FAPA HMEL BANG SINSIN! 

jUNE 2011

Zumtu leitlun nun cun Fapa, Zesu Khrih hmuihmel bang sinsin in ṭhansoh asi. A burin siseh, bulpak in siseh biaknaklamah kan tuahmi pohpoh cu Fapa hmuihmel bang sinsinnak ding asi. Fapa hmuibmel bang sinsin dingin thangso ter loin tisa lam porh awknak le nuam awknak cu satan bumnak, hmnarua leitlun sakhua nak men asi. Satan in Pathian tongkam hmangin Adam tei insang a bum vekin tuini tiang biaknak, Pathian tongkam hmangin leitlun milai pawl  inbum rero thoho asi. Biaknak lam cangvaihnak, peknak, khawm awknak, thlacamnak, thiltha tuahnak, zumnak ih cangvaihank pohpoh ah Khrih hmuihmel bang sinsin dingin ṭhangso ding kan si: Pathian mizia kan sungah thangso sinsin, lang sinsin dingmi asi- zumtu unau duhdawt sinsin, tangdor sinsin, porh awknak hlo sinsin, midang hnakin ka thacuang tinak hlo sinsin, midang hrang pek awknak tam sinsin, mai hrang ruatlo sinsin, tvp, in nun phumhlum ah Khrih Thlarau cangvai sinsin ding asi. Ziang hmuahhmuah kan hmuh tawnmi cu Fapa, Zesu Khrih hmuihmel kan bang sinsin nak ding hrangah Pa Pathian in kan hrangah a canter asi.Zumtu Pathian fate pawl cu hi leitlun nun sungah ziangvek dinhmun, zovek milai, mibur karlak khalah siseh Fapa hmuihmel bang sinsin in ṭhanglian ding kan si. Amah, Zesu Khrih aratsal tik lawngah a famkim in amah vek kan si ding. 

Cutin Fapa hmel kan bang sinsinnak ding hrangah kan parah thil a thlengmi pawl hi zumtu tampi in kan theithiam lo theu. In bawmtu dingah malten zoh hrih hnik uhsi!

Fapa in kan sual in ngaidam bangin ngaidamnak, Pathian mizia kan sungah ṭhanglian dingin ngaidam tulmi, a mawh, a palhmi, diklo zetin kan parah a thlengmi, diklo zetin mawhsiat thangsiat, relsiat, dodal, zuarthlainak, a phunphun, kan parah a thleng ding hi Pa Pathian in a siangmi asi. Cuticun Pa Pathian ih duhdawtnak ngaidamnak cu a takin kan sunglamah a ṭhangso sawn asi. Khrih mizia kan sungahṭhanglian thei dingin ca sungah, le tongkam in zir theih asilo, mah rori in tawn lawngah zir theih asi. Kan milai mizia, tisa thinlung in a ngaidam theilomi, pomrem theilomi Khrih Thlarau uknak le kaihhruainak in kan ngaidam tikah Pathian mizia kan sungah a thanglian, a cangvai asi.

Joseph in a unau pawl tuahmi a ngaidam tikah Pathian mizia a sungah a cangvai asi. David in Saul siangpahrang parah siseh amai fapa Absolom parah siseh ngaidamnak a nunpi tikah Pathian mizia a sungah a lang asi.

Na parah diklo le mawilo zegin na thinlung in a ngaidam thei lomi na tawng rero maw? Mi vannei na si, na sungah Pathian mizia thanglian dingin caantha na tawng asi. Lungawi in Pathian thangthat awla, na parah a mawhtu pawl hrangah thlaza cam aw! Na lungawinak siatsuah tu pawl hrangah thlaza cam sawn aw. Cucu thlawsuah na conak hrang asi. Pathian in kan tuah theilo mi in fial dahlo ih thil pakhatkhat in fial tikah laksawng in kamcia ringring asi. Cui laksawng sunglawi cu Pathian mizia kan sungah a thanglianmi asi. Cuihlei ah mangbangza Pathin thlawsuah na nun ihsin a luangsuak ding. Duhdawtnak le ngaidamnak a luanuaknak, Pathian thlawsuah luansuaknak, Pathian hmanrua tha na si ding.

Pathian Thlarau le tisa mizia cu an raal awk ringring vekin kan tisa mizia cu nitin kross parah khenbet loin zohman in Khrih dungthluntu si a theih lo. MI pakhat in bawi pahnih a rian thei lo: na tisa duhzawngin na nung ding maw, Khrih na rian ding, hril ding na nei. Curuangah kan tisa mizia cu a thi ngaingai asi ti langtertu thil pakhatkhat kan parah a thleng ringring theu asi. Cuticun kan sungih in that theitu kan tisa mizia cu a thih thlepthlep theinak dingah, Pathian rintlakmi si thei dingin kan tisa duhlo zawng thil tampi kan parah. a thleng theu. Cuticun tisa mizia a thi hrih lo tu pawl cun mangbangin kan aukio theu. A cancan cu Pathian hnenah bawmnak kan dil, mi hrekin Pathian lamlam kan mawhthluk theu. A ngaingaiah kan siatnak ding ziang thil hman Pathian in kan parah thlenter ding a duhlo asi. Kanmah in leitlun milai Pakhat hman kan uklo, thununlo ih kan ukmi pakhat umsun cu "mah le mah" tisa mizia (self) lawng asi. Milai in kan thancih mi tisa mizia cun kanmai parah a thlengmi kan thuanthunung siseh kan kiangkap minung pawl siseh uk (control) duhak asi. Cui tisa mizia cu nitin kros parah khenbet tahratin kanmah in zianghman kan kut sungah kan ret loih Pathiann kut sungah ziangkim a um asi tiah zaahza kan hngat awk theinak dingah kan tisa thinlung khawruahnak le duhthusam kalh zawngin thil tampi kan parah, kan nitin nunah a thleng theu asi. Na tisa thinlung duhzawng, a hiarhaal zetmi pawl thawn kalh aw in na thuanthunung a cang rero asile na lungawi sawn aw. Na nunah, na tisa thinlung di na riamter ding maw, Pathian lung na awiter ding, hril ding na nei. A phnih in na lungawi ter thei lo asi. 

