DUHRHIL THUTHLUKNAK Hre Mang, March, 2011 Thuhmaihruai Pathian hnen ihsin fimnakin Thurawn petu Mi zokhalin amai hrilmi parah tuanvo a nei Midang duhhrilmi ruangah Pathian lungtum a thleng aw dah lo Satan siotarh
Thuhmai hruai: Hrilsual ruangah a rah kuanhaanglo thuanthu tawi: Evi: Pathian thulunglo le pasal rawnlo in Satan thulung sawn in theirah ei cu a duhhrilmi asi ruangah milai cithlah sualnak hrampi a rahsuak. Adam: Pathian thu hnakin a nupi thulun ding a hrilsawn ruangah milai cithlah sualnak hrampi arah suak. Lot nupi: Pathian thu hnakin amai lungsung turhhnawhtu thinlung thu a lung dingin a hrilsawn ruangah cilungpi ah a cangtha. Samson: Pathian thu hnakin a fala ih thu a hrilsawn ruangah a mit mithnih phorhsak a tuarnak, Gehazi: Apu pa thu lungloin amai lungsung duh-amnak a hrilsawn ruangah mipharah a cangta. Ananias te nupi: Pathian thu hnakin Satan thu an hril sawn ruangah an leitlun nun atawp.
Hi pawl hin tuisan milai pawl hnenah san an neihtermi a um asi ahcun nitin kan duhhrilnak ih kan hrilmi ih thupitzia le fimkhur a tulzia thu in sim asi ti ka zum.
Cuvek thotho in Pathian thulungin thiltha a hriltu pawlin an duhhrilnak ruangah tesinfa leitlun milai cithlah pawl hrangah thlawsuah malza a luansuaknakah a cangmi an um. Cupawl lakah malte sim asile; Abraham: Pathian thu a hrilsawn ih a pupa ram a suahsan ruangah zumnak ih pa a cangta. Moses: Miphun a duhdawtih Egpyt ram siangpahrang fanu ih fapa dinhmun nak in a miphunpi pawl thawn harsat tuar a hrilsawn ruangah Irael pawl zalennak a sualsuak. Rahab: Hlawhhlang nu in Joshua ih thlahmi thlingthlatu pawl humhim dingin a hrilnak sawn ruangah leitlun cemtiang daih in a hmin cu Bible sungah ngan asi. Zarepath nuhmei nu: Amai ei ding a neihmi tangsun cu Elijah hnehah a pek ding a hrilsawn ruangah ni1277 sung rawl ei ding cem thei lo khawp Pathian thlawsuah a dawng. Mary: A pasal dingah a hamtu Joseph ih hnawnnak le a miphun pawlih hnawlnak thlen thei ding dinhmun karlah Pathian Thlarau thusimmi ahril sawn ruangah “thlawsuahmi nunau” asi.
Hipawl thuanthu in tuisun minung pawl hnenah san neihtermi an nei asile mi pakhat cio in kan duhhrilnak in an hrilmi in milai tampi hrangah thlawsuah luansuaknak titler vek an sinak in zirh asi ti ka zum.
Mi zocio khal, Pathian Thlarau in nitin nunah hrilding kan hmaiah in retsak, “thinak le nunnak” hrilding kan nei ringring asi. Tisa duhnak cu thihterin Pathian duhnak sawn cu hrildingin tuanvo kan nei cio asi.
Rundam kan si theinak dingah Zesu in “Nannih in in hril lo; keimah in ka lo hriil hai ih kumkhuaih a hmunmi rah nan va rah theinak dingah ka lo fial a si” (John 15:16) tiah a ti. A thimi kan thlarau cu sersiamthar, hrinthar salin nunnak in pek. Cuihleiah, Pahtian in thahrum hmangin (not by force) kan sungah hna a tuan lo; kan thinlungsiatha theihnak cu tthangharh tahratin thiltha, in sersiamtu ih inhrilnak cu saanglet ve dingin le hrilve thei dingin Thlarau Thianghlim kan sungah hna a tuan sawn asi. Curualrualin nitin kan leitlun nunah kanmai duhhril vekin nung, tlangleng, khawruat, tong, le tuah dingin zalennak in pek asi. Cui kan leitlun nitin nunah kan duhhrilnak vekin laksawng khal pek kan si ding. Curuangah mi zokhal amai duhhril vekin aparah thu then asi dingih laksawng, a tlakmi thuthennak tawng ding kan asi.
