Milai Hlohdan Cihra

Mithi kan timi khi a ruangpum kan hnenah a um nawn lo asilo, a nunnak a cemzo ruangah kan pehtlaih nak a hlo tinak asi. Cuvek thotho in a nunglaimi a hlo kan titikah leilung parah a um nawn lo tinak siloin a umnak dingah umlo, a um dan dingin umlo, tvp ruangah "mihlo" asi kan ti theu. Hlohdan ci tampi lakah a hnuailam vekin cihra zoh hnik uhsi.

1) Thlarau hlo: Pathian thawn pehzawm awknak nei nawn lo-Adam tluksiatnak ruangah Pathian le milai pehzawmnak a cat, a hlo ruangah leitlun milai zapi ten Pathian hmaiah mi hlo kan si. Pathian in A Fapa Zesu Khrih ah in hawlsal ih Khrih Zesu a neitu, hrinthar, sersiamthar asi mi pohpoh cu an hlo nawn lo, Pahtian thawn an tawng aw, peh zawm awknak an nei sal zo. Zesu Khrih a neilo tu pohpoh cu thlarau hlo an si.

2) Umnak hlo/Ramdangah hlo: Peh zawmnak cat: Mi zokhal a suahkeh ihsin a umnak ding tiah ruahsakmi hmunah a um nawn lo, a pehzawm dingmi pawl thawn pehzawmnak nei nawn lo tu pawl cu mihlo an si. Mai nulepa,insang,  miphunpi, khawpi pawl thawn pehzawm awknak nei nawn loin leitlun khui tawk hmun ah si maw a rak nungmi, lole a thihlo zo mi pawl cu mihlo an si. CUvek thotho in nauhak te cu upa pitar putar lakah pitar putar vekin a um, lole upa pitar putar cu mino lakah mino te vekin mino tuanvo a lak ih a um ciamco khal asile a umhmun a hlo an ti.

2) Tuannak ah mi hlo: Pasal in a nupi fanau cawm loin a thlawrthlau tikah, pacangtha pawlin an khawsung, an khua an ram an humhalh, kilkhawi lo tikah, khawsung mi in nuhmei le farah nauta an zohthatlo, an kilkhawi loih an hmuhsuam nautat tikah, nupi nu in a pasal fate zoh loin tlangval dang a dawi tikah, a mai insang a zohtha lo, a nunau tuanvo a tuan lo tikah, mihlo asi. Cuvek thotho in mino thangthar nonawn pawlin an khua an ram, an miphun thuanthu a siat cuahco, ral in an cim, an nam, an mipi an siatsuah rero laiah an to men, zianghman an cangvai lo asile mihlo an si.

3) Nunphungah mi hlo: Milai cu nunphung nei in sersiammi kan si. Kan nunphung kan hloh tikah mihlo kan si. Nunphung ah a telmi pawl cu tong, thuam,  nuntu ziaza, lungput, milai pehtlaih awkdan, cawn le lam, tvp, an tel. Mai miphunpi pawl thawn pehtlaih awknak nei nawn lo pawl khal mihlo, mai miphun tong thiam nawn lo pawl khal mihlo, mai miphun nuntudan in a nung nawn lo tu pawl khal mihlo, mai miphun milai thawn pehtlaihnak nei nawn lo tu pawl khal mihlo an si.  

4) Nuncan ziaza ah mi hlo: Milai cu nunphung, nuntu ziaza nei mi kan si vekin milai pakhat cu ramsa nun in a nungtikah, a mai miphun nuntu ziaza tlansan in miphun dang nuntu ziaza cawngin a nung tikah, amah thawn a pehtlaihmi a insang, nulepa, nupi/pasal fate, unau, hrinpi le cipi, miphunpi pawl thawn pehtlaihnak nei nawn loin miphun dang lakah miphun dang nuntu ziaza in a nung tikah, mihlo asi.

5) Zumnak ah mi hlo: Miphun tin in miphun Pathian kan nei, miphun Pathian dungtun tahratin biaknak dang ah a tlantu cu mihlo asi. Miphun Pathian be nacing in a biakmi Pathian mualphohtertu nuncan ziaza sia thawn a nung khal asile a zumnak a tlansan ih mihlo asi.

6) Siatsuahtu ah cang tahratin mihlo: Lai pacang pakhat cu mi lolu ihsin lungtum a hril theu, milo rawl siatsuahtu ah a cang. Cukhal cu a tuahnak in mihlo asi. A tuah dingmi tuah loin a tuah lo dingmi a tuah, mihlo asi.

7) Tumtah ah hlo: Kawlram tlawng dingin a feh nan Mizoram lam athleng asile cucu a hlo asi. Cuvekin, milai pakhat in a Pathian, mahlemah, a insang, a miphun, le sersiammi parah a nuntu dan dingin a nunglo asile cucu mihlo asi.

8) Tongkam ah mi hlo: Putar pakhat cu nauhakte vekin a tong phuatpho asile cucu mihlo asi. CUvek thotho in milai pakhatkhat in amai tong lo ding, amah thawn a pehpar lomi siseh san nei lo a tong phuatpho asile mihlo thotho asi.

9) Nupi pasal ah mihlo: Laimi nunau in miphun dang a neih asile mihlo ah a cang. Ziangah tile a fate pawl cu miphun dangah an an cangta.

10).  Raal le rual hlo: Ralkap pakhat cu a raalpa kap loin amai lamtang a kap asile cu khal cu mihlo an ti. Mi zokhal mai miphunpi, mai zumnak le miphun ah pumkhat asimi a dodal, a thangsiat, a mualphoh rero asile cu khal cu mihlo asi. Khrih ah le Miphun ah pumkhat asimi cu khat le khat tungding aw tawn, bawmbawi aw tawn, sawmdawl aw tawn ding kan si. Culai lakah tongkam in siseh ruahnak in siseh tuahnak in siseh a mai miphunpi, zumnak ah Khrih ah a mai unau a thangsiat, dodal, namthlak, mualphoh asile cucu hlohnak cikhat asi.

Na hlo ve maw? Mihlo na hmu maw? Hawl suak uhsi!