ZESU IN THUPHAN A PER MAW SI?

 

Thlipi daiter: Math. 8:26; Cutikah Jesuh cun, “Ziangah so cuticun nan ṭih? Nan zumnak a va mal so!” tiah a ti. Cule a tho ih thli le tilet cu dai dingin thu a pek; hmakhatte ah tili cu daitein a um sal.

 

Zesu tongkam pawlin ziangtluk zumnak ka nei mal ti i fiangter sal tikah ka tisa thinlung cawpcilh in ka ruangpumpi hi halral thawinak vekin maicam parah Pathian sunloihnak ah pek hi Pathian in a duhmi sisehla ka va duhso ka ti theu.

 

Nangteh cek aw fel hnik aw, Zesu na zum taktak maw? Zesu in i zumtu pawl nunah cun a lang dingmi tiah a sim vekin na nunah a lang ve maw? Kan insang, kan pawlkom, kan khua, kan ram, kan miphun, kan kawhhran, Khrih Zesu ka zum titu pawl nun zoh tikah Zesu cu thuphan per a bang pang maw?

 

1) Nan hnenah ka um kumkhua:

   i) "Nan hnenah ka um ringring ding" a ti.

Math. 28:20, Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti.

ii) "Pahnih pathum nan pumkhawmnak ah nan hnenah ka um ve asi"

Matha. 18:20, Ziangah tile ka hmin in mi pahnih siseh, pathum siseh, nan pumkhawm tikah nan hnenah ka um ve a si,” tiah a ti.

 

Zesu thawn na nung ringring maw? Cawlhni khawm tinte ka lo umpi ding a tilo, "san a cem lai hlan lo ka lo umpi ringring ding" ati. Zesu um lovekin kan nung theu maw? Biaknak lam cangvaihnak phunphun, thusim thiam thatha, kan phur zet theu. Kan sung muril ah hngangam daihnak, duhdawtnak, lungawinak, nun luangliam thawn kan sungah Khrih a umzia kan nunah a lang maw? Kan nunah midang in Zesu hmuihmel an hmu maw? Miphun dang pawlin Laimi an hmuh tikah Pathian an cawimawi maw? Zesu an hmu maw? Kan hnenah a um maw? Kan hnenah a ummi Zesu hnakin kan lungawitertu thildang a um maw? Zesu hnakin kan duhsawnmi thildang a um maw? Infialmi vekin a thuthangtha sim ding kan sim maw? Kan nun an zoh tikah Zesu cu thuphan per a bang pang maw?

 

2) Thildang hmuahhmuah ka lo pekbet ding:

Matha 6:33; Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si.

 

Thildang hmuahhmuah pek kan si maw? Kan silo asile Zesu thuphan a per maw, kan hawlmi a diklo tinak asi! Zesu cu Pathian asi ih thuphan per thei asilo. Laimi Khrihfa ti aw pawlin ramdang feh, ramlian ah feh kan duh ih Malaysia ah kan feh tluk in aram le felnak hawlin harsa tuar, sumpai cem, Zesu hrangah tuar ngam sehla, missionary ah leitlun ramkip ah feh sehla Pathian in thildang hmuahhmuah in pek ko lo ding maw? Kan thlennak kipah amah Zesu thawn bulpak pehzawm pawlkom awknak hnakin thildang kan hawl lai maw? Aram le felnak hnakin thildang kan hawl sawn maw?

 

3) Keimah izumtu cu a thinlung sung ihsin nunnak tiva a put ding.

John 7:38, Ca Thianghlim in ‘Zokhal keimah i zumtu cu a thinlung sung ihsin nunnak tiva a put ding,’ * tiah a ti vekin a si ding,” tiah a sim.

 

Na sung ihsin nunnak tiva a put maw? Zesu thuphan a per maw? Zesu cu Pathian asi, thuphan per thei asilo. Kan thinlung sung ihsin huham, khawruah, tongkam a suakmi pawl hi a theitu le a pehtlaimi pawl hrangah thunung tinung asi maw? Kan mai nun in a pehtlaihmi pawl parah, kan ciahnehmi pawl parah nunnak tinung a luang maw? TIkhur pakhat ihsin tikha le tithlum an suak tlang thei lo. Khrih zumtu pawl lungsung ihsin nunnak tiva nung a suak ding tiah Zesu in a simcia mi asi. Nang na thinlung sung ihsin ziang tiva a put?

 

4) Keimah i zumtu cun ka tuahmi hi a tuah ve ding; hi hnakih thil mak sawn hman a tuah ding

John 14:12; Thungaite in ka lo sim: Keimah i zumtu cun ka tuahmi hi a tuah ve ding; a si, ka Pa hnenih ka feh ding ruangah hi hnakih thil mak sawn hman a tuah ding. 