Ahmaisa ah nitin te mi pakhat cio in ziangvek pawl kan hril timi zoh hmaisa uhsi. Kan thluak sungah kan khawruah (thoughts), kan tongkam, kan lungput (attitude), midang pawlkom mi, le kan tuahnak pawl hi nitin zocio khalin kan hril ringringmi an si. II Kor 5:10, “Ziangah tile thuṭhen dingah kan zate in Khrih hmai ah kan ding leh ding. Zozo khal a ṭha siseh a sia siseh a nunsung ih a tuahmi vek cekci in a ngah ding”. Job 34:11, “Milai cu an hnaṭuan thawn kaih-aw in hlawhman Pathian in a pek, An tuahmi ziaza thawn mil-aw in an parah a thlenter a si. Rome 14:10, “Kan zatein Pathian hmaiah kan ding ding ih Amah in kan thu in ṭhen ding a si”. Mi zapi ten nitin kan hril ringringmi kan thluak sungah kan khawruahmi, kan kaa sungah kan luttermi le kan tongkam suak, kan mit in kan zohmi le kan hna sungah kan luttermi, ka lungput le tuahnak vek cekci in Pathian hmaiah kan ding leh ding. Curuangah, Thufim 23:23 “Thutak kha lei awla zuar nawn hlah; Fimnak, thuzirhnak le theihnak tla kha lei awla zuar nawn hlah” tiah fimnak in nung dingah in sim vekin ziangtin a thabik kan hril thiam ding ti Bible in ziang in zirh ti zoh hnik uhsi.
Mi zokhal, huatnak le tisami sinak in a ukmi cu thimlakah a vak rerotu asi ih ziangtikah ka ke ka sit ding ti khal a thei aw lo tu asi. I John 2:11, “Sikhalsehla a unau a huatu cu khawthim sungah a um a si; khawthim sungah cun a tawivak ih thimnak in a mit a cawtter ruangah khuitawk lam ka pan ti hman a thei lo.” Psalm 119:105, “Na thu cu ka ke hrangah mei-inn a si ih, Ka lamzin hrangah tleunak a si” tiah ngan asivekin nitin nun thuthluknak hril ding lakah Pathian thu vekin ziangkim a hmuthiam hrilthiamtu cu eng hnuai ah a tlangleng reromi asiih Pathian ih thutak eng in lamzin eng hnuaiah a thabik hrilthiamnak a pek ringring asi
. 1) Pathian hnen ihsin fimnakin:
Thuf. 3:5-6, “5Bawipa cu na thinlung zate in rinsan aw. Nangmah ih ruahnak le theihnak kha rinsan aw hlah. 6Na tuah mi kipah Pathian cu thei ringring awla, Amah in lamzin dik a lo hmuh ding a si” tiah thu insim. I Kor. 2:5,14 “5Curuangah nan zumnak cu minung fimnak parih bunmi si loin Pathian cahnak parih bunmi a si sawn. …14, Thlarau minung a si lomi pawl cun Pathian Thlarau hnen ihsin a rami laksawng cu an co thei lo; a theih khal an thei thei lo. Ziangah tile cuih laksawng pawlih sunlawizia cu thlarau thinlung lawngih theih theimi a si ih cumicu annih hrangah cun aat-hna a si.” Thuf 4:7 “Fimnak neih cu na tuah thei mi thil thupi bik a si, na neihmi hmuahhmuah hman man sehla fimnak cu nei aw” tiah thufim in inzirh vekin fimnak in a thabik hril thiam dingin Pathian hnen ihsin hawl ding kan si.
Milai theihnak cu tlamtlinglo asi ih kan thinlung cu “ziang hmuahhmuah hnakin mibum hmangbik asi” fawn tikah Pahtian in in duhsakmi le tumtahmi hrilthiam dingin Pathian hnen ihsin fimnak kan zir a tul. Pathian hnen ihsin fimnak ngah dingin kanmai neihmi ziangkim khal kan sung ding khal asile kan leitlun lungawinak hnakin Pathian duhnak hrilsawn ding kan si. Kanmai ruahnak ih thiltha pawl tla kan tlansan, tanta thei a tul. James 1:5 “Nanmah lakah fimnak a tlasammi nan um ahcun Pathian hnenah dil sehla Pathian in a pe ding” ti asivekin Pathian hnenah fimnak dil ding kan si. Asinan, Pathian hnen ihsin fimnak a ngah duhtu cun amai ruahdaan le duhdaan cu a tanta hmaisak a tul. A thinlung a lawngter hmaisak a tul. Bible in in simmi cu “na neihmi hmuahhmuah hman man sehla” ti asi ruangah “na duhdaan, ruahdan” ih raalkhat lamzin zawh vekin na thei aw khal asile Pathian duhdaan thlun ding hril sawn aw. “Na duhdaan le pomdaan thawn a mil awaw asile” lawngah Pathian thu thlun dingin zirhmi kan silo, kan duhdaan le hmuhdaan thawn a kalh aw ringringmi lamzin bikte sawn hrildingin kan Bawipa Zesu in in zirh sawn asi.
Hebru 1:1;-2, “1Hlanlaiah Pathian in kan pupa pawl hnenah voi tampi a phunphun in profet pawl hmangin thu a rak sim. 2Sikhalsehla hi ni neta bik lamah cun kan hnenah a Fapa sungin a sim a si” ti ah Bible in inzirh. Cui Fapa in thu a simmi pawl cu dungthluntu pawlin midang hnenah an sim sawng ih Bible sungah khum tahratin kannih hnenah peksawng kan si. I John 1:3, “Pa le a fapa Jesuh Khrih thawn pawlkomnak kan neihmi sungih nan tel venak dingah kan hmuhmi le kan theihmi cu nan hnenah kan phuang a si” tiah John cakhuat sungah in sim vekin Fapa in a simmi thutak cu kan hnenah simsawng asi. John 14:26, “Ka hmin in ka Pa in a run thlah dingmi Bawmtu Thlarau Thianghlim in ziang hmuahhmuah a lo zirh ding ih ka lo sim ciami hmuahhmuah khal a lo cinkenter ding” tiah Zesu in arak simcia vekin Bible sungah nganmi Zesu ih zirhnak le dungthluntu pawlin an mitin an hmuh le an theihmi an simsawngmi Bible sung nganmi thutak cu Thlarau Thianghlim in zumtu pawl lungsungah fiangzetin theihter kan si.
