“Ziangkim in can an nei” tiah Thusimtu (3:1) in in sim. Bulpak pakhat, insang, hrin, khua, le miphun khalin thuanthu an nei ih anmah le tikcu an nei cio. Bible sungah kan theihlar zetmi le mi tampi thinlung sungah hmun a luahtu, David Siangpahrang khal hi siangpahrang tohkawm ah cawimawinak pek asi hlanah siseh siangpahrang a tuan hnu khalah siseh duhnung lo zet dinhmunah a dincan a um: lungpuk sungah daiziarzi ten a relhcan, siangpahrang in sungah nuam zetin a tlanlan can, le amai fapa tih in a tlan rero can a um. Ziangvek dinhmunah a din lai khalah siseh a lungput, thinlungken, le ziangkim a nunpi dan zoh tikah Pathian in “Ka thinlung keng mi pakhat” (a man after my own heart)” (Tirh 13:22) tiah a ti. Pathian  in “Ka thinlung keng mi pakhat”  atimi kan si ve theinak dingah ziang kan tawng, ziangvek dinhmunah kan ding, ziangvek harsatnak nawmnak, duhmi duhlo mi lakah kan nung, mi in ziang an sim, zo in in duh in in do, zo in in thangthat in simsiat, ziangvek tuanvo kan nei, ziangvek thuanthunung santiluang in khui ah in fen khal asile kanmai lungput, thinlung ken, nitin thuanthu nung kan nunpi dan parah Pathian in kan thlarau, kan thinlung A zoh ringring asi. Lungpuk sung kan relh cah khalah siseh tlangpar ah kan aukio lai khalah siseh Pathian in kan thinlung, kan thlarau azoh ringring asi. Ziangtik lai khalah “Milai cun a lenglam thil nan zoh, kei cun an thinlung ka zoh a si,” ( I Samuel 16:17) ati.  Nitin zumtu leitlun khualtlawnnak ramah kan hmai ah a rak fehtu, Pathian fate zumtutha pawl dinhmun thawn tahtthim theihmi dinhmun ah voi tampi kan dingin Pathian in lam in hruai cio ding. Curuangah kan hmaiah a rak fehtu pawl dinhmun ihsin kan zir thiam ringring hi Bawipai duhmi asi ruangah zumnak lam ih kan pa/nu pawl hnen ihsin zir dingin in sim (Heb. 11).

David Siangpahrang cu lungpuk sungah a relh can a rak um (I Sammuel 24:3). Falistin micak hminthang Goliath thattu David  cu lungpuk sungah a relh khiokhi can a rak um. Zo ttih in a relh, Falistin raalkap tih in asilo, amah in a rian rero mi, Pathian hnawnmi, Saingpahrang Saul tih in a relh. Zumtu pawl leitlun khualtlawnnak ah diklo zetin nekcepnak, zuar thlai nak, thuphan puhnak, dinhmun tha lo ah dincan a um theu. Khatlam zawngin sim asile kawhhran ah buhlem in buhtak a khuh can a um theu. Laitlun rampi, ramkulh le milai thuanthu a herliam laiah ziangti hman in kham theih lomi, kanmai (zumtu pawl) ti thei mi lenglamah a sosang mi milai thuanthu santiluang tisuar sosang do in au-khuan rero man ah a tha hnem lo tlukin san thuanthu a her awk can a um theu. Sihmansehla, zumtu pawlin santiluang tisuar sosang hrial dingin lungpuk sungah kan relh asi hmanah ziang kan tuah ding? Thinlung fimvar ten Pathian aw ngaithla in Elijah lungpuk sungah a relh lai vekin (I Siangpahrang 19:9) le David siangpahrang in lungpuk sungah a mah thah tumtu a ngaidam vekin Pathian Thlarau uknak hnuai ah nung ding kan si. A ngaingai ah, Pathian fa zumtu pawl hi satan hmanrua, milai thuanthu, in siatsuah tumtu pawlin Pathian siannak telloin kan parah zianghman tuah thei mi an nei lo. Kanmai tisa thinlung duhhrilnak hmang tel loin siatsuah thei tu zianghman sersiammi a um lo. Lungpuk sungah na relh canah Pathian pawlkom aw, na thinlung Pathian Thlarau in lo uk sheh!

