PEKNAK

Amah in a kilhim thei lo mi a kumkhua in a kilhim theitu hnenah a petu cu mifim asi. Mi raltha pawlin an pe. Neihmi zate pesuaktu pawl cu an zalen lellel. Peknak cu kan cahnak asi. Pe timi cu a kan neihsan vekin hman asi.

“Ralthatnak ngaingai cu mai duhhrilnak in nun pek ngam, le mai duhmi tanta ngam asi.”

Peknak cu zalennak asi:

Midang kan pekzomi cu kan ta asinawn lo ih kan duhduh in kan hmang thei nawn lo. A neitu in a duhduh in a hmang dingih a petu in thu a neinawn lo. Kan pekmi in hmannak ding a nei lo ahcun kan pekmi khal a la lo ding. Midang na pekzomi parah tuanvo, thu na neinawn lo. A neitu in a duhduh in a duh tikah a duhnakah a duhvek in amai tumtahnak hrangah a hmang ding. Pekzomi hmandan thu ah thuneih tum, soisel tu cu a tuahmi a theilo asi.

Pathian zumtu timi cu nunpumhlum Pathian hnenah pek asi. Pathian duhnak, tumtah le lungawinak hrangah leitlun nun pumhlum hman asi. “Kei ka hrang ah nun cu Khrih asi.” Na nunnak Pahian hnenah na pek zo hnu ah na parah ziang a thleng, ziangvek in mi in an lo upat/duhdawt/relsiat/thangsiat timi parah siseh ziangvek dinhmunah na um ih ziangvek sinak na nei, tvp, na parah a thlengmi ziangkim cu na nunnak neitu, na pekmi ih kutsungah a um zo. Na nunnak na pekzo bangin a neitu ih thuthu in na leitlun damsung cu nun ding lawng asi.

Na nunnak cu Pathian hnenah na pek tikah nangmah ai in a hmandan a thiam sawn ih kumkhua tiang a lo nungter ding asi. Na nunnak cu na kutsungah na rettum khal asile, a ngaingai ah na nunnak cu na kutsungah a umlomi a rak siziar fawn. “Amah in a hum thei lomi a kilhim theitu hnenah pek hna thiamtu cu mifim asi.”

Na peksuak zomi parah nangmah in tuanvo le thuneihnak na nei nawn lo, na pekmi ih kutsungah a um zo. Nang cu na zalen zo ih na nunnak neitu ih hrangah nun lawng na hmabak asi. Cutin na nunnak neitu in amai huham cahnak, thiltitheihnak thawn sankhuk hrangah a lo kilhimsak in a hmang sawn dingmi asi.

Peknak hi kan thiltitheinak le cahnak asi.

Na neihmi hmuahhmuah hi na peksuak lai hlanlo man an nei lo. Na tongkam khal na tongsuak lai hlanlo man a nei lo. Na sumpai khal, thilleinak ah na peksuak lai hlanlo man a nei lo. America ram social scientist pawl hmuhsuakmi pakhat cu “mai ngah ding lawng a ruattu pawl hi mi lungawilo bikpawl an si” ti asi. Na nunnak khal na peksuak lai hlanah tihnak le harsatnak hlir in a tuam mi asi. Na nunnak cu tivapi sungah tilian in tipithuanthum lam pan in a fen rero mi sathi ruangpi vek asi. A tawpnak cu hacang rialnak tipi thuanthum asi. A kumkhua in a lo kilhimsak theitu hnenah na pek lawnglawngah man a nei ih thiltitheinak khal a nei. Na nunnak cu asersiamtu hnenah na peksuak tik lawngah a sersiamtu in amai tumtahmi le duhnak hrangah a hmang dingih man nei ah a cang ding. CUtin siloin na kutsungah na hum hrih asile a sersiamtu ih tumtah hrangah hman theih asilo ruangah leilevan sersiamtu in a sersiammi lakah amai duhnak le tumtah vekin hman theihlo hman thalo pawl hlawnnak, hnawmpung sungah a lo hlawn ding. Cui hnawmpung cu “hell ram” tiah kawh asi.

