A LO HUATU PARAH

“Huatu zaarep duhtu zaarep”  tiah pupa pawlin an rak sim theu. Milai kan si sungah kan kiangkap milai pawl duhdaan famkimter theitu kan um lo ding. Cui hleiah kanmai tuahsualnak ruangah siloin Pathian in fimnak, thiamnak, hlawhtlinnak le thlawsuah phunphun thawn mal a sawmmi pawl parah iksiktu tampi an suak sinsin ding. Thuthiang in san neta ahcun duhdawtnak a mal sinsin dingih ulenau khal an hua aw ding tiah in sim. Kan san hi thudik le thuphan cawhpolh celcel sanah kan nung. Mitthep kar loah thu le hla hi leitlun killi a lehka theh thei. Cuvek, san sansia ah kan nun vekin satan bumnak thang in in awk lo nak ding hrangah huatu le duhtu karlakah zumtu nundaan zir ding a um.

A lo huatu lakah nangmai mawhnak ruangah alo huatu, an duhvekin na um lo ruangah alo hua tu, an duhlo zawngin na um ruangah a lo huatu, mi in an bum ruangah a lo huatu, tvp, an um ding. Ziangruangah an lo hua khal asile midangin an tuahmi parah hngat aw in Pathian in na parah thu a then dahlo. Nangmah lo thlawhsuah dingin siseh lo hrem dingin siseh Pathian in midang zohman rawnmi a nei lo. Nangmai tuahmi parah thu a lo then ding asi. Curuangah ziangvek zovek huatu le duhtu na nei khal asile nangmai tuahmi par lawngah tuanvo na nei. Midang tuahmi parah thlaphang, phunzai rero, thinphang in a umtu pawl hi anmai tuanvo thitha in a tuansuak theilo tu pawl an si theu. Nangmai tuanvo par lawngah mawhphurhnak na nei ih nangmai tuahmi par lawngah Pathian in na parah thu a then ding asi. Nangmah thawn a pehpar mi thu ah, midang tuah mi cu na duhzawng huat zawng, na thin natnak, lungawizawng, an tuahsia, an tuah tha khal asile nahrang Pathian tumtah tlamtlinnak ding hmanrua ah Pathian in a hmang thei thotho asi.

Curuangah huatu parah tuah ding, tuah lo ding, thu tawite sim hnik uhsi.

1.      Hua ve hlah:

Na thinlung sungah huatmi na nei asile thimlakah na vak rero ih ziangtikah na ke na sit ding ti na thei aw lo. Na khawruahnak, na lungput, na tumtah, na nunrah tiang a siatsuah thei. Huatnak cun nget vekin na sungmuril a lo ei siat dingih na nun a ro ding. Cui hleiah huatnak  cu Pathian mizia thawn kalh aw mi asi vekin na sungah Pathian Thlarau le huatnak an um tlang thei lo. Biaknak lamah ziangvek na tuah, na zuam, na taima khal asile na sungah huatnak na nei, na nunpi asile pawnlang sakhua biaknak ih cangvaihnak in na sunglam a lo thleng dah cuang lo dingih nangmah le nangmah na bum aw rero men asi.

Na hua maw hua lo ti ziangtin na thei aw thei ding? A lo huatu, mi pakhatkhat ih siatnak simnuam na ti maw? Midangin a lo huatu siatnak thu an sim tikah ngainuam na ti maw? An thatnak an sim tikah na lung a tur maw? An hrang thiltha na tuah theimi parah tuah lo in na um maw? A lo huatu pawl hlawknak lamzin na khamsak maw? Hi thusuhnak pawl na sang tikah na sunglam ah ziang a um ti na fiang aw ko ding.

A lo huatu na hua ve tikah ziangthu ruangah an lo hua khal asile, na dik, na mawhlo, a lo hua tu an mawh khal asile na hua ve asi ahcun satan in a thangin a lo awk asi. Na lei damsung hua tu na nei ringring ding. Leitlun in a lo hua lo ih a lo duh asile Pathian fate na si lo ih leitlun fa na si tinak asi. Curuangah a lo huatu na hua ve tikah Khrih ah manbangza Pathian malsawm na co mi nunpi le nuam zetin ceen thei lo dingin satan in a lo tuah tinak asi. Hua ve hlah!