Curuangah nitin leitln nunah a sia a tha kan hrilmi parah Pathian rawn hmaisa in ziangkim hril ding kan si. Pathian Thlarau Thianghlim in hmanrua a phunphun hmangin thu insim thei asi, tongkam vekin siseh Pathian palai, siahhlawh pastor le rawngbawltu, zumtu pawl hmangin siseh ramsa le sersiammi pawl hmangin siseh Pathian in in theihter duhmi thu in sim ringring asi.
Cutin Pathian in thu insimmi ngai in ziang a thabik tiah hrilding kan neih laiah hrialtul mi pawl a um. Cu pawl cu tisa mi sinak in a ukmi pawl, thuphan per hmang, rukru le duklo in ngahnak a duhtu pawl, a sual asi ti thei cingin Pathian tihzahnak nei loin sualnak a tuah sunzawm rerotu pawl, huatnak in a thinlung a ukmi pawl, mi relsiat thangsiat le zuar thlai hmangpawl, rinhlelhnak tipungtu, huatnak tipungtu Pathian duhlo zawngin a cangvaitu pawl hnen ihsin ruahnak zianghman laklo lawng siloin a hla theibikah tlansan ding hrial dingmi ansi. An thu ngai lo lawlaw a tha sawn.
Cuvek thotho in nitin nun thawn a pehparmi kan hril tikah kanmai tisa duhnak ih ukmi si lo dingin, thinheng lai ah siseh duhtuk, huattuk, lai ah siseh thuthluknak tuah loin hrial thei mi cu hrial a tha. Tisa sinak in in uklai ah kan hrilmi cun Pathian hmin sunlawinak hnakin tisa duhzawngin kanmai thinlungin in bum theu asi. Mi zokhal midangin in bummi hnakin kanmah le kanmah kanmai thinlungin in bum ruangah thlawsuah tampi kan co dingzat co ngah loin kan um thei asi.
Cutin Pathian Thlarau in kan nitun duhrilnak ah zalen zetin hna a tuanih kan sungah a cangvai theinak ding hrangah kanmai tisa duhnak ih ukmi siloin Thlarau Thianghlimih ukmi (Eph 5:17) kan si a tul.
2) Thurawnpetu
Thuf. 3:5-6, “Bawipa cu na thinlung zate in rinsan aw. Nangmah ih ruahnak le theihnak kha rinsan aw hlah. Na tuah mi kipah Pathian cu thei ringring awla, Amah in lamzin dik a lo hmuh ding a si” tiah thu in sim. Buddhist pawlin kutttial zohthiam (bedin saya) pawl hnen ihsin thurawn an lak tluk hman Laimi khrihfa pawlin kan pastor le thlarau lam hruaitu pawl hnen ihsin thurawn kan la dahlo tla asi thei men. Thuf 11:14; “Kaihhruainak um lo ahcun ram an siat, ruahnak ṭha petu tamnak ah himnak a um”. Tuf. 12: 15, “Mi aa pawl in miding kan si tiah an ruat aw ringring ṭheu; Mifim pawl cun ruahnak pekmi an ngai.” Tuisan minung pawlih buainak bik pakhat cu a tlunlam catlangpawlin in sim fiangzet in a lang.” Pakhatnakah kan simzo vekin Pathian hnenah thu kan rawn hlei ah Pathian in hmaiton in tongkam in thu intheihter caan a um thei. Cui hlei ah Pathian in tuisan zumtu pawl hrangah in pekcia mi Athu, Bible cathianghlim sungin nun insim, thu in sim, lamzin in hmuhsak asi. Bible in fiangzetin a simmi hman kan thlunlo asile Pathian hnen ihsin thudang theihbet tum rero man a um lo. Curuangah Thlarau Thianghlim in thu insim tikah Bible thawn a kalh aw in ziangtik hmanah a cangvai dah lo ding, Bible in asimcia mi thuthlangpi pawl cu cipciar dinhmun hrangah a fiangter sawn theu asi. Cutin Thlarau Thianghlim in hna a tuan tikah bulpak pakhat cio nun cu thutak sungah a kaihruai. Cuvek thiamthiam in Pathian hriakthih siahhlawh le zumtu pawl hmangin Pahtian in thu insim asi. Curuangah kan kiangkapah a ummi Pathian hriakthih kan milaipi pawl hnen ihsin thurawn, lamzin hmuhtu kan neih ringringmi asi.