 

Zesu in ka tlungthluntu 12, pastor, evangelist, missionary pawl atilo, "keimah i zumtu cun" ziang a ti? "ka tuahmi hi a tuah ve ding; asi, ka Pa hnenih ka feh ding ruangah hi hnakih thil mak sawn hman a tuah ding. 

Casiar tu lakah "Zesu ka zum" titu kan um pang maw? Na sive asile Zesu tuahmi vek, thilmak, Zesu tuah mi hnakih maksawn na tuahmi a um maw? Zesu maw thuphan per, nangmah? Zesu cu Pathian asi, thuphan per thei asilo.

 

5) Tlanghman a tthawn ding.

John 17:20; Jesuh in, “Nan zumnak a mal ruangah a si. Fiangtein ka lo sim: anṭam ci tia zumnak nan neih ahcun hi tlang hi ‘Hitawk ihsin khi tawkah ṭhawn aw,’ nan ti ahcun a ṭhawn ding. Ziang hmuahhmuah nan tuah thei ding a si,” tiah a ti. *

 

Antam citia tal zumnak na nei maw? Na nei asile tlang na thawn ter dah maw? "Ziang hmuahhmuah nan tuah thei ding" ati. Ziang hmuahhmuah na tuah thei maw? Ka zum na ti fawn si ahcun Zesu maw thuphan per, nang mah? Zesu cu Pathian asi, thuphan per thei asilo.

Pathian in tuahter alo duhmi tuah thei lo dingin a lo khamtu tlang a um lai maw? Thiltha tuah thei lo dingin a lo daltu tlang a um lai maw? Na zumnak in a thawnter zo maw? A thawn hrih lo asile, zesu maw thuphan per, nangmah?

Khawruah harza Zesu tongkam pawl hi Khrih zumtu pawl nunah lang hramseh!

Mark 9:24, "“Ka zum a si; ka zum kim lonak i bawm aw,” tiah a au ciamco." Hipa bangin zum ti aw cingin zum taktak lo, kan mai ruahnak fangfangah a hngat aw mi zumtu ti aw pawl, thinlung kekkuai in Pathian hnenah bawmnak dilin thlacam uhsi.

Khrih ka zum tisi leitlunah Khrih hmin ti mualphotu men ah leitlun nun hnakin amai hnenah kan feh lohli a tha sawn lo ding maw?

Leitlun hmun tintian, ram killi ah a thlengmi Khrih zumtu, Khrih in a duhdawtih amai nunnak rori in a runsuakmi Pathian fahniang le tla, Pathian in in umpi lo vekin kan thei aw pang asile in umpi lo asilo, in umpi zia kan thei lo, kan nunpi lo sawn asi theu. Kan thinlung sungah thildang in hmun kautuk khua a luah tikah kan thinlung sungah thildang duhsawnmi nuam ti sawnmi kan neih tikah, Khrih hnakin kanmai cahnak le sinak pawlkom ah kan hngat awk sawn ruangah Khrih ih Thlarau cu riahsia in kan umter ih amah thawn bulpak pawlkom awknak a cat sawn theu asi. Khrih duhbik uhsi, amah ah nuam aw uhsi, a duhmi tuah hi duhbik uhsi, a duhmi duh in a huatmi hua uhsi! Leitlun khuitawk ram kan thlen khal asile Khrih hmin ti mualpho tertu, Khrih cu thuphan per vekah cangtertu siloin Khrih ih mizia phuansuah awknak, a duhmi tuansuaknak hmanrua tha si sawn uhsi!

 

Khrih Zesu in taksa in leitlun a um lai ah a tuahmi thilmak pawl hnakih thilmak mangbangza a phunphun amah zumtu pawl nunnak sung ihsin tuah a duh ih a tuah rero zo. Nang khal, na zum ih na sungah amah na lalter asi ahcun Zesu in a tongcia vekin na  nunah a tuah tengteng ding asi.

Pathian Thlarau in a lo umpizia lo theihter sinsin hram seh; cuticun Zesu tongkam vek cekci in na nunah thleng hram seh! Zesu thawn thurual ringringtu si hram uhsi!

Pathian thu simmi rak ngai ve dingin rak khawm ve aw, lole online ah rak ngai ve aw.

 

Khrih zumtu pawl, nan zate nun ah Khrih huham phuangsuak aw vivo hram seh!