David hual rerotu cu David in a rian rero mi, Pathian hnawntak, Siangpahrang Saul asi. Nang a lo dawi rero tu cu ziang asi? Sumpai harsatnak,thihhlohnak, riahsiatnak, dodalnak, thangsiat relsiatnak, taksa dam lonak, dinhmun harsatnak a phunphun asi thei. Na parah ziang a thleng timi kha a thupi mi asilo, nangmahin ziangtin na let timi kha a thupi sawn mi asi. A lenglam ah ziangtin a lang timi kha a thupi mi asilo, na sunglam thinlung thlarau in ziangtin na let, ziang na hril timi kha a thupi mi asi. Daniel le a rualpi pawl cu meipi sungah thlak an si, Kiosa kaa ang hemhem hmaiah thlak an si. Ziang an tuah? Meisa kha mittum hai sehla an bang lak men ding. Kiosa kha thattum hai sehla an thi lak men ding. Cuvek in na harsatnak, na raalpa ih hmanrua cu kutthlak ve loin na thinlung zapiten Pathian thangthat aw. A bik minung thawn pehpar in “Mi hmuahhmuah thawn remte ih um ding kha a cangthei tawkin zuam uh” (Rom 12:20). A dungthluntu pawl cu lawng sungah thlipi le tisuar in a nuai zawk rero tikah ziang an tuah? Tileuh thiamthiam tipi sungah an dawp maw? Dawp lo. Baw Zesu an kai tho. Na tomi lawng cu a hnin zawk rero tla asi thei. Na ei in hawlnak cu hnaihnok rero in na um tla asi thei. Na kawhhran, na pawlkom, na insang, na ruali, hnatuanpi, na hngat awknak kha a hnin rero tla asi thei. Na duhzetmi lamzin cu phihsak in na um tla asi thei. Na duhthusam, na sunmang cu thimkhawzing in a khuh cuahco tla asi thei. Ziang na tuah ding? Milai fimnak ringin kekar ding asilo, nitin a lo kilvengtu a lo umpi tu Zesu kha kaitho aw.

Joseph cu a unau pawlin an hua ih thah an tum tikah ziang a tuah? Thah a tum ve maw? Thah tum ve sehla a thi lak men thei. Pontifar nupi in diklo zetin thawngin sungah a thlak tikah ziang a tuah? A dikzia le Pontifar nupi diklozia a  ruat rero maw, a aukio rero maw? Amai dikzia le Pontifar nupi sualzia ausuahpi rero sehla a hrangah zianghman tha hnem lo lawng silo in a thih phah thei mi asi. Ziang a tuah, a thinlung cu Pathian umnak hrangah hmun a lawngter, “Pathian a hnenah a um” (Tirh 7:9).

Israwl raalkap pawlin Goliath an hmuh tikah an khur, an tih tuk, a tumtuk ruangah an tihtuk. Sihmansehlam David in zingtin ati, “Hi tluk in a tum mi cu ka saihli thawn ka sai tikah ka thelh thei lo ding asi” tiah a ruat sawn. Na harsatnak, hnaihnoknak, na lamzin daltu, buainak cu a tum zet tla asi thei. Na tisa thinlung kholhfai nak ding hrangah Pathian Thlarau hmanrua meisa cu a alh hliau tuk tla asi thei. Nangmah dehtumtu Kiosa pawl cu an kaa an ang kau tuk tla asi thei. Na tumtah le sunmang cu na damsungah na thlen thei nawn lonak ding hmun, lam hla tukah a um tla asi thei. Ziang na tuah ding? Na thinlung kha lawngter aw la, Pathian in zaahza hmun luahkhat seh! Lo uk seh! “Pathian Thalrau ih a ukmi lawngin Pathian duhnak an theithei”. “Pathian Thlarau in a kaihhruai mi pawl lawng Pathian fate an si” (Rome 8:14).

Voikhat cu kawhhran upa pakhat in an pastor pa hnenah, “Pastor pa, ka kawhhran upa tuanpi pawl hrangah thla ka cam ringring nan a tu tiang an nun an thleng cuang lo, ziangruangah si pei, Pathian in ka thlacam isang lo si pei maw?” tiah thu a sut. Pastor pa in, “Pathian in cu pawl hmangin nangmai nun a lo thleng a duh asi ding” ti a sangta. Nitin kan leitlun nunah kan kiangkap milaipi, dinhmun, thilcang mi pawl lungtawng aw thei loin kan rak um ringring asile Pathian in kanmai nun, thinlung thleng duhmi ziang a nei timi thinlung tangdornak thawn hawl hmaisa ding kan si. Leitlunah ziang thuanthu a cang, santiluang in khui ramah in fen, ziangvek dinhmunah kan ding, midangin ziang an tuah, tvp hnakin kan hmaiah nitin hrilding a ummi ziang kan hril timi a thupi sawn mi asi. “Tuih sunah a ṭha le a sia, nunnak le thihnak hril dingin nan hnenah ka lo pek a si” ( Danpeksalnak 30:15). Mirang thufim in “midang tuanvo a buaipi tuktu pawl hi anmai tuanvo thaten a tuan vo tu pawl an si” an ti. Midangin ziang an tuah, ziang an sim timi parah Pathian in thu a lo then lo, ziangtin nangmah in na let timi sawn kha a thupi sawn mi asi.