Milai thuanthu kan zohsal tikah kiangkapah Pathian in a pekmi thurawn (spiritual mentor/advisor) pawl hnenah thu rak rawn hmaisa hai sehla sualnak/bumnak tampi cu an rak hrial thei dingmi asi. Thuthimnakah, Evi in theirah a ei hlanah a pasal Adam rak rawn hmaisa sehla Satan bumnak in a luat thei; David ih Bethseba a sualpi hlanah Kamsang Sammuel rak rawn hmaisa sehla uire tahratin ningzahza a innsangah a cangmi a thleng lo tla asi thei; Siangpahrang Ahab in Kamsang Elijah kha thu rak rawn hmaisa sehla Israel ramsungah mualphoza a cangmi a rak hrial thei tla asi thei; Gehezi in Naaman hnen ihsin laksawng a rak lak hlanah kamsang Elisa kha thu rak rawn hmaisa sehla pharnat a ngah lo tla asi thei; tvp, simding tampi a um. Thilsual pakhat a cang hlanah thurawnpetu pawl rawnnak caan tampi a rak um theu ko na in milai thinlung sungah sualnak thlaici cu a thupten a tthanglian rero hnu ah sualrah cu milai nunah a rahsuak theu mi asi. Zumtu leitlun nunah Pathian hmai le thlarau lam in hruaitu hmaiah phuan ngam lomi kan nei asile kan thinlung sungah sualhram a thla rero zo ti theih asi. Na thinlung kha zum hlah aw, mibum hmangbik asi (Jer. 17:9) asi. Pathian hmaiah, phuang aw la, sual cu ti mualpho asi dingih nangmah cu runsuak na si ding. Cutin thuthluknak pakhatkhat na hril hlanah a cang thei nak poh ah thurawnpetu hawl hmaisa ringring aw.
Kumkimlo nauhak te lai kan sile nulepa, zohkhentu, thupeknak hnuai ah nung ding kan sivekin upa kan si hnu khalah kan nitin nun thlaraulam thurawnpetu, tuu khal in tuu rual a khal vekin, kiangnai ah kan nei ringring asi. Santhar fimsan sinsin ahcun leitlun khawmual kiltin ihsin thurawn lak theih asi zo, phone le internet a phunphun in pehtlaih awk theih asizo. Thurawn lak thiam hi mifim pawl umtudaan sawn asi.
Curualrual in rinsan lo dingmi, bumtu thurawnpetu lak ihsin fimkhur a tul. A hmaisa bikah kanmai thinlung cu mi bumhmangbik asi vekin in bum tambik tu asi. Cun tikcu caan le dinhmun khirhkhaan caan ah siseh lungawi hlawptlo lai, riahsiattuk lai, rilrawn le pumpuar tuklai, caak tuk duhtuk mi neih lai, tvp, caanah thuthluknak thupipi hrial thiam a thupi zet. Cuvek thotho in zuri, rukruk, thuphan per, thinhengmi, huatmi nei, iksiknak, tvp, tisami sinak in a ukmi pawl hnen ihsin thurawn kan lak tikah Pathian duhdan thawn kalh awaw in ruahnak sual in pek theu asi; fimkhur ringring thiam ding tuanvo kan nei. Zo hnen ihsin thurawn, ruahnak pekmi kan lak ding timi cu kanmai hrilmi asi. “Na rualpi isim awla, zo na si ti ka lo sim ding” tiah an sim theu vekin zo hnen ihsin thurawn kan lak timi in zo kan si timi insim fawn. Zohnen ihsin thurawn na lak khal asile na duhhril thuthluknak tuahmi parah nangmah ih tuanvo thotho asi. Curuangah a thianghlimmi le Pathian duhzwang hril thiam dingin Pathian Thlarau ih luahkhat mi, Pathian siahhlawh pawl hnen ihsin kan nitin nun duhhril ding thurawn kan lak thiam ringring hi a thupi ngaingai asi.
3) Mi zokhalin amai hrilmi parah tuanvo a nei:
Sihmansehla, nangmah hrangah Pathian in duhhril ding a lo pek ih “Tuih sunah a ṭha le a sia, nunnak le thihnak hril dingin nan hnenah ka lo pek a si” (Daan 30:15) ati. Na hrilmi parah nangmah in tuanvo na nei. Midangin an lo bum khal asile bumin na um ruangah na hrilmi ih rah ihsin na luat cuang lo. Evi cu bumin a um ruangah a duhhrilmi in arah suahmi ihsin a luat cuanglo. Adam in Pahtian thupek hnakin a nupi ihthu a hrilsawn ruangah a duhhrilmi ih rah ihsin aluat cuanglo. Esau in a rilrawng tuk ruangah a duhhrilmi ih rahsia ihsin a luat cuanglo. Na duhhrilmi parah zianghman puhmawh ding, a rah ihsin luat theinak na neilo. Thiltha na duhhril asile a tha, thilthalo na duhhril asile thiltha lo, mi zokhalin an tuhvek cekci in an at ding (Kal. 6:7). Na thluak sungah suangtuahnak, khawruahmi na neihmi, na ruahmi, na thinlungin na paimi sungtuahnak, na kaa ihsin na tongsuakmi, na kaa sungah na luttermi, na hna sungah na luttermi, na taksa thawn na tuahmi, ziangkim nangmah thawn a pehpar mi na leitlun nitin nunah na duhhrilmi vekin thlaici na tuh ih na tuhmi ci bangin na at rero asi ( Job 4:8). Pathian in midang duhhrilmi parah thu a lo thenlo ih nangmai duhhrilmi parah midang thu a then fawn lo. Na duhhrilmi na ruatvekin na kaa in tongsuak ding le tuansuak dingin na hril vekin na nitin duhhrilmi vekin na cangvai ih na mizia khal nitin tuahser rero asi. Tuisunah thil pakhatkhat na hrilih na duhlo zawng a rahsuak tikah na duhhrilnak ih rahsuakmi na hrial thei lo zia na hmu ding. THiltha na hril asi ahcun zohman ih laksak theihlo a rah na at fawn ding.
