TLAMTLING BIAKNAK TAHFUNG: Sound doctrine

Mi zokhalin anmai biaknak, kawhhran pawlkom cu a thabik, a thianghlim bik le Bible vekin a nungmi, a cangvaimi asi tiah an zumih an pom cio. Asile, kan Khrihfa Biaknak, kan kawhhran le pawlkom in a zirhmi, a dinpimi, a fehpimi thurin hrampi pawl hi a tlamtling maw tiah cuai thlai tikah a hnuailam tahfung panga thawn tah asi:
1) Pathian thawn pehzawm awknak
2) Mai bulpak nun ukbetnun
3) Duhdawtnakin pehtlaih
4) Veng, khua, society, cozah kumpi le miphun hrang tuanvo liangpar suang nun
5) Sersiammi kilhimtu

Malte fiang deuh dingin sim bet tum hnik uhsi.

1) Pathian thawn pehzawm awknak
Biaknak dik, tlamtling, thianghlim le famkim Bible in a zirhmi cu Pathian thawn bulpak pehzawm awknak nei in cui pehzawm awknak hrangah nun asi. Pathian  le milai pehzawm awknak a siat zo hnu ah Pathian in lamzin in ruatsakmi umsun cu Khrih lawngah asi. Jesuh in, “Keimah cu lamzin le thutak le nunnak ka si. Keimah hnenin siarlo zohman ka Pa hnenah an thleng thei lo” ati, John 14:6. Cutin Khrih ah sersiamthar, hrinthar zomi nun asi ih Zesu Khrih ah Pathian thawn pehzawm awknak cu bulpak nunsan, nun pumhlum hngat awknak, milai nunsan, lungawinak, hnangam daihnak hrampi asi. Cutin catbanglo Pathian thawn bulpak pehzawm awknakin Thiang Thlarau ukmi nun asi. Cucu Khrihfa biaknak nung thianghlim famkim in a zirhmi le a dinpimi asi. Khristian sakhuanak hi miburpi biaknak asilo, Khrih ah  bulpak Pathian  thawn pehzawm awknak nunpi in Pa Pathian ih tumtah le duhnak hrangah nun asi. Cutin Khrih ah Pathian thawn pehzawm awknak neitu pawl pehzawm awmi mibur cu Kawhhran tiah kawh asi. Pathian thawn bulpak pehzawm awknak neilo in Khrihfa lakah tlanglengin kawhhran sungtel pawl cu Bible in tuu lakah me (kel) a timi pawl khi an si.Na biaknak, na kawhhran, na sakhua nak in Pathian thawn bulpak pehzawm awknak nun lamzin ah a lo fehpi maw?

2) Mai bulpak nun ukbetnun
Khrihfa biaknak ih danglamnakbik pakhat cu minung lam tuahnak, tisa zuamnak cu thihter, tawpter asiih Khrih ah Thiang Thlarau uknak hnuaiah nunthar asi. Tisa leihring nun in a suahpimi tumtah, duhmi, porh awknak, cawimawinak, nuam timi pawl cu nitin Kross parah khengbet tahratin nitin Pa'i tumtah, duhnak le lunghmuizawng tuah in Thiang Thlarau uknak hmuai ah nun asi. Tisa cu Thlarau Thianghlim Pathian thawn an ral aw. Curuangah Khristian biaknak nung, thianghlim le tlamtling cun tisa cangvaihnak cu do in Thiang Thlarau ukmi bulpak nun a zirh. Cuticun Thiang Thlarau in a ukmi zumtu nunah tisa mizia cu thihter asi ih Thiang Thlarau a lal, zumtu nunah Pathian mizia thanlenter asi.Khrih hmuihmel bang sinsin in nitin thanlennak asi. Na biaknak, sakhua, kawhhran in na tisa kross parah khengbetin Thlarau Thianghlim ukmi nun lamzin ah a lo hruai maw?

