ZIANGTIKAH "KEIMAH" KAN TI DING?

Lai mino, ziangtik canah 'KEIMAH" na ti ve ding?

 "Keimah" ih thu ka ngai loah zoih thu ka ngai ding?

"Ka" timi voinga salin Satan cu Pathian uknak sung ihsin dawisuak asi tiah insim. "Keimah" lole "ka" ti a lal tik poh ah buainak a suak.

·         Eve in Pathian thupek hnakin amai ruahnak ih thiltha a thlun ruangah satan bumnak thangsungah leitlun milai a feh liampi.

·         Sarah in amai ruahnak hmangin a pasal Abrahram cu a salnu thawn a ihter tikah a salnu ih fapa ih tesinfa pawl cu amai fapa ih tesinfa pawlih raalah an rung cangta.

·         Absalom in "ka" tiah a ti aw ve ih a pa David a do tikah amai thihnak le rampi mualphonak a thleng.

·         Gehazi in amai ruahnak in apupa thulunglo in acangvai tikah pharnatnak a ngah.

·         Miriam in a unau Moses a dodal tikah pharnatnak a ngah.

Sim ding tampi Bible sungah a um.

Asile ziangtikah, ziangvek dinhmun ah, ziang thu ah kanmai ruahnak cu dinpi, fehpi, tlangaupi, ding asi pei?

·         Ttnk: Bruce lee hi nunglai sehla Laimi lakah a ngiar ngam kan um pei mw ka thei lo. Lole Jetli thawn sual aw dingin Laimi lakah ngaingamtu an um thu ka thei hrih lo. Takasa sual awknak thu ahcun Bruce Lee le Jet Li cu laimi pawlin kan kiangah um hai sehla an thu kan ngai zet ding.

Asinan thu le hla lam ahcunkan thei theumi:

·         Zuri cing khalin kawhhran thu, biaknak thu le pastor pawl siatnak relngamtu bolo,

·         Fimthiamnak  Zirnak le kum lam khalah phunhra kai lai in a pa le kumzat, le fimnak lamah an saya tuantu ding pawl, B.A., Master le Ph.D. degree ngah pawl ziangsiar loin zirhtu vekin au rero mi,

·         Calai lamah lai cabu pakhat hman ngansuak hrih loin laica thiambik vekin au khuang,

·         Thlarau lam thu rel tikah mai pawl, mai piangthar thu, mai doctrine dikbik vekin midang vuak that thluh, sobul le hreitlung thawn midang that thluh ngam in aukhuang,

·         Miphun, ram thu rel tikah ke karkhat hman kar dahlo, buhfang fangkhat hman liam dah lo khalin to hmun in a tuar rerotu pawl simsiat relsiatnak tongkam,

·         Zo ih ruahnak, fehnak lamzin hi miphun damnak, Pathian hriakthih kan miphun lamzinpi asi ti thleidan thiam lo dingin awn au a tam.

A hmasa bikah a hnuailam thu hin a khaikhawm zet: Na feh maw?

Na feh lo ahcun hruaitu na tul lo. Na theih zomi lamzin parah na feh ahcun hruaitu na tul lo, na tekleng (lansioh) men asiih na umnak hmun kelah na thleng sal ding. Nangmai ruahnak in a ban lomi lamzin tha, hmun thasawn thlen thei tu lamzin a um asi ti na zum lo ahcun hruaitu na tul lo. Nuam na tinaknak ah vaktawi men ding na si. Duhnak na nei ih nangmai ruahnak hnakin a thasawnmi lamzin a um asi ti na zum lawngah hruaitu na tul; ziangtik lai khalah cui lamzin parah a fehtu hruaitu an um ringring. Dungthluntu tha na si lai hlanalo, hruaitu tha na si theinak ding lamzin a um mlo, himi leilungpi parah cuvek milai an suak hrih lo. Na hril dingmi: feh, dungthlunmi nei aw, dungthluntu tha na si ding ih cu lawngah hruaitu tha na cang ding.

Kan thi maw?

Ram le miphun (politics)  thu ah a thimi, thlarau ah a thimi, pawlkom awknak ah a thi mi pawl hrangah mai ruahnak le midang ruahnak ziangkhal danglamnak a um lo, a thimi sai (vui) ruangpi cu tilian in a fen vekin thuanthu santiluangin a fennaknak ah luang men ding a si.

Asile kan thi maw?

Ram le miphun  thu ah: Kan ram le miphun thu ah thuthluknak kan buaipi lo asile mithi kan si. Kan ram le miphun thuanthu hi ziangin a sia a tha a thlenpi (what are the determinant factors to our living national history) timi kan buaipi nawn lo asi ahcun politics ah mithi kan si.

BIaknak lamah: Kan thanglo, fehsuak lo asile mithi kan si. Zingtinte vokpi in a kuangsung rawl a ei ding bangin zarhtin biak inn pan theu, danglamnak, thlarau hmasawnnak nei lo, a thanglo mi cu thlarau thi asi.