 

SAWMNGIARNAK:#1

* Falam pi e sialso ti-ni kan nei lo
* Meifar cu thimlakah van asi. 

"Falam pi e sialso duaini kan neilo" ti ah hla a rak saktu pawlih tesinfa pawl cun "Falam pi e sialso ti-ni kan nei lo" ti in hla an sak thlang. Ziangruangah? Dodal awknak, upa upathna thiamlo, hruaitu dungthluntu an um nawn lo, a burkhawm in um kan thiam nawn lo, kan lakah zo ih thu ngaiin zo ih dung kan thlun ding ti kan thei nawn lo, mahte mi fimbik vekah kan cang theh: Nulepa pu/pi lungfim upa pawl thurawn lak kan thiam nawn lo, fimthiamnak lamah Phunhra kai lai in Ph.D. le Master degree nei pawl parah saya tuan kan tum, thlaraulam mitdei hrih lo pawlin anmah thlarau rawlcawmtu zirh kan tum, tulsamnak ah bawmmi pawlin kanmah bawmtu hngawngtan kan tum, rilrawng pawlin kan pum a puar veten kanmah rawl petu thah kan duh, duhdawtnak Pathian riantu ih huatnak thlaicih kan tuh, Khrih ah pumkhat sinak thusimtu pawlin thentheknak kan suahter, dingfelnak le duhdawtnak hnakin lamtang tuah awknak cawisan asi, dingfelnak lamah khrihfa kan si nan pupa rirai bia pawl hman kan tluk nawn lo, hnam cimitnak, fehsualnak, daan le duun umlo nuntu khawsak, phunzainak, thiltha tuahmi hnakin siatsuahmi tamsawn, relsiat thangsiatnak, hi pawl hi santhar thuanthunung eisiattu nget, nathrik, khensar vek asi. 

Tahtthimnak: Nunau nauhakte pakhat cu pawpi in a deh ih an inn hnuai ah pawpi in a sa a ei rero laiah nunau nu te ih pa cu meithal thawn "pacangtha ka si lo maw" ati ih hmuansungah thiahlei kapthat dingin a hacang a rialin thiahlei cu a dawi rero. 
Kan miphun thuanthu siatsuahtu, Thlarau Thianghlim hnatuan daltu, ziang asi ti thei loin a thupibik kham/daltu ah a thupi lo sawn kan aupi, kan buaipi rero. Kan mipi tampi hellram lamzin ah an liam rero laiah doctrine le kawhhran pawlah kan buai; kan miphun thuanthu tong le calai nunphung zir thei loin kan um laiah "o" "aw" 'lalpa" 'bawipa" ah kan buai. Nauhak bik khalin mifim bik vekin hruaitu dodalnak tongkam a khaksuak zohzoh. Zuri khalin pastor sawlselnmak a zitcawk loin a thei. Santhar mino pawlin ram le miphun thuanthu nung tuahtha dingin pek awknak an ruat paih nawn lo, hnihsuak le nuamnung sernak, reilo te hrang nawmnak, mai bul hrang lawng an ruat. tvp. 
Hudson Taylor in "The good is the enemy of the best", "Thiltha cu a thabik ih raal asi" atimi vek kan san minung pawlin kan thleng zo. Thiltha satliah cu nauhak mitdei pekte khalin an thei, asinan thiltha bik cu hruaitu, Pathian hriakthih pawlin an thei. 
Khui lamzin kan zawh? Na fehnak lamzin kha nahrangah a nuam in athlum zet laiah kan miphun thuanthu lamzin khamtu, Thiang Thlarau lamzin khamtu asi maw? 
Santhuanthunung in tuisan thangthar nonawn pawl nasaten sawmngiar kan si! 
Sim duhsawnmi cu, "Meifar cu a thimnak hmunah van asi." "Leitlun eng nan si" tiah Bible in zumtu zapi ten kan umnak kipah eng ding kan sizia in sim. Zumtu diktak, Pathian fate pawl, kan kiangkap umnak kipah thim cu bahbal in eng vivo uhsi! Khrih ih ennak cu kan sung ihsin leitlun pumpulluk tiang engsuak vivo hram seh! 

• "God and one person is enough to change the world upside down" "Pathian le minung pakhat tangrual cun leitlun linglet theh ko thleng awknak an thlen thei asi. 

• "Are you that one person?" Nangmah cu cui mi pakhat cu na si maw?"