4) Midang duhhrilmi ruangah Pathian lungtum a thleng aw dah lo: Pathian in nangmah thlawsuah lo pe dingin mi pakhat hman thu a rawn dah lo. Midangin an duhhrilnak in thuthluknak an tuahmi ruangah Pathian lung a thleng dahlo ih Pathian tumtah a dal thei dah lo. Mi zokhal anmah ih tuhmi thlaici vek cekci in a rah an at asi. Midang duhhril thuthluknak, cozah kumpi, khawsung, mibur, pawlkom, boruak thalo, sumpai tlaksamnak, taksa harhdamnak, tvp milai buaipi theumi pawl ruangah Pathian lungthlitum a thleng dahlo. Midang duhhril thuthluknak parah thu then lo dingin le sawisel le mawhsiattu si lo dingin Bible in in zirh. Ziangruangah tile midangin ziangvekin thuthluknak an tuah ih thu le hla a fehsual pittawp khal asile Pathian in Amai tumtahmi a famkim theinak ding hrangah hmanrua ah a hmang thei thotho asi.
Joseph thuanthu in in zirhmi cu Satan hmanrua le leitlun milai pawl duhhril thuthluknakin Pathian lungthlitum a kham theilo timi asi. Joseph ih mangmanmi cu a pa Jacob hmanin a lawmmam tuk tiah a ruat. Joseph unau pawlih duhhril thuthluknak in Pathian tumtah a kham thei lo. Farah zawnzaihnak, lawngfangkheh in hnipuan hruh lai mi hman an hlitsak, sumpai piakhat hman nei loin saltaanak, unau pawlih huatnak, dungtunnak, leitlunah ttantu le dinpi tu pakhat hman nei loin dinhmun sia ah dinnak, dodalnak, thuphan thawn Pontifar nupi in a pasal thuneihnakin Egypt cozah kumpi hmangin Joseph cu thawng inn sungah a thlak, hi pawl hmuahhmuah in Pathian tumtah a kham thei cuang lo. Farah zawnzaihnak, lawngfangkheh in zianghman kutsungah neihmi nei lo, tlaksamnak, dinhmun sia in saal tannak, zohman ttanpitu nei lo khawpin leitlun milai pawlih dungtunnak, cozah kumpi pawlih diklo zetin hremnak thawngthlaknak, thei tu le hmuhtu pohpoh hmaiah ningzak mualphoza in diklo zetin relsiat simsiatmi dinhmunah dinnak, leitlunah lamtang pakhat hman neiloin leitlunmi pawlih dungtunnak, hivek dinhmun hmuahhmuah hi Joseph in a rak tawnmi asi. In zirhduh mi pakhat cu Pathian fate pawl leitlun nunah kan tawn dingmi harsatnak hmuahhmuah in Pathian lungthlitum a dal/kham thei lo timi asi. Culawng asihrihlo, satan in leitlun milai, kumpi cozah le society, hmanrua a phunphun hmangin Pathian fate pawl parah a tuah theimi khal Pathian in A fale pawl hrangah a tumtah mi famkim tertu hmanruatha ah a hmang thei asi (Rome 8:28) tiah Joseph nun in in zirh.
Tuisunah himi casiartu pawl ziangvek dinhmunah kan um cio ti ka thei lo. Satan in ziangvek hmanrua hmangin lungreithei ko a lo tuah ti ka thei lo. Na lungthlitum, Pathian duhzawng tuan suak thei lo dingin ziangvek harsatnak le dinhmun pakhatkhat in a lo hnaihnok ti ka thei lo. Ziangvek dinhmunah, ziangvek hmanrua thawn satan in a lo do, a lo hnaihnok khal asile Pathian Thlarau in in zirh duhmi cu hihi asi, Satan hmanrua ziangkim kha, Pathian in na hrangah a tumtahmi fimkimter dingin hmanrua ah a hmang rero mi asi. Na theihthiam lomi, neihlomi, tlaksamnak le duhthusam famkim lomi pawl ruangah zohman thinhar le beidawng in um ding kan silo. Kan theihlo mi, neihlomi, tlaksamnak dinhmunah kan din rero Pathian in in siang asi ahcun kan theihdah lomi neih dah lomi dinhmun le thlawsuahnak Pathian in inruatsakmi kan hmu sawn ding asi.
