A ZALENMI PEHTLAIHNAK Democracy: "Government for the people, by the people, and of the people," "Cozah kumpi cu mipi hrangah, mipipawl dinmi, mipipawl ta asi." Democracy ih thuhram sirhsan cu milai zovek khalin, midang siatsuah loin, anmai duhdan vekin, anmah in an hrangah thatnak asi tiah an ruahmi vekin pawlkom din, cangvai, hmin nei in cangvai theinak asi. Cozah kumpi siseh biaknak le mibur pawlkom siseh pursum leilawn ei hawlnakah siseh a pehparmi mipi pawlin thuneihnak tawp, sangbik an nei ih anmah ih duhdan, tuldan, le lungawinak tiah an ruahmi pohpoh tuah theinak asi. Cutin mi zokhalin anmai lungawinak an hawl laiah midang lungawinak siatsuah asilo nak dingah senpi lungkim tlangmi tlun dingmi daan cu tuah asi. A cuih senpi thlun dingmi kumpi daanpi tlun dingin lungkim ve lo, duhlo tu cun amai ram suahsan in amah ih duhdan thawn a milaw mi ramdangah um theinak a nei. Cuvek thotho in biaknak, nunphung, senpi vangtlang thansohnak, humhimnak, harhdamnak, le pursum leilawnnak khalah mibur, mipi pawlkom sungtel sinak cu mi zokhal mai duhhrilnak liolio in si dingmi asi. Umnak hmun, khua le ram, veng khal bulpak duhrilnak liolio in si dingmi asi. Curuangah democracy uk awknak ram, mibur umkhawmnak le society ahcun pawlkom din, sungtel sinak, mibur cangvaihnak pawl cu bulpak duhhrilnak liolio in si dingmi asi. Mi zokhalin amai lungawinak, hlawknak, diriamnak, thatnak tiah a ruahmi vekin pawlkom in siseh bulpak in siseh, senpi vangtlang lungkim tlangmi le nemhngetmi kumpi daan dinglai pahbal lo poh ahcun, pawlkom din theinak, cangvaih theinak ( rights) a nei asi. Ruahdan bang aw lo: Milai bur umkhawmnak poh ah ruahdan bang aw lo a um ringring ding. Ruahdan bang aw lo theih ding, simreltu an umlo asile society a zalenlo tinak asi. Bible in Pathian zum dingin zohman thahrum hmangin a nawr dahlo, a hrem dah fawnlo. Mi zokhalin anmai duhrilnak liolio in an duhhrilmi tuah, nupi, tlangau theinak an nei cio. Cutikah mi zocio khalin anmai duhrilnak vekin a sual an hril asile an hrang siatnak, a tha an hril asile thatnak co ding an si. Curuangah mi zovek khalin an duhhrilnak vekin anmai hrangah thiltha tiah an ruahmi ngah dingin anmai lungawinak tipung dingin mibur in siseh bulpak in siseh pawlkom din in siseh, an cangvai, tlang an au tikah, cozah kumpi, society, mibur, pawlkom le bulpak in siseh camsiat mawhsiatnak hnakin zalennak an neihmi, bulpak pianpi milai canpual zalennak cu upatnak pekin khat le khat cohlang aw tawn sawn ding kan si. Khat le khat mawsiat awknak, nam thlak awknak in society a tuah thalo ih mi a thenthekter sawn asi. A zalenmi society ahcun mi zokhalin an ruahsualmi tla zalen zetin nunpi, tuahsuak, cangvaihpi theinak an nei asi, midang an siatsuah loih senpi vangtlang lungkim tlangmi kumpi daanhram an pahbal lo poh ahcun. Pawlkom tampi: A zalenmi society poh ah pawlkom tampi a ding. Biaknak, thansohnak, phurnak bangaw, tumtah bangaw, tvp, pawlkom phunphun dingding asi. Pawlkom din tikah hrinhnam, biaknak, milian burkhawm, farah burkhawm, pacang pawl, nu pawl, nupi tawnglo pawlkom, pasal tawnglo pawlkom, tlangtluan pawlkom, phairawn pawlkom, tvp, in mi zocio khalin zalenzetin pawlkom din theinak an neiih an pawlkom hmin khal an duhduh sak theinak an nei as. Cutin pawlkom din, cangvaih, tlangau tikah cozah kumpi siseh anmah hnakih mibur tam deuh, cakdeuh pawl