SAWMNGIARNAK #2

Kan Ok maw?
"Mihrekkhat in kan tha tuk ko, kan thuanthu hi santiluangin a fen dingih kan tha ko ding" tiah an ruat. Cucu a thazawng hmuhdan "positive thinking" asi maw? 
Tahtthimnak thawn sim hnik uhsi:

1. Kan mitih ziangtiang a hmu timi parah a hngat aw: ttnk: Voikhat cu naute tong thiampekte cu daiper sung ihsin a ek a pawt ih a kut in a tham. A nu ih "Baby na ok maw? a ti tikah a lu a su ih "ok, ok" ati. Naute hrangah ek tham rero tla a ok ko. 
Ziangvek huap in thuanthu kan thlir timi parah kan khawruah a thum aw. Pathian le sersiammi karlakah, leitlun khawmual killi huap in khua kan ruat tikah le lai khawte pakhat dinhmun in khua kan ruat tikah kan lungawi tawk a bang aw thei lo. 

2. Lungthlitum in ziang a hmuisel timi parah a hngat aw: ttnk, Voikhat cu lairamah ram an tawi ih miburpi sakhannamnak ah savum le sahrang kap dingin hruaitu pawlin an ho laiah an khawsung mi hmukhmak pakhat in sawrsia a kap ih, a meithal awn ring tukah sapicang cu an tlan theh. Mipi tawnkhawmnakah amah cu a lungawi tukah a hnihmurhmo. Midang hmuahhmuah cu an riahsia theh, an tong paih lo. 
Ziang tumtah kan nei timi parah kan khawruah a tum aw aw. 

3. Hmailam mit maw dunglammit in in mawng timi parah a hngat: ttnk, khua pakhat cu kumtinte salurocia an aihsal ringring, saluro hler in an lam rero theu, sathar kap thei an um lo ruangah pharpar ah an tar zomi saluro an aih ih an lam zawk rero. 
Mi tampi in a thangso rero laimi minung kan cawisang, kan dinpi, upatnak pek in kan thlun lo ih zianghman thathnemnak nei nawnlo, a liamcia lawng upat le cawisannak kan pek rero mi hi mipun tumsuknak a si. 

4. Dodaltu, huatnak tipungtu, nundiklo lamtang tuah awknak. Ttnk, Absolom a lallai ah Israel mipi tampi cu an lung a awi zet, David lallai hnakin kan nuamsawn ding an ti. 
ZIr: Huatnak, le midang sawiselnak thawn dinmi pawlkom cu cawngpawl thawn vunnel parah innsak mi vek asi. Rei a awh asile thiltha a siatsuahmi, a kham, a dalmi a tam deuhdeuh. 

5. Pathian Thlarua le biaknak thlarau sia thleidan thiamnak: tnnk. Mizo pawlin "Pawl ah chuan sazu cauh a awm" "Pawl ahcun zinghnam lawng a um" an rak ti. Khawtin hmun dangdangah feh tahratin a umcia mi kawhhran lungrualnak siatsuahtu hi Pathian Thlarau asi dah lo, biaknak thlarau sia asi, Mizo pawl tongkam sang cun "zinghnam thlarau" kan ti pei. 
Zianghnam thlarau in in nuai rero lai asile cangpawl sungah kan buai rero lai ding. Thir le sui innpi kan saksuak thei hrih lo ding. 
Zir: BIaknak thlarau le Pathian Thlarau cangvaihnak, lamhruaidan kan thleidang thiam hrih lo. Zinghnam thlarau cun pawl, lamtang tuah awknak, biaknak cu hmanrua ah hmang tahratin a cangvai. Pathian Thlarau cu Khrih ah pumkhat sinak, duhdawtnak le rawngbawlnak a ti karhzai. Zinghnam thlarau cun amai lamtang tapoh cu vanah a hlir dingin amai lamtang ah a ruatlo mi poh cu a se thei bikin a nam thla ringring ding. Miphun le Khrih ah pumkhat sinak siatsuahtu asi. 

6. Miphun dang pasal nei. Laimi fala thatha miphun dang pasal nei an tamzet. A biktak in Falam misa pawl hi innteek umlo, miphun dang ngaina mi kan si tile a sual lo ding. Tahthimnakah, Mizoram ah Tedim peng, le Thlanthlang/Hakha peng ihsin a thawnmi pawl cu anmai tongten an tong lai. Ngopa district, Lakher district, Lai dictrict tiah Mizoram sungah an nei. Kannih Falam milesa tio ral ah a ummi pawl cu anmai tong hman an thiam nawn lo. Miphun dang ngainatnak, mah le mah nam thlak awknak lungput sia kan hlawn thei hlan cu mualphonak in dung in thlun rero ding. 

