FALAM CHRISTIAN YOUTH BIBLE STUDY: SPRING-Unit 2-Session 5

VUTCAM LAK IHSIN MAWINAK-Mualpho tlukbahnak ningzahnak ihsin runsuahmi

August 27, 2016; 8PM @ Falam Christian Church

Luke 22:54-62; Acts 4:8-13.

54Jesuh cu an kai ih Puithiam saang ih innah an fehpi; cule Piter in a hlat nawn in a thlun. 55Tual laifangah meipual an sep ih mei a aitu pawl hnenah cun Piter khal a to ve. 56Hnen-um nu pakhat in Piter meisa kiangih a to kha a hmuh tikah hmaiton-in a zohhliah ih, “Hi pa hi Jesuh hnenih a tel vemi a si,” tiah a ti. 57Asinain Piter in, “Nunau nu, cupa cu zo a si ti hman ka thei lo,” tiah a ti. 58Malte a rei hnuah mi pakhat in a hmu ve ih, “Nang tla na tel ve ko,” tiah a ti. Asinain Piter in, “Mi pa, kei ka tel lo,” a ti. 59Cule nazi pakhat tluk a rei hnuah midang pakhat in, “Hi pa hi Jesuh hnenah a tel ve, ti cu zum lo ding ṭha a si lo; ziangah tile amah khal hi Galilee mi a si ve ko,” tiah fiang zetin a ti. 60Asinain Piter cun, “Maw mipa, ziang nan ṭong ti hman ka thei lo,” tiah a ti thotho. Cutiih a ṭong rero laiah cun ar a khuang. 61Bawipa cu a her ih Piter kha a zohhliah; cule Piter cun Bawipa in, “Tuihzan ar a khuan hlanah voithum tiang ka thei lo tiah i phatsan ding,” a timi kha a vun mang sal. 62Piter cu a suak ih ninghang zetin a ṭap.

Tirh 4:8-13, 8Piter cu Thlarau Thianghlim in a khat ih an hnenah, “Mipi hotu pawl le upa pawl, 9tuihsun ahhin hi kezeng pa a damnak thu le a parih thil ṭha tuah a si thu hi in sut a si ahcun, 10nan theih dingmi le Israel mi hmuahhmuah in an theih ṭheh dingmi cu hihi a si: nan hmaiih a dingmi pa a damfelnak hi Nazareth mi, thinglamtah parih nan thahmi, thihnak ihsin Pathian in a thawhter salmi Jesuh ih hmin thawngin a si, tihi a si. 11Jesuh thu ahhin Ca Thianghlim in: ‘Inn saktu pawl in nan hnonmi lungto cu a thupi bik lungto ah a cang zo,’ * tiah a ti.  12Rundamnak cu amah ih sung lawngah a um; ziangah tile Pathian ih rundammi kan sinak dingah leikhawvel pumpuluk ah hin minung hnenih pekmi hmin dang zohman an um lo,” tiah a ti. 13Khonsil upa pawl in Piter le Johan cu fimnak le thiamnak a nei lomi mi menmen an si nain ziangtlukin an ral a ṭha ti kha an hmuh tikah an mang a bang ngaingai. Cule annih cu Jesuh ih rualpi an si ti kha an mang sal.

 

Zaingvek tlaksiatnak le tlukbahnak in na thosal dah, na thuanthu sim thei mi na nei maw?

1.     Luke 22:54-62. Nangmah ruangah mi pakhatkhat an beidawn, riahsiatnak an tawn tikah ziangtin na tuah?

(Jesuh in amah ruangah a tlu a bahtu Peter cu a tungdingsal ih mangbangza in a hmang asi)

2.     Zirththlah 4:8-12. Pathian in a lo thlawsuah lo ding, a lo dungtun ding phan can na nei maw, ziangvek can ah?

(Jesuh ih tuarnak a zoh tikah Peter lungsungah ziang a khat ding, tihphannak in a khat ko lo ding maw?)

3.     Thirh 4:13. Pathian in dunglamah na sual palhnak pawl a cing nawn lo ih a lo ngaidam theh zo ti na theihnak ruangah ziangtin Pathian na hmuhdan a danglam ter?

(Peter in voi 3 tiang Jesuh a phatsan hnu hmanah Jesuh in a dungtun dah lo sawn asi).

4.     Tui Bible zirnak ihsin Pathian in ziang a lo zirh ih tuzarh sungah ziangtin na nunah na nunpi ding?

·      ZIangvek sual palhnak na nei? Thup hlah aw, sim aw. Sir awknak thawn Jesuh Khrih ngaidamnak cohlang in nunpi aw. Na sualpalhnak Pathian in a lo ngaidamnak midang hnenah sim sawng aw. Na thuanthu ngan aw.

5.     Rome 5:6-11 siar aw la thil pa 3 tuah aw:

·      Ziangvek sual palhnak na sualbuai ih na neh timi lailan, fiangfai zetin sim aw.

·      Pathian in na sualpalhnak thu ziang a sim, timi ngan awla sualpalh nun in a lo uk nawn lo zia ngan in simsuak aw.

·      Cutin ziangtin nun danglam na nunpi ding, ngan in simsuak aw.

6.     Bible siar aw.

Ni 1: Luke 22:1-23; Ni 2: Luke 22: 24-38; Ni 3: Luke 22:39-53; Ni 4: Luke 54-62. Ni 5: Luke 24:13-35; Ni 6: John 21:1-14; Ni 7: John 21:15-25.