THLAWSUAH DAWTTHUM

 

Thlawsuah co, thlawsuahmi nuam zetin cen, le thlawsuah nuam zetin cenmi in midang lungawi ter nawmter hi thlawsuah famkim asi.

 

1)      Thlawsuahco:

Nun hi Pathian thlawsuah, leitlun ah caan tawite kan neih mi asi. A TU caan kan neihmi hi Pathian laksawng asi. Sersiammi ziangkim hi, kan neihmi, theihmi, pehtlaihmi, ti theimi, ziangtkim thiltha hmuahhmuah hi Pathian hnen ihsin kan ngah mi an si. Thlawsuah comi nei loin milai zohman an um lo. Anmah le tawkten mi zocio khal an lungawipi dingmi le nuam zetin an cen dingmi thlawsuah Pathian in a pek cio asi. Thlawsuah siar thiam uhsi.

 

2)      Thlawsuah comi nuam zetin cen:

Thlawsuah comi nuam le lungawi zetin cen, nawmpi hi Pathian thlawsuah asi. Khrih ah Pathian thawn pehzawm awknak, tikcu caan- atu caan, nupi pasal, insang, nulepa, sungle khat, hrin le hram, miphun, khua le ram, rualpi, pawlkompi, pehtlaihmi milai, thil le ri, neihmi theih mi, tvp a zaten lungawi le nuam zetin kan cen dingah Pathian thlawsuah an si. Cutin cen tikah thlawsuah in pe tu hnenah catbanglo lungawinak thawn nuam zetin cen ding kan si. Kan neih lomi, theih lomi, le ti thei lo mi parah siseh midang in an neihmi neih lomi, tuahmi, le tuah lomi parah siseh, dinhmun pakhatkhat parah siseh, dunglam le hmailam tikcu ah a thleng zomi le thleng lai dingmi ruangah khawruah har, thin nuam lo in lungawinak hlohter rero hi mi milai ih atnak bik pakhat asi. Bawipa ah thlawsuah ziangkim nuam in cen uhsi.

 

3)      Thawlsuah comi cenmi thawn midang lungawiter:

Milai hnenah Pathian in thlawsuah in pek tikah kanmah te nuamcen men dingah siloin kan kiangkap, kanmah thawn a pehtlaihmi le kanhman hmangin Pathian in thlawsuah a pekduhmi pawl hnenah Pathian duhdawt zangfah lainatnak thlawsuah a luansuahnak ding hrangah asi. Zumtu pawl cu Khrih ih tasak peng kan sivekin Khrih ih mit, kut, ke, kaa, si in Khrih ai-aw, palai si in midang in kanmai nun, thlawsuah comi ihsin Pathian an theih thei nak ding hrangah thlawsuah luansuaknak sidingmi kan si.

 

Pathian thlawsuah na comi siar thiam awla, nuam le lungawi sopar ten cen aw. Cutin nangmah ihsin Pathian thlawsuah midang hnenah luangsuak vivo hram seh!

 

Bawipa Pathian in thlawsuah famkim, dawtthum in lo thlawsuah hram seh!

 

Khrih ah