7. Kutdawt lungput: Miphun pitling lalram pakhat nei ding cun siangpahrang, mipi, le leiram an nei. Leitlun miphun pitling hmuahhmuah in anmah lakah Pathian hriakthih hruaitu upat hna an thiamih anmah in an siangpahrang tulsammi le ei in, inn le lo tiang an tum theh. An siangpahrang umnak ding innpi tiang an saksak. Santhar san minung, Laimi pawlin siangpahrang kan nei ding tinak si loin kan miphun hruaitu upa, lungfim Pathian hriakthih upat hna, humhim hna, dungthlun hna, support hna kan thiam lai hlanlo, mualpho nak in dung in thlun rero lai ding. Mahte a hlawm tete in kan umih kanmai lamtang lo pohpoh nam thlak kan tum, kan thangsiat awk rero lai asi, kan danglam cuang lo ding. Mi senpi zapi huap thei hruaitu upa lungfim, upat hna, an thu rawn pekmi thlun hna, an dung thlun hna kan thiam kan zir lai hlan lo, a cikpalak in sakhia a dangah cawnkiang a dangah kan si hrih ding. 

8. Falam khawrawp, rihzin ciarbek, pawl hi Laimi (Falam mipi) mibur lungput langtertu asi: "Khawpi mawinak in khawsung mipi pawl mibur lungput a langter" ti asi. Cikpalak ih mai hrang lawng ruat nawn loin senpi vangtlang hrangah tangdornak in khat le khat kutkai in upa lungfim le Pahtian pekmi hruaitu pawl dungthlun in nuntu kan thiam tikah kan khawpi cu ceimawi asi dingih kan lamzin cu a ngil ding. 

hruaitu tha dungthlun kan thiam tikah hruaitu tha Pathian in inpe ding. Kan thuanthu thusiattu ziang asi ti a hmufiangtu pawl thurawn pekmi la in kan neihmi thazang, sumsaw, pawlkom pehtlaih nak pawl cu thuanthu tuahtha tu a thupibik ah a tambik hmang in kan pek awk tikah kan mibur, miphun thuanthu cu tuahthat asi ding. 
Nang le kei kanmah le kiangkap, bulpak nun cio ah ziang kan bang? Kan thuanthu ih khuitawk ihsin ziangcin kan thlir ih ziang kan hmu, ziang kan fehpi, ziangtin sawmngiarnak kan cohlang ve ding? 
"Pathian le mi pakhat lungrual cun milai thuanthu linglet ko an thleng asi'. Cui mi pakhat cu nangmah na si maw? 

I have walked and driven thousands of miles, and have written thousands of pages, but I have not started the end yet.

SAWMNGIARNAK #3. 

Kan Chin society cu innpi pakhat vekin zoh hnik sehla;

Innpi cu a tlunkhuh, a phar, a zial, sangka te sangka pi, in rawng mawite a um theh lawng si loin sutpi ban, bante banpi, hram hnget zet kai awktu a um theh lawngah innpi hnget, innpi tha asi. 

Kan pupa san laiah senpi vangtlang bungrua rualran ten zem awknak, mipi siatsuah tu raal donak, kum 18 kim tapoh miphun raal do dingin tiar ciannak, ram le ti le tlang humhalhnak, nuncan mawi nupi pasal neih awknak, kum upapa ten upat awknak, nunau le nuhmei ei hawl thei lopawl zoh le sawmdawlnak, zapi lungrual tlangmi a tha a sia, nuncan ziaza khaikhawmtu, cawisan mi le ningzah thlak nun,rirai felten be thei dingin kumtin uikiu le khamrang rai thawinak, cu pawl hmuah hmuah hi kan Chin/Laimi society ah famkim thehpthep in an rak nei ih kan CHin mipi, khawsung mi pawl liangparah ram le miphun thuanthu cu zaahza tuanvo an rak lakmi asi. 