Midangin, bulpak, abur, le pawlkom in an duh an hril tikah na duhlo, pomlo zawngle a diklo, a thabik asilo tiin na ruat hmanah fimkhur dingmi cu mah le mah kaihrem awk, mai thinlung ruahnak ukneh, kross ah khenbet tahratin tisa duhnak in cangvai lo ding asi. Midang duhhrilmi parah sawisel, relsia, thangsiat, zuarthlai, thuthen, thinheng, ikfik, ngawltau, hngirteu in na um asile midang duhrilmi ruangah siloin nangmai lungput sawn kha na hrangah thlawsuah daltu asi. Mi zocio khal mai duhhrilmi parah arah kan at cio vekin midangin an hrilmi ih rah cu an at dingih nangin na duhhrilmi na lungput, tongkam le tuahnak vekin a rah na at ve ding. Midangin ziangvek an tuah khal asile Pathian in nangmai hrangah rem a ruatmi le a tumtahcia mi (Jer 11:29) cu a thleng dah cuanglo laiah midang duhhrilmi na buaipi ciamco asile Pathian in a lo duhsakmi le thlawsuah a lo kamcia mi co thei lo in nangmai duhhrilnak in thlawsuah a lo kham sawn thei mi asi.
Midang duhhril thutluknak ruangah Pathian lungtlitum le na hrangah a tumtahmi a thleng dahlo ih nangmai duhhrilnak vekin thlaci na tuhmi ih rah na at ding.
5) Satan siotarh Mi tampi in anmai dinhmun le an kiangkap dinhmun parah lungawi tawk loin midang mawhsiatnak thu an aukio rero theu. Naa an tuar mi le an duhthusam a famkimlo mi pawl midang duhrilsual ruangah tiah phunzainak in an khat theu. Cucu Satan bumnak tumpi asi. Midang ih khawruah, duhhril, tongkam, tuahnak ruangah na hrangah Pathian in a thinlung a thleng dah lo. Nangmah le Pahtian karlak thu parah hngat aw in Pathian in na leitlun nitin nun thuanthunung cu lai a rel asi. Phunzainak cu Satan in Israel mipi pawl nelrawn ramcar ah a bumnak hmanrua tha bik a rak si ih kum 40 tiang an rei phah. Nangteh na dinhmun, na insang, kawhhran, khawpi, miphun, le kiangkap thu pakhatkhat na duhdaan vekin a fehlo ruangah phunzai tahratin Pathian ih thlawsuahnak na hloh/sung rero ding maw? Satan in lobum nawn hlah seh! A ngaingai ahcun, na parah, na insang, na kawhhran, na khawpi, na miphun, na leilungpi thuanthu tuahtha dingin Pathian in nangmah hman a lo duh laiah midang mawhsiattu ah na cang asile hmantheihlo ah na cangzo tinak asi. Ziangah tile midang na mawhsiattikah “Unau mawhsiattu” cu Satan hmin asivekin satan mizia na ttawmpi tinak asi. Bible in inzirhmi cu Bawi Zesu cu leitlun ah “mawhsiat ding” in a ra lo, amah a zumtu hmuahhmuah kumkhua nunnak an neih theinak ding hrangah asi sawn (John 3:17). Cutin Khrih zumtu pawl cu Pathian mizia ttawmpitu kansi ( II Pet. 1:4) ih midang mawhsiattu siloin midang in an dinhmun harsatnak tlamtlinlonak, satan bumnak, sualsal ihsin an luat theinak ding hrangahah Khrih ih Thlarau cu nangle kei sung ihsin hna a ttuan rero sawn asi. Leitlun kan um sung cu duhhril sualnak, tongkam thalo, tuahnak sual, tlamtlinlonak, tvp, Pathian duhdaan le nangmai duhdaan thawn a kalh awmi na hmu ringringring ding. Phunzai le midang mawhsiat ding cu na duhhrilmi asile na damsung phunzainak le midang mawhsiat ding na nei ringring dingih na lei damsung satan lung na ti awi zet ding tinak asi. Midangin an duhhril thuthluknak ruangah lungawilo, ikfik, thinheng, hngirteu, aipuang theilo, lungawi theilo, le huatnak thinlung thawn na khat asile kawhhran sungah ziangvek tuanvo na nei maw, ziangvek doctrine na kutkaih maw, ziangvek peknak le biaknak lam raithawinak ziangvek na pek khal asile na sungah Pathian Thlarau a cangvai theilo ih na thlarau nun cu nelrawm ramcar ah tlangleng rero vekin na caurau ding. Cucu Satan tumtah le duhthusam, lungawi zawng asiih a ngaisio tarh thawn a lo awkngah tinak asi.