A ngaingai ah Pathian siannak tel loin Pathian fate pawl siatsuah thei tu ding Pathian in zianghman a sersiam lo. Pathian ih siarsiam loin ziangthil hman a um lo ( Kol.1:17). Pathian in a siang asi ahcun David in amah cam rero tu Shimei kha a kham lo ( II Samuel 16:5); Goliath in David a camsiat tikah David in a tuah dingmi a cawl cuang lo (1 Samuel 17:43); a unau pawlin tikhur sungah an thlak tikah Joseph in a sual ve lo, an zuar tikah a kham thei lo (Sem. 37:28); Daniel le rualpi pawlin Kiosa kaa ang hmai ih an um tikah Kiosa thah an tum lo, Meisa sungih an um tikah meipi mit dingin an zuam rero lo, Pathian an thangthat asi. James in ziang a sim, “hniksak harsatnak a phunphun a thlen tikah mi vannei kan si tiah ruat aw uh” (Jams 1:2) tiah a ti. Lungpuk sungah thuanthu santiluang in a lo fen in na relh, na tang khal asile na lungawi sawn aw. David Siangpahrang kha Siangpahrang innpi parah nuam ti zetin a vak uar-o ih khuaram cuan  in Bethseba taklawng a cuan rero lai hnakin lungpuk sungah a um lai ah khan Pathian thawn an nai aw sawn asi. Zumtu pawl leitlun nunah tisa duhlo zawng tampi a thlei laiah Pathian in in duhsakmi cu tisa duhzawng leitlun thil parah siloin Amah Pathian ah kan lungawinak asizia langter hi a si. Ziangkim a cangmi parah Pathian a cangvai ih A Fapa hmuihmel kan bang sinsinnak ding hrangah  (Rom 8:28) ziangkim cu hmanrua ah a hmang asi ti nitin zumnak in nunpi ding in duh asi. Thuanthu ah ziang a cang, midangin ziang an sim, timi thupi tukah ruat hlah aw, a ngaingai ah mi zokhalin leitlun nun sungah kan thinlung sungah a ummi, kan tongkam, kan tuahvek cekci in Pathian hmaiah in phawrhsuak leh thluh ding asi (Rome 14:12).

Pathian in kan hrangah a thabik A tuah dingmi A tuah zo: Pathian in a neih hmuahhmuah lakih a tha bik, A neihsun, A duhbikmi, A Fapa in pe zo asi. Thildang dilbet rero ding hman kan si nawn lo, kanmai nunnak hi pe ding kan si sawn. Kan pek lo asile kan hum thei cuang fawn lo,”Mi zokhal amai nunnak a hum tum asi ahcun a sung ding” (Luke 17:33), ti asi fawn. Amah kan pek zo mi cu Amah in A duhduh in A hmang dingmi asi, Pathian kan pek zo mi kanmah in hman tum rero ding khal a si nawn lo. Amai hmin sunlawinak hrangah Amahin A duhduh in A hman dingmi asi.

Lungpuk sungah, thawng inn sungah, thlipi lakah, camsiattu lakah, upat tu lakah, siangpahrang inn ah, raal lakah, lamzin parah, hnatuan nakah, inn ah, ziang hmuahhmuah tlunah laireltu cu Pathian asi: “Bawipa na Pathian cu na thinlung hmuahhmuah, na nunnak hmuahhmuah, na cahnak hmuahhmuah le na ruahnak hmuahhmuah thawn na duhdaw pei ih na innhnen cu nangmah na duh awk vekin na duh hai ve pei,” (Luke 10:27); “Minung cun a thinlung in khawkhannak tampi a nei ko ding; Sikhalsehla Bawipa ih khawkhannak lawng tuah a si ding,” ( Thuf. 19:21); “Ziangtinkim ahhin Pathian cun amah a duhdawtu le amah ih tumtahmi vekih a kawhmi hrangah cun an ṭhatnak ah hna a ṭuan a si, ti kan thei” (Rome 8:28). Pathian thangthat si ko seh! Amen!

“Ziang hmuahhmuah hrangah kan Bawipa Jesuh Khrih hminin Pa Pathian cu thangṭhat ringring uh,” Eph. 5:20.

“Ziangvek dinhmun khalah lungawi thu sim uh. Cucu Khrih Jesuh ah Pathian ih a lo duhsakmi a si” I The. 5:18.

“ Bawipa cu kumkhua in ṭihzah  awla na lung a awi ding; Na lung a ruh ahcun na nunnak a siatral ding,” Thuf. 28:14.