3) Duhdawtnakin pehtlaih
Pathian thawn catbanglo pehzawmnak neitu nun cu kiangkap midang, leitlun milaipi pawl thawn pehtlaihnak ah a lang: Duhdawtnakin Pathian rian in midang hrang nun asi. Zesu Khrih ah nunthar a thawktu pawl cu anmai bulpak hrangah nung nawn loin Pathian rian in midang hrang nun asi. Pehtlaih awknak cu a tawpnak asi ih thildang ziangkim cu hmanrua men an si. Pa Pathian ih duhdawtnakin a nungtu pawl hrangah daan a tul nawn lo. Duhdawtnakin a nungtu pawlin sualnak, Pathian huatzawng le midang siatsuahnak thil zianghman an ruatlo, an  tong lo ih an tuah fawn lo. Cutin zumtu pakhat cu Pathian Thlarau in a ukmi nunah a pehtlaihmi a insang, venghnen, hmuansak hmuanthlang, hrinpi, miphunpi, society le cozah kumpi, le leitlun milai pehtlaihmi pohpoh hnenah Pathian mizia nunpi in Pathian palai, Pathian siahhlawh asi. Cutin Pathian rian in midang thatnak hrangah a nung: milai tisa duhnak, nuam timi, porh awknak pawl cu thihter in pehtlaihmi milai zapi hnenah bulpak in siseh a burin siseh Pathian tumtah le duhnak cu tuah famkim asi. Cutin a pehtlaihmi milai hmuahhmuah hnenah Pathian duhdawt zangfah lainatnak thuthangtha thlawsuah luansuaknak Pathian hmanrua asi.Na biaknak, sakhuanak, kawhhran pawlkom in duhdawtnak in nun lamzin parah lam a lo hruai maw?

4) Veng, khua, society, cozah kumpi le miphun hrang tuanvo liangpar suang nun
Khrihfa zumnak nung, thianghlim le tlamtling cun vengsung, khualeram, mibur, hrin le hnam, miphun le ramkulh cozah kumpi pawlkom awknak le pehtlaihnak tha le thianghlim a zirh in a cangsuakter asi. Milai bulpak, mibur le pawlkom nunphung mawi a siatsuah loih a thiangmi le a tha mi milai pehtlaih awknak, pawlkomnak, milai nunphung mawi a suahter sawn asi. Cutin milai pawlkom awknak hrangah a tulmi milai pehtlaih awkdan siseh pursum leilawnnak, senpi vangtlang thuthluknak (public decision) le senpi bungrua le canpualtha zem darhnak, farah nauta, anhai sawmdawlnakah siseh hmasawnnak le ziangkimah milai nungphung mawi le nuntuziatha le thianghlim a hringsuak sawn asi. Khrihfa biaknak cu milai kutin sakmi innpi sungah tuahnak raithawinak asilo, nun pumhlum Pathian tumtah le duhnak hrangah Thiang Thlarau ukmi nun, Pathian rian in midang hrang nun, leitlun nun pumhlum ap wk nun, leitlun thim lakah Khrih ih eng kapsuaktu nun asi. Na biaknak, sakhua nak in na umnak kipah na tuanvo fiangter in veng, pawlkom, society, le cozah kumpi thawn pehtlaihnak ah nunphung mawi a lo zirh in Khrih ih eng kapsuaktu nun a lo zirh maw?

5) Sersiammi kilhimtu
Pathian in Adam hnenah tuanvo a rak pekmi, Satan bumnak ruangah milai in kan hloh zomi, milai canpual, sersiammi ziangkim parah thuneitu, uktu, le kilkhawitu milai sinak dinhmun cu Khrih ah a tharin milai hnenah peksal asi zo. Sersiammi ziangkim cu Pathian le milai karlak pehzawm awknak hrang hmanrua men an si vekin milai in sersiammi ziangkim cu kilhim, fingkhawi dingin tuanvo a nei asi.Na biaknak, sakhuanak, kawhhran le pawlkom in sersiammi ziangkim parah kilkhawitu, fingkhawitu tha si dingin a lo zirh maw?

Pathian in theihtheinak le na theihmi nunpi theinak lo pe hram seh!