UNIT 2: SESSION 2-VUTCAM LAK IHSIN MAWINAK-A kekkuai pehtalihnak ihsin runsuahmi

Seem 27:41, 33:1-11.

41A pa in Esau co dingmi thlawsuahnak cu Jakob a pek thluh ruangah Esau in Jakob cu a hua ih, “Ka pa hi rei a nung nawn lo ding; a thih hnuah Jakob cu ka that tengteng pam ding,” ti ah a thinlungte in a ruat. 

33:1-11, 1Jakob in Esau cu milai zali thawn an rat kha a hmuh tikah a faate pawl cu Leah, Rachel le a nusun pahnih hnenah a ṭhendarh thluh. 2A nusun pahnih le an faate pawl cu hmaisa bikah a ret; a sangtu ah Leah le a faate pawl a ret ih neta bikah Rachel le Josef a ret hai. 3Amah Jakob cu an hmaiah a feh ih voi sarih tiang a hmai leilung dai in a lu a kuun hnuah a u hnenah a va thleng. 4Sikhalsehla Esau in Jakob a hmuh tikah tong dingah a va tlan ih Jakob cu a pom; a hngawng in a kuah ih a hnam. Cule an pahnih in an ṭaptlang. 5Cule Esau cu khuadang a tang ih nunau le nauhak pawl a hmu. “Na hnenih nunau le nauhak pawl hi zoso an si?” ti ah a sut. Cutikah Jakob in, “Na siahhlawhpa keimah hi Pathian in i zaangfah ih i pekmi faale pawl an si,” ti ah a ti. 6Cun a nusun le an faate pawl an ra ih upat pe in an lu an kuun. 7Cuih hnuah Leah le a faate pawl an ra kuun; cule a neta bikah Josef le Rachel an ra ih an lu an ra kuun ve.

8Cule Esau in, “ṭilva rual ka rak ton zomi kha ziang sullam so a si?” ti ah a sut. Jakob in, “Bawipa, na hmaiṭha ka co theinak dingah an si,” ti ah a hun ti tikah, 9Esau in, “Ka duhzat cu ka nei ve ko, ka naupa; na ta pawl kha cu nangmah in nei ko aw,” ti ah a ti. 10Sikhalsehla Jakob cun, “Cuticun a si lo pei; na mithmaiṭha i coter a si ahcun ka laksawng cu na sang hram pei. Atu cu ka parah na thinlung tluangzet in a um ih ka hrangah na mithmai hmuh cu Pathian ih mithmai hmuh bangtuk a si. 11Zaangfahte in na hrangih ka rak kenmi laksawng cu co hram aw; Pathian in i zaangfah ih ka ṭulmi pohpoh cu i pek a si,” ti ah a ti. Cutiin Esau ih a san hlan lo a hneek zok rero. Cule Esau cun a saang.

Na nauhak laiah ziangvek atthlak el awknak ah na tawng dah? Milai zokhalin kan duhdawtnak duhdawttu thawn thin na ko in kan el aw, kan to aw theu, pehtlaih awknak siatsuah ruangah thinlung kuai le thin nuam loin kan um theu.

Q1. Seem 27:41, Ngaidamnak hnakin thincin (ngaidamlo) hi ziangruangah a awl sawn asi pei?

Na relsuak thei lo mi tla asi thei, na thinna ko a lo tuahtu an um dah maw? Na ruah lo pi, tumtah lopi in midang thinnatnak na tuahmi a um maw?

Q2. Seem 33:1-4. Tangdornak nun langter dingin ziangmi harsatnak in a lo dawnkham?

Kum 20 hnu ah Jacob kha tangdornak nun a langter.

Nangteh na nunah tangdor cuh in na nun tikah na pehtlaihmi milai thawn pehtlaih in ziangvek danglamnak a thleng ding?

Q3. Seem 33:5-11. Milai thawn kan pehtlaihnak a siat tikah remtha loin kan thuhmen tikah ziangvek kan cang theu?

Milai na pehtlaihmi karlak phardawl vekin nan pehtlaih awknak dawnkhamtu a um maw? Phurdawl phen ah mi siatnak cing ringring in siseh midang kap rero in siseh na um pang maw?

Nunpi aw:

·       Pathian kawhnak aw ngai in na nunnah tangdornak ziangtin na langter ding?

·       Pawnlang thleng awknak in mi bum hlah aw, Khrih na sungah lalnak pe aw la a mah in lo thleng seh.

·       Ngaidamnak cu a palhtu parah OK ti men asilo an mawhpalhnak kha lungsungah ret nawn lo, thincin nawn lo khi asi sawn.

·       Nitin ten na thinlung sung muril nangmah le nangmah tuzarh sung dap aw fel awla, tangdornak in na pehtlaihmi milai hmuahhmuah ngaidam lomi nein awn lo in nunpi aw.

Q4. Siar aw-Mathai 18:21-35.

·       Ziangsi ngaidam harsa na ti bikmi, ziangruangah?

·       Pathian in a lo ngaidam taktak asi ti zum harsa na timi a um maw, ziangruangah?

·       Tu zarh sungah na pehtlaihmi na ngaidam tulmi, ngaidam na dil tulmi zosi ruat aw?

Nitin Bible siar aw: Ni1, Seem 25:19-34; Ni2-Seem 26:1-33; Ni3-Seem 26:34-35, 27:1-46; Ni4-Seem 28:1-22; Ni5- Seem 32:1-32; Ni6-Seem 33:1-20; Ni7- Seem 11: 1-40.