Sumapi $ 1 na neihmi cu ei a theihlo. Asinan $ 1 na neihmi cu banhla neitu hnenah na pek ih banhla leinakah na hmang asi ahcun banhla tampi na ei ngah dingih na pum a puar ding. Cuvek in na nunnak cu na kutsungah na humtum sung poh cu phurrit, harsatnak bawmpi phur vek na si ringring ding. Sumpai na nei tam deuhdeuh, leitlun hlawn thilri na nei tam deuhdeuh, sinak na nei sang deuhdeuh asile na phur a rit deuhdeuh ding. Fanghum cu rawlah na ei asile a cemralta ding. Asinan fanghum cu leilungah na cingih a ci a thih asi ahcun a kung a kheuh dingih rah tampi a rah vekin na nunnak khal fang fangkhat vekfang na si ih rah tampi rah dingin a tipung theitu hnenah na tuh lawngah mi tampi hrang rah tampi a rah sawn ding asi. Na peksuak lawngah na nunnak hnakih man tampi rahtha a rah dingih nangmahin na ei cawk lomi rah tampi a rah ding asi.

Kan neihmi lak ihsin thenhra thenkhat pe dingin zirh kan si. A ngaingai ah kanmah ih ta, a kumkhua in kan kil thei dingmi zianghman a um lo. Kan neihmi sumpai le thilri an um thei hmanah kan nunnak hi kan kut sungah a um lo. Kan neihmi ziangkim hi Pathian ta asi ih amah in tul a tivekin kan neihmi hmuahhmuah hi Pathian hnatuannak hrangah, sersiamtu Pathian ih tumtah le duhnak hrangah hman ding asisawn.

Peknak hi Pathian hnatuandan asi.

“Pathian in leitlun a duhdawt tuk ruangah A Fapa mal neihsun a pek.” Pathian in milai a sersiam tikah amai thaw a thawt ih amai nunnak seu pesuak tahratin milai nunnak a semsuah. Pathian in in pek mi hmuahhmuah hi kan peksuak ding asi. Kan peksuak lomi pohpoh cu a cemral men mi an si.

Khrih Zesu amai duhhrilnak liolio in a nunnak cu milai rundamnak hrangah a peksuak ruangah leitlun mihlo tampi rundamnak kan co. Fala thianghlim Mary in a fala thianghlim sinak, a duhbikmi apasal ding Joseph thawn an ham awknak siat ding khal tih loin a nunpumhlum a pek awknak in Zesu Khrih cu nunau pumsungah naute ah rungcang tahratin milai ah a rungsuak.

Pathian in Eve cu Adam hnenah a pek vekin nulepa in an fanu cu a pasal hnenah an pek ih insang din asi. Nupa cun duhdawtnak an pekawk tawnnak in fanau rilrah thlahzai asi. Khawsungah senpi vangtlang pawl peksuaknak in senpi bungrua, cozah kumpi le kaihruai awknak pawlkom tumpi dinsuah asi. Kawhhran zumtu pawl peknak in kawhhran pawlkom, biak inn, bungrua ziangkim neih asi.

Zesu in “zokhal, amai duhnak a tanta thei lo tu cu ka dungthluntu tlak asilo ” ati. “Mai duhnak tanta” timi cu mai duhnak khal peksuak cih asi. Nunnak pek ti tikah duhnak, duhlonak, ruahdan, pomdan, hmuhdan pawl khal pek cih theh asi.

Zumtu pawl cu Khrih ih taksa peng kan sivekin Zesu ih kut le ke, mit le hnar kan si ih peknak in Zesu in leitlun milai pawl a thamban vivo asi. Pathian duhdawt zangfah lainatnak, le huham cahnak luangsuak dingin peknak cu Pathian hnatuandan, hmanrua asi.

Pathian betu lakah milai phunhnih:

Leitlun milai Pathian betu lakah phunhnih in thentheih asi: 1) Mai duhnak hrangah Pathian betu, le 2) Pathian hnenah nunpumhlum pe in Pathian be tu.

