei lo. Ka hnenih na laksawng cu ziangso a si ding? Ka rocotu * cu Damaskas khuaih Eliezer lawng a si. 3Fa pakhatte hman i pe lo ih, curuangah ka ro cu ka salpa pakhat in a co a ṭul ko,” ti ah a ti. 4Cun Bawipa in Abram hnenah, “Hi na salpa hi na rocotu a si lo ding; na rocotu cu nangmah ih fapa ngaingai a si ding,” ti ah a sim sal. 5 Bawipa in Abram cu lengah a suahpi ih, “Van khi zoh awla arsi pawl khi na siar thei asile siar hnik; khi arsi zat in na tesinfa pawl cu an tam ding a si,” ti ah a ti. 6Cule Abram in Bawipa cu a zum ih acuih zumnak cu Bawipa in dingnakah a co sak.

16:1-6, 1Cule Abram nupi Sarai cun fa pakhat hman a nei lo. Asinain Sarai in Ezipt mi Hagar timi salnu a nei. 2Sarai in Abram hnenah, “Zohhnik, Bawipa in fa i neihter duh lo hi! Ziangah so ka salnu thawn nan ittlang ko lo? Anih cun ka hrangah faate a nei thei men ding,” ti ah a ti. Cule Abram in Sarai ih thu cu a ngai. 3Curuangah Sarai in a salnu, Izipt nunau Hagar cu Abram ih nupi dingah a pek. Kanaan ramah Abram kum hra a um hnuah hi thil hi a cang. 4Abram le Hagar cu an pawl-aw ih Hagar cu fa a vun. Hagar in fa a vun ti a theih awk tikah a puarthau ih Sarai cu a hmuhsuam. 5Cutikah Sarai cun Abram hnenah, “Hagar in hiti ih i hmuhsuam hi nangmah ih mawh a si. Ka salnu cu keimah in ka lo pe. Asinain fa a vun ti a theih awk vete in i hmuhsuam ciamco. Bawipa in nang maw kei so, zo a dik deuh ti thu in ṭhen hramseh,” ti ah a ti. 6Cule Abram cun, “Hagar cu na salnu a si; nangmah in na uk; na duhduh in tuah aw,” ti ah Sarai hnenah a ti. Cutikah Sarai in Hagar cu a tuahsiat ih Hagar cu a tlan.

17:18,19 18Abraham in Pathian hnenah, “Ishmael tal cu na hmaiah mithmai ṭha ngah hramseh,” ti ah a ti. 19Cutikah Pathian in, “Abraham, cutiin a si lo. Na nupi Sarah hrimhrim in fapa a lo hrin ding ih a hminah Isaak * ti ah na ko ding. Amah hnenah siseh, a tesinfa pawl hnenah siseh, ka thukam cu ka fekter ding. Ziangah tile kumkhua daih thukamnak a si.

 

Thuhmaihruai: Na nunah tumtah vekin thil a canglo tikah hminsintlak tawntehmi sim aw.

 

Q.1. Seem 15:1-5. Pathian ih tumtah kimcang theihcia asilo tikah milai in ziangtin an cangvai theu?

Rekhawm aw: Abraham hnenah Pathian in thu a tiamkam tikah ziangvek anhai nak a tong?

Pathian in thu in tiamkam tikah kanmai kutsungah kan liangparah phurh a tul lo.

Q2. Seem 16:1-5. Pathian ih tumtahmi pawl hahdam ten kan pomrem thei tikah ziangvekin kan nun thuanthu a thleng aw thei? Abraham ih thuanthu ihsin ruat aw.

Ahram thokah Pathian thu tiamkam mi zohlan cu phur um zet asi thei nan, Pathian cangvai lo vekin a um tikah ziangvek harsatnak a um thei?

Q3. Seem 17:18-19. Ziangtin Pathian ih tumtah le amai cankhiahmi parah hngat aw sinsin thiam dingin ziangtin na zir thei ding?

Nunpi  aw: Tu zarh sungah na tikcu le thazang pe in ziangtin Pathian ih tumtah hrangah na hmang aw thei ding?

·      Na sualpalhnak phuang aw in Pathian ih duhdan lamzin thlun thei dingin tiam aw aw.

·      Hrilsual pangmi in tuar harsatnak natnak harsatnak a thlen ter theu ti thei ringring aw. Pathian ih cankhiah ciami na hngak asile ziangtin na nun lam a tluang ding?

·      Hrilsualtu pawl hnenah Pathian in na nunah ziangtin lam a lo hruai timi thu thawn thazang pe aw.

·      Sam 51:1-13, siar awla ziangzwn ah Pathian ngaidam na tul, na nun remthat a tul, runsuak na tul?

Nitin Bible siar aw:

Ni1: Seem 15:1-21; Ni2-Rome 4:1-12; Ni3-Rome 4:13-25; Ni4-Seem 16:1-16; Ni5-Kalatian 4:8-31; Ni6-Seem 17:1-27; Ni7- Kolosian 2:1-23.