tihnak zianghman umlo in zalen zetin tuahthei dingin kumpi in sepi vangtlang, insang, mibur, bulpak zalennak kilhim sak ding tuanvo a nei asi. Ngalpak vekin mahte um a duhtu le ngalrual vekin a bur in um a duhtu pawl khal pianpi zalennak an neihmi a bangrep asi. A tawizawngin a zalenmi society sungah mibur pawlkom din, sungtel sinak, cangvaihnak pawl cu bulpak duhhrilnak liolio asi. Mi zohman, cozah siseh mibur le pawlkom siseh ramsungmi zovek khal amai bulpak duhdan kalh in pawlkom sungtel siter theinak siseh pawlkom dinlo ding, cangvai lo dingin siseh kham theinak a neilo asi. Cutin mi zokhalin anmai duhdan, hmuhdan, pomdan vekin an lungawinak tipungtu tiah an ruahmi an ngah thei ding tiah an ruahdan vek cekci in pawlkom din in mibur cangvaihnak in siseh bulpak in siseh zalen zetin cangvaih theinak an nei cio asi. Cutin mi zokhal an cangvaih tikah milai zokhalin an pianpi sinak diktak siseh zirnak in an ngahmi fimthiamnak siseh a sangbik, a thabik, a tambik an hmang suak phorhsuak tikah senpi vangtlang hrang thatnak hmasawnnak khal a suahpi sawn asi. Bulpak zalennak ukbet, nambetnakin thansohnak hmasawnnak a kham sawn asi. Santiluangin milai thuanthunung cu a fen rero vekin milai pawlkom, pehtlaih, cangaihnak cangvaihdan le milai in an lungawinak an hawldan khal a thleng aw vivomi asi fawn. A zalenmi society ahcun mi pakhatkhat in in duhlo tikah in duhlotu kan mawhsiat theilo ih in duhhramhram dingin nawrhrim theinak zohman in ka nei fawnlo. Curuangah Democracy uk awknak hi a famkimmi uk awknak asilonan Bible in a zirhmi, milai mibur pehtlaih awknak, uk awknak thawn a nai aw bikmi uk awknak leitlun milai in kan tlin thei tawk asi tiah kan ti thei. Mi zokhalin amai duhdan ruahdan vekin midang pawl cu thahrum hmangin sizeh tihtarh tahratin siseh umter hramhram a tum asile democracy uk awknak daan a pahbal tinak asi. A tawizawngin sim asile democracy uk awknak ahcun mi zokhalin a burin siseh bulpak in siseh a sangbik lungawinak tiah an ruahmi an ngah thei ding asi tiah an ruahdan vekin hawl theinak pianpi zalennak an nei cio asi. Cui milai pianpi zalennak upat hna thiam lo tu cu "khuahlan minung" tiah an ko theu. A zalenmi kumpi kan nei thei hrihlo hmanah, mi zokhal kan umnak khua, veng, mibur, pawlkom cio ah a zalenmi milai pehtlaihnak thuhram nunpi, kenkawh cio uhsi. A bang aw lomi ruahnak, hmuhdan, pomdan, duhdan pawl cu mah le hmuhdan, pomdan, duhdan cio in zalen zetin le hrekkhawng awknak um lo ten fehpi thei dingin pawlkom din, mibur cangvaihnak, bulpak cangvaihnak siseh, midang nam thla lo ten mah in tha timi midangin an pom ve thei nak ding hrangah zalen zetin ausuahpi theinak siseh khat le khat upat awknak thawn kan zaten nunpi, kenkawh, humhalh cio uhsi! Nunphung le mibur ruahdan pomdan in a ukbet lomi, a zalenmi lungthlifim te thawn na siatha theihnak in na hrangah a thabik, na lungawinak sangbik tiah na sunglam aw in a lo theihtermi vekin khua ruat, tong, nung, cangvai, pawlkom, pehtlai in tuah aw. Mi zokhal, amai thinlungin a mawhsiat lomi cu mi thlawsuak asi. Pathian Thlarau in a ukmi, milai nunphung le pomdan hmuhdan ruahdan pawlin a uk lomi, tisa mizia ihsin a zalenmi, a thiangmi lung thlifimte thawn khua ruat, tong, nung, le cangvaitu cu mi thlawsuak asi. May God bless you all! Be free, so as the Truth set you free! |
WELCOME TO MY PAGE > 2011 CAHRAM >