SATAN RAWNGBAWL DAN PHUN NGA

Pathian tongkam bet tahratin, Porh awknak in, Pathian tumtah dalnak in, Tikcu pek nak in, Pathian sunloihnak pe lo in.

I.        Pathian tongkam bet tahratin,

Thuphan hi tah theih sisehla a tumbik le cuai thlai theih sisehla a rit bik cu “Pathian thuphan puh” asi ding. Pathian thusim pawlin Pathian in a sim lomi pi Pathian sim vekin an sim tikah Pathian thuphan an puh asi.

Evi in “Hmuan sungih thingrah hmuahhmuah kan ei thei ko;3a sinain hmuan laifangih a ummi thingrah cu kan ei thei lo, ziangah tile acuih thingrah cu ‘Nan ei lo pei; a tham khal nan tham lo pei, nan ei asile nan thi ding a si,’ ti ah Pathian in in ti,” ti ah rulpi cu a ti, ( Sem. 3:2) ati tikah Evi in Pathian tongkam ah bet mi a nei.  Sem. 2:17, “Pathian in a hnenah, “Hmuan sungih a ummi thingrah hmuahhmuah na ei thei;17a sinain a ṭha le a sia theihthiamnak thingkung ih rah cu na ei hrimhrim lo pei. Na ei asile na ei ni in na thi ding,” ti ah a sim. Evi in “a tham khal nan tham lo pei” tiah a bet.

Curuangah leitlun milai pawlin rawng an bawl theidan cikhat cu Pathian in a sim lomi Pathian ih tongkam vekin sim, Pathian thuphan puhnak in asi. A tihnung zetmi asi. Himi hi tihnung bik pakhat asi na cingin riahsiat thlakzet in milai in kan tuah sual ringring mi, satan lungawi zawng kan tuah sual pang ringring mi asi ding ti ka phang. Pathian zangfah lainatnak ih ngaidamnak tel lo cun pastor pawl hi a nung tlak hman kan um nawn pei maw?

 

II.      Porh awknak in,

I Sansiarnak 21:1, Satan in Israel parah harsatnak thlenter a duh ruangah David cu thusia a forh ih Israel mipum siar duhnak thinlung a neihter.

Pathian in Amah siarlo, milai cahnak fimnak le theihnak ah hngat awknak, porh awknak a duh lo. Pathian duh lomi tuahnak in mi pakhat in satan duhzawng a tuah thei. Mi pakhat cu thlawsuah a comi parah a porh aw aw ih midang hnakin tha cuang, felcuang, fimcuang, thianghlim cuang in a theih awk tikah siseh Pathian hnakin rinsanmi, hngat awknak pakhatkhat a neih tikah siseh Pathian a lung a awi loih satan a lung a awi ringring. Cuvek thotho in mi pakhat cu Pathian in A Fapa mal neihsun a pek zo hnu ah lungawi tawk hrih loin thildang thlawsuah malsawm pakhatkhat maw, pakhat hnakih tam maw, a duh hrih ih a lung a awi thei lo asile Pathian duhlo zawng a tuah ih satan lungawi zawng a tuah asi. A co tawk ah a lungawi thei lo mi pakhat cu Pathian thawn an duhdan hmuhdan pomdan a bang aw lo tinak asi. Pathian hnakin fimsawn ah a ruat aw ih Evi vek asi. Pathian in A pekmi tawkte lungawi tawk loin Evi in fimsawn, thasawn, fimdeuh si a duh ih tluksiatnak a tawng. Cuvek thotho in mi pakhat cu theibik si a duhtuk ih a theihmi hnakih tam a sim rero tikah thuphan thawn satan a rian rero tinak asi. Milai cawimawi awknak ih tuah mi pohpoh cu satan rian rero asi.

 

III.    Pathian tumtah dalnak in,

Mathai 16:23;  Jesuh cu a her ih Piter hnenah, “Nang Satan, ka hnen ihsin tlan aw! Ka fehnak lamzin khamtu na si, ziangah tile hi bangtuk na ruahnak hi Pathian hnen ihsin a rami a si lo, milai hnenin a rami a si,” tiah a ti.

A tongtu cu Peter asinan, Zesu in Satan a kawk. Zesu Khrih ih tuarnak ding kham tum in Peter in a tong tikah Zesu in a kawk. Biakinak sungah Pathian Thlarau theihternak tello, milai ruahnak in thiltha tiah ruahmi, milai zohmawinak ah thiltha tiah ruahmi pawl hi Thlarau Thianghlim lamzin khamtu, satan hnatuan asi. Pathian hriakthih, Pathian kamsang, Pathian Thlarau theihtermi, thutak phuansuahnak le rawngbawlnak daltu, khamtu, milai tisa khawruahnak ihsin a suakmi rawngbawlnak, Pathian hmin in thiltha tuahnak pawl hi Pathian Thlarau lamzin khamtu, Zesu in “Satan” tiah a kawkmi vek asi.  Khrihfa ti aw mi tampi cu hmin lar duhnak ruangah siseh leitlun sakhua mitha sinak in siseh milai mit zoh in mawi, tha, fel, milai lawmnak duh in siseh, milai tisa thinlung ihsin a suakmi thiltha tuah duhnak, tisa thinlung in Pathian hrang thiltha tuah duhnak ruangah siseh, Pathian kehram ah thupuan dawng hmaisa loin leitlun sakhua biaknak sungah ke an kar, an tong, thu an sim, hna an tuan tikah Pathian Thlarau hnatuan lamzin daltu ah an cang riangri. Curuangah fimkhur dingin Paul in “Pathian Thlarau Thianghlim kha riahsiater hlah uh..” ( Eph.4:30) tiah zumtu pawl a cahta. Pathian Thlarau uk lomi, kaihruai lomi, Pahtian thusuak asi lomi, milai tisa thinlung khawruah nak ihsin a suakmi “thiltha” pawl hi Pathian Thlarau hnatuannak lamzin kham dingin satan hmanrua thabik pakhat asi. “Tisa mizia (thinlung) in a ukmi pawlin Pathian duhnak an thei thei lo. “Curuangah mi pakhat minung sinakih a ukmi cu Pathian ih ral a si, ziangah tile Pathian ih daan a thlun lo; a thlun duh lo lawng si loin a thlun thei lo.8Minung sinakih daan a thluntu pawl cun Pathian lung an awiter thei lo,” ( Rome 8:7-8). (Those controlled by the sinful nature cannot please God).