2.      A lo huatu thawn pehpar in thuthluknak hrial aw:

A cang thei asi ahcun a lo huatu pakhatkhat thawn pehpar in thuthluknak tuah ding hrial aw. Ziangah tile nangmah le nangmah thei aw lo cingin a lo huatu pawl parah na thinlung a fehpeng thei ih Pahtian duhlo zawng thuthluknak lakah na tel pang thei. A lo huatu pawl ih hlawknak, thatnak siseh siatnak siseh anmah thawn a pehpar mi thu then ding a um tikah siseh thuthluknak pakhatkhat a thleng tikah nangmai duhdaan hnakin midang duhdaan in thuthluknak fehter thei a tha. “Phuba la hlah, phuba cu keimai ta asi” ti ah ngan asi. A lo huatu parah siatnak pakhatkhat na tuah asile a lo hua tu thawn danglamnak na nei lo. Satan thang in a lo awk tinak asi.

3.      Simse hlah:

Milai mizia cun in huatu pawl siatnak thu an simmi ngainuam a ti zet theu. A lo huatu na simsiat tikah, a lo huatu na hua ve tikah, a lo huatu parah ikfik, thincin, thinheng, hngirteu in na um tikah satan thang sungah na taang tinak asi. Nangmah in na simse ve lo ding lawng asilo, a lo huatu pawl huatu pawlin a lo huatu an simsiat thangsiatnak va ngai hrimhrim hlah. An tongsiat thangsiat relsiat zuarthlai awknak lakah va tel hrimhrim hlah. A lo huatu pawlin mawhnak an neih vekin mi zokhalin mawhnak, famkim lonak kan nei theh asi. A lo huatu pawl simsiat duhnak na awm sung ihsin a cangvai tikah Pathian hnenah thlacam aw la na raal pawl duhdawt theitu thinlungthar Pathian hnenah dil aw. A lo duhtu lawng na duhdawt asi ahcun Bin La Den le Al-Qaida pawl thawn danglamnak na nei lo asi.  Na kaa kha satan in amai tawtawrawt ah hman a duh. Curuangah na thinheng tertu, na thinnatnak tuahtu, na lungawinak siatsuahtu ding milai hmanrua na kiangah a um ter ringring ding. Satan thangkam mi na hmu fiang ahcun milai na hua lo dingih na raalpa, satan sawn kha na hmu thiam ding. Cutikah Zesu in “ Ka pa ngaidam aw, an tuahmi an thei lo asi” ati mi na thei thiam ding. Mi huatu pawlin an tuah mi an thei lo ih thimlakah an vak rero. Satan hmanrua ah an cang asi ti an theih awk lomi kha zaangfahnak in thla na camsak sawn dingmi asi. Sim se hlah!

4.      Thiltha tuahsak aw:

“Na raal duhdaw aw” tiah fial kan si. A har ngaingaimi asi. Asinan mi hrekkhat cu an ke hramah na kuun ih an sal, anmah riantu na tuan lai hlan lo na parah lungkim theilo tu tla an um ding. An inn sung na um tikah a lo that duhtu, siatsuah duhtu, Pathian in tuanvo a lo pekmi daltu, siatsuah duhtu, tvp, satan hmanrua lakah tuhlut aw tahratin thiltha tuahnak thu simmi asilo. Cucu thiltha asilo. Cuvek milai huatu na neih tikah an parah thiltha na tuah mi hmu thiam loin a linglet in na siatnak lawng an hawl asile na ke thing aw la fehsan aw. Pathian Thlarau Thianghlim kaihhruainak hnuai ah a lo huatu pawl hrangah thiltha na tuah theinak caan poh ah, na tuah thei mimi, an hlawkpi dingmi pohpoh tuah sak aw. Cutin na tuah tikah milai lungawiter tum ruangah siloin Pathian riantu sinak in tuah aw. A lo huatu thawn pehpar in na tuahmi pohpoh ah thiltha lo hrial aw la, thiltha tuah aw. Cucu Pathian Thlarau Thianghlim in  a ukmi pawl nuntu asi.

5.      Thlacamsak aw:

Huatu pawl hrangah thlacam tikah fimkhur tulzetmi a um. Mah cu mitha, mi thianghlim hleice vekin ruat aw tahrat in in huatu pawl cu satan fate vekin hmuhsualnak, mah le mah porh awknak thawn Pathian hmaiah thlarau porh awknak in kan thinlung a luahkhat lo ding fimkhur a thupi zet. Huatnak nunpi tu pawl cu satan thang sungah an taan vekin huatmi pawl khal famkim lo nun thawn leitlun damsung a nungmi kan si. “Hih a thimi taksa ihsin zoso in runsuak thei ding” tiah Paul in thla a cam tikah a au suak.