Midang duhhrilnak le tuahnak ruangah Pathian in tuanvo a lopek mi tuansuak theilo in na um asile Pathian hmaiah puhmawh ding zianghman na nei lo. Ziangah tile Khrih dungthluntu pawl cu anmai duhnak tanta ih thihnak le nunnak, lungawi riahsiat, mitthli le canghnap thawn khalin Pathian ih fialmi tuansuak ding asi. A thupek thlun ding asi. Pathian ih hmanrua tha si thei dingin le duhdawtnak le thlawsuah luansuaknak, Thlarau Thianghlim in zalenzetin a hman theimi si dingin Pathian thulun a tul. Pathian thulun tikah tisa in a duhlomi, na lungawinak siatsuahtu pawl ngaidamnak, duhdawtnak, thiltha tuahsak le thlacamsak tla a tel hrimhrim ding. A ngaingai ah, zumtu pawlin tisa thinlungin a duhlomi kan tuah thei lai hlanah thlaraulamah thansohnak lamzin danga um lo. Khrihfa ka si tisi, lei tisa duhzawng famkim ringring dingin a ruat tu kan um asile kan zummi zo asi ti kan thei lo asi. “Mi zokhal ka dung ithlun duhtu cun amai duhnak tanta in ithlun seh” ati. Pathian in tuahdingin in fialmi pawl cu tisa in a duhlomi pawl an si ringring. Ziangah tile tisa cun Thlarau duhnak dokalh in a hiar ringring asi (Kal. 5:17). A naa zet khal asile Pathian thu na lungruangah na sung ding tiah na ruahmi hnakin Pathian thu na lunglo tikah na sunmi a tamsawn ringring asi ti theih a tha. Unau duhdawt ding thupek na thlun ruangah na sungmi hnakin huatnak thawn na cangvai tikah na sungmi a tamsawn ringring. Unau na ngaidam ding thupek na thlun ruangah na sung mi hnakin na ngaidam loih na sunmi a tamsawn ringring. Tahtthimding rual hman asilo.
Cutin simtikah midang duhhrilnak cu a dik theh tinak asi maw? Silo. Joseph unau pawl cu an dik tinak asi maw? Silo. Midang mawhnak, sualnak, tlamtlinlonak cu hmanrua ah hmangin Satan in thang a lo kammi kha fiangzetin na hmuh thei nak dingah simmi asi. Ziangruangah Bawi Zesu in amah thattu, zuartu pa Judas Ischariot cu kumthum sung daiziar in thei lo vekin a dungthlun hleihnih lakah a umpi, rawl a eipi, thu a zirh ih sumpawi kilkhawitu ah a ret, ti na ruat dah maw? Bawi Zesu hman in Judas cu kumthum sung a umpi, tongsia kamkhat hman thlaklo, relse lo, thangsiatlo, dodallo, hnihsanlo, nautatlo, thleidanglo, mitsen hman in zoh dahlo, met dahlo, dungthlun dang hleikhat pawlih theihthiam dingin zianghman a tuahdah lo asile nang na kiangkap um zumtu unau pawl parah na khawruah, na tongkam, na tuahnak pawl kha ruat sal hnik? Zesu hmaiah na ding ngam ding maw? Bawi Zesu cu amah zuartu ding thawn kumthum sung a um tlang laiah a phunzai dah lo. “Zusu lungput vek nei uh” (Phi. 2:5) tiah thupek kan si vekin na kiangkap ummi pawl mawhnak, thiltisualmi, tlamtlin lonak mawhsiattu ah na tang hrih ding maw? Noah ih fapa pawl thuanthu kha zoh sal hnik! Zo ha satan thang sungah tla ih camsiat tuar? Noah a taklawngin a ih lai kha a an hmu cio nan a simsawngtu ih fapa cu camsiat a tuar sawn asilo maw! Satan in na nitin nunah thang a lo kam mi thei aw; na insang, hnatuannak, kawhhran, khawpi, venghnen, rualpi, sungkhat lakah an tlaksamnak, mawhnak, sualnak, santlai lonak pawl mawhsiattu dingah satan in a lo duh. Pathian in cu pawl duhdawtih an hrangah thlacamsak dingin le Pahtian duhdawtnak thuthangtha luansuaknak si dingah a lo duh. Zoih duhnak na hrilsawn ding?
Midang duhhrilnak ruangah lungawilo kan um pang maw? Leitlun sakhua nak ih bum awknak cu leitlun pawlkom sinak, upatnak, cawimawinak, mifel sinak, dinhmun le mibur cangvaihnak ih thinlung hlawptlonak pawl asi theu. Hivek dawi in leitlun sakhua nak ah a rak nung rero tu pawl nunah a hmunmi sunglam nun lungawi, hnangam daihnak le duhdawtnak luangliam a langlo theu. Fiangten sim ahcun Pathian in a neihsun, a fapa Zesu Khrih a pek zo mi parah lungawi tawk hrihlo tu pawl hrangah Pathian in a fapa hnakih tha sawn milai lungawiter dingin laksawng dang a nei lo asi. Curuangah mi zokhal, midang duhhrilnak ruangah ka duhmi vekin thil a canglo tiah ninghang, lungsia, riahsia, thinheng, hngirteu in a um hrih asi ahcun “A ram le a felnak hawl hmaisa uhla thildang hmuahhmuah pekbet na si ding” (Mat 6:33) ati mi vek asile kan hawlmi a diklo tinak asi. Pathian in a fapa in pekzo ih kan lungawi diriamnak a kimhrih lo asile kan hawlmi a diklo tinak asi. Pathian thawn kan duhdan a bang aw lo tinak asi. Kan duhmi cu Mathai 6:33 in “zianghmuahhmuah” atimi lakah a tel hrih lo tinaka si. Zo a mawh?
