2013, X’th Suahni Cam Nun Thlirfelnak March 8, 2013. "Ka nu, ka nu, ka ning tuk, a thim tuk, suah ka duh thlang, tiah ka ke ka sirh ciamco ih ka nu ti ngaihnak thei nawn lo in i- hrinsuak. Ka suah veten ka mit ka hun meng cu ludum hmiarhmiar in sungkhat pawlin inrak hmuak" tiah lo sim sehla in zum pei maw? Pathian in damreinak ipek rualrualin thu tampi iruat ter. Milai nunah dawtthum a um: nui pumsung, leitlun nun le kumkhua nun. Nu pum sungah hrilmi ka nei lo, ka nui umnaknakah ka um, a ei mi ka rak ei ve. Leitlun nun cu duhhrilnak hlirin a khatmi asi. Thihnak le nunnak ka hmaiah Pathian in a ret ringring: nunnak ka hril. Hi lei taksa nunnak a cem hnu ah kumkhua nunnak a thawk ding. A siat thei lomi kumkhua a nung dingmi ruangpum thawn thuam ka si ding. Ziangkim sersiamtu Pathian insangah fapa dinhmun in Pa Pathian, Fapa Zisu, Thiang Thlarau thawn sankhuk in kan lengtlang ding. Cui hlei ah zumtu Pathian fale dang pawl, Abraham, Jacob, Joseph, Noah, Peter, Paul, le tuisan zumtu unau pawl, Baptist zumtu pawl, gospel pawl, beterian pawl, AG pawl, le leitlun killi ihsin zumtu pawl, mirang pawl, midum pawl, tvp miphun cikim in Pa Pathian thawn kan um, kan nuam, kan tlangleng tlang ding. Leitlunah thenthek awknak a phun um hman sehla, nunau, mipa, nauhakte pawl, midum, mirang, mi farah, milian, tvp, vanram ahcun kan zaten lungawi a kim ding. Kan duhdawtmi pawl thin kan naa ter nawn lo ding, kan duhdawtmi pawlin kan thin in naa ter nawn lo ding. Tlaksammi a um lo ding. Duhbetmi kan nei nawn lo ding. Awh, cui hlei ah Sibawi le lawyer hnatuan a um nawn lo ding! Bawipa thangthat in kan aw neihsun suah in lungawi diriam in kan nung ding. Leitlun kan um sung cu baptisma malte, thit umnak malte, then awknak malte, thlanmual vui awknak malte, khualtlawnnak malte, a um hrih ding. Kan parah thiltitheinak nei nawn lo, Satan le a ho pawl, thlarau sual pawl cu tikcu rei lo te sung mibum ding hawlin in hnaihnok hrih ding. Nu ih pumsung kan suahsan tikah kan dinhmun a thleng aw vuarvi: duhril theinak kan nei, thim ihsin ni eng kan hmu. Nui pumsungah kirsal a duhtu zohman an um lo ding. Hi lei taksa leitlun kan suahsan tikah mangbangza thleng awknak asi sinsin ding. Aw, cui ni cu a va cak um em! Sersiammi ziangkim in cui ni cu kan hngak sawn asi. Sungkhat laina, miphunpi, leitlun milaipi pawl an ten cui hmunah thlenpi thei dingin Bawipa thawn kutkai in nitin tuan cio uhsi. Nun timi hi ziang so asi? Nunnak ih hram, Zisu lawngah nun timi hi san nei a rak si. Ka nunnak cu Khrih ah zohman le zianghman ih hnaihnok thei lo dingin thuhruk in a um zo. Leitlun ka khual tlawnnak cu alaang te lawng asi. A rei lo te sung ka umnak ding thu ruangah thinhar le ruahhar, phan ding zianghman a um lo zia Bawipa Thlarau in ka sungah a fianter zo. Nunnak ih hrampi, Khrih ah ka nunnak cu pehzawm in a um zo. Ka nunnak a neitu ih tumtah hrangah leitlunah rei lo te sung caan pek ka si. I sersiamtu, I neitu, le I khawltu, ka Bawipa ih duhmi le tumtah famkim ter dingin nitin nun ka hmang. Ka hmuhtawnmi ziangkim, ruahnak, hmuhnak, theihnak, hmuhtawnmi ziangkim hi Bawipa ih tumtah famkim tertu an si. Ka nunah Bawipa ih tumtah le duhmi a famkimter hi ka lungawinak sangbik asi. Saal sungah a tangmi pawl zalennak Thuthangtha sim dingin leitlun caan tawite ka nei lo hrih. Ka sungah hna a tuantu Thlarau in Pa Pathian ih tumtah a tuan theh tik ni ah Pa hnenah laksoh ka si ding. Ka leitlun nunah Pa Pathian in a tumtahmi pawl dal thei tuding Pa Pathian Sersiamtu in a sersiam lo. Ka sungah hna a tuantu Khrih ih Thlarau hnakin a cak deuh Pathian in sersiammi a nei lo. Mangbangza Pathian ih nunnak, mizia, le huham cahnak ttawmpitu nun hi ziangtluk sunglawiza so asi. Acuih mangbangza Khrih ah milai nun sunglawi nunpi thei lo dingin hmanrua phunphun thawn salsungah Satan in a hrentarhmi pawl zalen ter dingin Khrih ih Thlarau ka sungah hna a tuan asi. Aw, leitlun minung pawl, Khrih Thlarau ih luahkhat nun, Khrih ih lalram nun, Pa Pathian thawn duhdan tumtah bang aw in lungrual ringring nun, duhmi le nuam timi bang aw in tangdor nak in Bawipa thawn nitin nun hi ziangtluk mangkhung sunglawinak milai nun so asi? Khrih Thlarau ka sungah a lal tikah pawnlang nun, mithmuh theih le hmuh thei lo leitlun thil um le a cangmi pawlin a hnaihnok thei lo mi hnangam daihnak, duhdawt zangfahnak in a luangliam nun cu ka sungah a khat asi. Khui ramah, ziangvek dinhmunah, zovek milai thawn, ziangvek dinhmun le sinak, duhmi maw huatmi, tlacam in maw, puar le tlai in, nitin leitlun taksa parah a cang mi pawl in a hnaihnok thei lo mi nun, zianghman in a kham thei lomi tumtahnak le damsan thawn nitin Bawipa dungthlun hi milai nun in a phu lo mi Pa Pathian zangfahnak, zumnak in Khrih ah laksawng sunglawi ka co mi asi. Suahni campha kum siar khal a nuam hlei ce. Bawipa Pathian in himi casiartu zapi ten lungsungah A Fapa, Zisu Khrih ih Thlarau lalter hram seh! |
WELCOME TO MY PAGE > 2013 Cahram >