·         Pacang pakhat cu a fanu meipi in a kaang ih a sawltal rero a hmu na in a hni men ahcun mi aa asi ih mithi hnak hmanin a ningzah thlak sawn;

·         Nupinu pakhat cu a fanu tilian in a fen ih tipi kapah nuam zetin a hni men asile mithi thawn bang aw, mithi hnak hman in ningzah thlak sawn asi.;

·         Tlangval pakhat cu a unau tilian in a fen lai fangah tipi kapah hnihsuaksai in a khek rero asile mi aa asi;

·         Fala pakhat cu a nulepa rawl ei ding nei loin an rilrawng an thi zik rero lai fangah hmursen thawn tlangval a dawi rero asile a nulepa, miphun hrangah ningzahnak, thihhnak in a sualsawn mi asi;

Kan ram zoh hnik uhsi:

·         Biaknak lamah Pathian nung betu, duhdawtnak Pathian betu rem aw thei lo, ziangruangah?

·         Rundamnak colo zu le sa thawn ziangzat hellram ah nitin an liam?

·         Kan miphun thuanthu cu zo in in ngan sak rero?

·         Kan thuanthu tuahtha dingin le tuahsiat dingin zo in an kutzung an nam rero?

·         Leitlun khawmual ah,  Kan tong, kan calai, kan thuanthu, kan ram, kan hruaitu, kan cohzah kumpi, ti ding kan nei maw?

Ziangtikah 'KEIMAH" kan ti ding?

·         Daniel le rualpi pawl cun Kiosa kaa ang hemhem hmai ah siseh meilipi sung ah siseh anmah that tumtu ziangpahrang hmai ah siseh 'KEIMAH" Pathian nung zumtu ka si an ti,

·         Joseph cu Pontifar nupi in sualpi a tum tikah "KEIMAH" Pathian nung dokalh in thilsual tuah thei lotu ka si, a ti,

·         David cun amah thattu ding Saul siangpahrangin amah that dingin a dawi ih lungpuk sungah a that thei lai ah "KEIMAH" Pathian hriakthih mi parah ziangtik hmanah kut a thlak dah lo tu ding ka si a ti,

·         Paul cun a rualpi pawl in an tlansan lai khal ah siseh diklo zetin thawngah an thlak, a unau pawlin an vuak, an velh ih a thi tiah hnarpawn ah an hlawn hnu khalah "KEIMAH"; Khrih hrang lawngah a nungtu ka si, a ti.

NANG LE KEI TEH ZIANGTIKAH "KEIMAH" KAN TI VE DING?

·         Kan kiangkap ah kan unau pakhatkhat in kan miphunpi a thangsiat tikah "KEIMAH" ka hna sungah kan unau thangsiatnak thusia lutter dah lo tu ding ka si;

·         Kan kiangkap ah kan unau pakhatkhat in kan miphunpi a thangsiat tikah "KEIMAH" ka kaa sunga ihsin kan unau thangsiatnak thusia suakter dah lo tu ding ka si;

·         Kan thinhengnak tuahtu in kan lungawinak an siatsuah tikah kan mitthli an tlakter tik khalah "KEIMAH" Pathian nung zumtu, ka unau parah hua thei lo, ka tuah siat thei lo, ngaidam thei tu ka si;

·         Kan miphun lakah kan farnu nauhak tete miphun dangin an uiretpi, an sualpi tikah 'KEIMAH" pacang nucangtha ka si lo maw tiah run ngamtu ding;

·         Kan thuanthu cu miphun dangin nitin te an ngan ih kan nunphun, kan calai, kan pupa ro cu a hlo cuahco lai ah "KAIMAH" ka miphun thuanthu tuahtha tu ding ka si;

·         Thangsiat relsiat awknak a suak celcel tikah 'KEIMAH" ka lei in ka miphunpi ka unau thangsiatnak tongkam kamkhat hman ka suak ter dah lo ding;

·          Kan kiangkap ah kan unau, kan miphun pi rilrawng ti hal kan hmuh tikah kanmai ei ai pe suak in "KEIMAH"            ka miphun harnak cu ka harnak ti ngam tu ;

·         Mi tampi in kan mipi, kan miphun, kan ram le kan thuanthu cu mai nuamnung cennak ah an hman lai ah 'KEIMAH' ka miphun hrangah zan itlo in ka nunnak thaap ngamtu ding;

·         Mi tampi leitlun tlanzuam awknak le nuam cennak ah an tlan hloh lai ah 'KEIMAH" Pathian fahniang sualsal sungah tang thei nawn lo mi;

·         Kan hruaitu an tlukbah canah Absolom in amah hringtu apa siatsuahtu ah a cang vek si loin David dungthluntu pawl bangin "KEIMAH" Pathian lungtawng, kan miphun hruaitu dinpi tu;

·         Kan thuanthu, kan mah bulpak, insang, khua, kawhhran, pawlkom le kan miphun hrangah thiltha tuah tha dingin, kan thuanthu tuah tha dingin  'KEIMAH" ti ngamtu mino, santhar lai fahniang pawl dinsuak thlang uhlaw.

Tangdornak diklo cun "keimah" timi an hlawn theh ih huatnak le sualnak tipungtu, thiltha le Pahtian lamzin daltu sawnah dingin thli-hran nak poh ah an sawi vivo lai ah,

Lai mino, ziangtik canah 'KEIMAH" na ti ve ding?