LOUISVILLE, KENTUCKY IHSIN THLIRVELNAK (Leadership training March 6-10, 2013; @ Louisville Chin Church, Louisville, Kentucky) Louisville, Kentucky hi Indianapolis, Indiana thawn motor in nahzi pahnih feh lawng asi. Indianapolis ah Chin mi 8,000 lenglo kan um tiah an sim. Falam tonghmang 1000 vuakvel kan um tlang ding a zum um. Asinan a kiangte ah Malaysia le India ihsin a ra thlengthar pawl, a umcia pawl pan loin, khawthar an ra sat tikah harsatnak tampi an tawng. Asinan harsatnak lakin an zir vivo tikah pacannak ah le ram umtudan zirnakah an hmang. Pathian in lam a hruainak atakin an hmu sinsin. USA ramah Chin (Falam) tonghmang Kawhhran pawlkom , association tumbik CBANA sungah kawhhran sungtel 22 (23rd nak in an dil lai) an um. CBANA sungah a tel lo pawl thawn cun USA ram sungah Chin (Falam) tong hmang kawhhran 30 lenglo kan um zo tinaka si. Kawhhran tamsawn cu sungtel maltete an si cio. Ziangtin hmailam saupi khua kan khang in kan pehtlai aw ding, kan sichih aw in kan tungding aw tawn ding, ziangtin community pawlkom sungah kan sihcih aw ding, ziangtin kawhhran kan kairuai aw ding, miphun pakaht kan si nak langter in ziangtin ramthar nunphung bang aw ten kan zir in kan kenkawh ding, ziangtin kanmah Chin mi lakah siseh American milesa pawl thawn siseh kan pawlkom aw ding, tvp ruat ding, tuahfel ding tampi a um. Kan dunglam kum 10 sungah a burhlawmpi in Chin mi USA kan thleng. Kan thlennak hmun hril tikah zo ih thurawn kan lak le a tha bik ding, zo in kan thatnak a thei bik ding, zo kan rinsan ding, tvp hril anhaiza in kan mipi pawl kan um ruangah tlacawp ringin refugee agency pawlin in retnaknakah mi tampi kan um cio. Kan thlennak kipah nuntu khawsakdan zir in thinbang in mi tampi kan um. A thlengcia kaihruai aw tu um lo nak sinsin ahcun a tul lo pi in kan caanpualtha kan sun phah in liamkuan khal a tam. Hmailam ah teh a tuvek in hmun le khua kan tekdarh hrih ding maw? A thleng lai ding pawl teh refugee agency pawlin an retnaknak ah an hngat aw cio ding maw? Khua ruat that a tul. Louisville Chin Church ah leadership training lamah hersal sehla, Pathian kutcak a langmi lungawiza asi. Ziangtin pawlkom kan kaihruai aw ding, a hnget khoh mi bulpak, insang, pawlkom nuntu khawsak, pawlkom sihcih awknak le kaihhruai awknak pawl Pathian thu vekin milai nuntu khawsak, pawlkom pehtlaih awkdan pawl zirh awk, relkhawm, ruahdan hlawm aw in thutha hawltlangnak asi. Chin ram, Kawlram sungah um lai vek si loin dinhmun a thar, nuntu a dang, tuanvo a thleng awk theh tikah ramthar ah ziangtin kan nung ding, cozah pawlkom le cozah a silomi pawlkom pawl thawn ziangtin kan nung in kan khawsa ding, tvp thu tampi zir kan tul, thansohpi kan tul cio asi timi cu zapi te lungkim mi asi. Pakhatnak ah lungawi umza asi mi cu, Chin mi unau pawl, nulepa, fala tlangval, nauhak tete pawlin Pathian duhnak kan neihmi hi asi. Asinan kan biaknak hi mibur biaknak, cawlhni voikhat khawm le biaknak cangvaihnak ah tel men lawng si loin Bawipa thawn bulpa caan fianhrial hmangin biak awknak nei in, bulpak, insang tin ah rinsantlak zumtutha si thei dingin kaihruai awknak, kan umnak khua le ram, pawlkom cio ah Pathian Thlarau kaihhruainak in Pathian rian in, dandinglam thlun in le nunphung mawi nunpi le kenkawh in thansohnak lamzin ah nunthiam ding a thupi. Pahnih nakah cun zumtu unau, miphun pi tlaihsan