Santharsan, Khrihfa san ah kan upa,mifim thurawn, nulepa pawlin ding pawlin society ah hmun an nei nawn lo, an fimthiamnak, tesinfa hnen pe sawng dingin vangtlang bungrua a um lo; ram, tile tlang humhalhnak hrangah senpi vangtlang in lairel theinak an nei nawn lo, laimi khawsungmi pawlin an liangparah tuanvo an phur nawn lo, thuanthu tuahtha dingin zohman in tuanvo an la nawn lo, tantami khua le ram vek asi zo. Farah zawnzai nauta thlauthlak vivo asi, "a thi thi thi a nung nung nung" keimah ka pum a puar takah ti san kan suak zo. Nuncan ziaza ah nupi pasal neih awknak, dingfelnak zoh asile dingnak Pathian betu tuisan minung pawlin kan pupa dingfennak lamah mi hminthang, paraaltha pawl dinhmun kan thluk nawn lo, kan thuanthu kan zir thei lo, kan tong kan calai zalen zetin tlawngah kan zir thei lo, kan nunphung mawi kenkawh dingin cawisannak hmanrua bungrua kan nei lo, kan biakmi Pathian thu vekin society tundin theih asi lo. Sumpai le canpualtha ngahnak ding asi ahcun mino upa, fala tlangval ti umlo, a tar a tawt ti umlo, ningzah le nunphung, daan le dun ti umlo, Pathian nung zahnak a um nawn lo. Duhdawtnak Pathian betu pawl thinlung cu huatnak le thleidannak in a luahkhat theh, miphun ah le Khrih ah pumkhat sinak a hlo zo. Khuahlan ah kum 18 kim pohpoh miphun raalkap an rak si, tuisun kum 18 minung pawlin an miphun hmin, tong, le nunphung thei nawn lo an tam tuk zo, an liangparah an miphun thuanthu an suang nawn lo. 
Kan society cu a ruangpi lawng a taangmi, khuahlan di innpi, ruah a zun cuupcomi, a ban a sawn rero mi, a sutpi ban a um nawn lo mi, a phar a bal theh zo mi, zinghnam le vate in zaan hriahnak ah an hmanmi, cukcu le hnahfa buu in a khatmi, belrua kuai le puansia kang rimhmui pawlin meikhu zing ciciai in a khutmi, thli a hran tikah a hnin aw duldo mi, disapthla ah caangvat tawm in milai thizuk dingin an van rero nak hmun, insung lutnak ding disapthla tiang ciarbek hlir in a khat mi, insungah ruahzun mi thawn a ciar theh mi, zial a moih theh ih a sung umtu pawl ziangtik ah ka tla ding tiah thlaphang zetin an um rero nak hmun, zan ih tikah vanpar arsi siar theihnak Tenglam ih innpi vek, zan thlapi eng in insung tiang a kap eng sersermi , misual mitha lo pawlin inn sungah an duhduh thil le ri la dingin an lut an suak rero nak hmun, innpi rawp cuahco, meisa kaang ding le thlipi ih hran tluk ding hnak in ding cuahco mi innpi vek asi zo. 

Nehemiah 1: 3 "Cutiih ka suh tikah, saltaannak in a suak ih an khua le an ram a thlengmi pawl cu harsatnak tampi an tong ih an kiangkap ih ummi miphun dang pawl in an hmuhsuam hai a si tiah in sim. Cuih tlunah Jerusalem kulhnak phar pawl cu an cim thluh ih, an ur thluh hnu in kotka pawl tla cu an tuah sal hrih lo a si, ti tla in sim. 4Cuih thu ka theih tikah ka to ih ka ṭap.

Pathian zumnak dik, Bible in a zirhmi cu: 1) Bulpak Pathian thawn pehzawmnak, 2) Mah lemah Khrih ah nungin Pathian rian in nunnak, 3)Mai minungpi duhdawtnak; mai insang, sungkhat, khawpi, miphun, ram le kumpi cozah pawl parah tuanvo neih mi famkim zetin tuan le pehtlaihnak neih, 4) sersiammi ziangkim parah Pathian ih fialmi vekin kilkhawltu tha nun neih, hi pawl hi asi. 

"Pathian le minung pakhat lungrual cun leitlun milai thuanthu linglet ko an thleng theu asi." Nangteh cui minung pakhat cu na si maw?

 

 

ZESU IN THUPHAN A PER LO!

 

Zesu in thuphan a per mawsi timi cu thusuhnak dik asilo; nang le kei in thuphan kan per maw si, ti a dik sawn!

 

Thlipi daiter: Math. 8:26; Cutikah Jesuh cun, “Ziangah so cuticun nan ṭih? Nan zumnak a va mal so!” tiah a ti. Cule a tho ih thli le tilet cu dai dingin thu a pek; hmakhatte ah tili cu daitein a um sal.

 

Zesu cu ziangkim sersiamtu, amai hrangah amah ih sersimmi asi vekin kan parah a thlengmi, kan hmuhtawnmi ziangkim, kan nun hnaihnoktu thlipi khal a daiter thei asi. A daiter lo khal asile thlipi le meipi lak ihsin amai hmin sunlawinak langter thei tu asi.

 

1) Nan hnenah ka um kumkhua:

   i) "Nan hnenah ka um ringring ding" a ti.