Curuangah huatu pawl parah ngaidamnak thinlung kan nei lo asile huatu mawhsiatnak tongkam thawn thlacam cu a thianghlim lomi asi. Kanmai mawhnak in ngaidam bangin kan parah midang mawhnak kan ngaidam vekin Pathian hnenah ngaidamnak kan dilsak dingmi asi. Kanmah in kan ngaidam lomi thlacam sak rero cu san nei lo asi.

Ngaidam aw, thla cam sak aw.

6.      A lo huatu parah mi in an tuahsiatnak ah va tel ve hlah:

Mi in siatnak an tawn tikah diriamnak hi Pathian huatmi asi. Kan milai pi, zovek khalin siatnak an tawn tikah diriamnak thinlung kan nei asile kanmai sunglam cekfel a tul; Pathian Thlarau ih thianter kan tul tinak asi. Kan tisa mizia cun in huatu pawlih siatnak thu ngainuam a ti, relnuam a ti. Fim khur aw! A lo huatu pawl parah mi in an simsiat, relsiat, thangsiat, tuahsiat nak lakah va tel ve hlah. Ziangah tile thangsiat relsiat simsiat tuahsiat awknak cu satan rian reronak an si. Satan riannak hmunah va tel ve hlah. Na kaa ihsin thutha a suak na duh, na sung ihsin nunnak tinung a luangsuak ding na duh asile na hna ihsin thusia lutter hlah aw. Thilsia le hnawmbal pawl cu hnawmpung sungah an hlawn theu vekin na hnakua kha hnawmpung ah canter hlah. Hnawmpung sung ihsin thiltha zohman in an sar dahlo. Pathian Thlarau in na sunglam nun a thianter rero laiah, na sunglam a thianhlim sinsin theinak dingah, Pathian Fapa hmuihmel na bang sinsin theinak dingah, na hna, na kaa ihsin a lutmi le na mit ihsin na hmuh mi pawl na fimkhur a tul. Midang, a lo huatu pawl siatnak tuahtu pawl lakah va tel ve hlah, tha va pe ve hlah, an lak ihsin thiar fihlim aw aw.

7.      Huatnak tipungtu va si hlah:

Fale in nulepa thu an ngailonak siseh mino tete an thanglian tikah a sezawng lungput, upa dodal duhnak thinlung an neihnak pawl hi tampi cu nu le pa in an kawppi (nupi pasal), hmuansak hmuanthlang, an kawhhran hruaitu, khawpi, cozah le kumpi, parah an lungawi lonak, thinheng nak pawl an fale theih ah tongkam sia an hman mi ruangah asi thei. Tongkam sia, sawisel, relsiatnak, midang namthlaknak, ziangsiarlo, puarthau tongkam pawl hi a tongtu hrang ahcun nuam ti zetin an tong theu nan a ngaingai ah an theih lo mi cu satan tawtawrawt an cang asi. Huatnak tipungtu, theihthiam awk lonak tipungtu, hmuhsual awknak tipungtu, tvp hi satan palai pawl hnatuan asi. Va tel ve hrimrhim hlah. Na insang, nulepa, fale, unau, inhnenah, kawhhran pastor le hruaitu, hnatuanpi, tvp, mi zovek pawl par khalah a lo huatu, na lungawinak siatsuahtu pawl parah na huatmi le a lo huatu hua ve dingin midang zohnen hmanah lamtang va tuah hlah, huatnak va ti pung dah hlah aw! Huatnak tipungtu cu satan palai asi ih Khrih ih palai pawl cun duhdawtnak an tipung asi.

A tlunlamah nganmi pasarih pawl hi na tuah ruangah vanram na kai ding, na piangthar ding tinak asilo. Pathian Thlarau in a ukmi le kaihhruaimi vanram kai ding, piangthar, hrintharmi, Pathian fate pawl nuntu asi sawn. Satan bumnak thang sungah taang  tahratin mangbangza Pathian malsawm nuam zetin ceen thei dingin, Thlarau Thianghlim zalen zetin na sungah a cangvai theinak dingah le na nunkhua saunak, nun diriamnak le nunrahtha tampi na rah sinsin thei nak ding, Pathian Fapa hmuihmel na bang sinsin thei nak ding hrangah duhsaknak in. Pathian Thlarua in sim duhmi na sung ah fiangter hramseh!