 

IV.    Tikcu pek nak in,

Eph. 4:27, “Satan kha tikcu ṭha pe hlah”. Mi pakhatkhat in a unau a hua, a thin a heng, a relsia simsia, thangsiat, eltai, zuar thlai, namthlak, phiarsawm, thuphan a puh, a phunphun in a siatnak a tawlrel tikah “satan tikcu pek”, “satan kethlaknak pek” , satan rian asi. Mi pakhat in a innsang cu relsiat thangsiat awknak, tawh awknak, sual tuahnak, a thianghlim lomi tongkam, tuahnak, Pathian sunloih lo in milai nuamnung sernak, a phunphun sual tuahnak ah a hman tikah a inn cu satan riahbuk, satan lalram ah a canter asi. A kaa in tongsia, a thianghlim lomi, mi relsiat thangsiatnak, milai porh awknak, a ngaitu pawl hrang hlawknak um lo tongkam, huat awknak tipungtu a tong rero tikah a kaa cu satan hmanrua , tawtawrawt asi. A phone cu mi relsiat thangsiatnak ah a hmang asile a phone cu satan hmanrua asi. Tv/Video a zoh mi pawl in tisa duhnak diriamtertu asi ahcun satan hmanrua asi. Mi pakhatkhat in ngaidam thei lomi a nei  asi ahcun satan riahbuk a thinlung sungah a pek asi. Mi pakhatkhat cu tuahnak in maw tongkam in maw huatnak tipungtu asi ahcun satan palai asi. Mi pakhat cu tikcu pe in siseh a neihmi hmanrua in le lo hmang in siseh a tlun lamah satan duhzawng tuahnak thapetu asi ahcun satan riantu asi.

 

V.      Pathian sunloihnak pe lo in,

Isaiah 43:7, “Keimai' minung an si ih, Sunloihnak i petu dingih ka seemsuah mi an si,” a ti.

Milai cu Pathian hmin sunlawinak hrangah sersiam asi vekin Pathian hnenah sunloihnak pe loin mai hrangah a nungtu pohpoh cu satan riantu asi.

Luke 10:27, Cupa cun, “Bawipa na Pathian cu na thinlung hmuahhmuah, na nunnak hmuahhmuah, na cahnak hmuahhmuah le na ruahnak hmuahhmuah thawn na duhdaw pei ih na innhnen cu nangmah na duh awk vekin na duh hai ve pei, a ti,” tiah a ti.

Pathian in A neihsun Fapa a pek zo mi parah lungawi tawk hrih lo tu cu Pathian Fapa Zesu hnakin duhsawn mi a nei tinak asi ih a tisa duhnak sal sungah a tang hrih vekin, tisa ih pa, satan riantu asi.

 

A tlunlam hmanrua pawl hmangin Pathian in Laimi Khrihfa pawl nasaten a siatsuat zo asi ti ka zum.

·         Pathian tongkam parah  tintehrekte tia hman bet hlah uhsi, la then hlah uhsi.

·         Porh aw loin Pathian thawn duhbikmi, nuam timi, huatmi, tumtah, hmuisel bang aw in nung uhsi!  

·         Pathian tumtah hrangah nungin kan kiangkap milai pawl parah Pathian tumtah daltu siloin Pathian tuanvo pekmi an tuansuak theinak ding hrangah bawmtu tha si zuam sawn uhsi.

·         Satan cu tikcu cantha pe hrimhrim hlah uhsi. Innsang, hnatuannak, lamzin par, dawr tluan, khui tawk hmun khalah ziangtik khalah, zovek hnen khalah satan cu cantha pe hrimhrim hlah uhsi!  

·         Pathian sunloihnak pe uhsi! Kan insang, kan neihmi hmannak ah, kan tongkam, kan taksa ruangpi hman awknak, kan kaa sungah a lutmi le a suak mi, kan hna in kan thei mi, kan mitin kan hmuhmi le ziangkim ah Pathian sunloih uhsi!

Thei cingin maw, thei lo cingin maw, daithlan ruangah maw, duhham ruangah maw, satan rian pang hlah uhsi! Pathian lawng bia in rian uhsi!