Math. 28:20, Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding,” tiah a ti.

ii) "Pahnih pathum nan pumkhawmnak ah nan hnenah ka um ve asi"

Matha. 18:20, Ziangah tile ka hmin in mi pahnih siseh, pathum siseh, nan pumkhawm tikah nan hnenah ka um ve a si,” tiah a ti.

 

Zesu kan hnenah a um kumkhua asi. Zesu kan hnenah um lovekin kan theih awk nak san bik cu a " thupekmi hmuahhmuah thlun dingin" midang kan zirh lo ruangah asi. Insangah, kanmah thawn a pehtlai mi pohpoh hnenah Zesu ih in zirhmi hmuahhmuah kanmah in kan nunpi, kan mah thawn a pehtlai mi hmuahhmuah hnenah kan zirh asi ahcun Zesu ziangtluk kan hnenah a umti lawng si loin kan kiangkap um pawlin an hmu ding asi.

Zesu thuphan a per lo.

 

2) Thildang hmuahhmuah ka lo pekbet ding:

Matha 6:33; Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si.

 

Thildang hmuahhmuah pekbet kan si hrih lo asi ahcun kan hawlmi a diklo tinak asi. Leitlun le a mawinak hawl nawn loin Zesu kan hawlih amah kan sungah a lal asi ahcun a duhmi kan duh dingih a duhdaan in kan nung ding. Cutikah kan tulmi ziangkim cu kan tulnak hmunah kan tulzat in kan tulcanah inpek ringring asi. Amah duhbiktu si in amah lawng hawl uhsi.

Zesu in thuphan a per lo.

 

 

3) Keimah izumtu cu a thinlung sung ihsin nunnak tiva a put ding.

John 7:38, Ca Thianghlim in ‘Zokhal keimah i zumtu cu a thinlung sung ihsin nunnak tiva a put ding,’ * tiah a ti vekin a si ding,” tiah a sim.

 

Kan sung ihsin tinung a putlo asi ahcun kan zumnak in kan nunglo tinak asi; kan zum taktak lo tinak khal asi. Kan khawruahmi, kan tongkam, kan nundan, kan neihmi thlawsuah kan hmansuaknak ziangkimah kanmah thawn a pehtlai tu pawl hmuahhmuah hrangah thatnakbak siarlo zianghman kan nun ihsin a rahsuakmi a umlo ih Khrih cu kan sung nungin zumnak in kan nung asi ahcun kanmah thawn a pehtlaitu pohpoh hnen ihsin lungawi diriamnak, Khrih ih nunmawi, kumkhua nunnak thutak cu a luangsuak ding asi. Leitlun killi ah a tekdarhmi laimi zapi ten kan umnak cio ah ziangtik lai khalah kan sungah Khrih ih Thlarau a lal ih amah in in uk asi ahcun kan sung ihsin a thunung cu a luangsuak dingih leitlun killi ah leitlung eng vekin Khrih en nak in kan eng suak ding asi.

Zesu in thuphan a per lo.

 

4) Keimah i zumtu cun ka tuahmi hi a tuah ve ding; hi hnakih thil mak sawn hman a tuah ding

John 14:12; Thungaite in ka lo sim: Keimah i zumtu cun ka tuahmi hi a tuah ve ding; a si, ka Pa hnenih ka feh ding ruangah hi hnakih thil mak sawn hman a tuah ding. 

 

Zesu san laiah Juda ram ihsin laitlang thleng thei dingin ke in feh sehla kum 33 sung hmanah a thleng pei maw? Laitlang ihsin America ke in feh sehla kum 33 sungahkan thleng pei maw? Zesu in kum 3 sungah ahmuh le tawn thei mi milai mipum zat hnakih tam cu tuisan ah mittkhep kar lo sungah calai le telephone thawn kan pehtlai aw thei zo. Cukhal cu thilmak asi.

 

Zesu zumtu pawl nunnak sungah Thlarau in amah a ceng, a nung, a cencilh, in umpi dingmi thu a rak simmi asi. Amah in amah zumtu kan sung ihsin Thlarau in leitlun taksa pumin a um lai ih a tuahmi hnakih thilmak, tampi a tuah lai dingmi thu a rak simcia mi asi. Kan nunah thilmak a cang hrih lo asile Zesu zumnak ah kan nung taktak hrih lo tinak asi.

Zesu in thuphan a per lo.

 

 

5) Tlanghman a tthawn ding.