Cutin zumtu leitlun nitin nunah kan tisa thinlung khawruahmi, a tha timi, hmuhdan, pomdan, tumtah le suangtuahnak kalh zawngin duhtusam raalkhat lamah dingin santhuanthu lamhawi le kan duhthusam cu a kalh awk tikah Pathian hnenah lungawi in thangthat hla sak sawn ding kan si. Ziangah tile kanmai ti theimi lenglamah Pathian in kanmai ruahnak ih a tlinlo mi thiltha sawn kan hrangah a thlenter dingmi a um asi. Ziang hmuahhmuah hnakin amah Pathian kan duhsawn asi ti langter dingin kan thinlung tisa duhmi, duhtusam raalkhatah kan din canah, leitlun thilthlengmi cu diklo zetin kan hmuh caanah kan lungawinak khui ah a ṭhum awaw ti hniksak kan si theu asi. Pathian in lei thlawsuah parah kan thinlung a hngat awk ding a duhlo, amah ah kan lungawinak, kan ruahsannak, kan tumtah le hngat awknak si ding induh asi. Kan thinlung sungah Pathian hnakin hmunkausawn khua a luahtu cu kan milem asi. Pathian amah thawn bulpak pehzawmnak le pawlkom awknak hnakin thildang pakhatkhat kan thupiter sawn, kan nuam aw sawn, kan duhsawn asile Pathian thupek lakah a tumbik kan pahbal ringring asi.Pathian hnakin duhsawnmi na nei maw? Fapa in a duhbikmi cu amah leitlunah a thlahtu, a Pa ih duhmi tuah asi. Nang na duhbikmi, na lungawinak bilk, na nuam awknak bik ziang asi? 

Curuangah zumtu pakhatkhat a lung a awilo asile Pathian thupek lakah a tumbik, a thupibik a pahbal asi: Pathian cu thinlung zate, cahnak zate, le ruahnak zate in duhdawt ding timi a pahbal asi. Pathian a duhdawt ding zatin a duhdawtlo ruangah a lungawi thei lomi asi. Ziangah tile Zesu in san deng tiangin ka lo umpi ding inti vekin kan leitlun nunah nitin Tlarau in in umpi nacingin amah hnakin thildang, tisa duhmi, lei thlawsuah kan thinlung in a duhsawnmi, a haal, a hiar, nuam a ti sawnmi a neih ruangah kan lungawi thei lo mi asi. Fapa Zesu in taksa in tuar theilomi taksa thihnak tuar ding tiang khalin "Ka Pa, na duhvek siko seh" tiah "thihtiang tangdornak nun" in zirh vekin Khrih ih mizia, hmuihmel kan sungah a thanglian sinsin theinak ding hrangah Pathian in in zirh rero mi asi sawn. Tangdornak timi cu tisa thinlungin a duhlo, a huatbikmi dinhmunah din tik khalah Pathian hnenah mai duhhrilnak liolio in lungawi siamso ten "ka Pathian, nangmai duhnak ka parah, ka leitlun nunah lal sawn seh" ti theinak asi. Pahian thu hnuai ah tuhlut awknak, up awknak asi sawn.Na nunah Pathian duhmi maw thupi sawn, nangmai duhmi? 

A ngaingai ahcun tangdornak nun, thu awi nun zirngah le nunpi thei dingin tisa mizia in a duhlo zetmi dinhmun kan thlen lai hlanlo kan zir ngah dahlo asi. Cuticun Pathian mizia kan sungah a thanglian rero vekin ziangvek dinhmun, zovek milai lak khalah duhdawtnak, hnangam daihnak, nundiriamnak cu zumtu pawl leitlun nunah kan nunpi ringringmi asi. Cui hnangam daihnak, duhdawtnak, le nun diriamnak (love, joy, peace) cu leitlun in a pek thei lomi, leitlun thil thawn lei theih lomi, man khungtuk, Pathian in A Fapa sungah in pekmi, kan sungah amai mizia aṭhanlentermi asi. Kannih cu Pathian mizia ṭawnpitu, Fapa rocotu ding, Fapa thawn sankhuk in a lal dingmi kan si vekin leitlun nun reilo te sung cu Fapa hmuihmel kan bang sinsin theinak ding hrangah caanṭha Pathian in in pek hrihmi asi. Khrih hmuihmel bang sinsin dingin thang cio uhsi!

Rome 8: 28-29, Ziangtinkim ahhin Pathian cun amah a duhdawtu le amah ih tumtahmi vekih a kawhmi hrangah cun an ṭhatnak ah hna a ṭuan a si, ti kan thei. Pathian in a hriil ciami pawl cu a Fapa hmuihmel keng dingah a thiadang cia hai; cuti cun unau tampi lakah a Fapa cu upa bik a sinak dingah a si.