Midang duhhril thuthluknak parah thuthen ding kan si lo. Ziangah tile, midang duhhril thuthluknak parah thuthen tlak khawp in mifim zohman kan um lo. Midang in duhhril thuthluknak an tuahmi thu thawn pehpar in thu hla famkim a theikimtu kan umlo. Midang duhhril thuthluknak ruangah riahsia ninghang, thinheng, hngirteu, aipuang thei lo, lungawi thei loin a um kan um asile midang mawh asilo. Pathian in na lungawinak tuahtu dingah midang zohman tuanvo a pe lo. Na lungawiter dingin nangmah lawngin tuanvo na nei. Midang thuthluknak parah Pathian in nangmah a lo mawhsiat dahlo ding. Tuanvo na neihlo mi parah Pathian in thu alothen dah lo, a lo mawhsiat dah fawn lo. Cutin midang duhhrilnak parah na buai asile nangmah tuanvo le duhhrilmi parah na tuahsual zo tinak asi. Na fapa pawpi in a deh mi hman buaipi loin na hmuanthlang tei uico bo na buaipi rero thawn a bang aw aw. Cutin na buaisuai asile midang in duhhrilnak an tuahmi ruangah na sungmi hnakin midang duhhrilmi parah na buai ruangah na sunmi a tam sawn ringring ti theih a tha fawn. Cuihleiah, midang parah saya tuan tum fawn hlah. Ziangah tile na theihnak famkimlo thawn midang parah saya, zirhtu, thiltha sawn thei vekin khua na ruat, na tong, na cangvai tikah midang hnakin ka tha deuh ka thei deuh tiah na ruat awk ruangah asi ih nangmai sunglam ihsin porh awknak a cangvai tinak asi. Porh awknak cu Pathian in a do (James 4:6) ih Pathian in a lo hnuk thla ding (Thuf. 29:23).
Tawpnakah; nitin te na leitlun nunah duhhrilnak hlir in a khat. Minute tin, second tin, duhhrilnak hlir in a khatmi asi. Na thluak le thinlung sungah khua a luahtu khawruah, na mitmeng, lungput, tongkam, mithmai retdah, umdan, tlanlendan, midang pehtlaihmi, tumtah, le hmuisel, tuahnak, na kaa sungihsin a lutmi le a suakmi, na mit in na zohmi, na hnakua sungah na luttermi, na pawlkommi le pehtlaihmi, na neihmi nah man awknak le thlawsuah a lut a suak, tvp, duhhrilnak hlir in a khatmi na leitlun nunah ziang na hril? Nangmai duhhrilmi vek cekci in Pathian in na parah thu lo then ding. Duhhrilnak lakah Pathian hnen ihsin a rami fimnak, satan hnen ihsin a rami bumnak, mibum hmangbik kanmai tisa thinlung ihsin a suakmi ruahnak hmuhdan pomdaan, tvp, thleidan thiam uhsi. Pathian hnen ihsin fimnak hawlin tisa duhnak tanta uhsi. Pathian in kanmah bawmtu dingah inpek mi thurawnpetu pawl hnen ihsin thurawn la ringrig uhsi. Santhar leitlun milai nuntudan cu “daan umlo” (lawlessness) asi. Uktu, thurawnpetu, nei lo, mai tisa duhnak ih nun, bulpak zalennak (individual freedom) rual emem san asi ih zohman thurawnpek tullo in mahte nun thei uarsan asi. Cuvek sanah kan nun laiah zumtu unau pawl cun “Khrih upatnak ruangah khat le khat duhnak thlun aw tawn in” (Eph. 5:21), tuhlut aw tawn sawn ding kana si. Cutin thurawn pek awknak ihsin duhhril sual lo dingin le satan bumnak thang sungah tla sual pang lo dingin Pahtian in in bawm thei asi.
Zocio khal, mi in in bum ruangah maw, midang duhhrilmi a sual ruangah maw, kan duh k an hril sual asile kan duhhrilmi ih rah ihsin luat theinak puhmawh ding zianghman kan nei lo asi. Midang duhhrilnak ruangah Pathian in kan parah thu inthen lo ding vekin kanmai duhhrilnak in kan hrilmi parah midang in a liamkuan in kuansak lo dingih Pathian in midang hnenah laksawng a pe dah fawn lo ding. Curuangah Pathian hnen ihsin fimnak hawl hmaisa in satan thangkam mi, midang duhhrilnak buaipi lo dingin fimkhur cio uhsi. Pathian in mi pakhat cio hrangah tumtah mi a nei ih cui a tumtah mi siatsuah tu ding Pathian in zianghman a sersiam tel lo. Nangmah duhhrilnak vek cekci in a rah na at ding.
A thabik, Pathian lungawizawng hrilthiam ringring dingin Pathian Thlarau in fim a lo zirh rero mi kha hnawng loin tisa duhnak sawn kha hnawng sawn uhsi. |
WELCOME TO MY PAGE > 2011 CAHRAM >