Sual ngainep mi le larterbik neih khal hi sual asi. Sualnak lakah caan hnandan sual hi mi tampi in kan ngai pawimawh lo, sual asi ti khal ruat setsetlo, thei loin nitin a tlangleng tla kan um thei. Sual pohpoh lak ihsin fianhrial, thiarfihlimaw thei dingin rak siar in cek aw fel aw ding kan si. Sumpai mi kan bak, mita kan ruk pang khal asile peksal a theih. Caan kan ruk, kan khawhral pang asile laksal theih asinawn lo. Thil ziangkim hi a neitu ih duhdan le tumtah vekin a um lo poh ahcun sual asi vekin caan khal hi a neitu le in petu Pathian ih duhdan le tumtah vekin hman lo poh ahcun sual asi. Milai cu thil pathum caan, hmunram, thu sungah a nungmi kan si vekin kilkip ah thangso ding, Fapa hmuihmel bang sinsin ding kan si.

Caan thawn pehpar in sual Ci 7 pawl tla cu:
            1) Caan pekmi vekin hmanglo: Meeting, khawm, thusim caan, thlacam caan, tvp  senpi, mibur in tuahmi siseh a tuahtubik  ding tiah mi pakhat caan pek mi in siseh caan hman tikah pekmi caan luan in hman hi sual asi.
            2) A caan khiahcia mi pahbal: Meeting tlai, khawm tlai, hnatuan tlai, tawn awk ding caan khiahcia tlai, khiahcia mi caan pohpoh pahbal hi sual asi. Lungkim ciami caan ah thleng lo, tuah ding timi tuah lo hi sual asi. Meeting tlai ringring, khiahcia mi caan pahbal hi sual asi.
            3) Tuah ding timi tuah loin khiahcia mi caan ah thildang tuah: Pathian hnenah thlacam in timtuah cia diamdi in tumtah neih hnu ah khiahcia mi vekin caan hmang loin thildang tuahnak ah caan hman khal sual asi.
            4)  Midang caan lawnsak: Mibur umkhawmnakah siseh mi pahnih lole pahnih hnakih tam um khawmnak poh ah midang tong can, midang in an hman ding caan lawnsak cu caan lawnsak, sual asi.
            5) Midang caan ruksak: Meeting le tawn awk ding khiahcia caan ah suak lo ruangah midang a lak in an caan khawhral ternak in siseh khiahcia mi caanah tawnkhawmnak tawpter loin midang tlai ternak in siseh thu pakhatkhat ruangah mah bulpak ruangah siseh midang caan khawhralter, an caan siatsuah sak, cemralter men cu sual, midang caan ruksak thawn bang aw asi.
            6) Caan siatsuah: Milai in caan pathum kan Nei: nui pumsung, leitlun caan, le thihhnu vanram lole hellrem ah. Leitlun damsung hi thil tha tuahnakah caantha Pathian in in pekmi asi. Thu sual ruatnak, tongsia tongnak, thilsual tuahnak ah caan hman siseh zianghman tuah loin caan khawhral men khal sual asi.
            7) Caan puhmawh: Caan hi a tha tukmi asi. Thiltha tuah lo tikah "caan ka nei lo" tiah caan puhmawh hi sual asi. Mi zokhal nikhat ah nahzi 24 caan pek kan si. Tuah dingmi thiltha tuah loin um tikah caan puhmawh ding asilo, sual asi.Kanmah ih tuanvo, thiltha tuah ding kan tuah lo tikah caan puhmawh ding asilo, sual asi.
            Zumtu Pathian fate pawlin caan thawn pehparin sualnak hrial thiam  dingin duhsaknak thawn. Pa Pathian in caan in pekmi cu amah thawn catbangloin pawlkomnak, amah kan sungah hnatuan tahratin a ra lai dingmi sankhuk nun sungah a Fapa sunloinak kan tawmpi ve theinak ding hrangah leitlunah caan in pekmi asi. In petu ih tumtah le duhdan in kan nitin nun hmang cio uhsi.