awknak kan neih mi a tha. Khawkhat ah a thleng le umkhawmtu pawl cu Chin ramah rak thei aw dah lo khal asile USA ram kan thlen tikah kawhhran khat, khawkhatah khawsa tlang in ulenau vekin kan theihmi thiltha hlawm aw tlang in kan theih mi siatnak hrial tlang in kan tlukbah can ah tungding aw tawn in nun tawm aw tawn in nundan kan zir cio mi hi lungawinak ngaingai, kan zumnak in in zirhmi le kan pupa san lai khawpi venghnen bawmbawi awknak nun kan neihmi asi. Sunzawm thanter vivo uhsi. Cun khawsung pakhat, kawhhran pakhat sung lawng si loin khawleng, le mai local kawhhran lenglamah miphun pi, Khrih ah le miphun ah unau pawl thawn sihcih, pehtlaih awk hi kan zaten hrang thatnak le Pathian duhmi asi ti khal zapi ten lungkim tlang mi asi. Tahthimnakah, Geese vate pawl hi anmahte a pak in an zam hnakin a bur in an zam tikah a let 72% hla an zam thei ti asi. Cuvek in Chin miphun pawl lei killi ah a tekdarhmi pawl, Khrih ah le Miphun ah unau asimi pawl, hmun dangdang, state dangdang, ram dangdangah then awkin umhmun khuar cio hman sehla, santhar pehtlaih awknak a tha, pawhtlang awknak, lamtluan vah sukco len awknak a awlsam tikah sihcih awknak neih thei cio a tha. Pathian duhzawng le zapi thathnemnak, caksins in Pathian kan rian theinak asi ti cu zapi te lungkimmi asi fawn. Ziangtin kan pawlkom in kan sihcih aw ding, ziang kan tuah dingih khuitawk lamzin ah abur in kan feh ding, ziangmi kan hmuitin ding timi cu miphun pakhat, zumtu burpi pakhat hrangah Pathian hnen ihsin sunmang, vision, hmuhnak a neitu, hruaitu tha, mifim Pathian in in pekmi kan nei asi. A burin a ummi ramsa bur pakhat hman hi sersiamtu Pathian in hruaitu, lamzin hmuhtu nei loin a tanta dah lo. Zocio khal kan hruaitu pawl thawn kutkai in Bawipa rian tlang dingah thukthun hlah uhsi. Khuitawk ram, state, khua ah ziang kawhhran hmin pu in ziangvek rawngbawlnak kan nei khal asile a thupi bikmi cu kan miphun Pathian, Bawipai lungawinak asi. Curualrual in nitin leitlun nunah a thangso mi, zohthimtlak miphun, kawhhran, pawlkom ,insang, bulpak nun kan neih ding hi asi. Kan umnak hmun cio ah danding lai le nunphung pawl thlun danah siseh insang le bulpak nundan ah siseh sumpai laklutnak le hmannak ah siseh zohman in sawisel theih lomi nunmawi, Pathian le miphun cawimawi in kan umnak khua le ram cio ah rinsantlak rammi (efficient citizen) kan si ding a thupi asi. Cutin tungding aw thei dingin a thleng hmaisa, fim hmaisa, thei hmaisa, nei hmaisa, pawl to men loin kan mah le kiangkap cio ah thleng thar le bawm tul tete pawl hnenah Pathian hmanrua tha, Bawi Zisu ih a kut, a ke, a mit, a hnar, a kaa, a taksa peng si in mahle covo, Pathian pekmi cio vekin taimak suah in bawmbawi aw tawn in tuan cio uhsi. Thlengthar pawl khalin kiangkapah mah le miphunpi, Khrih ah ulenau pawl tlaihsan in nunkhat nun ten khuasat tlang in mibur thazang cak sinsin dingin kan miphun Pathian hmin sunlawinak hrang hawl tlang cio uhsi. Pathian in kan miphun, pawlkom, insang, le zumtu bulpak nun thlawsuah a pek duhmi, a tumtahmi tlamtling lo dingin kham thei tu Pathian in a sersiam lo asi ti thei in Bawipa cu kanmah bulpak nun, insang, pawlkom, mibur lakah lalnak pe in amai lam hruainak ah kekar tlang cio uhsi, tiah thlaza cam phah in lungawinak awmsung tongkam malte ka tarlang duha si. Khrih ah le miphun ah, |
WELCOME TO MY PAGE > 2013 Cahram >