John 17:20; Jesuh in, “Nan zumnak a mal ruangah a si. Fiangtein ka lo sim: anṭam ci tia zumnak nan neih ahcun hi tlang hi ‘Hitawk ihsin khi tawkah ṭhawn aw,’ nan ti ahcun a ṭhawn ding. Ziang hmuahhmuah nan tuah thei ding a si,” tiah a ti. *

 

Pathian in kan nunnak ah in duhsakmi kan duhmi a kham theitu a um in kan ruat asile Zesu hnakin in kham theitu kan buainak kan zumsawn tinak asi. Zesu a zumtu pawl nun ahcun lamzin khamtu ziangvek khal tlang vek in tum khal sehla zumnak in tthawn ter theih asi.

Zesu in thuphan a per lo.

 

Kan hmuh tawnmi dang bet hrih uhsi! Tuihlan kum 100 ah Laimi pawlin America ram a um le um lo hman an rak theilo. 1948 ah Laimi pawlin Kawl le miphun dang thawn ram dinkhawm kan din hnu ah Kawl ralkap kumpi a cozah cun Laimi pawl ramdang ah feh thei lo dingin fimthiamnak zir sunzawn thei lo dingin lamzin in kam sak lai ah a tu ah American ram ih Perry Perry Tawnship School district pakhat lawngah Laimi tlawngah 1000 lenglo an um zo. Mangbangza asi. Pathian zumtu pawl nunah Pathian in a tumtahmi hi Satan le leitlun milai pawlin kam theih asilo.

 

Kan nun, thlawsuah kan dawnmi ziangkim, kanmah thawn a pehtlai mi hmuahhmuah hi Khrih ih ta ansi theh vekin ziangkim hi Khrih hrangah hmang uhsi! America ramih Indianapolis khawpi sungah tuihlan kumn 5 sungah naute suakmi, American citizen in asuakmi hi 400 lenglo an si zo. Curualrual in zuri in motor mawng ruangah thawng inn tang hi 400 lenglo asi zo ding. Sual tuahnak satan hmanrua hrangah nun hi thih hnak hmanin a thalo sawn. Thih cu kan hrang hlawknak asi. Sual tuah cu satan hlawknak asi. Pathian in amai fapa hman zuahlo in Zesu in kan sualnak a liangparah a suan tikah Pa in kross parah a khenbet rori mi asi. Cutluk in kan Pa Pathian in a huatmi cu tuah sunzawm nawn hlah uhsi. Kan kaa ihsin siseh kan thinlung sung in siseh unau huatnak hrimhrim hmun luah ter hlah uhsi. Duhdawtnak le thlawsuah luangliam nun, Khrih ah nunpitu si uhsi. Pathian in thlawsuah in pekmi pawl hi amah thawn kan pehzawm awknak daltusi hram hlah seh.

 

Kan neihmi ziangkim santhar bungrua phunphun, internet, yahoogrops, cumputer, email, facebook, dollar, tvp, hi pawl hi satan pe hlah uhsi! Krhih hmin sunlawinak hrangah hmang uhsi. Pathian tumtah mi cu satan le milai in kham theih asilo. Khrih thawn lungrual ringringtu si sawn uhsi!

 

Na lungthlitum cu tlaang in a dal maw? Nehemiah bangin siangpahrang inn ih sabiti na peknak hmunah na khua le ram a cim cuahco mi thu na theih tikah na tap maw? Pathian in nangmah hmangin tuah duhmi a nei asi thei. Pathian aw ngai aw. Ezekiel bangin ruhro lakah, thuanthu dungtawlh rero phairuam ah nangmah lawng ding vekin na thei aw aw maw? Pathian in nangmah hmangin tuah duhmi anei asi thei. Na khua le na ram, nangmai thuanthu, na hrinhnam, na insang, nangmah thawn a pehtlai mi na thlir tikah thuanthu thimzet lakah um vekin na thei aw aw maw? Pathian in nangmah hmangin tuah duhmi a nei asi thei. Pathian aw thei aw. Pathian in a tuah duh tikah miphun dang, nangmah a lo siatsuah duhtu pawl lala hmangin nangmah, na miphun, na hrinhnam thuanthu khal a cawisang thei asi. Thinlung tangdornak thawn, Pathian hnenah thlaza camin "Bawipa, hinah ka um, na duh bangin i hmang aw" na ti thei zo maw?

 

Zesu in thuphan a per lo, kan hmuhtawnmi hmuahhmuah cu Pa Pathian in kan hrang thatnak, a Fapa hmuihmel kan bang sinsin nak ding hrangah hmanrua ah a hmang rero asi sawn.

 

Rome 8:29, Pathian in a hriil ciami pawl cu a Fapa hmuihmel keng dingah a thiadang cia hai; cuti cun unau tampi lakah a Fapa cu upa bik a sinak dingah a si.