Mai duhnak hrangah Pathian betu:

“Tuah aw, tuah aw hlah” timi pawl thlunnak in siseh milai mithmuh ah biaknak lam cangvaihnak ah pek awknak in siseh milai thinlung duhnak diriam dingin Pathian betu pawl an um. Cupawl ih an duhmi cu milai in an porh awknak ah an hman theu mi, sakhua mitha sinak, mifel, mitha, milai duhmi sinak, milai upattlakmi sinak, senpile pawlkom lakah upa sinak, tohkham sang to in milai cawimawinak, milai duhmi sinak, porh awknak, tvp, leitliun mi pawlin an upat zetmi pawl tla an hawl ih Pathian an bia. Sialkiringcin vekin Pathian cu hman an tum.  Cutin milai in upattlak an timi pek awknak, biaknak lamah zuamnak pawl cu an tuah ringring. Asunglam ah thleng awknak ngaingai a um loih tisa mizia in a uk ringring. Cucu “tuu rual lakah meheh (kel)” pawl nundan asi.

Pathian hnenah nunpumhlum pe in Pathian be tu.

Pathian cu zumtu pawl nunah a pakhatnak asilole a pahnihnak asi thei lo. Kanmai nunnak, duhmi le neihmi hmuahhmuah hnakin Pathian cu a thupi sawn lo asile Pathian cu kan nei lo lawlaw tinak asi. Pathian cu kan nunnak ah a thupibik asilole a pahnihnak asi thei lo. Kan duhbikmi asilole kan duhbik sangtu ah Pathian a um thei lo. Pathian a duhbik lotu cun Pathian a nei lo.

Voikhat cu pastor pakhat in nupi a bia an ti:”Nute, nan hmuahsak fala nu khi nupi dingah ka be lai ih a remcan lo pang le nangmah rak ralring awla” ati. Fala nu hrang ahcun a duhlo lawng si loin in nautat asi tiah a thin a heng tuk. Pathian cu kan duhbikmi asilole duh bik sangtu dinhmunah a ding dahlo.

“Na Pathian cu an thinlung zate, na ruahnak zate, na cahnak zaten duhdawt aw” ti ah ngan asivekin Pathian duhbiklo tu cun dan tumbik a pahbal ringring asi.

“Ziang kim Pathian hmin sunloihnak ah siseh” tiah Bible in a sim vekin Pathian cu kan nunnak hnakin a thupi sawn, a thupibik ah kan ret lo asile Pathian cu kan bia kan timi cu milai diriamnak hrangah a betu men kan si.

Pathian hrangah nunnak pek timi cu milai nunnak ih umnak diktak ah retthat sal mi asi.

“Pathian hrangah ka nunnak ka pe” kan timi khalin thlarau lamsinak diktak kan zoh asile tongdiklo asi. A ngaingai ah kan nunnak cu kanmai ta asi dah lo. Kan peksuak theimi thil khal asilo. Kan nunnak cu kan duhduh in hman dingah sersiam kan si dah lo. Pathian in “Kha, ka lo sersiam zo, na nunnak cu nangmai ta, na duhduh in hmang aw” tiah nunnak hi in pe dah lo. “Ka hmin I sunloih tu dingah ka sersiammi,” “ka hmin in kawhmi” tiah Bible in a sim vekin Pathian in milai a sersiam tikah amai tumtah, duhnak, le lunghmuizawng hrangah, amai hrangah milai a sersiammi asi. Pathian duhnak le tumtah hrangah zumtu kan nung mi hi sersiam kan si vekin kan sinak diktak ah kan nung sawn mi asi. Pathian kan pekmi asilo. Amah ih ta cu amai tah ah kan kirsawn mi as.

Voikhat cu rannung rual neitu pa in a khual tlawn sung a rannung kilkhawi sak dingin a inn hnen pa hnenah a upta. A ra tlunsal tikah a ranung pawl cu a lak ih inn ah a tlunpi sal. Cutikah a inn hnen pa in “na rannung ka lo pe” a tilo, “na runnung la aw” ati. CUvek in Pathian in leitlun sualnak sungah a hlo zomi mihlo pawl cu Khrih Zesu ah in hawl suak ih amai ta asimi kan nunnak cu umnak dikah in hruaikir sal, in thlenpi sal mi as sawn. A kutsungah zianghman kawlmi  le neihmi a neilo tu, Pathian ihta asimi cu mi lungawi, zalen, thlawsuak, nehtu, le a cakbik asi.